1. Wekidekla dah me wiawi nan ekei sahpw nan sounpar kan me keren?

EREIN sounpar kidkid kei, pali laud en aramas akan nin sampah kin mie arail pelien lamalam. Ahpw sounpar kan me keren, wekidekla laud wiawi. Tohtohla aramas me kin nda me sohte arail pelien lamalam. Ni mehlel, nan ekei sahpw, pali laud en aramas akan kin nda me re sohte nsenohki pelien lamalam. *​—Mad. 24:12.

2. Dahme kahrehda aramas tohto sohte kin nsenohki pelien lamalam?

² Dahme kahrehda tohtohla aramas kin nda me irail sohte nsenohki pelien lamalam? * Ekei kin kedirepwkihla peren en sampah de kapwunod kan. (Luk 8:14) Ekei sohte kamehlele me mie Koht. Meteikan kamehlele Koht ahpw kin medewe me pelien lamalam solahr kadoadoahk oh sohte kin pahrekiong palien sains oh loalokong pwung. Ele irail kin rong kompoakparail kan, sounpadahk kan, de irail me kin doadoahk nan palien rohng kan nda me mour pein miehla, ahpw irail sohte kin kalapw rong duwen kahrepe mwahu kan en kamehlele Koht. Meteikan kin kailongki kaun en pelien lamalam kan me kin noahroke mwohni oh men ahneki manaman. Nan ekei sahpw, mie kosonned en koperment kan me kin irehdi doadoahk en pelien lamalam kan.

3. Ia kahrepen iren onop wet?

³ Sises ketin kasik kitail en “padahkihong aramas en wehi koaros pwe ren wiahla nei tohnpadahk.” (Mad. 28:19) Ia duwen atail kak  sewese irail kan me sohte nsenohki pelien lamalam en sukuhlki poakohng Koht oh wiahla sapwellimen Krais tohnpadahk? Kitail anahne pohnese me mwomwen ahn aramas men eh kin mwekidki dahme kitail padahngki kin pidada wasa me e tikida ie. Karasepe, aramas akan me kohsang Iurop ele sohte pahn rong kitail ni atail padahk ong irail duwehte irail kan me kohsang Eisia. Dahme kahrehda? Nan Iurop, aramas tohto ele ekis ese soahng kei duwen Paipel oh irail kin rong me Koht ketin kapikada soahng koaros. Ahpw nan Eisia, pali laud en aramas akan ekiste ese de sohte douluhl ese duwen Paipel, oh ele irail sohte kin kamehlele Sounkapikadao. Kahrepen iren onop wet iei en sewese kitail en sair mohngiong en koaros me kitail tuhwong nan kalohk, sohte lipilipil wasa re kohsang ie de dahme irail kin kamehlele.

4. Dahme kahrehda kitail kak kolokolete madamadau pwung?

⁴ Ahneki Madamadau Pwung. Sounpar koaros, mie aramas me sohte kin nsenohki pelien lamalam me wiahla Sounkadehdehn Siohwa kei. Tohto irail kin wauneki tiahk mwahu oh kin tateki wiewia mwalaun kan en pelien lamalam. Meteikan sohte kin wauneki tiahk mwahu oh me tohto rehrail ahneki tiahk kan me suwed me re anahne kesehla. Pwehki sapwellimen Siohwa sawas, kitail kak kamehlele me kitail pahn diarada irail kan me “ahneki mohngiong mwahu en ale mour soutuk.”​—Wiewia 13:48; 1 Tim. 2:3, 4.

5. Dahme kin kalapw kamwakid aramas akan en rong duwen padahk en rongamwahwo?

⁵ Kadek oh Kamantik. Aramas akan kin kalapw men rong rongamwahwo me kitail padahngki, kaidehn pwehki dahme kitail nda, ahpw pwehki mwomwen atail nda. Irail kin kalahnganki ni atail kin kasalehda kadek oh kamantik, oh uhdahn nsenohkin irail. Kitail sohte kin idingkihong irail en rong kitail. Ahpw kitail kin song en wehwehki kahrepen arail ahneki soangen madamadauo duwen pelien lamalam. Karasepe, ekei sohte kin men koasoia duwen pelien lamalam ong emen me re sehse. Meteikan kin medewe me e sohte mwahu en idek rehn emen eh madamadau duwen Koht. Ekei pil kin namenengki ma meteikan kilang irail wadek Paipel, ahpw mehlel rehn emen Sounkadehdehn Siohwa. Sohte lipilipil kahrepeo, kitail kin song en wehwehki arail pepehm.​—2 Tim. 2:24, ntp.

