1. Dahme kitail koaros mwahuki en wiawihong kisehtail kan?

EMEN sister me adaneki Pauline * nda: “Sangete ahnsou me I esehla padahk mehlel, I men koaros nan ei peneinei en iang ie mi nan Paradais. Ahpw mehlel I men ei pwoudo, Wayne oh nait pwutak pwulopwulo en iang ie papah Siohwa.” Ia duwe, mie kisehmw kan me saikinte esehla oh poakohng Siohwa? Duwehte Pauline, ele ke men kisehmw kan en iang uhk papah Siohwa.

2. Peidek dah kei me kitail pahn koasoiapene nan iren onop wet?

² Kitail sohte kak idingkihong kisehtail kan en pwungki rongamwahwo, ahpw kitail kak kangoange irail en medewe oh mwekidki padahk en Paipel. (2 Tim. 3:14, 15) Dahme kahrehda kitail anahne kalohk ong kisehtail kan? Dahme kahrehda kitail anahne song en wehwehki arail pepehm? Dahme kitail kak wia pwehn sewese kisehtail kan en poakohng Siohwa duwehte me kitail kin wia? Oh ia duwen koaros nan atail mwomwohdiso ar kak sewese kitail?

3. Nin duwen me 2 Piter 3:9 mahsanih, dahme kahrehda kitail anahne kalohk ong kisehtail kan?

³ Ahnsou keren, Siohwa pahn ketin kasohrehla koasoandi wet. Irail kante me “ahneki mohngiong mwahu en ale mour soutuk” me pahn pitila. (Wiewia 13:48) Kitail kin kihong kehl oh ahnsou laud en kalohk ong aramas akan me kitail sehse nan atail wasahn  kousoan, eri kitail pil men kisehtail kan en iang kitail papah Siohwa. Samatail me ketin limpoak, Siohwa, “sohte kin ketin kupwurki emen en kasohrala ahpw e ketin kupwurki aramas koaros en koluhla.”—Wadek 2 Piter 3:9.

4. Sapwung dahieu me kitail kakete wiahda ni atail kalohk ong kisehtail kan?

⁴ Kitail anahne tamataman me mie ahl pwung oh ahl sapwung en ehukihong meteikan duwen rohng en komour. Karasepe, ele kitail kin koasoi ni kadek ni atail kin kalohk ong emen me kitail sohte ese, ahpw mwein kitail sohte kin wia met ong kisehtail kan.

5. Dahme kitail anahne tamataman mwohn atail song en ehukihong kisehtail kan duwen padahk mehlel?

⁵ Ni atail kin medewehla tepin ahnsou me kitail song en kalohk ong kisehtail kan, tohto rehtail ele kin nsensuwedkihla mwomwen atail koasoiong irail oh mentehno wia met ni ehu ahl tohrohr. Wahnpoaron Pohl kaweidki Kristian kan: “Ahnsou koaros amwail lokaia kan en kin kadek, doalki soahl, pwe kumwail en kin ese duwen amwail pahn sapeng emenemen aramas.” (Kol. 4:5, 6) E mwahu en tamataman kaweid wet ni atail kin koasoiong kisehtail kan. Pwe ma soh, kitail kakete kalingeringerihada irail ahpw kaidehn sewese irail en rong kitail.

6-7. Menlau karasahda duwen kesempwalpen Kristian kan en kasalehda arail wehwehki arail pwoud me sohte kin papah Siohwa.

⁶ Kasalehda me ke wehwehki arail pepehm. Pauline, me kitail koasoia mwoweo, nda: “Nin tapio, I kin men koasoiaiong ei pwoudo ihte duwen Koht oh Paipel. Se sohte kin koasoia soahng kan duwen ehuehu rahn.” Ahpw, en Pauline pwoudo, Wayne, sohte nohn ese duwen Paipel oh sohte wehwehki dahme Pauline kin koasokoasoia. Ong ih, e mwomwen me Pauline kin medemedewehte eh pelien lamalamo. E  perki me Pauline iangala pwihn keper ehu oh me pwihno pitihdier ih.

