1-3. (a) Kahpwal dahieu me me pwulopwul koaros kin lelohng, oh ia duwen omw kak kawehwehda met? (Menlau kilang tepin kilel.) (b) Dahme pahn sewese Kristian pwulopwul kan nan irair wet?

MEDEWEHLA me ke koasoanehdi en kohla ni wiewia kesempwal ehu nan kahnimw ehu me doh. Pwehn lella wasao, ke anahne dake bus. Ni wasahn peidi en bus, tepte ke kin pwonopwonkihda eh tohto aramas wasao oh pil bus tohto. Ahpw ke peren pwe ke esehier ia wasa me ke pahn kohla ie oh bus dahieu me ke pahn dake. Ke sohte pahn dake ehu bus tohrohr, pwehki ke ese me e pahn waiukala ehu wasa tohrohr.

² Mour duwehte omw wia seiloak ehu, oh kumwail me pwulopwul kan duwehte aramas akan me mi ni wasahn peidi en bus. Ekei pak mie pilipil tohto nan mour me kahrehiong uhk ken pwonopwonkihda. Ahpw ma ke uhdahn ese ia wasa me ke pahn kohla ie, e pahn mengei ong uhk en wiahda pilipil mwahu kan. Mehnia ahl me ke pahn pilada?

³ Iren onop wet sapengala peidek wet oh pahn kangoange iuk en medemedewehte en kaperenda Siohwa. Met wehwehki en idawehn sapwellimen Siohwa kaweid ong pilipil kan koaros me ke anahne wiahda nan omw mour, duwehte soangen sukuhl de doadoahk en mwohni dah  me ken ale de ma ke pahn pwopwoudida oh naineki seri de soh. Oh met wehwehki en nanti laud pwehn lelohng omw mehn akadei kan, me iei, mehn akadei kan me pahn kakerenihukala rehn Siohwa. Ma ke kin medemedewehte papah Siohwa, ke kak uhdahn kamehlele me e pahn ketin kapaiukada oh seweseiuk en pweida.​—Wadek Lepin Padahk 16:3.

4. Dahme kitail pahn tehkpene nan iren onop wet?

⁴ E kin mwahu en wiahda mehn akadei kan me pid papah Koht. Dahme kahrehda? Kitail pahn tehkpene kahrepe siluh. Kahrepe keieu oh keriau pahn seweseiuk en kilang me en nanti kapwaiada omw mehn akadei pahn sewese omw kompoakepahnki Siohwa en mwahusang mahs. Kahrepe kesiluh pahn kasalehda dahme kahrehda e mwahu en wiahda mehn akadei kan me pid papah Koht ni omw pwulopwulte.

5. Ia kahrepe keieu kesempwal en wiahda mehn akadei me pid papah Koht?

⁵ Kahrepe me keieu kesempwal en wiahda mehn akadei me pid papah Koht iei en kalahngankihong Siohwa sapwellime limpoak oh dahme e ketin wiadahr ong kitail. Emen sounnting en Melkahka nda: “Maing KAUN, ia uwen mwahu en ei kin patohwan wia ei kapingkalahngan ong komwi . . . wiepen nin limomwi manaman akan kin kansenamwahwihiehla; pwehki sapwellimomwi wiewia kan, I patohwan koulki ei peren.” (Mel. 92:1, 4) Medewehla soahng koaros me Siohwa ketikihong uhk. E ketikihong omw mour, omw pwoson, Paipel, mwomwohdiso, oh koapworopwor kaselel en mour kohkohlahte nan Paradais. Ni omw wiahda mehn akadei kan me pid papah Koht, ke kin kasalehiong Siohwa me ke kin kalahnganki soahng pwukat koaros oh met kin kakerenihiukala reh.

6. (a) Ia duwen mehn akadei kan me pid papah Koht ar kin kamwakid omw nanpwungmwahu rehn Siohwa? (b) Mehn akadei dah kei me ke kak wiahda ni omw pwulopwulte?

