1. Dahme kahrehda kitail kak karasahiong Sehdan sounlidip men?

SOUNLIDIP men kin men koledi mahn de kemehla. Ele e kin doadoahngki soangsoangen lidip kan, nin duwen me emen kompoakepahn Sohp likamw ko kasalehda. (Sohp 18:8-10) Ia duwen sounlidip men eh kin kasonge mahn men en doulong nan eh lidipo? E kin tetehk mahno. Ia wasa mahno kin kohla? Dahme e mwahuki? Mehnia lidip me pahn keieu mwahu en doadoahngki? Sehdan duwehte sounlidipo. E kin tetehk kitail. E kin tehk wasa kitail kohla oh dahme kitail perenki. Eri e kin pilada lidip ehu me pahn lidipihkitaildi ni atail sohte kasik. Ahpw Paipel kamehlelehiong kitail me ma kitail lohdi, kitail kak pitsang. E pil padahkihong kitail ia duwen atail kak soikala lidip pwukat koaros.

2. Lidip riau dah me Sehdan kin doadoahngki me kin pweida mwahu?

² Lidip riau me Sehdan kin doadoahngki me kin pweida mwahu iei pohnmwahso oh noahrok. * Erein sounpar kid kid kei, Sehdan kin pweida ni eh doadoahngki lidip riau pwukat. E kin duwehte irail kan me kin kihdi uhk pwehn parokedi menpihr kan de lidipihiraildi. (Ser. 5:26) Ahpw kitail sohte anahne lohdi pahn ahn Sehdan lidip. Dahme kahrehda? Pwehki Siohwa ketin kasalehiong kitail wiepe kan me Sehdan kin doadoahngki.​—2 Kor. 2:11.

3. Dahme kahrehda Siohwa ketikihda mehn kahlemeng kan nan Paipel?

³ Siohwa ketin padahkihong kitail uwen keper en pohnmwahso oh noahrok sang ni eh ketin padahkihong kitail duwen dahme wiawihong ekei sapwellime ladu kan, eri kitail kak soikala wiahda soangen sapwung ko me re wiahda. Kitail pahn kilang ia duwen Sehdan eh kak lidipihedi pil ekei me kin papah  Siohwa erein sounpar tohto. Ia duwe, met wehwehki me kitail uhdahn sohte kak soikala pohnmwahso oh noahrok? Soh. Siohwa ketin tehk mwahu me mehn kahlemeng pwukat pahn ntingdi nan Paipel pwehn wia “mehn kataman ehu ong kitail.” (1 Kor. 10:11) E ketin mwahngih me kitail kak sukuhlsang mehn kahlemeng pwukat oh soikala de tangasang en Tepil lidip kan.

4. Ia imwilahn pohnmwahso?

⁴ Sehdan men kitail en pohnmwahsohla. E ese me ma kitail pohnmwahsohla, kitail pahn duwehla ih oh sohte pahn mour kohkohlahte. (Lep. Pad. 16:18) Eri, wahnpoaron Pohl katamankihong kitail me emen kak “aklapalapala oh ale kadeikohte me Tepilo alehdier.” (1 Tim. 3:6, 7) Met kak wiawihong emenemen kitail, mehnda ma kitail kapw nan padahk mehlel de papahkiher Siohwa erein sounpar tohto.

5. Nin duwen me Eklesiasdes 7:16, 20 mahsanih, ia duwen emen eh kakete kasalehda pohnmwahso?

⁵ Aramas pohnmwahso kin roporop. Sehdan kin song en kahrehiong kitail en medewehte pein kitail laudsang atail en medewe duwen Siohwa, ahpw mehlel ni atail kin ahneki kahpwal. Karasepe, mie pak emen karaunehkin uhk mehkot me ke sohte wia? De emen wiahiong uhk wiewia sapahrek? Sehdan pahn perenki kilang omw kapwukoahki Siohwa de riomw Kristian kan. Oh Tepilo men ken medewe me ihte ahl en kamwahwihala kahpwalo iei en pein wia dahme ke mwahuki oh sohte idawehn kaweid me Siohwa ketikihda nan sapwellime Mahsen.​—Wadek Eklesiasdes 7:16, 20.