⁷ Pauline wehkada me erein ahnsou ehu e kin doadoahngki laud eh ahnsou ni soutik oh imwin wihk kan ong rie Kristian kan​—ni mihting kan, nan kalohk, oh mwemweit rehrail. Pauline nda: “Ekei pak sohte emen mi ni imwato ni Wayne eh pwurasang doadoahk oh e kin sangat.” Ni mehlel, Wayne men eh pwoudo oh neira pwutako en mi reh. E sohte ese aramas akan me ira kohla rehrail, oh e mwomwen me kompoakepahn eh pwoudo kin kesempwal sang ih. Wayne eri kamasak Pauline me e pahn mweisang ih. Ke kak medewehda ekei ahl me Pauline kak kasalehda me e wehwehki en eh pwoudo pepehm?

8. Nin duwen me 1 Piter 3:1, 2 mahsanih, dahme pahn keieu kamwakid kisehtail kan?

⁸ Wiahda mehn kahlemeng mwahu. Kisehtail kan kin tehk dahme kitail kin wia laudsang dahme kitail kin nda. (Wadek 1 Piter 3:1, 2.) Kedekedeo, Pauline esehda ire mehlel wet. E nda: “I ese me Wayne poakohng kiht oh sohte men sen mweipeseng.” Ahpw eh kamasak ie kahrehiong ie en wehwehkihda me I anahne kapwaiada dahme Siohwa ketin mahsanih duwen mouren pwopwoud. I anahne wiahda mehn kahlemeng mwahu sang ni ei wiewia kan ahpw kaidehn en koasoakoasoite.” Pauline uhdihsang eh kin song en idingkihong Wayne ira en koasoia duwen Paipel, oh e tepida koasoia soahng kan duwen ehuehu rahn. Wayne kilang me Pauline kin meleilei sang mwoweo, oh e kilang me neira pwutako kin tepida kadek oh peik. (Lep. Pad. 31:18, 27, 28) Ni Wayne eh tehkada kamwahupen padahk kan en Paipel eh kamwakid eh peneineio, ih eri tepida medemedewe oh mwekidki rohng sang Mahsen en Koht.​—1 Kor. 7:12-14, 16.

9. Dahme kahrehda kitail anahne pousehlahte sewese kisehtail kan?

 ⁹ Pousehlahte song en sewese kisehmw kan. Siohwa ketin wiahda mehn kahlemeng ong kitail. E “sohte kin tokedihsang” eh ketikihong aramas akan ahnsou mwahu en mwekidki rongamwahwo oh alehdi mour. (Ser. 44:4) Oh wahnpoaron Pohl ndaiong Timoty en pousehlahte sewese meteikan. Dahme kahrehda? Pwehki ni eh wia met, e pahn doarehla ih oh irail kan me kin rong ih. (1 Tim. 4:16) Kitail kin poakohng kisehtail kan, eri kitail men irail en ese padahk mehlel me dierek nan Mahsen en Koht. Mwurin ahnsou ehu, dahme Pauline kin koasoia oh wia kamwakid eh peneineio. Ahnsou wet e kin perenki iang eh pwoudo papah Siohwa. Ira koaros wia pioneer kei, oh Wayne kin papah nin duwen elder men.

