1. Dahme kahrehda wahnpoaron Pohl kangoange Kristian en Ipru ko mahs ren kangoange emenemen “laud sang mahs”?

NI MWEHIN tepin Kristian ko, wahnpoaron Pohl kihda kaweid wet ong Kristian en Ipru kan: “Kitail en medemedewe emenemen pwe kitail en kangoange emenemen en kasalehda limpoak oh wiewia mwahu kan, dehr soukautihong atail kin tuhpene duwen ekei ar kin epwehnki wia, ahpw kitail en kangoange emenemen, oh wia mepwukat laud sang mahs ni amwail kilang rahno kerendohr.” (Ipru 10:24, 25, NW) Ele Kristian ko kin medemedewe dahme kahrehda Pohl ndaiong irail en kangoange emenemen laudsang mahs. Kereniong sounpar limau mwuri, ehu kahrepe sansalda. Ni ahnsowo, irail kilang me sapwellimen Siohwa rahn en kadeik ong Serusalem kerendohr. Re wehwehki me re anahne tangasang kahnimwo nin duwen me Sises mahsanihong irail en wia. (Wiewia 2:19, 20; Luk 21:20-22) Rahn en Siohwa pweida nan pahr 70, ni mehn Rom ko ar kamwomwala Serusalem.

2. Dahme kahrehda kitail anahne kalaudehla atail medemedewe en kangoange emenemen rahnwet?

² Rahnwet kitail pil mi nan soangen irairohte. Rahn lapalap en Siohwa  me kamasepwehk kerendohr. (Soel 2:11) Kokohp en soukohp Sepanaia pil dokedoke atail ahnsou: “Rahn lapalap en KAUN-O kerendohr—kerendohr mehlel oh pahn mwadang leledo!” (Sep. 1:14) Pwehki kahrepe wet, kitail anahne “medemedewe emenemen pwe kitail en kangoange emenemen en kasalehda limpoak oh wiewia mwahu kan.” (Ipru 10:24, NW) Kitail anahne kalaudehla atail nsenohki riatail Kristian kan pwe kitail en kak kangoange irail ni ahnsou me re anahne.

3. Dahme wahnpoaron Pohl ndahki duwen kangoange meteikan? (Menlau kilang tepin kilel.)

³ “Pwunod pahn kak adihasang omw peren, ahpw lokaia kadek pahn kaperenihiukada.” (Lep. Pad. 12:25) Mie ahnsou me kitail koaros kin anahne kangoang. Pohl kasalehda ni sansal me irail kan me kin pwukoahki kangoange meteikan pil anahne kangoang. E ntinglahng rie Kristian kan nan Rom: “Pwe I uhdahn men tuhwong kumwail pwe I en kak kihong kumwail kisakis sang rehn Koht pwe kumwail en tengeteng nan pwoson; de kitail en kangoange emenemen sang ni atail pwoson, amwail oh pil ahi.” (Rom 1:11, 12, NW) Mie ahnsou me Pohl pil anahne kangoang sang meteikan.​—Wadek Rom 15:30-32.

4, 5. Ihs me kitail kak kangoange rahnwet, oh dahme kahrehda?

⁴ Rahnwet kitail kak kangoange irail kan me kin doadoahngki pali laud en arail ahnsou ong papah Siohwa, duwehte pioneer lelepek kan. Me tohto rehrail kin tounmeteikihla soahng kan me re kin perenki wia pwe ren kak pioneer. Met pil mehlel me pid misineri kan, tohn Pedel kan, oh sounapwalih me kin seiloak kan oh arail pwoud kan, oh irail me kin papah ni ohpis en kawehwe kan. Irail pwukat koaros kin wiahda tounmetei kan pwehn kalaudehla arail ahnsou ong papah Siohwa. Eri kitail anahne kangoange irail. Pil mie me tohto me men doadoahngkihte pali laud en arail ahnsou ong papah Siohwa ahpw solahr kak wia met. Irail pil kin kalahnganki ni arail ale kangoang sang meteikan.