6. Ia duwen wahnpoaron Pohl eh wekidala mwomwen eh koasoi, oh ia duwen atail kak alasang ih?

⁶ Dahme kitail kak wia ma emen kin soansuwedki atail doadoahngki lepin lokaia kan duwehte “Paipel,” “kapikipik kan,” “Koht,” de “pelien lamalam”? Kitail kak alasang wahnpoaron Pohl oh wekidala mwomwen atail koasoi ong irail. Ni eh kin koasoiong mehn Suhs kan, Pohl kin doadoahngki Paipel. Ahpw, ni eh koasoiong mehn Krihs kan nan Areopakus, e sohte doadoahngki iren Paipel kan. (Wiewia 17:2, 3, 22-31) Ia duwen atail kak alasang ahn Pohl mehn kahlemeng? Ma ke tuhwong emen me sohte pwungki Paipel, e pahn keieu mwahu en dehr doadoahngki iren Paipel kan ni omw koasoiong ih. Ma ke pehm me aramaso pahn soansuwedki wadek Paipel rehmw, song en kasalehiong ih iren Paipel kan ni ahl ehu me meteikan sohte kak kilang, ele ni omw doadoahngki sehlpwohn de tablet ape.

7. Dahme kitail anahne wia pwehn alasang mehn kahlemeng en Pohl nin duwen me 1 Korint 9:20-23 kasalehda?

⁷ Wehwehki Irail oh Rong Kanahieng. Kitail anahne wehwehki kahrepen aramas akan me kitail tuhwong ar kin ahneki soangen madamadauo. (Lep. Pad. 20:5) Pil pwurehng tehk ahn Pohl mehn kahlemeng. E tikida rehn mehn Suhs kan. Uhdahn e anahne wekidala mwomwen eh kin padahk ong mehn liki kan, aramas kei me sohte nohn ese de sohte douluhl ese duwen Siohwa oh Paipel. Ele kitail anahne wia roporop de peki sawas sang irail kan me koahiek nan mwomwohdiso pwe kitail en kak wehwehki mwahu aramas akan nan atail wasahn kalohk.​—Wadek 1 Korint 9:20-23.

8. Ia ehu ahl en tapiada koasoia duwen Paipel?

 ⁸ Atail mehn akadei iei en rapahki “me warohng” kan. (Mad. 10:11) Pwe kitail en wia met, kitail anahne idek rehn aramas akan ia arail madamadau oh rong kanahieng. Emen brother nan England idek rehn aramas akan arail madamadau ong ia duwen atail kak ahneki mouren pwopwoud nsenamwahu, ia duwen atail en apwalihada seri kan, de ia duwen atail en dadaur pahn wiewia sapahrek. Mwurin eh rong arail pasapeng kan, e nda: “Ia omw madamadau ong kaweid wet me ntingdi kereniong sounpar 2,000 samwalahro?” Eri, ni eh sohte nda lepin lokaiao “Paipel,” e kasalehiong irail iren Paipel kan me konehng sang nan nah sehlpwohno.

9. Ia duwen atail kak sewese aramas akan me sohte men koasoia duwen Koht?

⁹ Kitail kak sair mohngiong en aramas akan me sohte men koasoia duwen Koht sang ni atail koasoia soahng kan me kin kamwakid irail. Karasepe, aramas tohto kin pwuriamweikihla duwen kapikipik kan. Eri kitail kak nda: “Ele ke ese me ni saintis kan ar wiahda dipwisou kapw kan, irail kin kalapw alasang soahng kan me re kilang. Karasepe, irail me kin wiahda microphone kan, anahne sukuhlki duwen salengen aramas, irail me kin wiahda kamera kan, mesen aramas. Dahme ke kin mwadang medewehda ni omw kin medewe duwen soahng pwukat? Ia duwe, ke medewe e pein miehla, de mie emen me kapikada met, de mehkot tohrohr?” Mwurin omw rong kanahieng, ke kak nda: “Ni sounwiahda misihn kan ar sukuhlki duwen salengen de mesen aramas, ele kitail pahn medewe ihs me irail sukuhlkihsang mepwukat. I uhdahn pwuriamweikihla dahme emen sounnting nda: ‘Me ketikihong kitail salengatail kan​—e ahpw sohte kak ketin karonge wasa? Ih me ketikihong kitail masatail kan—​e ahpw sohte kak mahsanih wasa? . . . Ih me kin wia sounpadahk en aramas koaros​—eri dah, e sohte ketin kupwurokong?’ Ekei saintis kan kamehlele mahsen pwukat oh kamehlele duwen kapikipik kan.” (Mel. 94:9, 10) Eri kitail kak kasalehiong irail kisin kasdo sang jw.org^® pahn “Interviews and Experiences” nan “Viewpoints on the Origin of Life.” (Kilang pahn PUBLICATIONS > VIDEOS.) De kitail kak kihong irail kisin pwuhko Was Life Created? de The Origin of Life​—Five Questions Worth Asking (lokaiahn wai).

