1, 2. Dahme kahrehda Kristian keidi kan kin men ese duwen Rom irelaud 8?

 ELE ke wadekehr Rom 8:15-17 erein ahnsoun Kataman en pwoulahn Siseso. Iretikitik pwukat kawehwehda ia duwen Kristian keidi kan ar ese me re ahneki koapworopwor en mour kohkohlahte nanleng. Rom 8:1 kahdaneki me keidi kan “irail akan me kin miniminiong Krais.” Ahpw ia duwe, Rom irelaud 8 kin kadoadoahk ongete me keidi kan? De e pil kak sewese irail kan me ahneki koapworopwor en mour kohkohlahte nin sampah?

² Rom irelaud 8 uhdahn ntingdi ong me keidi kan. Irail alehdi sapwellimen Koht manaman nin duwen irail kan me ‘kasikasik ahnsou me Koht pahn ketin sapwellimankinirailla oh kamaiauwihirailda’ sang paliwar uduk. (Rom 8:23) Ni ahnsou kohkohdo, re pahn wiahla sapwellimen Koht kei nanleng. Sang ni pweinen pweipwei sapahlo, Siohwa ketin mahkohngehr diparail kan. E ketin kilangwohng irail nin duwen aramas pwung kei kahrehda irail kak wiahla sapwellime.​—Rom 3:23-26; 4:25; 8:30.

3. Dahme kahrehda irail kan me ahneki koapworopwor en mour kohkohlahte nin sampah pil anahne onopki Rom irelaud 8?

 ³ Ahpw ni tepin pwuhken Rom, Pohl ntingihedi duwen emen ohl me kaidehn me keidi men ahpw me Siohwa ketin wiahki aramas pwung men. Ohl menet iei Eipraam. Ohl menet mihmi mahsie mwohn Sises ketin meirongkihla sapwellime mour nin duwen pweinen pweipwei sapahl ehu. (Wadek Rom 4:20-22.) Rahnwet, Siohwa pil kak ketin wiahki Kristian lelepek kan me ahneki koapworopwor en mour kohkohlahte nin sampah nin duwen aramas pwung kei. Re pil kak paiekihda kaweid me kohsang Rom irelaud 8.

4. Dahme kitail en pein idek rehtail ni atail wadek Rom 8:21?

⁴ Nan Rom 8:21, kitail wadek duwen sapwellimen Siohwa inou me sapwellime sampah kapwo pahn pweida oh me aramas akan pahn maiaudahsang dihp oh mehla. Iretikitiko mahsanih me re pahn “iang sapwellimen Koht seri kan nan arail saledek lingan.” Ke kak medewehla pein kowe nan sampah kapwo? Kitail pahn koasoiapene dahme kitail anahne wia pwehn kousoan nan sapwellimen Koht sampah kapwo.

5. Dahme Pohl kawehwehda nan Rom 8:4-13?

⁵ Wadek Rom 8:4-13. Nan Rom irelaud 8, Pohl kawehwehda soangen pwihnen aramas riau, irail kan me kin momour nin duwen “ahnepen aramas” de ineng en uduk oh irail kan me kin nsenohki kapwaiada de medemedewehte soahng kan me pid sapwellimen Koht manaman. Ekei medewe me Pohl kin koasoakoasoia irail Kristian kan oh pil irail kan me kaidehn Kristian. Ahpw wasaht Pohl ntingwohng Kristian ko me Koht ketin ‘malipe pwe irail en wiahla sapwellime.’ (Rom 1:7) Eri irail me momour nin duwen “ahnepen aramas” oh pil irail kan me medemedewehte soahng kan me pid sapwellimen Koht manaman wia Kristian kei. Ahpw ia duwen arail wekpeseng?

6, 7. (a) Ia ekei wehwehn “uduk” nan Paipel? (b) Ia duwen Rom 8:4-13 eh doadoahngki lepin lokaia pwukat “ahnepen aramas” de ineng en uduk?

⁶ Ni Paipel eh doadoahngki lepin lokaia “uduk,” e kak dokedoke soahng kei. Ekei  pak e kin wehwehki paliwaratail. (Rom 2:28; 1 Kor. 15:39, 50) E pil kak dokedoke kisehn peneinei. Karasepe, Pohl kahdaneki mehn Suhs ko “kisehn udukei oh ntahi.”​—Rom 9:2.

⁷ Pwehn wehwehki dahme Pohl koasoiahki duwen irail me kin momour nin duwen “ahnepen aramas” de ineng en uduk, kitail kak kilang Rom 7:5. Pohl ntingihedi: “Ni ahnsou me kitail momour nin duwen ahnepen aramas, ineng suwed kan me Kosonnedo kin kamwakidada loalatail kin doadoahk ni paliwaratail kan.” Wasaht Pohl kawehwehda me irail me kin momour nin duwen “ahnepen aramas” de ineng en uduk iei irail kan me kin medemedewehte oh idawehn arail ineng suwed kan oh wiewia dahme re men wia.

