1. Dahme kitail koaros anahne wia?

KE PAHN men iang tang nan weirentang ehu me ke ese me apwal, ahpw mehlel ma ke soumwahu de pwang? Mwein soh. Ahpw wahnpoaron Pohl nda me Kristian mehlel koaros mi nan weirentang ehu. (Ipru 12:1) Oh kitail koaros, pwulopwul de mah, kehlail de pwang, anahne dadaurete lel ni imwio ma kitail men alehdi kisakis me Siohwa ketikihda ong kitail.​—Mad. 24:13.

2. Nin duwen me kileldi nan 2 Timoty 4:7, 8, dahme kahrehda Pohl kak kihda kaweid wet?

² Pohl kak kihda kaweid wet pwehki e pweida ni eh “kanekehla weirentango.” (Wadek 2 Timoty 4:7, 8.) Ahpw ia uhdahn wehwehn weirentango me Pohl koasokoasoia?

3. Weirentang dahieu me Pohl koasokoasoia?

³ Ekei pak Pohl kin ntingihedi duwen soahng kan me kin wiewiawi nan mwadong kan nan Krihs mahso pwehn padahngki mehn kasukuhl kesempwal kei. (1 Kor. 9:25-27; 2 Tim. 2:5) Pak tohto, e kin kapahrekiong mouren Kristian ong weirentang ehu. (1 Kor. 9:24; Kal. 2:2; Pil. 2:16) Aramas emen kin tepida tang nan “weirentang” ni ahnsou me e inoukihong Siohwa pein ih oh papidaisla. (1 Pit. 3:21) E kin kanekehla weirentango ni ahnsou me Siohwa ketikihong ih kisakis en mour soutuk.​—Mad. 25:31-34, 46; 2 Tim. 4:8.

4. Dahme kitail pahn koasoiapene nan iren onop wet?

⁴ Ia ekei soahng kan me duwepenehte nanpwungen weirentang reirei oh mourki mour en Kristian? Mie soahng tohto. Kitail pahn koasoiapene soahng siluh. Keieu, kitail anahne idawehn ahl me pwungo; keriau, kitail anahne kilangwohngete  imwin weiro, oh kesiluh, kitail anahne powehdi kahpwal kan erein atail tangatang.

5. Ahl dahieu me kitail en idawehn, oh dahme kahrehda?

⁵ Pwehn alehdi kisakiso nan weirentang ehu, sounweiren tang men anahne idawehn ahl me irail me koasoanehdi weiro wiahda. Duwehte met, ma kitail men alehdi kisakis en mour soutuk, kitail anahne idawehn elen mour en Kristian. (Wiewia 20:24; 1 Pit. 2:21) Ahpw, Sehdan oh irail kan me kin idawehn eh mehn kahlemeng kin men kitail en wiahda ehu pilipil me weksang; re men kitail en “iang irail.” (1 Pit. 4:4) Re kin kepitki elen mour me kitail kin idawehn oh kose me elen mour me irail kin mourki me mwahusang oh me e kin kahrehiong irail saledek. Ahpw dahme re nda likamw.​—2 Pit. 2:19.

6. Dahme ke sukuhlkihsang mehn kahlemeng en Brian?

⁶ Mehmen me kin mour duwehte irail me ahn Sehdan sampah kin kamwakid pahn esehda mwuhr me ahl me re piladao sohte kin kahrehiong irail saledek, ahpw re kin wiahla lidun Sehdan oh arail ineng kan. (Rom 6:16) Medewehla dahme wiawihong Brian. Eh pahpa nohno kangoange ih en idawehn elen mour en Kristian. Ahpw ahnsou me e pwulopwul, e kin peidengki ma elen mouro pahn kahrehiong ih peren. Brian pilada en iang irail kan me kin mourki koasoandi en Sehdan. E nda: “I sohte ese me saledek likamw me I kin inengieng pahn kahrehiong ien sohla kak uhdihsang wia soahng suwed kan. I kin doadoahngki wini en kasahliel oh kamamsakau oh mourki mour suwed. Erein sounpar kan mwuri, I kalaudehla ei kin ale wini en kasahliel keper kan oh I wiahla lidun soahng tohto pwukat. . . . I tepida netiki wini en kasahliel pwehn apwalih soangen mour me I ahneki.” Kedekedeo, Brian pilada en mourki sapwellimen Siohwa koasoandi kan. E wekidala eh elen mouro oh papidaisla nan pahr 2001. E uhdahn nsenamwahu ahnsou wet pwehki eh kin idawehn elen mour en Kristian. *

