1. Dahme Siohwa ketin mwahngih duwen sapwellime aramas akan?

SIOHWA KOHT “kin kupwurperenki sapwellime aramas akan.” (Mel. 149:4) E uhdahn kaperen en ese duwen met! Siohwa kin ketin mwahngih soangen aramas mwahu dah kitail kak wiahla oh ketin sewese kitail en wiahla kompoakepah. Ma kitail lelepekohngete ih, e pahn kin ketin ieiang kitail kohkohlahte!​—Sohn 6:44.

2. Dahme kahrehda ekei kin apwalki kamehlele me Siohwa ketin poakohng irail?

² Ekei ele kin nda, ‘I ese me Siohwa kin ketin poakohng sapwellime aramas akan nin duwen pwihn ehu, ahpw ia duwen ei kak uhdahn kamehlele me Siohwa ketin poakohng ie?’ Dahme kakete kahrehiong ekei en idek peidek wet? Oksana * me lelohng kahpwal laud ni ahnsou me e seri, nda: “I uhdahn peren ni ahnsou me I papidaisla oh I tepida pioneer. Ahpw mwurin sounpar 15, I tepida tamanda soahng kan me wiawihong ie ahnsou me I seri. Ngehi eri medewe me Siohwa sohla ketin kupwurperenkin ie oh I sohla warohng sapwellime limpoak.” Yua, emen pioneer sister me pil lelohng kahpwal laud ni eh seri, nda: “I inoukihong Siohwa ei mour pwehki I men kaperenda ih. Ahpw I uhdahn kamehlele me e sohte kak ketin poakohng ie.”

3. Dahme kitail pahn koasoiapene nan iren onop wet?

³ Duwehte Kristian lelepek pwukat me kitail ahpwtehn koasoiapene, ke kin uhdahn poakohng Siohwa ahpw mwein ke kin peikasalki me e kin ketin poakohng uhk. Dahme kahrehda ke anahne kamehlele me e uhdahn ketin poakohng uhk? Oh dahme kak seweseiuk ni ahnsou me ke medewe me Siohwa sohte ketin poakohng uhk? Kitail pahn koasoiapene pasapengpen peidek pwukat.

4. Dahme kahrehda e keper en peikasalki sapwellimen Siohwa limpoak ong kitail?

⁴ Ni atail kin uhdahn kamehlele me Siohwa ketin poakohng  kitail, kitail pahn men papah ih ni uwen me kitail kak, mendahki ma atail mour kin apwal. Ahpw ma kitail kin peikasalki me Koht kin ketin poakohng kitail, kitail “uhdahn lamalam luwet.” (Lep. Pad. 24:10) Oh ni ahnsou me kitail mworusala oh tepida medewe me Koht sohte ketin poakohng kitail, kitail sohla pahn kak pelianda ahn Sehdan uhwong kan.​—Ep. 6:16.

5. Dahme kin wiawihong ekei riatail Kristian kan me sohte kin medewe me Koht ketin poakohng irail?

⁵ Ekei riatail Kristian kan kin tepida medewe me Siohwa sohla ketin poakohng oh nsenohkin irail, eri arail pwoson kin luwetala. Emen elder me adaneki James nda: “Mendahki I kin papah nan Pedel oh perenki iang kalohk nan mwomwohdiso ehu me kin lokaiahki ehu lokaia tohrohr, I kin peikasalki ma Siohwa kin kupwurperenki dahme I wiewia ong ih. Ehu ahnsou I pil peidengki ma Siohwa kin ketin karonge ei kapakap kan.” Eva, me pil kin doadoahngki pali laud en eh ahnsou pwehn papah Koht, nda: “I esehda me e keper en medewe me Siohwa sohte ketin poakohng kitail pwehki met kin kamwakid soahng koaros me ke kin wia pwehn papah Siohwa. Kitail kin sohla men wia soahng kan ong Koht oh pil sohla atail peren en papah Siohwa.” Michael, emen pioneer oh pil elder, nda: “Ma ke sohte kamehlele me Koht kin ketin nsenohkin uhk, ke pahn ekisekis peila sang ih.”