6. Dahme ke kak sukuhlkihsang dahme wiawihong sistero nan Netherlands?

⁶ Medewehla dahme wiawihong emen sister nan Netherlands me lingeringerkihda soh unsek en meteikan. E koasoanehdi me e sohte kak patehng irail. E nda: “I pehm me I kin kelekelehpw, ahpw I sohte kak mahkohng irail. I ndaiong ei pwoudo me se anahne keseula ni ehu mwomwohdiso tohrohr.” Ahpw sistero kilang prokram en JW Broadcasting^® en March 2016. Prokramo kihda iren sawas kei  ong ia duwen atail en dadaur pahn soh unsek en meteikan. Sistero nda: “I kilang me I anahne aktikitik oh medewe duwen pein ei sapwung kan oh dehr song en wekidala riei Kristian kan nan mwomwohdiso. Prokramo sewese ie en medemedewehte Siohwa oh sapwellime pwuhng en kaunda.” Ke kilang ire kesempwalo? Ni omw lelohng kahpwal ehu, medemedewehte Siohwa. Peki en ketin seweseiuk ken kilangwohng meteikan nin duwen me e kin ketin wia. Samatailo nanleng ketin mwahngih arail sapwung kan; ahpw e ketin kupwurki mahkohng irail. E pil ketin kupwurki ken wia duwehte.​—1 Sohn 4:20.

7. Dahme wiawihong Nanmwarki Usaia?

⁷ Pwehki Nanmwarki Usaia en Suda pohnmwahsohla, e sohte rong kaweid sang meteikan oh wiahda mehkot me e sohte ahneki pwuhng en wia. Usaia wia ohl uhdahn koahiek men. E kana nan mahwen tohto, wiahda kahnimw tohto, oh ahneki soangen mwetuwel tohto. Oh “Koht ketin kupwuramwahwihala.” (2 Kron. 26:3-7, 10) Paipel mahsanih: “Ahpw ni ahnsou me Usaia kehlaillahr, e ahpw aklapalapala, oh met kahrehiong eh pwupwudi.” Siohwa ketin kehkehlingki mwoweo me samworo kante me mweimwei en isik warpwohmwahu nan tehnpas sarawio. Ahpw Nanmwarki Usaia wiahda mehkot me e sohte ahneki pwuhng en wia oh pedolongala nan tehnpas sarawio pwehn isik warpwohmwahwo. Siohwa sohte ketin kupwurki met oh kalokehki ohl pohnmwahso menet soumwahu tokutok. Usaia eri soumwahuki tokutok erein eh mour.​—2 Kron. 26:16-21.

8. Ia duwen atail peikiong 1 Korint 4:6, 7 eh kak sewese kitail en soikala pohnmwahso?

⁸ Ia duwe, kitail kak pohnmwahsohla oh wiahda dihp duwehte Usaia? Medewehla dahme wiawihong José. E kin uhdahn pweida nan pesines oh pil wia emen elder nan mwomwohdiso me meteikan kin wauneki. E kin wia padahk kan nan mihting tohrohr kan, oh sounapwalih me kin seiloak kan kin peki kaweid sang reh. E nda: “Ahpw I kin likih pein ei koahiek oh dahme I eseier. I sohte kin likih Siohwa. I medewe me I kehlail, eri I sohte kin rong sapwellimen Siohwa kaweid oh mehn kataman kan.” José wiahda dihp laud oh piskenla. Sounpar kei mwoweo, e pwurodo nan padahk mehlel. Met e nda: “Siohwa ketin padahkihong ie me dahme kesempwal iei, kaidehn en ahnekihte pwukoa ehu, ahpw  en wia dahme Siohwa ketin kupwurki kitail en wia.” Kitail en tamataman me sohte lipilipil soangen koahiek de pwais dah me kitail ahneki nan mwomwohdiso, soahng pwukat koaros kohsang rehn Siohwa. (Wadek 1 Korint 4:6, 7.) Ma kitail kin pohnmwahso, Siohwa sohte pahn ketin doadoahngki kitail.

9. Dahme noahrok kahrehiong Sehdan oh Ihp en wia?

⁹ Ni atail kin medewe duwen noahrok, kitail kin tamanda Sehdan me Tepil. Sehdan wia emen sapwellimen Siohwa tohnleng, oh ele e ahneki pwais kaselel tohto. Ahpw e men ahneki tohtohsang. E men kaudok me Siohwa kelehpw ketin warohng sapwellimanki en kohwong ih. Sehdan men kitail en duwehla ih, eri e kin song en kahrehiong kitail en men ahneki tohtohsang dahme kitail ahneki. Tepin eh song en wia met iei ni eh koasoiong Ihp. Ni limpoak, Siohwa ketikihong Ihp oh eh pwoudo soangen mwenge tohto me ira en tungoale. Ira kak tungoale ‘wahntuhke koaros me mi nan mwetuwelo,’ ahpw ihte ehu. (Sen. 2:16) Ahpw Sehdan pitiheki Ihp en medewe me e anahne tungoale wahntuhkeo me keinapwidi. Ihp sohte itarki dahme e ahnekier; e men ahneki tohtohsang. Kitail ese dahme wiawi mwuhr. Ihp lohdi pahn dihp oh kedekedeo mehla.​—Sen. 3:6, 19.

