1, 2. (a) Dahme kahrehda en wia lidu men oh en ahneki saledek kin wia ire kesempwal kei ni mwehin wahnpoaron Pohl? (b) Ihs me Pohl nda me wia Utupen saledek mehlel?

TEPIN Kristian ko mi nan wehin Rom, wasa me aramas ako kin uhdahn pohnmwahsohki arail kosonned kan, arail koasoandi en pwung pahrek, oh arail saledek. Ahpw kaunda kehlail wet kin koapworopworki lidu kan en wia pali laud en doadoahk laud kan. Mie ahnsou ehu me lidu kan tohtohki persent 30 en tohn wasao. Mehlel, en wia lidu men oh en ahneki saledek kin wia ire kesempwal kei ong pali laud en aramas ako, iangahki Kristian kan.

² Wahnpoaron Pohl kin kalapw koasoia duwen saledek. Ahpw e sohte songosong en kamwahwihala kahpwal kan en sampah. Aramas tohto ni ahnsowo men wia met. Pohl oh ienge Kristian ko kin doadoahk laud pwehn padahkihong aramas akan duwen rongamwahu en Wehin Koht oh pil sewese irail en wehwehki ia uwen kesempwal en sapwellimen Krais Sises pweinen pweipwei sapahlo. Pohl padahkihong ienge Kristian ko ia wasa ren diar Utupen saledek mehlel. E ntingihedi: “Siohwa iei Ngehn Emen, oh wasa me sapwellimen Siohwa manaman kin mi ie, saledek pil kin mi ie.”​—2 Kor. 3:17, NW.

3, 4. (a) Dahme Pohl koasoia nan iretikitik kan mwohn 2 Korint 3:17 (NW)? (b) Dahme kitail anahne wia pwehn ahneki saledek me Siohwa ketikihda?

 ³ Nan nah keriaun kisinlikou ong mwomwohdisohn Korint, Pohl koasoia dahme wiawihong Moses ni eh pwuredihsang Nahna Sainai mwurin eh patopato rehn sapwellimen Siohwa tohnleng men. Marain wie lingaling sang pohn meseo! Ni mehn Israel ko ar kilang Moses, re masakada, kahrehda Moses perehkihla meseo koaduhpwel ehu. (Eks. 34:29, 30, 33; 2 Kor. 3:7, 13) Pohl kawehwehda: “Ahpw ni emen eh kin sohpeiong Siohwa, koaduhpwelo kin kohsang.” (2 Kor. 3:16, NW) Ia wehwehn met?

⁴ Kitail sukuhlkihsang iren onop en mwoweo me Siohwa, Sounkapikpen mehkoaros, iei Ih kelehpw me sapwellimanki saledek me unsek oh sohte irepe. Eri kitail kak wehwehki me saledek kin mi wasa me Siohwa kin ketiket ie oh pil wasa me “sapwellimen Siohwa manaman kin mi ie.” Ahpw Pohl nda me ma kitail men ahneki saledek wet, kitail anahne sohpeiong Siohwa. Met wehwehki me kitail anahne ahneki nanpwungmwahu keren reh. Mehn Israel ko nan sapwtehn kin kilangwohngete soahng kan nin duwen me aramas kin wia, ahpw kaidehn nin duwen me Siohwa kin ketin wia. E mwomwen me koaduhpwel ehu perehla arail madamadau oh mohngiong. Re men doadoahngki arail saledek pwehn kaitarala pein arail ineng kan.​—Ipru 3:8-10.

5. (a) Soangen saledek dah me sapwellimen Siohwa manaman kin kihda? (b) Ia duwen atail ese me emen kak ahnekihte saledek me Siohwa ketikihda mendahki eh wia lidu men de selidi nan imweteng? (c) Peidek dah kan me kitail anahne sapengala?

⁵ Saledek me sapwellimen Siohwa manaman kihda kin laudsang saledek me lidu men alehdi. Manaman wet kin wahdo saledek me inenen laudsang dahme aramas kak kihda. E kak kasaledekihala kitail sang liduwih dihp oh mehla oh pil sang liduwih kaudok likamw oh eh tiahk kan. (Rom 6:23; 8:2) Ia uwen kaselel en soangen saledek wet! Pil emen me wia lidu de selidi nan imweteng kak ahneki soangen saledek wet. (Sen. 39:20-23) Riatail Kristian Nancy Yuen oh Brother Harold King selidi nan imweteng erein sounpar tohto pwehki ara pwoson, ahpw ira ahnekihte soangen saledek wet. Ke kak kilang nan JW Broadcasting duwen ara koasoiahda dahme wiawihong ira. (Menlau kilang pahn INTERVIEWS AND EXPERIENCES > ENDURING TRIALS.) Eri kitail pahn sapengala peidek riau. Ia duwen atail kak kadehdehda me atail saledek kin uhdahn kesempwal ong kitail? Oh ia duwen atail kak doadoahngki atail saledek ni elen erpit?