6. Dahme kitail anahne wia ma kitail tepida medewe me Koht sohte ketin poakohng kitail?

⁶ Koasoipen irail pwukat kasalehda ia uwen atail pwoson eh kak luwetala ma kitail medewe me Siohwa sohte ketin poakohng kitail. Ahpw dahme kitail anahne wia ma kitail tepida medewe me Siohwa sohte ketin poakohng kitail? Kitail anahne mwadang soikala madamadau pwukat! Peki rehn Siohwa en seweseiuk en kihsang soangen “lamalam” pwukat oh wiliankihdi ‘sapwellimen Koht popohl me pahn pere omw mohngiong oh omw kehl en madamadau.’ (Mel. 139:23; Pil. 4:6, 7) Oh tamataman me kaidehn kowe kelehpw ahneki soangen madamadau pwukat. Riatail Kristian lelepek teikan pil kin ahneki soangen madamadau pwukat. Sapwellimen Siohwa ladu kan mahs pil anahne pelianda soangen madamadau pwukat. Tehk dahme kitail kak sukuhlkihsang mehn kahlemeng en wahnpoaron Pohl.

7. Kahpwal dah kan me Pohl ahneki?

⁷ Mie pak ke pehm me omw pwukoa kan nohn tohto, oh ke sohte kak wia soahng koaros me ke anahne wia? Ma ei, ke pahn wehwehki ahn  Pohl pepehm. E kin pwunodki kaidehn ehute mwomwohdiso, ahpw “mwomwohdiso koaros.” (2 Kor. 11:23-28) Ke kohwahki soumwahu me kin kihsang omw peren? Pohl ahneki kahpwal ehu me kin kahrehiong ih en kin lokolok, mwein met soumwahu ehu, oh e men soumwahu wet en kohsang reh. (2 Kor. 12:7-10) Ke kin ekei pak nsensuwedkihla omw soh unsek kan? Ekei pak Pohl pil kin ahneki soangen pepehm pwukat. E kahdaneki pein ih “aramas paisuwed men” pwehki e kin pelipelian eh soh unsek kan.​—Rom 7:21-24.

8. Dahme sewese Pohl en dadaur mendahki eh kahpwal kan?

⁸ Mendahki Pohl anahne dadaur pahn kahpwal pwukat, e pousehlahte papah Siohwa. Dahme kakehlailih en wia met? Mendahki e pohnese eh soh unsek kan, e uhdahn kin pwoson pweinen pweipwei sapahlo. E ese duwen sapwellimen Sises inowo me “mehmen me kin kasalehda eh pwoson [Sises] en ahneki mour soutuk.” (Sohn 3:16; Rom 6:23) Ei, Pohl kin pwoson pweinen pweipwei sapahlo. E kamehlele me Siohwa uhdahn ketin kupwurki mahkohng pil irail kan me wiahda dihp laud ma irail koluhla.​—Mel. 86:5.

9. Dahme kitail kak sukuhlkihsang dahme Pohl nda nan Kalesia 2:20?

⁹ Pohl pil pwoson me Koht uhdahn ketin poakohng ih pwehki e ese me Koht ketin poaronehdo Sises en mehkihla ih. (Wadek Kalesia 2:20.) Tehk mahsen kaselel kan ni imwin iretikitiko. Pohl nda: “Sapwellimen Kohto, ketin poakohng ie oh pangala pein ih ong ie.” Pohl sohte medewe me e wia aramas suwed men, me kahrehda Siohwa sohte kak ketin poakohng ih. E sohte nda, ‘I kak wehwehki dahme kahrehda Siohwa ketin poakohng riei kan, ahpw e sohte kak poakohng ie.’ Pohl katamankihong mehn Rom ko: “Krais pwoukinkitailla ni atail wiahte aramas dipan kei.” (Rom 5:8) Sohte mehkot kak irehdi sapwellimen Koht limpoak ong kitail!

10. Dahme kitail sukuhlkihsang Rom 8:38, 39?

¹⁰ Wadek Rom 8:38, 39. Pohl ese ia uwen kehlail en sapwellimen Koht limpoak. I ntingihedi me sohte mehkot “pahn kak katohreikitailsang sapwellimen Koht limpoak.” Pohl ese me Siohwa kin uhdahn ketin kanengamahiong mehn Israel ko. E pil ese me Siohwa pil kin ketin kasalehiong ih mahk kalahngan. Eri Pohl kin mwomwen ndinda, ‘Pwehki Siohwa poaronehdo sapwellime Ohlo en pwoukiniehla, I sohte anahne peikasalki me e ketin poakohng ie.’​—Rom 8:32.