⁵ Ihs me pil anahne kangoang? Kitail kak kangoange riatail Kristian tohto me pilada ren kiripw pwehki re men peikiong Siohwa oh pwoudiki emen “ihte ma e kin idawehn Kauno.” (1 Kor. 7:39, NW) Lih pwopwoud kan pil kin ale kangoang ni arail pwoud kan ar kin ndaiong irail me re poakohng irail oh kalahnganki soahng koaros me re wia. (Lep. Pad. 31:28, 31) Kristian kan me kin dadaurete pahn kalokolok kan de soumwahu kan pil anahne kangoang sang meteikan. (2 Des. 1:3-5) Siohwa oh Sises kin ketin kakehlakahda irail koaros me kin loalopwoat.​—Wadek 2 Deselonika 2:16, 17.

6. Ia pwukoahn elder kan me Aiseia 32:1, 2 kasalehda?

⁶ Wadek Aiseia 32:1, 2. Kitail mour ni ahnsou apwal oh kitail kakete tepida nsensuwedla oh mworusala. Sises Krais ketin doadoahngki “kaunen wehi kan,” ienge elder me keidi kan oh pil elder kan sang sihpw teikan pwehn kangoange oh kaweid irail me kin nsensuwedla oh mworusala ni ahnsou apwal wet. Elder pwukat kaidehn kaunen atail pwoson, ahpw re wia iengatail tohndoadoahk kei ong atail peren. Irail men sewese kitail pwe kitail en peren oh kolokolete atail lelepek.​—2 Kor. 1:24.

7, 8. Ia duwen elder kan ar kak kangoange kitail sang ni dahme irail kin nda oh wia?

⁷ Elder kan kak kahlemengih wahnpoaron Pohl, me kin ahnsou koaros kangoange rie Kristian kan. E ntinglahng Kristian kan nan Deselonika me lelohng kalokolok oh nda: “Pwehki at poakohng kumwail, se onopadahr se en kihong kumwail, kaidehn Rongamwahuohte me sang rehn Koht, ahpw pil pein at mour. Pwe kumwail wialahr kompoakepaht mehlel!”​—1 Des. 2:8.

 ⁸ Elder kan kak uhdahn kangoange kitail sang ni dahme re nda. Ahpw ia duwe, met kin ahnsou koaros itar? Pohl ndaiong elder kan sang Episos: “Kitail en doadoahk kehlail oh sewese me luwet akan. Kitail en pil tamataman sapwellimen Kaun Sises mahsen me pein ih ketin mahsanih, ‘Kihwei kaperen sang ale.’” (Wiewia 20:35) Ong rie Kristian kan, Pohl uhdahn men ‘kihong irail mehkoaros oh tounmeteikihla pein ih ong irail.’ E kadehdehda met sang ni eh wiewia kan me e uhdahn men wia soahng sohte lipilipil ong irail. (2 Kor. 12:15, NW) Pil ni ahlohte, elder kan anahne kangoange oh kansenamwahwih meteikan kaidehn ihte sang ni dahme irail nda ahpw pil sang ni dahme irail kin wia. Met kin kasalehda me irail uhdahn nsenohkin kitail.​—1 Kor. 14:3.

