NI MENSENG en ehu Rahn Sarawio nan pahr 1520 samwa, tohn Meaux, kisin kahnimw ehu karanih Paris, pwuriamweikihla dahme re rong nan ihmw sarawi. Irail rong wadawad en pwuhken Rongamwahwo ni pein ar lokaia, ni lokaiahn France a kaidehn Latin!

Sounkawehwehn Paipel me wia met iei, Jacques Lefèvre d’Étaples (ni lokaiahn Latin, Jacobus Faber Stapulensis), oh mwuhr e ntinglahng kompoakepah keren men: “Ke sohte kak medewehla uwen Koht eh ketin sewese aramas tohto en wehwehkihla sapwellime Mahsen.”

Ni ahnsowo, Pwihnen Kadolik oh irail me semen en pelien lamalam kan nan Paris uhwong kawehwehn Paipel ong lokaia teikan me aramas sohte lipilipil ese. Eri dahme kamwakid Lefèvre en kawehwehdi Paipel ong ni lokaiahn France? Oh ia duwen eh koasoanehdi mwahu pwe aramas sohte lipilipil en wehwehki Mahsen en Koht?

Mwohn eh wiahla sounkawehwehn Paipel men, Lefèvre doadoahk laud pwehn kapwurehiong uhdahn wehwehn pwuhk kan me koasoia madamadau en aramas oh pelien lamalam. E tehkada me doaropwehn mahs kan kin kalapw wekila pwehki kawehwe sapwung kan erein sounpar epwiki kei. Nan eh roporop ong uhdahn wehwehn nting en mahs kan, e tepikihda onopki ni keneinei Paipel me Pwihnen Kadolik kan kin kalapw doadoahngki, Latin Vulgate.

Eh doadoahk laud en onopki Paipel kahrehiong ih en medewe me “onopki dahme mehlel duwen Koht kelehpw kin inoukihda . . . nsenamwahu me keieu laud.” Ihme kahrehda, Lefèvre sohla onopki madamadau en aramas ahpw uhd doadoahngki eh kehl koaros pwehn kawehwehdi Paipel.

Nan pahr 1509, Lefèvre wiahda ehu pwuhk me kasalehda eh onopki oh kapahrekihpene kawehwe limau en pwuhken Melkahka kan, * iangahki dahme e pein kapwungala nan kawehwehn Vulgate. Weksang irail semen kan en eh ahnsou, e nantihong en diarada “wehwe pwung” en iren Paipel kan. Wiepe kan me e doadoahngki pwehn kawehwehdi Paipel uhdahn kamwakid irail semen Paipel teikan.​—Menlau kilang koakon “ Ia Duwen Martin Luther Eh Mwekidki Lefèvre.”

Lefèvre tikida nan palien lamalam en Kadolik oh e kamehlele me kamwahulahn eh pelien lamalam kak wiawi ihte ma aramas sohte lipilipil ale padahk en Paipel ni pwung. Ahpw ia duwen aramas sohte lipilipil kan ar pahn kak paiekihda Paipel ni ahnsou me nting sarawi pwukat mihte ni lokaiahn Latin?

Ahn Lefèvre poakohng mehlel Mahsen en Koht kahrehiong ih en wiahda Paipel me pahn mengeiong aramas tohto en kak ale. Pwehn lel mehn akadei wet, nan June 1523, e wiahda kawehwehn Rongamwahu ko ni lokaiahn France nan pwuhk riau me sohte nohn laud. Pweinen Paipel tikitik wet elep en pweinen Paipel me laudo, oh met kahrehda e mengeiong  aramas semwehmwe kan en alehda neirail Paipel.

Aramas akan mwadang mwekidki met ni ngoang. Ohl oh lih koaros uhdahn ngoangki wadek mahsen en Sises kan ni pein ar lokaia, kahrehda tepin pwuhk kan me wiawihda meh 1,200 nekla mwurinte sounpwong kei.

Nan tepin koasoi kan ong pwuhken Rongamwahu ko, Lefèvre kawehwehda me e kawehwehdi ni lokaiahn France pwe “irail me sohte sukuhl laud kan” nan pelien lamalam kan en “kak uhdahn ngoangki me mehlel duwehte irail kan me naineki kawehwehn Paipel ni lokaiahn Latin.” Ahpw dahme kahrehda Lefèvre uhdahn men sewesehki aramas sohte lipilipil ren wehwehki dahme Paipel uhdahn kin padahngki?