⁶ Kahrepe keriau en wiahda mehn akadei kan me pid papah Koht iei me ni ahnsou me ke kin nantihong en kapwaiada, ke kin wia doadoahk mwahu ong Siohwa oh met pahn kakerenihiukala reh. Wahnpoaron Pohl inoukihda: “Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasalehdahr.” (Ipru 6:10) Ke kak wiahda mehn akadei kan ni omw tikitikte. Christine sounpar eisek ni eh pilada en kin kaukaule wadek duwen mouren Sounkadehde lelepek kan. Toby sounpar 12 ni eh wiahda mehn akadei en wadekala Paipel pwon mwohn eh papidaisla. Maxim sounpar 11 oh rie serepeino Noemi sounpar ehu tikitiksang ni ahnsou me ira papidaisla. Ira koaros nantihong kapwaiada ara mehn akadei en papah nan Pedel. Pwehn sewese ira en medemedewehte met, ira kihda doaropwehn audehda iang Pedel ni dihd en imwarao. A kowe? Ke kak medewehda ekei mehn akadei me ke kak wiahda oh nantihong kapwaiada?​—Wadek Pilipai 1:10, 11.

7, 8. (a) Ia duwen wiahda mehn akadei kan eh kak kamengeila wiahda pilipil kan? (b) Dahme kahrehda me pwulopwul men pilada en sohte kohla sukuhl laud?

⁷ Ia kahrepe kesiluh e mwahu en wiahda mehn akadei kan ni omw pwulopwulte? Nin duwen me pwulopwul men, mie pilipil tohto me ke anahne wiahda. Nanpwungen soahng teikan, ke anahne pilada mehnia sukuhl de doadoahk en mwohni me ke pahn ale. Pilipil pwukat kin duwehte pilada mehnia ahl me ke pahn wetlahng ie ni omw kin seiloak. Ma ke ese ia wasa me ke pahn kohla ie, e kin mengei en pilada mehnia ahl me pwung. Met pil duwehte nan omw mour. Ma ke ese ia omw mehn akadei kan, e kin mengei en wiahda pilipil loalokong kan. Lepin Padahk 21:5 mahsanih: “Wiahda omw koasoandi ni keneinei, ke ahpw pahn ahneki dipwisou tohto.” Ma ke wiahda mehn akadei mwahu kan mwadang, e pahn mwadang en pweida. Met me wiawihong Damaris ni eh anahne wiahda pilipil kesempwal ehu ni ahnsou me e pwulopwulo.

⁸ Damaris neksang sukuhl oh uhdahn pweida mwahu loale. E kak kohla iang sukuhl laud en palien kosonned ahpw sohte anahne pwain sukuhlo,  ahpw e pilada en doadoahkte nan pangk ehu. Dahme kahrehda? E nda, “I wiahda ei pilipil mwoweo en iang pioneer. Met wehwehki me I anahne doadoahk lepin ahnsou. Ma I sukuhl laud oh alehdi degree nan palien kosonned, I kakete wiahda mwohni laud, ahpw e pahn apwal I en diarada doadoahk ong lepin ahnsou.” Damaris wiahier pioneer men erein sounpar 20. Ia duwe, e pehm me e wiahda mehn akadei pwung ehu oh wiahda pilipil mwahu ni eh pwulopwulo? E nda, “Ni ei wasahn doadoahk ni pangko, I kin kalapw tuhwong sounrepen pwung kan. Re kin wia soangen doadoahk me I kakete wia ma I sukuhl nan palien kosonned. Me tohto sohte uhdahn perenki arail doadoahk kan. Ei pilipil en pioneer sewese ie en soikala kapwunod kan nan palien doadoahk en mwohni oh ritingadahng ie elen papah Siohwa ni peren erein sounpar tohto.”