10. Dahme wiawihong Nanmwarki Depit ni eh noahrokla?

¹⁰ Siohwa ketikihong Depit soahng tohto, me iangahki en kepwehpwehla, lapalapala, oh en kalowehdi imwintihti tohto. Depit kalahnganki mepwukat oh nda me sapwellimen Koht kisakis kan ‘uhdahn tohtohsang me e kak kasalehda!’ (Mel. 40:5) Ahpw Depit noahrokla oh men ahneki tohtohsang dahme Siohwa ketikihongehr ih. Depit pwoudiki lih tohto, ahpw e tepida inangih emen lih me pwoudiki emen tohrohr, mendahki Siohwa mahsanih me met sapwung. Liho iei Padsipa, oh eh pwoudo iei Uraia mehn Id. Depit wendi rehn Padsipa, oh Padsipa liseianda. Dahme Depit wiao uhdahn suwed, ahpw e pil wiahda mehkot suwedsang. Depit koasoanehdi me Uraia en kamakamala! (2 Sam. 11:2-15) Dahme Depit medewe? E medewe me Siohwa sohte kak ketin mwahngih? Depit papahki Siohwa erein ahnsou werei, ahpw e noahrokla oh met kahrehiong ih lokolok laud. Mwuhr, Depit wehkada dipe ko oh koluhla. E uhdahn kalahnganki me Siohwa ketin mahkohng ih!​—2 Sam. 12:7-13.

11. Nin duwen me Episos 5:3, 4 mahsanih, dahme kak sewese kitail en pelian noahrok?

 ¹¹ Dahme kitail sukuhlkihsang mehn kahlemeng en Depit? Kitail sukuhlki me kitail kak pelian noahrok ma kitail kin kalahngankihte soahng koaros me Siohwa ketikihong kitail. (Wadek Episos 5:3, 4.) Kitail anahne itarki dahme kitail ahneki. Ni atail kin tepida onop Paipel rehn aramas, ele kitail kin padahkihong irail en medewe soahng mwahu ehu me Siohwa ketikihong irail. Ma emen kin wia met rahn koaros nan wihk ehu, met wehwehki me e kapakapkier soahng isuh. (1 Des. 5:18) Ke kin wia soahng wet? Ma ke kin doudouloale soahng koaros me Siohwa ketin wiahiong uhk, met pahn seweseiuk en kin kalahngan. Oh ni omw kin kasalehda kalahngan, ke pahn itarki dahme ke ahnekier. Ni omw kin itarki dahme ke ahnekier, ke sohte pahn noahrok.

12. Dahme Sudas Iskariot wiahda pwehki e noahrokla?

¹² Pwehki Sudas Iskariot noahrokla, e wiahda mehkot me uhdahn suwed oh pangala Sises. Ahpw nin tapio, Sudas sohte wia aramas suwed men. (Luk 6:13, 16) Sises ketin pilada ih en wia wahnpoaron men. E sansal me Sudas wia aramas koahiek men oh Sises kin ketin likih ih, pwehki e kin apwalih neirail koakon en mwohnio. Sises oh wahnpoaron ko kin doadoahngki mwohni pwukat pwehn apwaliheki dahme re anahne nan arail doadoahk en kalohk. Met duwehte sawas en mwohni me kin kohwong atail doadoahk en kalohk sampah pwon rahnwet. Ahpw kedekedeo, Sudas tepida pirap, mendahki e rong Sises ketin katamankihong aramas akan pak tohto ren dehr noahrokla. (Mark 7:22, 23; Luk 11:39; 12:15) Sudas pohnsehsehla mehn kataman pwukat.

13. Iahd me Sudas kasalehda me e noahrokla?

¹³ Sudas kasalehda me e noahrokla erein ahnsou ehu mwohn Sises eh ketin kamakamala. Sises oh sapwellime tohnpadahk ko, iangahki Mery oh rie liho Marda, mihmi nan imwen Saimon me tokutoko. Ni arail wie konokonot, Mery kohla oh wudekihdiong pohn tapwin Siseso leh pwohmwahu ehu me uhdahn pweilaud. Sudas oh tohnpadahk teiko uhdahn lingeringerkihda met. Tohnpadahk teiko ele medewe me re kak doadoahngki pweinen leho ong arail doadoahk en kalohk. Ahpw Sudas lingeringerda pwehki ehu kahrepe tohrohr. Ih “lipirap men” oh e men pirapa mwohni sang koakon en mwohnio. Oh pwehki Sudas noahroklahr, e pangala Sises pwehki mwohni.​—Sohn 12:2-6; Mad. 26:6-16; Luk 22:3-6.