Lefèvre uhdahn wehwehki dahme padahk en aramas akan oh madamadau en aramas akan kin wiahiong Pelien Lamalam en Kadolik. (Mark 7:7; Kolose 2:8) Oh e kamehlele me ahnsowo lelehr me Rongamwahu ko en “uhdahn lohkiseli sampah pwon, pwe aramas akan en dehr pitida pahn padahk kan de madamadau en aramas.”

Lefèvre pil nantihong en kasalehda sapwung en irail kan me kin uhwong kawehwehn Paipel ong ni lokaiahn France. E kasalehda ar keptakai ong wehipokon ni eh koasoia: “Ia duwen ar pahn  padahkihong [aramas akan] ren kapwaiada mehkoaros me Sises Krais kehkehlingki, ma re sohte men aramas me sohte sukuhl laud kan en kilang oh wadek Rongamwahu en Koht ni pein ar lokaia?”​—Rom 10:14.

E sohte kapwuriamwei me irail semen kan en Sukuhl laud en Paris, pwihn ieu me adaneki Sorbonne song en kauhdi Lefèvre. Nan August 1523, re koasoiapene ar sapwungki aramas en kawehwehdi Paipel ni lokaia teikan oh kawehwehda wehwehn iren Paipel kan, oh re nda me met keper ong arail pelien lamalam. Ma Nanmwarkien France, Francis I sohte kauhdi irail, re pahn kadeikada Lefèvre nin duwen emen me kin uhwong.

Lefèvre sohte mweidohng akamai kan me uhwong eh doadoahk en kedirepwa ih sang kawehwehdi Paipel. Nan pahr 1524, mwurin eh kanekehla eh kawehwehdi Palien Paipel ni Lokaiahn Krihk (me ekei kin kahdaneki Kadehde Kapw), e kihda pwuhken Melkahka kan pwe irail me pwoson kan en kak “kalaudehla arail poadidiong oh loalenohng” arail kapakap kan.

Irail semen kan nan Sorbonne mwadangete kasawih ni keneinei ahn Lefèvre kawehwe. Re mwadangete koasoanehdi me ahn Lefèvre kawehwe en Palien Paipel ni Lokaiahn Krihk en isihsla mwohn wehi pokon, oh irail kadeikada ekei pwuhk me e ntingihdi me dene e “duwehte nein Luther pwuhk kan.” Ni ahnsou me irail semen kan ekerdo ih en kawehwehda dahme e kamehlele, Lefèvre pilada en “nennenlahte” oh tangala Strasbourg. Wasao, me e pousehla eh kawehwe Paipel ni rir. Mendahki ekei kin medewe me dahme e wiao sohte kasalehda eimah, e kamehlele me ih met me keieu mwahuong irail kan me sohte kesempwalki padahk mehlel en Paipel me rasehng “takai kesempwal.”​—Madiu 7:6.

Kereniong sounpar ehu mwurin eh tang, Nanmwarki Francis I idihada Lefèvre en wia sounpadahk ong nah kisin pwutak me sounpar 4, Charles. Pwukoa wet kihong Lefèvre ahnsou laud en kanekehla eh kawehwe Paipel. Nan pahr 1530, e kanekehla eh kawehwehdi Paipel pwon oh wiawihda nan wasa ehu likin France, nan Antwerp, sang ni mweimwei en Kaun Lapalap Charles V. *

Erein ahn Lefèvre mour, e kasik me eh pelien lamalam pahn kesehla tiahk en aramas kan oh pwuralahng uhdahn padahk mehlel en Paipel kan. E uhdahn kamehlele me iei “ahn Kristian men pwuhng, ahpw ni mehlel, eh pwukoa, en pein wadek oh sukuhlki Paipel.” Ihme kahrehda e uhdahn doadoahk laud pwe koaros en kak wadek Paipel. Mendahki dahme e kasik ong eh pelien lamalam sohte pweida, sohte me kak peidengki dahme Lefèvre wiahda ong dih en mwuhr kan, e sewese aramas sohte lipilipil en esehla Mahsen en Koht.