9. Dahme kahrehda neitail me pwulopwul kan warohng ale kaping?

⁹ Me pwulopwul kidkid kei nan mwomwohdiso kan nan sampah pwon warohng ale kaping. Re kin inoukihong Siohwa pein irail oh nan arail mour re kin kilangwohngete mehn akadei kan me pid papah Koht. Me pwulopwul pwukat kin uhdahn ahneki mour nsenamwahu oh ni ahnsowohte sukuhlki en idawehn sapwellimen Siohwa kaweid kan ni uwen me re kak. Mepwukat kin pidada sukuhl, doadoahk en mwohni, oh mour en peneinei. Solomon ntingihedi: “Likih KAUN-O ni mohngiongomw unsek. . . . Tamanda KAUN-O ni omw wiewia kan koaros, oh e pahn ketin kasalehiong uhk ahl me pwung.” (Lep. Pad. 3:5, 6) Me pwulopwul kan nan mwomwohdiso uhdahn kesempwal mwohn silangin Siohwa, me uhdahn ketin poakohng irail oh ketikihong irail pereparail, kaweid oh kapai kan.

10. (a) Dahme kahrehda kalohk wia mehkot me uhdahn kesempwal me kitail en wia? (b) Ia duwen atail kak wia pwe kitail en pweida mwahu nan kalohk?

¹⁰ Me pwulopwul men me kin medemedewehte en kaperenda Siohwa kin uhdahn kesempwalki doadoahk en kalohk. Sises Krais ketin kasalehda me “rongamwahwo uhdahn pahn lohkseli mahs.” (Mark 13:10) Pwehki doadoahk en kalohk uhdahn karuwaru, e uhdahn kesempwal kitail en wia. Ke kak wiahda omw mehn akadei en kalaudehla omw iang doadoahk en kalohk? Ke kak pioneer? Ahpw ia duwen ma ke sohte nohn perenki kalohk? Oh ia duwen omw kak wia pwe ken pweida mwahu nan omw kalohk? Mie kahk riau me pahn sawas: Kaunopada mwahu, oh dehr uhdihsang ehukihong meteikan dahme ke ese. Ele ke pahn pwuriamweikihla peren laud me ke pahn diar ni omw kin kalohk.

11, 12. (a) Dahme me pwulopwul kan kak wia pwehn kaunopada en ehukihong meteikan duwen padahk mehlel? (b) Ia duwen emen me pwulopwul eh doadoahngki ahnsou mwahu ehu en kalohk ni eh wasahn sukuhl?

¹¹ Ke kak tepida ni omw kaunopada pasapengpen peidek ehu me iengomw tohnsukuhl kan kin kalapw idek, duwehte “Dahme kahrehda ke kamehlele me mie Koht?” Neitail website jw.org audaudki ire kan me wiawihda pwehn sewese me pwulopwul kan en esehla ia duwen arail kak sapengala peidek wet. Kilang pahn BIBLE TEACHINGS > TEENAGERS. Wasao ke pahn diarada worksheet ehu me oaralape “Dahme Kahrehda I Kamehlele me Mie Koht?” (“Why Do I Believe in God?”) Worksheet wet pahn kaweid uhk en kaunopada omw pasapeng. E kin kihda iren Paipel siluh me ke kak doadoahngki ni omw kawehwehda dahme ke kamehlele. Iren Paipel pwukat iei Ipru 3:4, Rom 1:20, oh Melkahka 139:14. Ni omw doadoahngki worksheet pwukat, ke kak kaunopada pasapeng en ehuehu peidek.​—Wadek 1 Piter 3:15.