14. Ia duwen pwopwoud ehu ara doadoahngki kaweido me dierek nan Luk 16:13?

¹⁴ Sises ketin katamankihong sapwellime tohnpadahk ko ire mehlel wet: “Kumwail sohte kak wia ladu kei ong Koht oh Kepwe.” (Wadek Luk 16:13.) Met mehlelete. Karasepe, medewehla ia duwen pwopwoud ehu nan Romania ara doadoahngki dahme Sises mahsanih. Mie me men kihong ira doadoahk ehu ong lepin ahnsou nan ehu sahpw tohrohr me kepwehpwe. Ira nda: “Mie at pweipwand laud nan pangk me se anahne pwainla, eri nin tapio se medewe me doadoahk wet iei kapai ehu sang rehn Siohwa.” Ahpw mie kahpwal ehu. Ma ira alehda doadoahko, ara ahnsou en papah Siohwa pahn tikitikla. Mwurin ara wadek oaralapo “Dadaur Ni Loalopwoat Ki Mohngiong Unsek” nan Kahn Iroir en August 1, 2008, ira wiahda ara pilipil. Ira nda: “Ma se keseula ehu sahpw tohrohr pwehn wiahda mwohni tohto, me pahn kahrehda sen apwalki papah Siohwa, eri kaidehn at nanpwungmwahu rehn Siohwa me keieu kesempwal nan at mour. Se uhdahn kamehlele me at nanpwungmwahu rehn Siohwa pahn luwetala.” Eri ira sohte ale  doadoahko. Dahme wiawi? Ohlo diarada doadoahk ehu nan sahpw me ira miheo me kak pwainla dahme ira anahne. Liho nda: “Siohwa pahn kin ahnsou koaros ketin sewese sapwellime ladu kan.” Pwopwoud wet perenki ara wiahki Siohwa ara Soumas, a kaidehn mwohni.

15. Dahme kahrehda kitail kak uhdahn kamehlele me kitail kak pitsang ahn Sehdan lidip kan?

¹⁵ Dahme kitail anahne wia ma kitail tehkada me kitail pohnmwahsohla de noahrokla? Kitail kak tangasang! Pohl koasoia me irail kan me Tepilo “parokiraildier” kakete pitsang lidipo. (2 Tim. 2:26) Ih met me wiawihong Depit. E rong ahn Nadan kaweid kehlailo, koluhkihla eh noahrok, oh kamwahwihala eh nanpwungmwahu rehn Siohwa. Dehr manokehla me Siohwa ketin kehlailsang Sehdan. Eri ma kitail pwungki ale sapwellimen Siohwa sawas, kitail kak pitsang lidip koaros me Sehdan wiahda.

16. Dahme pahn sewese kitail en soikala ahn Sehdan lidip kan?

¹⁶ Mehlel, e pahn mwahu kitail en dehr pohnmwahsohla de noahrokla. Kitail kak wia met ihte pwehki sawas sang rehn Koht. Kitail en dehr medewe me kitail uhdahn kehlail oh sohte pahn pohnmwahsohla de noahrokla. Pil irail kan me papahkiher Siohwa erein ahnsou werei kin pohnmwahsohla de noahrokla. Eri peki rehn Siohwa rahn koaros en ketin seweseiuk ken kasawih omw madamadau oh wiewia kan. (Mel. 139:23, 24) Wia uwen omw kak koaros en dehr pohnmwahsohla de noahrokla!

17. Dahme pahn wiawihong atail imwintihtio Tepil ni ahnsou keren?

¹⁷ Erein sounpar kid kid kei, Sehdan wia sounlidip men. Ahpw ahnsou keren, e pahn selidi oh kedekedeo sohrala. (Kaud. 20:1-3, 10) Kitail uhdahn kasikasik rahno. Lao lel rahno, kitail en mwasamwasahn ahn Sehdan lidip kan. Doadoahk laud pwe ken dehr pohnmwahsohla de noahrokla. Koasoanehdi teng en ‘pelianda Tepil, oh e pahn tangasang uhk.’​—Seims 4:7.