1-2. Nin duwen me wiawihong Angelito, dahme emenemen kitail anahne wia?

IA DUWE, omw pahpa nohno wia Sounkadehdehn Siohwa kei? Ma ei, tamataman me ke sohte kak sohsohki nanpwungmwahu rehn Siohwa sang ira. Mehnda ma atail pahpa nohno kin papah Koht de soh, emenemen kitail anahne pein kakairada nanpwungmwahu kehlail rehn Siohwa.

² Medewehla dahme wiawihong brother men me adaneki Angelito. E tikida nan peneinei ehu me wia Sounkadehde kei. Ahpw, ni ahnsou me e pwulopwul, e pehm me e sohte uhdahn karanih Koht. E nda: “I kin papah Siohwa ihte pwehki I men wia dahme ei peneineio kin wiewia.” Ahpw, Angelito koasoanehdi en kihong eh ahnsou laud en wadek Mahsen en Koht oh doudouloale, oh e tepida kalaudehla eh kin kapakap ong Siohwa. Ia imwilahn met? Angelito nda: “I sukuhlki me ihte ahl en karanihala Semeio, Siohwa, iei en pein esehla ih.” Dahme wiawihong Angelito kahrehiong kitail en medemedewe peidek kesempwal pwukat: Ia wekpeseng en ese soahng kei duwen Siohwa oh uhdahn esehla mwahu Siohwa? Ia duwen atail kak esehla Siohwa?

3. Ia wekpeseng en ese Siohwa oh uhdahn esehla mwahu Siohwa?

³ Kitail kak medewe me kitail ese Siohwa pwehki kitail ese mware de ekei soahng kan me E kin ketin mahsanih de wia. Ahpw en esehla mwahu Siohwa kin pidada laudsang met. Kitail anahne kihong ahnsou pwehn sukuhlki duwen Siohwa oh sapwellime irair kaselel kan. Ihte ahnsowo me kitail kak tepida wehwehki kahrepen eh kin ketin mahsen de wia soahng kan. Met pahn sewese kitail en wehwehki ma Siohwa ketin kupwurki atail madamadau, pilipil oh wiewia kan. Ni atail wehwehkihla kupwuren Siohwa ong kitail, kitail anahne wia dahme kitail sukuhlkiher.

4. Ia duwen atail tehk mehn kahlemeng kan nan Paipel eh kak sewese kitail?

 ⁴ Ekei aramas ele kin kauwe kitail pwehki atail kin men papah Siohwa, oh ele irail kin kalaudehla arail uhwong kitail ni atail tepida werekiong sapwellime aramas akan. Ahpw, ma kitail kin likih Siohwa, e sohte pahn ketin likidmeliehla kitail. Kitail pahn tepida wiahda poahsoanpen atail nanpwungmwahu rehn Koht me pahn mihmi kohkohlahte. Ia duwe, kitail kak uhdahn esehla mwahu Siohwa? Ei, kitail kak! Mehn kahlemeng en ohl soh unsek kan, duwehte Moses oh Nanmwarki Depit, kin kadehdehda me met kak wiawi. Ni atail pahn tehk dahme ira kin wia, kitail pahn sapengala peidek riau: Ia duwen ara esehla mwahu Siohwa? Oh mehn kasukuhl dah me kitail kak sukuhlkihsang ara mehn kahlemeng?

5. Dahme Moses pilada en wia?

⁵ Moses mwekidki dahme e sukuhlki. Ni eh sounpar mpen 40, Moses pilada en werekiong sapwellimen Koht aramas akan, mehn Ipru kan, ahpw e sohte men aramas kan en ekerkin ih “nein Parao serepeino nah pwutak.” (Ipru 11:24) Moses pwilikihdi eh pwukoa nin duwen aramas lapalap men. Ni Moses eh sewese mehn Israel ko, me wia lidu kei nan Isip, e ese me Parao pahn uhdahn lingeringerda pah. Parao wia nanmwarki lapalap oh kehlail men, oh mehn Isip ko kin wiahki ih koht men. Met kasalehda me ahn Moses pwoson uhdahn kehlail! Moses kin likih Siohwa. Soangen likilik wet iei poahsoanpen eh nanpwungmwahu rehn Siohwa me e ahneki erein eh mour.​—Lep. Pad. 3:5.

6. Dahme kitail kak sukuhlkihsang ahn Moses eh mehn kahlemeng?

⁶ Dahme kitail kak sukuhlkihsang met? Duwehte Moses, kitail koaros anahne wiahda pilipil ehu: Ia duwe, kitail pahn pilada en papah Koht oh werekiong sapwellime aramas akan? Ele kitail anahne wiahda tounmetei kan pwehn papah Koht, oh ele kitail kin lelohng uhwong sang irail kan me sehse Siohwa. Ahpw ma kitail kin likih Samatailo nanleng, kitail kak kamehlele me e pahn ketin sewese kitail!