6. Ia duwen mehn Israel ko ar kasalehda me re sohte kalahnganki saledek me Siohwa ketikihong irail?

⁶ Ni emen eh kisikisekin kitail kisakis pweilaud ehu, kitail kin kalahngankihong ih. Ahpw mehn Israel ko sohte kalahnganki saledek me Siohwa ketikihong irail. Sounpwong keite mwurin Siohwa ketin kasaledekihirailla sang Isip, re tepida inangih soangen mwenge kan me re kin tungoale nan Isip. Re kaulimki duwen manna, soangen mwenge me Siohwa ketikihda ong irail. Re pil men pwurala Isip! Ong irail, ‘kisin mwahmw ko, kiuhri, wasmelen, anien, oh karlik’ kin kesempwalsang saledek me Siohwa ketikihong irail pwe ren kaudokiong ih. Ihme kahrehda Siohwa ketin engiengda kowahlap pahrail. (Nemp. 11:5, 6, 10; 14:3, 4) Met padahkihong kitail mehn kasukuhl kesempwal ehu.

7. Ia duwen Pohl eh doadoahngki pein eh kaweid me mi nan 2 Korint 6:1, oh ia duwen atail kak wia duwehte?

⁷ Pohl katamankihong Kristian koaros en dehr sohla kalahnganki saledek me Siohwa ketikihong kitail ni eh ketin doadoahngki sapwellime  Ohlo, Sises Krais. (Wadek 2 Korint 6:1.) Pohl sohte unsek oh e wia lidun dihp oh mehla. Met kahrehiong ih nsensuwed laud. Ahpw e nda: “Kalahngan ong Koht, me kin ketin kapwaiada met rehn atail Kaun Sises Krais!” Dahme kahrehda e nda met? Pohl kawehwehiong ienge Kristian kan: “Pwe kosonned en [“sapwellimen Koht manaman,” NW] me kin kahrehiong kitail mour ni atail miniminiong Krais Sises, e kamaiauwihiedahr sang manaman en kosonned en dihp oh mehla.” (Rom 7:24, 25; 8:2) Duwehte Pohl, kitail en dehr manokehla me Siohwa ketin kasaledekihala kitail sang liduwih dihp oh mehla. Pweinen pweipwei sapahlo kin kahrehda kitail en kak ahneki nsenmwakelekel ni atail papah Koht, oh met kin kahrehiong kitail peren mehlel.​—Mel. 40:8.

8, 9. (a) Mehn kataman dahieu me wahnpoaron Piter kihda ong duwen atail pahn doadoahngki atail saledek? (b) Ia duwen emen eh kak doadoahngki eh saledek ni ahl sapwung?

⁸ Kitail en dehr ihte nda me kitail kalahngankihong Siohwa, ahpw kitail en pil kanahieng en dehr doadoahngki saledek wet ni ahl sapwung. Karasepe, wahnpoaron Piter katamankihong kitail me kitail en dehr doadoahngki atail saledek nin duwen kahrepe ehu en wia me sapwung. (Wadek 1 Piter 2:16.) Ire wet katamankihong kitail duwen dahme wiawihong mehn Israel ko nan sapwtehn. Rahnwet kitail pil anahne iren mehn kataman wet, mwein laudsang mahs. Sehdan oh eh sampah kin kihda mehn kasongosong tohto ong dahme kitail en likawih, tungoale, nim, de wiahki atail mehn kamweit. Sounpesines loalokong kan kin doadoahngki aramas masamwahu oh paliwaramwahu pwehn kangoange kitail en pwainda soahng kan me kitail sohte uhdahn anahne. E kak uhdahn mengei ong sampah wet en pitihedi kitail en doadoahngki atail saledek ni ahl sapwung.