10. Dahme kahrehda kitail anahne kanengamah?

¹⁰ Ken kanengamah. Ni atail pilada en peikiong Koht, kitail wiahda wekidekla kan nan atail mour oh dahme kitail kin kamehlele. E kak apwal ong kisehtail kan en pwungki wekidekla pwukat. Dahme re kin kalapw tepin tehkada iei me kitail sohla kin iang irail wia kasarawi kan oh sohla iang pidada nan palien politik. Nin tapio, ekei kisehtail kan kakete lingeringerda pahtail. (Mad. 10:35, 36) Ahpw kitail en dehr medewe me irail sohte pahn wiahda wekidekla kan. Ma kitail uhdihsang song en sewese irail wehwehki dahme kitail kin kamehlele, met kin duwehte kitail kadeikadahr me irail sohte warohng alehdi mour soutuk. Siohwa sohte ketikihong kitail pwukoahn kadeik​—e ketikihong Sises pwukoa wet. (Sohn 5:22) Ma kitail kin kanengamah, kedekedeo kisehtail kan ele pahn men rong dahme kitail padahkih.​—Menlau kilang koakon “ Doadoahngki Neitail Website Pwehn Padahk.”

11-13. Dahme ke sukuhlkihsang mwomwen en Alice eh wiewia ong eh pahpa nohno?

¹¹ Ken kadek ahpw dehr mweidohng kisehmw kan en wekidala omw pilipil kan. (Lep. Pad. 15:2) Medewehla karasaras wet duwen Alice. E sukuhlki duwen Siohwa ni ahnsou me e mi ehu wasa me dohsang eh pahpa nohno, me sohte kin kamehlele Koht oh kin iang pidada laud nan palien politik. E wehwehki me e anahne mwadang ndaiong ira soahng mwahu kan me e sukusukuhlki. Alice nda: “Ma ke awih lao mwuhr pwehn ndahda duwen wekidekla kan me pid dahme ke kin kamehlele oh wia, omw peneinei pahn uhdahn nsensuwedkihla met.” E ntingla rehn eh pahpa nohno, idek ia ara madamadau duwen padahk kan en Paipel ong oaralap kan me e medewe ira pahn perenki, duwehte limpoak. (1 Kor. 13:1-13) E kalahngankihong ira ara apwalihada ih mwahu, oh e kadarala ara kisakis kan. Erein eh mwemweitla ni imwen eh pahpa nohno, e kin wia soahng koaros me e kak pwehn sewesehki eh nohno soahng kan nan imweo. Nin tapio, eh pahpa nohno sohte perenki ni Alice eh ndaiong ira duwen dahme e kin kamehlele.

¹² Ni Alice eh mi ni imwen eh pahpa nohno, e kin pousehlahte wadek Paipel rahn koaros. Alice nda: “Met sewese ei nohno en wehwehki ia uwen ei kesempwalki wadawad en Paipel.” Erein ahnsowo, ahn Alice pahpao koasoanehdi en sukuhlki mehkot duwen Paipel pwehn wehwehki madamadau en nah serepeino, oh e men rapahki soahng kan pwehn kauwehki Paipel. Alice nda: “I kihong ih Paipel ehu, oh ntingihong loale kisinlikou ehu ong ih.” Ia imwilahn met? Eh pahpao sohte diarada mehkot en kauwehki Mahsen en Koht, ahpw e inenen mwekidki dahme e wadek.

¹³ Kitail anahne kadek ahpw dehr mweidohng kisehtail kan en wekidala atail pilipil kan, mehnda ma kitail anahne dadaur pahn kahpwal kan. (1 Kor. 4:12b) Karasepe, Alice anahne dadaur pahn uhwong kan sang eh nohno. E nda: “Ni ahnsou me I papidaisla, Nohno likwerikin ie ‘nei serepein suwedo.’” Dahme Alice wia? E nda: “I sohte pohnsehsehla met, ahpw ni wahu  I kawehwehda me I koasoanedier me I pahn wiahla emen Sounkadehdehn Siohwa oh I pahn tengedihongete ei pilipilo. I song en kamehlelehiong ei nohno me I uhdahn poakohng ih. Kiht eri sengiseng, oh I kukihada kene mwenge mwahu. Sangete ahnsowo, ei nohno tepida pohnese me Paipel kin kahrehiong ie en wiahla aramas mwahu men.”