11. Mendahki Pohl wiahda soangen sapwung ko me kileldi nan 1 Timoty 1:12-15, dahme kahrehda e uhdahn kamehlele me Koht ketin poakohng ih?

¹¹ Wadek 1 Timoty 1:12-15. Pohl ele kin uhdahn  nsensuwedkihla ni ahnsou me e kin tamanda dahme e wia mwohn eh wiahla Kristian men. E sohte kapwuriamwei me e pein kahdaneki ih “me keieu dipan.” Mwohn eh sukuhlki padahk mehlel, Pohl kin kaloke Kristian kan nan kahnimw ko, salihedi ekei irail, oh pil pwungki me ekei irail en kamakamala. (Wiewia 26:10, 11) Ke kak medewehla ia ahn Pohl pepehm ni eh tuhwongdi emen Kristian pwulopwul me eh pahpa oh nohno kamakamala pwehki ih? Pohl koluhkihla eh sapwung kan, ahpw e ese me e sohte kak wekidala dahme wiawiher. E kamehlele me Sises ketin pwoukihla ih, eri ni eimah e ntingihedi: “I kak wia doadoahk wet pwehki sapwellimen Koht kadek sapan.” (1 Kor. 15:3, 10) Dahme kitail sukuhlkihsang met? Ke anahne kamehlele me Sises ketin pwoukinuhkla oh kahrehda ken kak ahneki nanpwungmwahu keren rehn Siohwa. (Wiewia 3:19) Dahme kesempwal rehn Koht iei dahme kitail kin wia ahnsou wet oh pil ahnsou kohkohdo, ahpw kaidehn sapwung kan me kitail wiahda mahso, sohte lipilipil ma kitail wia emen Sounkadehdehn Siohwa ni ahnsowo de soh.​—Ais. 1:18.

12. Ia duwen mahsen kan me kileldi nan 1 Sohn 3:19, 20 eh kak sewese kitail ma kitail pehm me sohte katepatail de sohte me kin poakohng kitail?

¹² Ni omw kin medewehla duwen Sises eh ketin pwoukihla dipomw kan, ele ke kin nda, ‘I sohte warohng ale kisakis wet.’ Dahme kahrehda ke ahneki pepehm wet? Atail mohngiong me sohte unsek kakete pitihkitaildi, oh kahrehiong kitail en pehm me sohte katepatail de sohte me kin poakohng kitail. (Wadek 1 Sohn 3:19, 20.) Nan soangen ahnsou ko, kitail anahne tamataman me “Koht lapalapasang mohngiongitail.” Limpoak oh mahk me Samatailo nanleng sapwellimanki uhdahn kehlailsang madamadau sapwung me ele mi nan mohngiongitail. Kitail anahne sukuhlki en kamehlele me Siohwa ketin poakohng kitail. Pwehn wia met, kitail anahne kalapw onopki sapwellime  Mahsen, kapakap ong ih ahnsou koaros, oh kaukaule werekiong irail kan me kin kaudokiong ih. Dahme kahrehda atail wia mepwukat uhdahn kesempwal?

13. Ia duwen onopki Mahsen en Koht eh kak sewese kitail? (Menlau pil kilang koakono “ Ia Duwen Mahsen en Koht Eh Sewese Irail.”)

¹³ Onopki Mahsen en Koht ehuehu rahn, oh ke pahn kalaudehla omw wehwehki sapwellimen Siohwa irair kaselel tohto. Ke pahn wehwehkihla ia uwen eh ketin poakohng uhk. Ni omw kin doudouloale Mahsen en Koht ehuehu rahn, met kak seweseiuk en medewe soahng kan ni sansal oh “kapwungala soahng kan” nan omw madamadau oh mohngiong. (2 Tim. 3:16) Emen elder me adaneki Kevin kin ahneki pepehm me sohte katepe, e nda: “Ni ei kin wadek Melkahka 103 oh doudouloale, met kin sewese ie en kapwungala ei madamadau oh wehwehki dahme Siohwa uhdahn ketin medewehkin ie.” Eva, me kitail koasoiapene mwoweo, nda: “Mwohn rahn ehu eh nekila, I kin wiahda ahnsou en medemedewe dahme kesempwal ong Siohwa. E kin kameleileiehdi oh kalaudehla ei pwoson.”