8. Dahme kahrehda Pohl anahne katamankihong Kristian keidi ko ren dehr momour nin duwen “ahnepen aramas”?

⁸ Dahme kahrehda Pohl katamankihong Kristian keidi ko ren dehr momour nin duwen “ahnepen aramas”? Oh dahme kahrehda Kristian kan koaros rahnwet anahne mehn kataman wet? Pwehki sapwellimen Koht ladu kan koaros kak tepida wiahkihla pein ar ineng kan me keieu kesempwal nan ar mour. Karasepe, Pohl ntingihedi me ekei Kristian ko nan Rom kin wia lidun “pein nsenarail.” Met kak wehwehki me wia nsenen pwopwoud, mwenge, de mehn kamweit teikan kin wia soahng kan me keieu kesempwal nan arail mour. (Rom 16:17, 18; Pil. 3:18, 19; Sud 4, 8, 12) Pil erein ahnsou ehu, mie irair ehu me pwarada nan mwomwohdisohn Korint duwen brother men eh kin wia tiahk samin me pid nsenen pwopwoud “rehn en eh pahpa eh pwoud.” (1 Kor. 5:1) E sansal me Kristian en mahs ako anahne ahn Pohl mehn kataman duwen arail kin momour nin duwen “ahnepen aramas.”​—Rom 8:5, 6.

9. Dahme Rom 8:6 sohte kin koasoakoasoia?

⁹ Mehn kataman wet pil kin kadoadoahk rahnwet. Emen me pil papahkiher Siohwa erein sounpar tohto kakete tepida momour nin duwen “ahnepen aramas.” Eri ia duwe, Pohl ndinda me kitail en dehr medemedewe soahng kan duwehte mwenge, doadoahk en mwohni, mehn kamweit kan, de men pwopwoud? Soh. Kitail kin wia soahng pwukat nan atail mour. Sises pil  kupwurperenki kisin tungoal kan oh ketin kamwengehla meteikan. Oh Pohl ntingihedi me wendipene wia mehkot kesempwal nan mouren pwopwoud.

10. Ia wehwehn lepin lokaia pwukat “nsenohki kapwaiada” de “medemedewehte”?

¹⁰ Ia wehwehn lepin lokaia pwukat “nsenohki kapwaiada” de “medemedewehte” me Pohl nda? Lepin lokaiahn Krihk me Pohl doadoahngki kin dokedoke emen eh kin medemedewehte oh pilipilahne mehkot. Emen ohl saman kawehwehda me lepin lokaia pwukat dokedoke soangen aramas me kin “keieu nsenohki, kalapw koasoia,” oh medemedewehte pein arail ineng roporop kan. Irail kin mweidohng soangen ineng pwukat en kaunda arail mour.

11. Soahng dah kei me kakete wiahla mehkan me nohn kesempwal ong kitail?

¹¹ Kristian ko nan Rom anahne pein kasawih irail oh diarada dahme re kin medemedewe. Ia duwe, re kin medemedewehte “ahnepen aramas”? Rahnwet, kitail pil anahne medewe duwen dahme keieu kesempwal ong kitail. Dahme kitail kin keieu perenki koasoia? Dahme kitail kin uhdahn perenki wia? Ekei tehkada me re kin kalapw medemedewe en song soangsoangen wain kan, kapwatahda imwarail, pwainda likou kapw, kalaudehla neirail mwohni, de koasoakoasoane ahnsoun kommoal oh mwemweit. Soahng pwukat sohte sapwung. Ele kitail kin wia soahng pwukat nan atail mour. Karasepe, Sises pil ketikihda wain ni kapwopwoud ehu, oh Pohl kaweidki Timoty en nim “ekis wain” ong eh roson mwahu. (1 Tim. 5:23; Sohn 2:3-11) Ahpw wain sohte wia mehkot me keieu kesempwal nan arail mour. A ia duwen kitail? Dahme kitail kin keieu nsenohki nan atail mour?

12, 13. Dahme kahrehda kitail anahne kanahieng dahme kitail kin medemedewe?

¹² Pohl ntingihedi: “Imwilahn arail nsenohki kapwaiada ahnepen aramas, iei mehla.” (Rom 8:6) Ia wehwehn met? Ma kitail kin momour nin duwen “ahnepen aramas,” kitail kak luhssang atail nanpwungmwahu rehn Siohwa ahnsou wet oh pil atail mour ni ahnsou kohkohdo. Ahpw met sohte anahne wiawihong kitail. Aramas kak wekila. Tamanda ohl en Korint me kin wia tiahk samino? Mwurin eh ale peneu, e wekila. E uhdihsang idawehn eh ineng samin kan oh pwurehng papah Siohwa ni ahl me mwakelekel.​—2 Kor. 2:6-8.

¹³ Ohlo wia karasaras laud ehu duwen momour nin duwen “ahnepen aramas,” ahpw mendahki met, e wekila. Eri ma Kristian men rahnwet tepida idawehn eh ineng sapwung kan ahpw kaidehn sapwellimen Siohwa koasoandi kan, e pil kak wekila. Atail tamataman ahn Pohl kaweid kak kamwakid kitail en wiahda wekidekla kan me anahn.