⁹ Ahn Piter kaweido pil kin kadoadoahk ong soahng kesempwal kan nan mour, duwehte soangen sukuhl oh doadoahk dah me kitail en pilada. Karasepe, me pwulopwul kan rahnpwukat kin ale kasongosong en doadoahk uhdahn laud pwe ren kak pedolong nan sukuhl laud kan me keieu mwahu. Me tohto kin ndaiong irail me ma re kohla iang sukuhl laud, re pahn alehdi doadoahk mwahu, wiahda mwohni laud, oh aramas pahn waunekin irail. Aramas pwukat ele kasalehiong me pwulopwul kan kisin pwuhk, doaropwe, de soahng teikan me mwomwen kadehdehda me emen me kesepwil sang sukuhl laud ehu pahn koadoahkihada mwohni laudsang emen me kesepwil sang pwihn kaeisek riau. E mwomwen me sukuhl laud wia mehkot uhdahn mwahu ong me pwulopwul kan ni arail pahn wiahda pilipil kan me kak kamwakid arail mour pwon. Ahpw dahme me pwulopwul kan oh arail pahpa nohno anahne tamataman?

10. Dahme kitail anahne tamataman pwehn wiahda pein atail pilipil ong soahng kan me pid kitail?

¹⁰ Ekei ele pehm me pwehki mepwukat wia pein arail pilipil, re ahneki saledek en pilada dahme re mwahuki, ma met sohte pahn kerempwa kadeikpen loalarail. Mwein re kin medewe dahme Pohl nda: “Ia kahrepen ei saledek eh pahn pakadeingkihda kadeikpen loalen emen aramas?” (1 Kor. 10:29) Mendahki kitail ahneki saledek en wiahda pein atail pilipil duwen sukuhl oh doadoahk, kitail en tamataman me mie irepen atail saledek oh mie imwilahn pilipil koaros me kitail wiahda. Ihme kahrehda Pohl nda: “Ekei kin nda, ‘E mweimweiong kiht se en wia mehkoaros.’ Mehlel, ahpw mehkoaros sohte mwahu ong kitail. ‘E mweimweiong kitail, kitail en wia mehkoaros’—ahpw mehkoaros sohte kin wia mehn sawas mwahu ehu ong kitail.” (1 Kor. 10:23) Eri mendahki kitail ahneki saledek en wiahda pein atail pilipil ong  soahng kan me pid kitail, kaidehn dahme kitail mwahuki me keieu kesempwal.

11. Ia kahrepen Siohwa eh ketin kasaledekihala kitail?

¹¹ Ni Piter eh katamankihong kitail en dehr doadoahngki atail saledek ni ahl sapwung, e nda me en doadoahngki atail saledek ni ahl pwung iei en wia “lidun Koht kei.” Kahrepen Siohwa eh ketin doadoahngki Sises pwehn kasaledekihala kitail sang lidun dihp oh mehla iei pwe kitail en kak doadoahngki atail mour unsek pwehn papah Ih.

12. Mehn kahlemeng dahieu me Noha oh eh peneineio kihda ong kitail?

¹² Ahl me keieu mwahu en doadoahngki atail saledek iei en kihong atail ahnsou oh kehl unsek pwehn papah Siohwa. Atail wia met pahn pere kitail sang en wiahkihla mehn akadei kan en sampah oh pein atail ineng kan me keieu kesempwal nan atail mour. (Kal. 5:16) Medewehla dahme Noha oh eh peneineio wia. Re mi nan sampah ehu me diren tiahk lemei oh tiahk samin. Ahpw re sohte iang pidada wiewiahn aramas akan me mi limwahrail. Re pilada en soupisengkihla doadoahko me Siohwa ketikihong irail en wia. Re kauwada warihmwo, nahkpene kanarail oh kenen mahn akan mwenge, oh padahkihong meteikan duwen Nohliko. “Noha eri ahpw kapwaiada mehkoaros me Koht ketin mahsanih.” (Sen. 6:22) Imwilahn met, Noha oh eh peneineio pitsang imwiseklahn sampah en ahnsowo.—Ipru 11:7.

13. Dahme Siohwa ketin kehkehlingkihong kitail?

¹³ Dahme Siohwa ketin kehkehlingkihong kitail en wia rahnwet? Nin duwen tohnpadahk en Sises, kitail ese me Koht ketin kehkehlingkihong kitail en kalohk. (Wadek Luk 4:18, 19.) Rahnwet, Sehdan karotongelahr pali moron en aramas akan oh re sohte wehwehki me re wia lidun kaudok likamw, kepwe kan, oh koasoandi en koperment kan. (2 Kor. 4:4) Duwehte Sises, kitail ahneki pwais kaselel en sewese meteikan ren esehla oh kaudokiong Siohwa, Kohto me kin ketikihda saledek. (Mad. 28:19, 20) E sohte mengei en kalohk ong aramas  akan. Nan ekei wasa, aramas akan sohte men esehla Koht, oh ekei pil kin lingeringerda ni atail kalohk ong irail. Ahpw pwehki Siohwa ketin kehkehlingkihong kitail en kalohk, kitail anahne pein idek rehtail: ‘I kak doadoahngki ei saledek en kalaudehla ei papah Siohwa?’