10. Ia duwen atail kak tapiada koasoiong emen me sohte men koasoia duwen Koht?

¹⁰ Pali laud en aramas akan kin inengieng soahng mwahu kan ni ahnsou kohkohdo. Ahpw, tohto kin masak me sampah wet pahn kasohrala de sohla towe. Emen sounapwalih me kin seiloak nan Norway nda me aramas akan me sohte kin men koasoia duwen Koht kin men koasoia duwen irair en sampah. Mwurin eh rahnmwahwih aramas  akan, e kin nda: “Ia omw madamadau ong dahme pahn mwahu ong kitail ni ahnsou kohkohdo? Ke leme kaun en politik kan, saintis kan, de emen tohrohr kak kihong kitail koapworopwor me keieu mwahu?” Mwurin eh rong kanahieng, e kin wadek ehu iren Paipel me koasoia duwen ahnsou kohkohdo ehu me mwahu. Ekei uhdahn perenki dahme Paipel inoukihda me sampah wet pahn mihmi kohkohlahte oh me aramas mwahu kan me pahn kousoan powe kohkohlahte.​—Mel. 37:29; Ekl. 1:4.

11. Dahme kahrehda kitail men doadoahngki soangsoangen wiepe kan pwehn tapiada koasoi, oh ia duwen atail kak alasang ahn Pohl mehn kahlemeng me sansalda nan Rom 1:14-16?

¹¹ Kitail anahne doadoahngki soangsoangen wiepe kan pwehn tapiada koasoiong irail kan me kitail tuhwong. Dahme kahrehda? Pwehki emenemen aramas wekpeseng. Dahme emen perenki mwein sohte pahn kaperen ong emen tohrohr. Ekei kin men koasoia duwen Koht de Paipel ahpw meteikan kin men tepidahte koasoia soahng teikan. Sohte lipilipil nan soangen irair dah, kitail anahne isaneki ahnsou mwahu wet en koasoiong soangen aramas koaros. (Wadek Rom 1:14-16.) Ei mehlel, kitail anahne tamataman me Siohwa me ketin kahrehiong padahk mehlel en kekeirda nan mohngiong en irail kan me poakohng dahme pwung.​—1 Kor. 3:6, 7.

12. Dahme kitail kak wia pwehn sewese aramas akan sang Eisia me sohte kin uhdahn medewe ma mie Sounkapikada men de soh?

¹² Nan sampah pwon, sounkalohk tohto kin tuhwong aramas akan sang sapwen Eisia, iangahki ekei sang wasa kan me koperment kan kin irehdi doadoahk en pelien lamalam kan. Nan sahpw tohto nan Eisia, me tohto sohte kin uhdahn medewe ma mie Sounkapikada men de soh. Ekei kin men esehla soahng kan oh men onopki Paipel, ahpw meteikan sohte perenki sukuhlki soahng kapw kan. Dahme kitail kak wia pwehn sewese irail? Ekei sounkalohk koahiek kan kin pweida ni arail tepida koasoia soahng kan me sohte pidada Paipel, kasalehda me re nsenohki aramaso me re tuhwong, oh eri ni ahnsou me konehng, koasoiaiong aramaso ia duwen kaweid en Paipel kan ar sewese kamwahwihala arail mour.

13. Dahme kak kamwakid aramas akan en men kalaudehla arail esehla duwen Paipel? (Menlau kilang kilel ni kilin Kahn Iroir wet.)

¹³ Aramas tohto kin tepin perenkihda kaweid erpit kan sang nan Paipel me kak kadoadoahk nan arail mour rahn koaros. (Ekl. 7:11, 12) Nan New York, mie sister men me kin tuhwong irail kan me kin doadoahngki lokaiahn Mandarin, e nda: “I kin song en esehla aramas akan oh rong irail. Ma I esehda me irail keseudo sang ehu sahpw, I kin idek: ‘Ia iren omw keseudo wasaht? Ke diarada omw doadoahk? Aramas akan wasaht kin kadek ong uhk?’” Ekei pak met kin sewese sistero en kasalehda ehu padahk en Paipel. Ni ahnsou me konehng, sistero pil kin nda: “Dahme ke medewe me keieu kesempwal kitail en wia pwehn ahneki nanpwungmwahu rehn meteikan? I kak kasalehiong uhk ehu lepin padahk sang nan Paipel? E mahsanih: ‘Tepidahn akamai kin rasehng aramas me kin kamwakidasang perehpen pihl; katokehdi mwohn eh pahn pwilpeseng.’ Ke medewe kaweid wet kak sewese kitail en ahneki nanpwungmwahu rehn meteikan?” (Lep. Pad. 17:14) Soangen koasoakoasoipene wet kak sewese kitail en esehda soangen aramas me pahn kasamwo atail pwurala rehrail.