14, 15. (a) Dahme Pohl kaweidki kitail en medemedewe? (b) “Medemedewehte soahng kan me pid sapwellimen Koht manaman” sohte wehwehki dah?

¹⁴ Mwurin Pohl koasoia duwen keperpen en “nsenohki kapwaiada ahnepen aramas,” e nda me medemedewehte soahng kan me pid sapwellimen Koht manaman kin wehwehki “mour oh popohl.” Ia uwen kaselel en keting wet me kitail kak ahneki!

¹⁵ Ahpw en “medemedewehte soahng kan me pid sapwellimen Koht manaman” sohte wehwehki me emen kin pohnsehsehla dahme kin uhdahn wiewiawi. E sohte wehwehki me emen en kin medemedewehte oh koasoakoasoiahte duwen Siohwa de Paipel.  Kristian kan pil kin ahneki soangen mour me duwehte ahn meteikan. Medewehla tepin Kristian ko. Re perenki dahme re kin kang oh nim. Re pil kin pwopwoudida, ahneki peneinei, oh wia doadoahk en mwohni.​—Mark 6:3; 1 Des. 2:9.

16. Dahme keieu kesempwal nan ahn Pohl mour?

¹⁶ Ahpw Pohl oh tepin Kristian teiko sohte mweidohng mepwukat en wiahla soahng kei me keieu kesempwal nan arail mour. Karasepe, kitail ese me Pohl kin pein koadoahkihada nah mwohni sang ni eh kin wia ihmw likou kan. Ahpw eh doadoahko kaidehn iei me keieu kesempwal nan eh mour. Dahme keieu kesempwal nan ahn Pohl mour iei en papah Koht. Pohl kin medemedewehte doadoahk en kalohk oh katohnpadahk. (Wadek Wiewia 18:2-4; 20:20, 21, 34, 35.) Kristian en Rom ko anahne alasang Pohl, pil duwehte kitail.​—Rom 15:15, 16.

17. Soangen kamwahu dah kan me kohsang atail kin “medemedewehte soahng kan me pid sapwellimen Koht manaman”?

¹⁷ Ia pahn mwomwen atail mour ma kitail kin medemedewehte en papah Siohwa? Rom 8:6 (NW) mahsanih: “Medemedewehte soahng kan me pid sapwellimen Koht manaman kin wehwehki mour oh popohl.” Atail wia met kin pidada atail mweidohng sapwellimen Siohwa manaman en kaweid atail madamadau oh sukuhlki en ahneki soangen madamadauohte me e sapwellimanki. Siohwa ketin inoukihong kitail mour peren oh nsenamwahu ahnsou wet oh pil mour kohkohlahte ni ahnsou kohkohdo.

18. Ia duwen atail kak ahneki popohl ni atail kin “medemedewehte soahng kan me pid sapwellimen Koht manaman”?

¹⁸ Ia wehwehn ahn Pohl nda me “medemedewehte soahng kan me pid sapwellimen Koht manaman” kak wahdohng kitail popohl? Koaros men ahneki meleilei, ahpw mehlel madamadau meleilei. Ahpw me malaulaute me kin diar. Kalahngan ong Siohwa, kitail kak ahneki meleilei mehlel nan atail madamadau. Kitail pil kak ahneki meleilei rehn atail peneinei oh pil tohn mwomwohdiso. Pwehki kitail sohte unsek, mie pak me kitail pahn ahneki kahpwal rehn riatail Kristian kan. Ni met eh wiawi, kitail kin idawehn sapwellimen Sises kaweid: “Kohwei oh kapwungala nanpwungamwa.” (Mad. 5:24) Tamataman me riomw Kristiano pil kin papah Siohwa, Kohto “me tepin atail popohl.”​—Rom 15:33; 16:20.

19. Popohl tohrohr dahieu me kitail kak ahneki?

¹⁹ Ma kitail kin medemedewehte soahng kan me pid sapwellimen Koht manaman, kitail pil pahn ahneki popohl rehn Koht. Soukohp Aiseia kawehwehda: “Komwi [Siohwa] me kin ketikihdo popohl mehlel ong irail kan me nan kapehd kehlail oh tengeteng oh kin likih komwi.”​—Ais. 26:3; wadek Rom 5:1.

20. Dahme kahrehda ke kalahnganki kaweid en Rom irelaud 8?

²⁰ Sohte lipilipil ma kitail ahneki koapworopwor en mour kohkohlahte nanleng de nin sampah, kitail koaros kak paiekihda kaweid mwahu me mi nan Rom irelaud 8. Kitail kalahnganki me Paipel kin kangoange kitail en medemedewehte atail en papah Siohwa ahpw kaidehn pein atail ineng kan. Kitail ese me ni atail kin medemedewehte soahng kan me pid sapwellimen Koht manaman, kitail kak ahneki keting kaselel wet: “Sapwellimen Koht kisakis sapan, iei mour soutuk rehn Krais Sises atail Kaun.”​—Rom 6:23.