7. Nin duwen me Madiu 7:13, 14 mahsanih, ahl riau dah me mi mwohtail?

⁷ Ia uwen eh kesempwal me kitail en pilada ahl pwungo en idawehn! Sehdan men kitail koaros en uhdihsang tang nan ahl tehtik me “kohlahng mour” oh uhd keid nan ahl tehlap me pali laud en aramas akan nan sampah wet kin keid ie. Me tohto kin keid nan ahl wet oh e mengei en keid ie. Ahpw e kin “kolahng kasohrala.” (Wadek Madiu 7:13, 14.) Pwe kitail en kekeidte nan ahl pwungo oh sohte wetsang, kitail anahne likih Siohwa oh rong ih.

8. Ma sounweiren tang men dipekelekel, dahme e kin wia?

⁸ Sounweiren tang kan nan weirentang reirei ehu kin kilangwohngete ahlo me mi mwohrail pwe ren dehr dipekelekel. Ahpw, re kakete sapwungala loiong emen sounweiren tang ko de re tiakedi nan pahd ehu. Ma irail pwupwudi, re kin pwurehng kesihnenda oh doula tang. Re kin medemedewehte imwin weiro oh kisakis me re kasik en kanakihda, ahpw kaidehn dahme kahrehda re dipekelekel.

9. Ma kitail dipekelekel, dahme kitail anahne wia?

⁹ Nan atail weirentang, ele kitail kin dipekelekel pak tohto, wiahda sapwung ni dahme kitail kin nda de wia. De ele iengatail sounweiren tang kan kin wiahda sapwung kan me kamedekeikitailla. Kitail en kasik me met kin wiawi. Kitail koaros soh unsek, oh kitail koaros kin tangatang nan ahl tehtikohte me kohlahng mour. Eri kitail kakete “loiong” emenemen ekei ahnsou. Pohl pohnese me ekei pak kitail pahn kihda “kahrepen en kaulimih” emenemen. (Kol. 3:13) Kitail en dehr medemedewehte dahme kahrehda kitail dipekelekel, ahpw en medewehte kisakiso mwohtail. Ma kitail dipekelekel, kitail en pilada en pwurehng kesihnenda oh doula tang. Ma kitail lingeringerda oh sohte men pwurehng kesihnenda, kitail sohte pahn lella ni imwin weiro oh alehdi kisakiso. Patehng met, kitail kakete kerempwahla meteikan me kin songosong en tang nan ahl tehtik me kohlahng mour.

10. Ia duwen atail kak soikala wia “mehn kadipekelekel” ong meteikan?

¹⁰ Pil ehu ahl me kitail kak soikala wia “mehn kadipekelekel” ong iengatail Kristian kan iei sang ni atail mweidohng irail en wia soahng kan ni ahl me re mwahuki ni ahnsou me kak, kaidehn ahnsou koaros kitail en men irail en wia dahme kitail mwahuki. (Rom 14:13, 19-21; 1 Kor. 8:9, 13) Ni ahl kesempwal wet, kitail weksang sounweiren tang ko nan uhdahn weirentang ehu. Irail kin siai ong sounweiren tang teikan, oh emenemen sounweiren tang kin nantihong alehdi kisakiso ongete pein ih. Sounweiren tang pwukat kin medemedewehte dahme pahn sewese irail en kana. Eri irail kin siken sounweiren tang teikan pwe ren kak mi mwowe. Weksang met, kitail sohte  kin siai ong emenemen. (Kal. 5:26; 6:4) Atail mehn akadei iei en sewese koaros me kitail kak pwe irail en iang kitail lella ni imwin weiro oh alehdi kisakis en mour. Eri kitail kin song en kapwaiada ahn Pohl kaweido en ‘raparapahki kamwahupen meteikan, a kaidehn atail kante.’​—Pil. 2:4.

11. Dahme sounweiren tang men kin medemedewehte, oh dahme kahrehda?

¹¹ Patehng arail en kilangwohngete ahlo me mi mwohrail, sounweiren tang kan nan uhdahn weirentang ehu kin medemedewehte sahlo ni imwin weiro. Mehnda ma irail sohte kak kilangki pein meserail sahlo, re kak medewehla arail daulih sahlo oh alehdi kisakiso. Irail kin nantihongete sang ni arail kin medemedewehte kisakiso.