¹² Ni ahnsou me mwahu, kangoange iengomw tohnsukuhl kan en pein kilang jw.org. Ih met me Luca wia. Eh sounpadahko oh ienge tohnsukuhl ko koasoakoasoiapene duwen soangsoangen pelien lamalam kan, oh Luca tehkada me pwuhko me re doadoahngki koasoia soahng kei me sohte mehlel duwen Sounkadehdehn Siohwa kan. Mendahki e ekis pweiek, e pekihda ma e kak  kapwungala ire likamw pwukat, oh sounpadahko mweidohng. Luca sohte ihte kawehwehda dahme e kin kamehlele ahpw e pil kasalehiong irail pwon neitail website. Ong arail homework, sounpadahko ndaiong tohnsukuhl ko en kilang kisin kasdo Beat a Bully Without Using Your Fists. Luca uhdahn perenki eh kak ehukihong irail padahk mehlel.

13. Dahme kahrehda kitail en dehr uhdi ni kahpwal kan ar pwarada?

¹³ Dehr mworusala, mehnda ma e uhdahn apwal. (2 Tim. 4:2) Ni ahnsou me miehla kahpwal kan, kolokolete omw mehn akadei kan. Katharina sounpar 17 ni ahnsou me e wiahda mehn akadei en kalohk ong emenemen ienge tohndoadoahk. Emen rehrail kin ekei pak kasarowe ih, ahpw e sohte masakada. Emen ienge tohndoadoahk me adaneki Hans mwekidki en Katharina eh wiewia mwahu ni ahnsou me e kin lelohng kahpwal kan. Pwehki met, Hans wadek neitail sawaspen Paipel kan, onopki Paipel, oh papidaisla. Katharina keseula ehu wasa tohrohr oh sehse me met wiawi. Medewehla uwen eh peren me mwurin sounpar 13 ni ih oh eh peneineio ar mwomwohd nan Wasahn Kaudok oh rong me brother me mwemweitdo pwehn wia padahk iei Hans! Ia uwen eh mwahu me Katharina sohte uhdihsang eh mehn akadei en kalohk ong ienge tohndoadoahk ko!

14, 15. (a) Ni me pwulopwul kan ar mi pahn kasongosong sang meteikan, dahme irail anahne tamataman? (b) Ia duwen me pwulopwul kan ar kak powehdi kasongosong kan?

¹⁴ Iren onop wet kangoange iuk en wiahda omw pilipil en medemedewehte omw ineng en papah Siohwa. Met wehwehki en keieu kesempwalki omw mehn akadei kan me pid papah Koht. Me pwulopwul teikan me uwe iuk ele kin keieu kesempwalki arail ahnsoun peren, oh ele re pahn luke iuk en iang irail. Kedekedeo, ke pahn anahne kasalehda me ke koasoanehdi teng en kolokolte pilipil kan me ke wiadahr. Dehr mweidohng meteikan en kerempwa iuk. Ni omw medewehla karasepen bus-o, ke uhdahn sohte pahn iangala bus ehu kohla wasa sohte lipilipil ihte pwehki e mwomwen me irail kan me iang bus-o pereperen.

¹⁵ Mie soangsoangen ahl akan en powehdi kasongosong  kan sang meteikan. Karasepe, ken soikala irair kan me kin kak kasonge iuk. (Lep. Pad. 22:3) Oh katamankihong uhk duwen imwila suwed kan me kin kohsang iang irail me kin wia me suwed. (Kal. 6:7) Dahme pil sawas laud iei en pohnese omw anahn en ale kaweid. Aktikitik pahn seweseiuk en men rong kaweid sang omw pahpa nohno oh irail kan nan mwomwohdiso me koahiek nan padahk mehlel.​—Wadek 1 Piter 5:5, 6.