9. Ia duwen elder kan ar kak kihda kaweid ni ahl ehu me kin kangoange meteikan?

⁹ Pwehn kakehlaka Kristian kan, ekei pak elder kan anahne kihda kaweid. Elder kan kak sukuhlkihsang Paipel ia duwen arail en wia met ni ahl ehu me kin kihda kangoang. Sises ketin wia mehn kahlemeng me keieu mwahu sang ni eh ketikihda kaweid kan ni eh mahseniong mwomwohdiso kan nan Asia Minor mwurin eh ketin pwoula oh iasada. E ketikihda kaweid kehlail ong mwomwohdisohn Episos, Perkamum, oh Daiadaira. Ahpw mwohn eh ketikihda kaweido, e ketin kapinga irail pwehki soahng mwahu koaros me re kin wia. (Kaud. 2:1-5, 12, 13, 18, 19) Sises mahsanihong mwomwohdisohn Laodisia: “I kin lipwoare oh panawih irail koaros me I kin poakohng. Eri, ngoangda oh koluhla.” (Kaud. 3:19, NW) Riatail elder kan kin song en kahlemengih Krais ni arail kin kihda kaweid.

10. Ia duwen atail kak kakehlakahda emenemen?

¹⁰ Kaidehn elder kante me anahne kangoange meteikan. Pohl kangoange Kristian koaros en doadoahngki “mahsen mwahu, soangen mahsen me kin sewese oh kakairada dahme anahnepe mie” ong meteikan. (Ep. 4:29) Emenemen kitail  anahne medemedewe dahme kitail kak wia pwehn sewese meteikan. Pohl ntinglahng Kristian en Ipru ko oh nda: “Kumwail kakehlahda pehmwail me daulahr oh pwukiemwail me luwetalahr akan! Kumwail ahpw weweidwei nan ahl inen, pwe pateneh me ohlahr en dehr suwedla, ahpw en mwamwahula.” (Ipru 12:12, 13) Kitail koaros kak kakehlakahda oh kangoange emenemen sang dahme kitail kin nda, mehnda ma kitail uhdahn pwulopwul.

11. Dahme sewese Marthe ni eh ahneki pwunod laud?

¹¹ Emen sister me adaneki Marthe * ahneki pwunod laud erein ahnsou ehu. E nda: “Ehu rahno, ni ei wie kapakapki mehn kangoang, I tuhwong sister mah men me kasalehiong ie limpoak laud, me ni ahnsowo I uhdahn anahne. E pil ehukihong ie dahme wiawihong ih me pil duwehte dahme pil kin lelohng ie, oh I pehm me I sohte kelehpw.” Ele sistero sohte ese ia uwen eh koasoi ko eh sewese Marthe!

12, 13. Ia duwen atail kak kapwaiada kaweid me dierek nan Pilipai 2:1-4 (NW)?

¹² Pohl ntinglahng Kristian kan nan Pilipai oh nda: “Eri ma kumwail kin miniminiong Krais oh kin kangoange oh kaloalamwahwih meteikan sang ni amwail kin limpoak ong irail oh pil nsenohkin irail, poakohng irail, oh poakeirailla, kumwail kaunsekala ei peren sang ni amwail kin ahneki madamadauteieu, limpoakteieu, oh miniminpene ni unsek oh ehukihpene lamalamteieu. Kumwail dehr wia mehkot sang ni akamai de aklapalap, ahpw ni aktikitik, kumwail wiahki meteikan lapalapasang kumwail ni amwail kin raparapahki kamwahupen meteikan, a kaidehn amwail kante.”​—Pil. 2:1-4, NW.

¹³ Kitail koaros anahne rapahki ahl akan pwehn sewese emenemen. Pwehn kangoange riatail Kristian kan, kitail kak “kaloalamwahwih,” “limpoak ong irail,” oh “poakeirailla.”

14. Ia ehu ahl me kitail pil kak kangoange meteikan?

¹⁴ Kitail kin perenkihda atail rong me irail kan me kitail sewese mahs kin kolokolete arail lelepek. Wahnpoaron Sohn ntingihedi: “Sohte me I perenki sang ei rong me nei kompoakepahi kan kin momourki mour mehlel.” (3 Sohn 4) Pioneer tohto kin perenkihda arail diarada me emen me re sewese pwehn sukuhlki padahk mehlel mahso kin pousehlahte papah Siohwa ni lelepek, ele aramaso wiahla pioneer men. Eri ma pioneer kan kin mworusala, kitail kak katamankihong irail soahng mwahu koaros me re wiahdahr pwehn sewese meteikan.