12. Ni kadek dahme Siohwa ketikihong kitail?

¹² Nan weirentango me kitail kin wia, ni kadek Siohwa ketikihda koapworopwor en alehdi keting ehu ong sapwellime aramas akan me kanekehla weirentango, me iei mour soutuk nanleng de nan Paradais nin sampah. Paipel kawehwehdahr duwen kisakis wet pwe kitail en kak medewehla uwen kaselel en atail mour ahnsou kohkohdo. Ni atail kin medemedewehte duwen ahnsou kohkohdo me Siohwa ketin inoukihong kitail, kitail pahn kalaudehla atail koasoanehdi teng en dadaurete.

13. Dahme kitail ahneki me sounweiren tang teikan sohte ahneki?

¹³ Sounweiren tang kan nan mwadong en mehn Krihs anahne powehdi kahpwal kan, me duwehte pwangada de medek. Ahpw ihte me re anahne iei koapworopworki arail kaiahn oh pein arail kehl. Duwehte sounweiren tang pwukat, kitail pil kin ale kaiahn ong ia duwen en tang nan weirentango me kitail iang. Ahpw mie mehkot me kitail ahneki me sounweiren tang teikan sohte ahneki. Kitail kak ale kehl sang Siohwa, oh sohte irepen uwen me e kak ketin sewesehkin kitail. Ma kitail kin likih Siohwa, e ketin inoukihda kaidehn en ihte kaiahne kitail ahpw en pil kakehlakaikitailla!​—1 Pit. 5:10.

14. Ia duwen 2 Korint 12:9, 10 eh sewese kitail en powehdi kahpwal kan?

¹⁴ Pohl anahne powehdi kahpwal tohto. Patehng aramas akan ar kauwe oh kaloke ih, ekei pak e pehm e luwetala oh anahne dadaurete pahn dahme e kahdaneki “kisin tek kis kohieng ni paliwereiet.” (2 Kor. 12:7) E sohte kin kilangwohng kahpwal pwukat ong kahrepen en uhdihsang papah Siohwa, ahpw e kin wiahki mepwukat ahnsou mwahu ehu en koapworopworki Siohwa. (Wadek 2 Korint 12:9, 10.) Pwehki Pohl ahneki soangen madamadau wet, Siohwa ketin sewese ih nan eh kahpwal kan koaros.

15. Ma kitail kahlemengih Pohl, dahme pahn wiawihong kitail?

¹⁵ Ele aramas akan kin kauwe oh kaloke kitail pwehki atail pwoson. Ele kitail pil kin anahne powehdi kahpwal en soumwahu de pwang. Ahpw ma kitail kahlemengih Pohl, ehuehu kahpwal ko kak wia ahnsou mwahu en kehn sapwellimen Siohwa sawas limpoak.

16. Ma omw roson luwetala, dahme ke kak wia?

¹⁶ Ke kin wonohnte pohn peht de doadoahngki wheelchair? Pwukiomw kan luwet de ke sohte kak kilang mwahu? Ma iei, ke kak iang me pwulopwul oh me kehlail kan papah Siohwa? Ke uhdahn kak! Me mah oh me luwet tohto kin iang tang nan ahl me kohlahng mour. Irail sohte kak wia doadoahk wet ni pein arail kehl. Ahpw, re kin ale sapwellimen Siohwa kehl sang ni arail kin rong padahk kan me kin rekordi nan mihting kan. Oh re kin iang doadoahk en katohnpadahk sang ni arail kin kalohk ong toahkte, nurse, oh kisehrail kan.

17. Ia sapwellimen Siohwa pepehm ong irail kan me ahneki kahpwal en roson?

 ¹⁷ Ma ke sohte kak wia soahng koaros me ke men wia ong Siohwa, dehr mworusala oh medewe me ke sohte kak dadaurete lel ni imwin koasoandi wet. Siohwa ketin poakohng uhk pwehki omw pwoson ih oh soahng koaros me ke wiahiong ih erein sounpar kan me kohdo. Ke anahne sapwellime sawas ahnsou wet laudsang mahs, oh e sohte pahn ketin likidmelieiukala. (Mel. 9:10) Ahpw, e pahn pil ketin karanihukala. Tehk dahme emen sister me ahneki soangen soumwahu kei nda: “Pwehki ei kahpwal en roson wie tohtohla, I diarada me ei ahnsoun ehukihong meteikan padahk mehlel pil tikitikla. Ahpw I ese me mendahki uwen tikitik en ei nanti, met kin kaperenda Siohwa oh kin kahrehiong ien peren.” Ni omw kin mworusala, tamataman me ke sohte kelehpw. Medewehla mehn kahlemeng en Pohl, oh tamanda eh koasoi kangoang kan: “I kin peren ni ei kin luwet, . . . pwe ni ahnsou me I kin luwet, ih ahnsou me I kehlail.”​—2 Kor. 12:10.