16. Me pid dahme wiawihong Christoph, ia duwen met eh kasalehda me e kesempwal en kasalehda aktikitik?

¹⁶ Aktikitik kamwakid Christoph en ale kaweid mwahu. Mwurinte eh papidaisla, e tepida kalapw kohla ni wasahn eksersais ehu. Me pwulopwul teikan ni wasao kangoange ih en iang arail pwihn en mwadong. E koasoiaiong elder men duwen met, oh eldero ndaiong ih en medewe duwen soahng keper kan mwohn eh wiahda eh pilipil, duwehte keperpen madamadau en siai ong meteikan. Christoph pilada en iang pwihno. Ahpw kedekedeo, e diarada me mwadongo uhdahn keper. E pil pwurehng tuhwong elder kan, irail koaros kihong ih kaweid sang nan Paipel. E nda: “Siohwa ketikihong ie sounkaweid mwahu kan, oh I rong Ih, mendahki e ekis werei ong ie en kapwaiada.” Ia duwe, ke kin aktikitik pwehn ale kaweid mwahu?

17, 18. (a) Dahme Siohwa ketin kupwurki ong me pwulopwul kan rahnwet? (b) Ia duwen omw kak soikala koluhkihla omw pilipil kan ni omw laudla? Menlau kihda ehu karasaras.

¹⁷ Paipel mahsanih: “Mwahnakapw [de peinakapw] akan, kumwail pereperenki amwail pwulopwul. Kumwail pereperen nindokon amwail pwulopwul.” (Ekl. 11:9) Siohwa kupwurki ken peren ni omw pwulopwul. Nan iren onop wet, ke sukuhlki me ehu ahl en peren iei en medemedewehte omw mehn akadei me pid papah Koht oh idawehn sapwellimen Siohwa kaweid nan omw koasoandi oh pilipil koaros. Ni omw mwadang en wia met ni omw pwulopwulte, ke pahn mwadang en pehm ia duwen Siohwa eh kin ketin kaweid, pere, oh kapaiukada. Medewehla kaweid mwahu koaros me e ketikihong uhk nan sapwellime Mahsen, oh idawehn kaweido me mahsanih: “Tamanda Sounwiepomw nindokon omw wie pwulopwulte.”​—Ekl. 12:1.

¹⁸ Me pwulopwul kan kin mwadang en laudla. E kansensuwed me mwuhr tohto irail kin koluhkihla arail sohte wiahda mehn akadei mwahu de sohte douluhl wiahda mehn akadei ni arail pwulopwulo. Ahpw ma ke kin medemedewehte omw mehn akadei kan me pid papah Koht, ke pahn perenki omw pilipil kan ni omw laudla. Ih met ahn Mirjana pepehm. Ni eh pwulopwul, e uhdahn mai nan mwadong kan. E pil ale luhk en iang mwadong laud (Winter Olympic Games). Ahpw, e pilada en doadoahngki pali laud en eh ahnsou ong papah Siohwa. Daulih sounpar 30 mwuri, e kin wiahte met oh eh pwoudo pil kin iang ih. E nda me aramas akan me kin men ndandla, ale wahuparail, ahneki manaman, oh kepwehpwehla sohte kin ahneki peren mehlel. E pil nda me papah Koht oh sewese aramas akan en esehla ih iei mehn akadei kan me keieu mwahu oh poatopoat.

19. Dahme kahrehda e mwahu en medemedewehte mehn akadei kan me pid papah Koht ni omw pwulopwulte?

¹⁹ Kumwail me pwulopwul kan uhdahn warohng ale kaping pwehki mendahki kahpwal kan me kumwail kin lelohng, kumwail kin medemedewehte en papah Siohwa nan amwail mour. Kumwail kin wiahda mehn akadei kan me pid papah Koht, oh kin wiahki doadoahk en kalohk mehkot me pil keieu kesempwal nan amwail mour. Pil ehu, kumwail koasoanehdi en dehr mweidohng sampah wet en kahrehiong kumwail en manokehla amwail mehn akadei. Kumwail kak kamehlele me amwail doadoahk laud kaidehn mehkot mwahl. Mie riamwail Kristian kan me kin poakohng oh utung kumwail. Eri ‘peki rehn KAUN-O en ketin kupwuramwahwihala amwail koasoandi kan, kumwail ahpw pahn pweida ni mehkoaros me kumwail koasoanehdi.’