7-8. Dahme Moses pousehlahte sukuhlki?

⁷ Moses pousehlahte sukuhlki duwen sapwellimen Siohwa irair kaselel kan oh wia kupwure. Karasepe, ni Moses eh alehdi pwukoa en kahluwa mehn Israel kan sang Isip, e peikasalda oh pwurupwurehng patohwanohng Siohwa me e sohte warohng. Koht ketin sapeng ni kadek, oh ketikihda sawas ong Moses. (Eks. 4:10-16) Imwilahn met, Moses kakehr wahla rohng en kadeik kehlail ong Parao. Moses eri kilang duwen Siohwa eh ketin doadoahngki sapwellime manaman ni Eh ketin kapitala mehn Israel ko ahpw ketin kasohrehla Parao oh nah karis en sounpei kan nan Sehd Weitahtao.​—Eks. 14:26-31; Mel. 136:15.

⁸ Mwurin Moses eh kahluwa mehn Israel ko sang Isip, irail kin kalapw rapahki soahng kan pwehn kaulimki. Mendahki met, Moses kin kilang me Siohwa kin ketin kasalehda kanengamah laud ong sapwellime aramas akan me E ketin kapitala sang wia lidu kei. (Mel. 78:40-43) Moses pil kilang Siohwa eh ketin kasalehda aktikitik laud ni Eh ketin wekidala kupwure mwurin Moses peki Ih en dehr ketin kasohrehla mehn Israel ko.​—Eks. 32:9-14.

9. Nin duwen me Ipru 11:27 mahsanih, ia uwen keren en nanpwungmwahu me Moses ahneki rehn Siohwa?

⁹ Mwurin arail mweselsang Isip, ahn Moses nanpwungmwahu rehn Siohwa uhdahn kerenla me kahrehda mwomwen me e kak kilang Semeo nanleng. (Wadek Ipru 11:27.) Paipel kasalehda uwen keren en ara nanpwungmwahu  ni eh mahsanih: “KAUN-O ahpw kin ketin mahseniong Moses ni sansal mehlel, duwehte aramas emen eh kin lokaiaiong kompoakepah.”​—Eks. 33:11.

10. Pwe kitail en esehla mwahu Siohwa, dahme kitail anahne wia?

¹⁰ Dahme kitail kak sukuhlkihsang met? Pwe kitail en esehla mwahu Siohwa, kitail anahne wia laudsang suksukuhlkihte duwen sapwellime irair kaselel kan, kitail pil anahne wia kupwure. Kupwuren Siohwa rahnwet iei me “soangen aramas koaros en komourla oh esehla loalokong pwung en me mehlel.” (1 Tim. 2:3, 4) Ehu ahl me kitail kin wia kupwuren Koht iei sang ni atail kin padahkihong meteikan duwen Siohwa.

11. Ni atail kin padahkihong meteikan duwen Siohwa, ia duwen atail kin kalaudehla atail esehla ih?

¹¹ Kitail kin kalapw kilang me ni atail kin padahkihong meteikan duwen Siohwa, pein kitail kin kalaudehla atail esehla ih. Karasepe, kitail kin kilang sapwellimen Siohwa kadek ong aramas akan ni e ketin sewese kitail en diar irail kan me ahneki mohngiong mwahu. (Sohn 6:44; Wiewia 13:48) Kitail kilang manaman en Mahsen en Koht kin doadoahk ni atail kilang irail ko me kitail onop rehrail en uhdihsang wia soahng suwed kan oh tepida pwuhriong nan mour kapw. (Kol. 3:9, 10) Oh kitail kilang mehn kadehde duwen sapwellimen Koht kanengamah ni eh kin ketikihong aramas tohto nan atail wasahn kalohk ahnsou laud en sukuhlki duwen ih oh komourala.​—Rom 10:13-15.

12. Nin duwen me Eksodus 33:13 kasalehda, dahme Moses peki, oh dahme kahrehda?

¹² Moses kesempwalki eh nanpwungmwahu rehn Siohwa. Pil mwurin eh wiahda manaman kan ni mwaren Koht, Moses ni wahu peki rehn Siohwa en ketin mweidohng ih en pil kalaudehla eh esehla Siohwa. (Wadek Eksodus 33:13.) Ele Moses sounpar 80 samwa ni eh wiahda pekipek wet, ahpw e ese me miehte soahng tohto me e anahne sukuhlki duwen Seme limpoako nanleng.