18. Soangen kahpwal laud dah me ekei kin ahneki?

¹⁸ Ekei me kin tang nan ahl me kohlahng mour kin lelohng pil ehu kahpwal. Re kin dadaur pahn pein arail kahpwal kan me meteikan sohte kak kilang oh ele sohte wehwehki. Karasepe, re anahne dadaur pahn nsensuwed laud de pwunod laud. Dahme kahrehda sapwellimen Siohwa ladu pwukat kin lelohng soangen kahpwalo me uhdahn apwal? Pwehki ni aramas men me peh tipw de mi nan wheelchair, koaros kak kilang kahpwalo me e ahneki oh ele re pahn mwekidki en sewese ih. Ahpw, irail kan me kin dadaur pahn nsensuwed laud de soumwahu en madamadau ele mwomwen me sohte mie arail kahpwal. Irair apwal me re ahneki kin duwehte irail ko me pehrail de nehrail tipw. Ahpw pwehki meteikan sohte kak kilang me re kin lokolok, ele irail sohte pahn poakehla de nsenohki.

19. Dahme kitail sukuhlkihsang ahn Mepiposed mehn kahlemeng?

¹⁹ Ma mie soahng kei me ke sohte kak wia oh pehm me meteikan sohte wehwehkin uhk, ele mehn kahlemeng en Mepiposed kak kangoange iuk. (2 Sam. 4:4) E sohte kak alu mwahu, oh Nanmwarki Depit kadeik ih ni sapwung. Kaidehn ahn Mepiposed sapwung me kahrehda kahpwal pwukat en wiawihong ih. Ahpw e sohte nsensuwedkihla; e kalahnganki soahng mwahu kan me kin wiawihong ih. E kalahnganki ahn Depit kadekohng ih mahso. (2 Sam. 9:6-10) Eri ni Depit eh kadeikada ih ni sapwung, Mepiposed song en medewe soahng koaros me pidada irairo. E sohte mweidohng ahn Depit sapwung kan en kahrehiong ih en nsensuwed. Oh e sohte kapwukoahki Siohwa  dahme Depit wiao. Mepiposed kin medemedewe dahme e kak wia pwehn utung nanmwarkio me Siohwa ketin idihada. (2 Sam. 16:1-4; 19:24-30) Siohwa ketin kilelehdi nan Paipel ahn Mepiposed mehn kahlemeng mwahu pwe kitail en sukuhlkihsang.​—Rom 15:4.

20. Dahme pwunod laud kin wiahiong ekei, ahpw dahme irail kak kamehlele?

²⁰ Pwehki pwunod laud, ekei riatail Kristian kan kin uhdahn saloh oh perki dahme meteikan medewehkin irail ni arail mi nanpwungen meteikan. Ele irail kin apwalki mi nan pokon laud, ahpw re kin pousehlahte iang towehda mihting en mwomwohdiso oh mihting tohrohr kan. Re kin apwalki koasoiong aramas akan me re sehse, ahpw re kin koasoiong meteikan nan kalohk. Ma met kin wiawihong uhk, kamehlele me ke sohte kelehpw. Me tohto pil kin ahneki kahpwal wet. Tamataman me Siohwa kin ketin kupwurperenki omw wia uwen omw kak koaros. Pwehki omw sohte uhdi, met kadehdehda me e kin ketin kapaiukada oh ketikihong uhk kehl me ke anahne. * (Pil. 4:6, 7; 1 Pit. 5:7) Ma ke kin papah Siohwa mendahki omw kin dadaur pahn soumwahu de nsensuwed laud, ke kak kamehlele me ke kin kaperenda Siohwa.

21. Pwehki sapwellimen Siohwa sawas, dahme kitail koaros pahn kak wia?

²¹ Kitail kalahnganki me mie wekpeseng en uhdahn weirentang ehu oh weirentang me Pohl koasokoasoia. Ni ahnsou me Paipel ntingdi, emente me kin kanahkihda kisakiso nan uhdahn weirentang ehu. Weksang met, koaros me kin dadaurete ni lelepek nan weiren tang en Kristian kin alehdi kisakis en mour soutuk. (Sohn 3:16) Oh nan uhdahn weirentango, koaros soun weirentang ko anahne kehlail ni roson. Ma soh, irail sohte pahn kana nan weirentango. Weksang met, tohto rehtail sohte ahneki roson mwahu, ahpw kitail kin dadaurete. (2 Kor. 4:16) Pwehki sapwellimen Siohwa sawas, kitail koaros pahn tang nan weiro lao lel ni imwi!