15. Soahng dahieu me kitail kak wia pwehn kangoange irail kan me kin papah ni lelepek?

¹⁵ Sounapwalih me kin seiloak tohto nda me irail oh arail pwoud kin ale kangoang sang kisinlikou en kalahngan mwurin arail mwemweitla nan mwomwohdiso ehu. Met pil mehlel ong elder kan, misineri kan, pioneer kan, oh tohn Pedel kan, me kin papah Siohwa ni lelepek. Sang ni atail kasalehiong irail kalahngan, kitail ele kakete kangoange irail laudsang dahme kitail ese.

16. Soahng dah kei me kitail kak wia pwehn kangoange emen?

¹⁶ Ia duwen ma e apwal ong uhk en ndaiong meteikan omw pepehm duwen irail? Ni mehlel, e sohte apwal en kangoange meteikan. Song en sirei ong emen. Ma irail sohte sirei ong uhk, ele irail ahneki kahpwal ehu oh anahne emen en koasoiong. Ele ke kak kansenamwahwihirailla ihte ni omw kin rong irail.​—Seims 1:19.

17. Dahme kangoange emen brother pwulopwul?

¹⁷ Brother pwulopwul men me adaneki Henri uhdahn nsensuwedla ni ekei rehn kiseh kan ar uhdihsang papah Siohwa. Emen rehrail iei eh  pahpao, me wia elder men mahs. Emen sounapwalih me kin seiloak tehkada me Henri nsensuwed oh wahla ih wasahn nim koahpi. Sounapwaliho kin rong kanahieng ni Henri kasalehda eh pepehm kan. Henri wehwehkihda me ihte ahl me e kak sewese kapwurehdo eh peneineio nan padahk mehlel iei ma pein ih kin kolokolete eh lelepek. E pil nsenamwahula ni eh wadek Melkahka 46, Sepanaia 3:17, oh Mark 10:29, 30.

18. (a) Dahme Nanmwarki Solomon ntingihedi duwen kangoang? (b) Dahme wahnpoaron Pohl padahkihong kitail?

¹⁸ Dahme kitail kak sukuhlkihsang dahme wiawihong Marthe oh Henri? Kitail koaros kak kansenamwahwih oh kangoange Kristian men me anahne. Nanmwarki Solomon ntingihedi: “Meid kaperen diar mahsen pwung ni ahnsou me konehng! Mesen kouruhr kin kaperenda nan kapehdomw, oh rohng mwahu kin kaperenihiukada mehlel.” (Lep. Pad. 15:23, 30) Ia duwe, ke kak medewehda emen me ke ese me mworusala de nsensuwed? Ke seu wia mehkot duwehte wadek ong ih ehu ire sang Kahn Iroir de neitail website? Pil ehu, Pohl padahkihong kitail me koulki koul en kaping ong Siohwa kak kansenamwahwihala kitail. E ntingihedi: “Kumwail padahkpene oh pil peneupene nanpwungamwail ni soangen loalokong koaros. Kumwail koulki koulen kaudok oh koul sarawi kan; kumwail kouliong Koht.”—Kol. 3:16; Wiewia 16:25.

19. Dahme kahrehda ni ahnsou keren e uhdahn kesempwal en kangoange emenemen laudsang mahs, oh dahme kitail anahne wia?

¹⁹ Ni atail kerenlahngehr rahn en Siohwa, e pahn uhdahn kesempwal ong kitail en kangoange emenemen laudsang mahs. (Ipru 10:25) Kitail pahn peren ma kitail kapwaiada kaweid me Pohl kihda: “Kumwail kakehlakahda emenemen kumwail, oh sawaspene, duwen me kumwail wiewia ahnsou wet.”—1 Des. 5:11.