14. Ia duwen emen brother nan Palimese en Eisia eh sewese aramas akan me kin nda me irail sohte kamehlele Koht?

¹⁴ Ia duwen irail kan me ndaiong kitail me irail sohte kin kamehlele Koht? Emen brother me koahieklahr ni eh kin kalohk ong aramas akan me sohte nsenohki pelien lamalam nan Palimese en Eisia nda: “Pali laud en ahnsou, ni aramas emen wasaht eh nda, ‘I sohte kamehlele Koht,’ met wehwehki me e sohte kin kamehlele duwen en kaudokiong koht kan me pali laud en aramas akan wasao kin kaudokiong. Eri I kin pwungki me  aramas me wiahda pali laud en koht kan oh koht pwukat kaidehn uhdahn koht kei. I kin kalapw wadek Seremaia 16:20: ‘Mie aramas emen kak wiahda pein eh koht? Pwe soh, e sohte kak; ma e kak, eri, kaidehk uhdahn koht emen.’ Ngehi eri idek: ‘Ia duwen atail kak ese mehnia koht mehlel oh mehnia me aramas akan wiahda?’ I kin rong kanahieng, oh eri wadek Aiseia 41:23: ‘Kumwail padahkihong kiht audepen ahnsou me pahn kohdo​—se ahpw pahn ese me uhdahn koht kei kumwail!’ Ngehi eri kasalehiong ehu karasepen ia duwen Siohwa eh ketin kohpada dahme pahn wiawi ni ahnsou kohkohdo.”

15. Dahme kitail kak sukuhlkihsang mehn kahlemeng en emen brother nan Palimese en Eisia?

¹⁵ Brother men nan Palimese en Eisia kin doadoahngki wiepe wet ong pwurehng pwurala. E nda: “I kasalehiong irail karasaras erpit kan en Paipel, kokohp en Paipel kan me pweidahr, oh kosonned kan en pahnlahng me wiawidahr. Ngehi eri kasalehiong irail ia duwen ire pwukat koaros ar kasalehda me mie Sounkapikada ieias oh erpit men. Ni aramaso eh tepida medewe me mwein mie Koht, ngehi eri tepida kasalehiong ih dahme Paipel mahsanih duwen Siohwa.”

16. Nin duwen me Ipru 11:6 kasalehda, dahme kahrehda tohnsukuhl kan anahne pwoson Koht oh Paipel, oh ia duwen atail kak sewese irail en kalaudehla met?

¹⁶ Ni atail kin wia onop en Paipel rehn aramas akan me sohte nsenohki pelien lamalam, kitail anahne pousehlahte sewese irail kalaudehla arail kamehlele me mie Koht. (Wadek Ipru 11:6.) Oh kitail anahne sewese irail en kalaudehla arail pwoson Paipel. Ele kitail anahne pwurupwurehng koasoia ekei ire kan pak tohto. Erein ehuehu onop, ele kitail anahne koasoia mehn kadehde kan me Paipel iei Mahsen en Koht. Met kak pidada ia duwen kokohp kan nan Paipel ar pweidahr, ia duwen Paipel eh pwung ni eh kin mahsanih duwen ire kan me pid palien sains oh poadopoad kan, oh ia duwen Paipel eh kin sewese kitail rahn koaros.

17. Ia duwen atail limpoak eh kak kamwakid aramas akan?

¹⁷ Kitail kin sewese aramas akan en wiahla sapwellimen Krais tohnpadahk kan sang ni atail kasalehiong irail limpoak, mendahki ma irail nsenohki pelien lamalam de soh. (1 Kor. 13:1) Ni atail padahkih irail, atail mehn akadei iei en kasalehda me Koht kin ketin loalloale kitail oh kupwurki kitail en poakohng ih. Sounpar koaros aramas kidkid kei me mahso kin ekiste nsenohki de sohte kin nsenohki pelien lamalam papidaislahr pwehki re sukuhlki en poakohngala Koht. Eri ken ahneki madamadau pwung, oh kasalehda limpoak oh nsenoh ong soangen aramas koaros. Rong irail. Song en wehwehki irail. Sang omw mehn kahlemeng, padahkih irail pwehn wiahla sapwellimen Krais tohnpadahk kan.