14. Dahme kahrehda kitail en dehr mweidohng kisehtail kan en wekidala atail pilipil en papah Siohwa?

¹⁴ Ele ahnsou anahn mwohn kisehtail kan pahn uhdahn wehwehkihla ia uwen kesempwal ong kitail en papah Siohwa. Karasepe, ni Alice eh pilada en pioneer ahpw kaidehn doadoahk me eh pahpa nohno pilada ong ih, eh nohno pil pwurehng sengiseng. Ahpw Alice sohte wekidala eh pilipilo. E nda: “Ma ke mweidohng omw peneinei en wekidala omw pilipil duwen ire ehu, re pahn kakete song en wekidala omw pilipil ong ire teikan. Ahpw ma ke kin kadek ong omw peneineio ahpw tengedihongete omw pilipilo, ekei irail kakete rong uhk.” Ih met me wiawihong Alice. Met eh pahpa nohno wia pioneer kei, oh eh pahpao pil wia emen elder.

15. Nin duwen me Madiu 5:14-16 oh 1 Piter 2:12 mahsanih, ia duwen “doadoahk mwahu” en meteikan eh kak sewese kisehtail kan?

¹⁵ Siohwa kin ketin kainangihedo aramas akan reh sang ni “doadoahk mwahu” en tohnmwomwohdiso kan en Kristian. (Wadek Madiu 5:14-16; 1 Piter 2:12.) Ma omw pwoud kaidehn emen Sounkadehdehn Siohwa, ia duwe, e tuhwongehr tohn omw mwomwohdiso? Pauline me kitail koasoiapene mwoweo, luke rie Kristian kan ong imweo pwe eh pwoudo, Wayne, en kak esehla irail. Wayne tamanda duwen  emen brother me sewese ih en wehwehki dahme uhdahn mehlel duwen Sounkadehde kan. E nda: “Brothero kommoal sang doadoahk ihte pwehn iang ie kilang mwadong ehu nan TV. Oh I medewe, ‘E mwahu!’”

16. Dahme kahrehda kitail en luke kisehtail kan en iang towehda mihting kan?

¹⁶ Ehu ahl me uhdahn mwahu en sewese kisehtail kan iei en luke irail en iang kitail towehda mihting kan. (1 Kor. 14:24, 25) Tepin mihting me Wayne iang towehda iei Katamano pwehki e wiawi mwurin doadoahk oh prokramo mwotomwot. E nda: “I sohte wehwehki audepen padahko, ahpw I tamatamante aramas ako. Irail kohdo oh kasamwo ie oh itipeiong ie. I kak pehm me irail uhdahn aramas mwahu kei.” Ehu pwopwoud kin uhdahn kadek ong Pauline, sewese ih oh nah pwutako ni mihting kan oh nan kalohk. Eri ni Wayne eh koasoanehdi me e anahne wehwehkihla mwahu duwen dahme Pauline kin kamehlele, e peki rehn ohlo en onop Paipel reh.

17. Dahme kitail en dehr kapwukoahki pein kitail, ahpw dahme kahrehda kitail en dehr medewe me kisehtail kan sohte kak wekila?

¹⁷ Kitail kin koapworopworki me kisehtail kan koaros pahn iang kitail papah Siohwa. Ahpw, mendahki atail nanti koaros pwehn sewese kisehtail kan en wiahla sapwellimen Koht ladu kan, ele irail sohte pahn pedolong nan padahk mehlel. Ma ih met me wiawi, kitail en dehr kapwukoahki pein kitail arail pilipil. Ni mehlel, kitail sohte kak idingkihong emen en pwungki dahme kitail kin kamehlele. Ahpw ma kisehmw kan kin kilang uwen omw peren pwehki ke kin papah Siohwa, e kak kamwakid laud irail. Kapakapkin irail. Koasoiong irail ni kadek. Dehr uhdihsang omw sewese irail. (Wiewia 20:20) Ken kamehlele me Siohwa pahn ketin kapaiahda omw kin nannanti. Oh ma kisehmw kan pilada en rong uhk, irail pahn poadoandoarla!