14. Ia duwen kapakap eh kak sewese kitail?

¹⁴ Kalapw kapakap. (1 Des. 5:17) Ni ahnsou me ke men kompoakepahnkihla emen, ke anahne kalapw koasoiong ih oh padahkihong omw madamadau kan. Met duwehte atail nanpwungmwahu rehn Siohwa. Ni atail kin kasalehda atail pepehm, madamadau, oh pwunod kan nan atail kapakap, kitail kin kasalehda me kitail likih ih oh kitail ese me e kin ketin poakohng kitail. (Mel. 94:17-19; 1 Sohn 5:14, 15) Yua, me kitail koasoiapene mwoweo, nda: “Ni ei kin kapakap, I sohte kin padahkihongete Siohwa soahng kan me wiawihong ie rahno, I kin padahkihong ih dahme I kin uhdahn medemedewe oh pehm. Ekisekis, I esehla duwen Siohwa nin duwen Sahm men me uhdahn kin ketin poakohng sapwellime seri kan, a kaidehn kaunen kompani laud ehu.”​—Menlau kilang koakono “ Ke Wadekehr Met?”

15. Ia duwen Siohwa eh ketin kasalehda eh nsenohkin kitail?

¹⁵ Werekiong irail kan me kin kaudokiong Siohwa, irail wia kisakis ehu sang rehn Siohwa. (Seims 1:17) Samatailo nanleng kin ketin kasalehda eh nsenohkin kitail sang ni eh ketikihong kitail riatail Kristian kan nan mwomwohdiso me kin kasalehda “limpoak ahnsou koaros.” (Lep. Pad. 17:17) Nan nah kisinlikowo ong mehn Kolose ko, Pohl koasoia duwen ekei Kristian kan me sewese ih, oh e nda me “irail wialahr utupen nsenamwahu laud” ong ih. (Kol. 4:10, 11) Krais Sises kin anahne oh pil kalahnganki sawas me e alehdi sang kompoakepah tohnleng kan oh pil aramas akan.​—Luk 22:28, 43.

16. Ia duwen kompoakepatail lelepek kan ar kak sewese kitail en karanihala Siohwa?

¹⁶ Ia duwe, ke uhdahn paiekihda kompoakepahmw  kan nan mwomwohdiso? Ni atail kin koasoia duwen atail kahpwal kan ong kompoakepatail men me ahneki nanpwungmwahu keren rehn Siohwa, met sohte wehwehki me atail pwoson luwet, ahpw e kak wia perepatail. Medewehla dahme James me kitail koasoiapene mwoweo, nda: “En kompoakepahnki irail kan me ahneki nanpwungmwahu rehn Koht kin uhdahn sewese ie laud. Ni ei kin nohnla medewe me Koht sohte ketin poakohng ie, kompoakepahi mwahu kan kin rong ie ni kanengamah oh padahkihong ie me irail poakohng ie. Ni arail kin wia met, I kin esehda me Siohwa Koht ketin poakohng ie oh nsenohkin ie.” Ia uwen eh kesempwal ong kitail en kakairada oh kolokol atail nanpwungmwahu keren rehn riatail Kristian kan!

17-18. Ihs me kitail anahne en kamehlele, oh dahme kahrehda?

¹⁷ Sehdan men kitail en uhdihsang atail nannanti en wia dahme pwung. E men kitail en kamehlele me Siohwa sohte ketin poakohng kitail, oh me kitail sohte warohng en ketin doareikitailla. Ahpw nin duwen me kitail sukuhlkiher, met sohte mehlel.

¹⁸ Siohwa ketin poakohng uhk. Ke uhdahn kesempwal mwohn silangi. Ma ke peikiong ih, ke pahn “tengediong sapwellime limpoak” kohkohlahte, nin duwen me Sises ketin wia. (Sohn 15:10) Eri dehr kamehlele Sehdan de omw mohngiong ni ahnsou me ke medewe me Siohwa sohte ketin poakohng uhk. Ahpw, kamehlele Siohwa, me ketin mwahngih soahng mwahu kan me emenemen kitail ahneki. Kamehlele me e “kin kupwurperenki sapwellime aramas akan,” pil kowe!