13. Ia ehu ahl me kitail kak kadehdehda me kitail kin kesempwalki atail nanpwungmwahu rehn Koht?

¹³ Dahme kitail sukuhlkihsang met? Sohte lipilipil uwen werei en atail kin papah Siohwa, kitail en kesempwalkihte atail nanpwungmwahu rehn Siohwa. Ehu ahl me kitail kak kadehdehda me kitail kin kesempwalki atail nanpwungmwahu rehn Koht iei ni atail kin pato ong ih ni kapakap.

14. Dahme kahrehda kapakap kin kesempwal pwehn kalaudehla atail sukuhlki duwen Koht?

¹⁴ Ma ke men wia kompoakepah mwahu men ong emen, ke anahne kalapw koasoiong ih. Eri ken karanihala Koht sang ni omw kin kalapw kapakap ong ih oh dehr masak en kasalehiong ih audepen omw mohngiong. (Ep. 6:18) Krista, me kin kousoan Turkey nda: “Ei poakohng Siohwa oh likih ih kin kekeirda ahnsou koaros me I kin kasalehiong ih ei madamadau nan ei kapakap oh mwuhr kilang eh kin ketin sewese ie. Ei kin kilang Siohwa eh kin ketin sapengala ei kapakap kan, met sewese ie en kilangwohng Siohwa nin duwen Semei oh Kompoakepahi.”

15. Dahme Siohwa ketin mahsaniheki Nanmwarki Depit?

¹⁵ Nanmwarki Depit ipwidi nan wehi ehu me inoudahr ong Siohwa Koht. Ahpw Depit wia laudsang en ihte idawehn eh peneineio kaudokiong Siohwa. E pein kakairada eh nanpwungmwahu rehn Koht, oh Siohwa uhdahn ketin poakohng ih. Pein Siohwa ketin mahsanih me Depit wia ‘ohl emen me kin kaperenda kupwure.’ (Wiewia 13:22) Ia duwen Depit eh karanihala Siohwa?

16. Dahme Depit sukuhlki duwen Siohwa ni eh kilang kepikipik kan?

 ¹⁶ Depit sukuhlki duwen Siohwa sang kepikipik kan. Ni ahnsou me Depit pwulopwul, ahnsou laud e kin mi likin ihmw, apwahpwalih nein eh pahpao sihpw kan. Ele ih ahnsou ko me e tepida doudouloale soahng kan me Siohwa ketin kapikada. Karasepe, ni Depit eh kin kilengdahla nipwong kan pahnlahng, e sohte ihte kilang usu kidkid kei, ahpw e pil pahn wehwehkihda irair kaselel en Ih me ketin kapikada soahng pwukat. Depit mwekidkihda met oh ntingihedi: “Ia uwen sansal en pahnlahng eh kasalehda sapwellimen Koht lingan! Ia uwen eh kasalehda mwahu mehkan me eh ketin wiahda!” (Mel. 19:1, 2) Ni Depit eh medemedewe duwen kapwuriamwei oh mwahu en mwomwen aramas ar kapikipikda, e kin kilang me Siohwa uhdahn ketin erpit. (Mel. 139:14) Ni Depit eh song en wehwehki soahng kan me Siohwa ketin wiahda, e pohnese uwen eh tikitik mwohn Siohwa.​—Mel. 139:6.

17. Dahme kitail kak sukuhlki ma kitail kin doudouloale kepikipik kan?

¹⁷ Dahme kitail kak sukuhlkihsang met? Nsenohki esehla duwen kepikipik kan. Kihong ahnsou pwehn tehk sampah kaselel wet me Siohwa ketin kapikada; kilangwohng mepwukat nin duwen soahng kapwuriamwei kei! Rahn koaros, doudouloale dahme kepikipik kan limwahmw​—tuhke kan, mahn akan, oh aramas akan—​kin padahkihong uhk duwen Siohwa. Eri ehuehu rahn ke pahn kalaudehla omw sukuhlki duwen Semomw limpoako. (Rom 1:20) Oh ehuehu rahn ke pahn kilang me omw limpoak ong ih pahn lalaudla.