14, 15. Dahme sapwellimen Siohwa aramas tohto piladahr en wia? (Menlau kilang tepin kilel.)

¹⁴ E kaperen en ese me sapwellimen Siohwa aramas tohto pohnesehier me imwin koasoandi wet uhdahn kerendohr oh re piladahr en kihsang soahng kan me sohte nohn kesempwal nan arail mour oh tepida pioneer. (1 Kor. 9:19, 23) Ekei kin wia doadoahk en pioneer nan arail wasa, ahpw ekei kin keseula ni mwomwohdiso kan me anahne sawas. Sounpar limau me dower powe, daulih meh 250,000 me tepidahr pioneer, oh met mie pioneer daulih rar lopw (1,100,000). Ia uwen kaselel me me tohtohie kin doadoahngki arail saledek pwehn papah Siohwa ni ahl wet!​—Mel. 110:3.

¹⁵ Dahme sewese irail en doadoahngki arail saledek ni elen erpit? Medewehla duwen John oh Judith me papahier nan sahpw kei erein sounpar 30 samwalahro. Ira kawehwehda me ni ahnsou me Sukuhl en Pioneer tepida nan pahr 1977, tohnsukuhl kan kin ale kangoang en keseula oh papah wasa kan me anahn laud mie ong sounkalohk. Ihme kahrehda John kin kalapw wekidala eh doadoahk kan pwe ira en kak ahneki mour ehu me sohte kin kedirepwkihla soahng kan me sohte nohn kesempwal. Mwuhr, ira kohla ehu sahpw tohrohr pwehn kalohk. Dahme sewese ira en powehdi kahpwal kan duwehte en sukuhlki ehu lokaia tohrohr, wiahda wekidekla kan ong tiahk en sahpwo, oh pil ahnla kopou de karakar en sahpwo? Ira kapakap ong Siohwa oh likih ih en ketin sewese ira. Ia duwen ara papah Siohwa erein ahnsou ko eh kamwakid ira? John nda: “I pehm me I kin wiewia doadoahk ehu me keieu mwahu sang doadoahk koaros. Ei nanpwungmwahu rehn Siohwa uhdahn kerenla sang mahs, duwehte me emen kin ahneki rehn pahpa limpoak men. Met I wehwehkihla laud ia wehwehn Seims 4:8: ‘Kumwail keido mpen Koht, oh e pahn ketin keiong mpamwail.’ I ese me I diaradahr dahme I raparapahki, me iei mour ehu me mie katepe.”

16. Ia duwen me kid kid kei ar doadoahngki arail saledek ni elen erpit?

¹⁶ Ekei kak pioneer ahnsou werei, duwehte John oh Judith. Pwehki arail irair kan, ekei kak pioneer erein ahnsou kis. Me tohto pil kin toukihda arail ahnsou pwehn iang doadoahk en kauwada wasahn kaudok kan nan sampah pwon. Karasepe, mpen riatail Kristian 27,000 me kohla iang sewese kauwada atail poasen kaun nan Warwick, New York. Ekei kohla iang doadoahk erein wihk riau, ekei sounpwong kei, oh pil ekei sounpar ehu de wereisang. Tohtohn riatail pwukat kin wiahda tounmetei kan pwehn kohla oh papah Warwick. Irail wia mehn kahlemeng mwahu kei en doadoahngki arail saledek pwehn kapinga oh kawauwih Siohwa, Kohto me kin ketikihda saledek!

17. Dahme kitail kak kasik ma kitail doadoahngki atail saledek ahnsou wet ni elen erpit?

¹⁷ Kitail kalahnganki atail esehla Siohwa oh me kitail ahneki saledek me kohsang atail kin kaudokiong ih. Kitail en kadehdehda sang ni pilipil kan me kitail wiahda me saledek wet uhdahn kesempwal ong kitail. Kitail en dehr doadoahngki saledek wet ni ahl sapwung, ahpw kitail en doadoahngki pwehn papah Siohwa ni uwen atail kak. Eri kitail kak ahneki kapai kan me Siohwa ketin inoukihda ni eh ketin mahsanih: “Audepen lahng oh sampah uhdahn pahn maiaudahsang mouren liduwih mehla, oh pahn iang sapwellimen Koht seri kan nan arail saledek lingan.”​—Rom 8:21.