18. Nin duwen me Melkahka 18 kasalehda, dahme Depit pohnese?

¹⁸ Depit pohnese me Siohwa kin ketin sewese ih. Karasepe, ni Depit eh doarehla nein eh pahpao sihpw ko sang laion oh pehr men, e pohnese me Siohwa me ketin sewese ih en kemehla mahn lawalo ko. Ni Depit eh pelianda sounpei kodono, Kolaiad, e kilang ni sansal me Siohwa me ketin kaukaweid ih. (1 Sam. 17:37) Oh ni eh tangasang Nanmwarki peirino, Sohl, Depit pohnese me Siohwa me ketin doarehla ih. (Mel. 18, nting kan me mi pohn irelaudo.) Ma Depit aklapalap, ele e pahn medewe me pein ih me wiahda soahng pwukat. Ahpw Depit kin aktikitik, eri e kak pohnese me Siohwa me kin ketin sewese ih nan eh mour.​—Mel. 138:6.

19. Dahme kitail kak sukuhlkihsang mehn kahlemeng en Depit?

¹⁹ Dahme kitail kak sukuhlkihsang met? Kitail anahne wia laudsang en ihte peki rehn Siohwa sapwellime sawas. Kitail pil anahne song en pohnese iahd oh ia duwen eh kin ketikihong kitail sawas. Ma kitail ni aktikitik pohnese atail soh itar kan, kitail pahn kilang ni sansal me Siohwa kin ketin sewese kitail en wia dahme kitail sohte kak wia. Oh ehuehu ahnsou me kitail kilang Siohwa eh ketin sewese kitail, atail nanpwungmwahu reh pahn kehlailla. Isaac, brother men nan Fiji me kin papah Siohwa sounpar tohto, diarada me met mehlel. E nda: “Ni ei medewehla duwen ei mour, I kak kilang duwen Siohwa eh ketin sewese ie sangete ahnsou me I tepida onop Paipel leledo rahnwet. Imwilahn met, I uhdahn karanihala Siohwa.”

20. Dahme kitail kak sukuhlkihsang ahn Depit eh nanpwungmwahu rehn Siohwa?

²⁰ Depit kahlemengih sapwellimen Siohwa irair kaselel kan. Siohwa ketin kapikada kitail en ahneki koahiek en kahlemengih sapwellime irair kaselel kan. (Sen. 1:26) Ni atail kalaudehla atail sukuhlki duwen sapwellimen Siohwa irair kaselel kan, met pahn kalaudehla atail en kahlemengih ih. Depit esehla mwahu Semeo nanleng, eri e kak kahlemengih Ih nan  eh wiewia kan ong meteikan. Tehk karasaras wet. Depit dipada mwohn Siohwa ni eh wiahda dipen kamwahl rehn Padsipa oh mwuhr kemehla en liho eh pwoudo. (2 Sam. 11:1-4, 15) Ahpw Siohwa ketin pilada en kupwurehla Depit, ohl men me kasalehiong mahk ong meteikan. Pwehki Depit ahneki nanpwungmwahu keren rehn Siohwa, mehn Israel kan uhdahn poakohng ih, oh Siohwa ketin doadoahngki ih nin duwen mehn kahlemeng ehu ong nanmwarki teikan en Israel.​—1 Nan. 15:11; 2 Nan. 14:1-3.

21. Nin duwen me Episos 4:24 oh 5:1 mahsanih, ia imwilahn atail kin “kahlemengih Koht”?

²¹ Dahme kitail kak sukuhlkihsang met? Kitail anahne “kahlemengih Koht.” Atail wia met sohte pahn ihte wia kamwahupatail ahpw e pil kin sewese kitail en esehla ih. Ni atail kahlemengih sapwellimen Koht irair kaselel kan, kitail kin kadehdehda me kitail sapwellime seri kan.​—Wadek Episos 4:24; 5:1.

22-23. Dahme pahn wiawi ma kitail kin kapwaiada dahme kitail sukuhlki duwen Siohwa?

²² Nin duwen me kitail kilangehr, Siohwa ketin kasalehiong kitail duwen ih sang ni kepikipik kan oh sapwellime Mahsen, Paipel. Pwuhk wet audaudki mehn kahlemeng en sapwellimen Koht ladu lelepek kan me kitail kak alasang, duwehte Moses oh Depit. Siohwa ketin wiadahr dahme anahn. Kitail anahne wia dahme anahn oh sukuhlki uwen atail kak duwen ih.

²³ Sohte imwin dahme kitail kak sukuhlki duwen Siohwa. (Ekl. 3:11) Me kesempwal iei, kaidehn uwen laud en atail ese duwen ih, ahpw dahme kitail kin wia ong dahme kitail ese. Ma kitail kin kapwaiada dahme kitail sukuhlki oh song en kahlemengih Samatail limpoako, e pahn ketin pousehlahte karanihala kitail. (Seims 4:8) Sang sapwellime Mahsen, e ketin kamehlelehiong kitail me e sohte pahn ketin likidmeliehla irail kan me kin raparapahki ih.