1. Dahme sapwellimen Sises tohnpadahk ko ndaiong pokon ehu ren wia?

LAPALAHN pokon en ohl oh lih kei seiloakla Serusalem. Irail kohsang soangsoangen sahpw kei oh kin lokaiahki soangsoangen lokaia. Mehkot kapwuriamwei wiawi rahno. Mehn Suhs kei kak lokaiahki arail lokaia ko. Pokono uhdahn pwuriamweikihla met, ahpw dahme mehn Suhs ko oh wahnpoaron Piter ndindaiong irail koaros uhdahn kapwuriamweisang. Pokono esehda me irail kak komourla ma irail kasalehda me irail pwoson Sises Krais. Irail uhdahn mwekidkihda rohngo. Ni mehlel, irail uhdahn mwekidkihda me kahrehda re idek: “Dahme se anahne wia?” Piter sapengkin irail: “Emenemen kumwail en papidaisla.”​—Wiewia 2:37, 38.

2. Dahme kitail pahn koasoiapene nan iren onop wet? (Menlau kilang kilel ni kilin Kahn Iroir wet.)

² Dahme wiawi mwuhr pil kapwuriamwei. Mpen aramas 3,000 papidaisla rahno oh wiahla sapwellimen Krais tohnpadahk. Met iei tepin doadoahk en katohnpadahk laud me Sises ketin kehkehlingkihong sapwellime tohnpadahk kan ren wia. Sapwellime tohnpadahk kan kin wiewiawihte doadoahko lel rahnwet. Rahnwet kitail sohte kak koasoiong emen awa keite oh ih eri kakehr papidaisla. Ele met kin anahne sounpwong kei de sounpar ehu de reireisang pwe tohnsukuhl men en lel mehn akadeio. Katohnpadahk kin anahne doadoahk laud pwehn sewese emen en wiahla sapwellimen Krais tohnpadahk. Nan iren onop wet, kitail pahn koasoiapene dahme kitail kak wia pwehn sewese neitail tohnsukuhl en Paipel kan en papidaisla oh wiahla tohnpadahk.

3. Dahme Madiu 28:19, 20 mahsanih me tohnsukuhl men anahne wia pwehn kekeirda oh papidaisla?

³ Mwohn tohnsukuhl en Paipel men eh kak papidaisla, e anahne kapwaiada dahme Paipel kin padahngki. (Wadek Madiu 28: 19, 20.) Ni ahnsou me tohnsukuhl en Paipel men kin kapwaiada dahme e sukuhlki, e kin duwehla “ohl loalokong men” nan sapwellimen Sises karasaraso me weirada pwoahr loal pwehn kauwada imwe pohn paip. (Mad. 7:24, 25; Luk 6:47, 48) Ia duwen atail kak sewese tohnsukuhlo en kapwaiada dahme e sukuhlki? Kitail pahn koasoiapene soahng siluh me kitail kak wia.

4. Ia duwen atail kak sewese tohnsukuhl en Paipel men doulahte nantihong pwehn kak papidaisla? (Pil kilang kisin koakono “ Sewese Noumw Tohnsukuhlo en Wiahda Mehn Akadei kan oh Lel Mehn Akadei ko.”)

⁴ Sewese noumw tohnsukuhlo en wiahda mehn akadei kan. Dahme kahrehda ke anahne wia met? Medewehla karasaras wet: Ma ke pahn tangala wasa ehu me doh, mwehin ke pahn pilada en uhdi ekei wasa kaselel ni omw tangatangala. Eri ke sohte pahn mworusala pwehki e mwomwen me wasa me ke tangatangala ieo sohte nohn doh. Pil duwehte, ni tohnsukuhl en Paipel men eh wiahda mehn akadei kan me e kak lel ni ahnsou mwotomwot, e pahn kilang me e kak lel mehn akadei en papidaisla. Doadoahngki kisin koakono “Goal” me mi nan pwuhko Enjoy Life Forever! * pwehn sewese tohnsukuhlo en wiahda mehn akadei kan. Ni imwin ehu iren mehn kasukuhl, koasoiapene ia duwen mehn akadeio eh pahn sewese noumw tohnsukuhlo en kapwaiada dahme e sukuhlkier. Ma ke men noumw tohnsukuhlo en lel ehu mehn akadei tohrohr, ke kak ntingihedi pahn wasa me nda “Other.” Kaukaule doadoahngki wasaht pwehn kousapahlih rehn noumw tohnsukuhlo mehn akadei kan me e kak kapwaiada ni ahnsou mwotomwot, oh mehn akadei kan me pahn anahne ahnsou reirei.

5. Nin duwen me kileldi Mark 10:17-22, dahme Sises mahsanihong ohl kepwehpwe men en wia, oh dahme kahrehda?

⁵ Sewese noumw tohnsukuhlo en wiahda wekidekla kan nan eh mour. (Wadek Mark 10:17-22.) Sises mwahngih me e pahn apwal ong  ohl kepwehpwe men en netikihla eh kepwe kan koaros. (Mark 10:23) Ahpw, Sises mahsanihong ohlo en wiahda wekidekla laud wet nan eh mour. Dahme kahrehda? Pwehki Sises ketin poakohng ih. Ekei pak, ele kitail kin pweiek en kangoange tohnsukuhl men en kapwaiada dahme e sukuhlki pwehki e pehm e saikinte onopada en wiahda wekidekla ehu. Ele emen anahne ahnsou pwehn wiahda wekidala nan eh mour oh pwuhriong nan mour kapw. (Kol. 3:9, 10) Ahpw ma ke mwadang en koasoiaiong duwen wekidekla kan me e anahne wiahda, e pil pahn mwadang en tepida wiahda wekidekla pwukat. Ni amwa koasoiapene met, ke kin kasalehda me ke nsenohki ih.​—Mel. 141:5; Lep. Pad. 27:17.

6. Dahme kahrehda kitail anahne idek rehn neitail tohnsukuhlo ia eh madamadau?

⁶ E kesempwal me kitail en idek rehn tohnsukuhl men dahme e medewehki duwen ire ehu. Met pahn kasalehda dahme noumw tohnsukuhlo wehwehki oh kamehlele. Ma ke kin kaukaule wia met, ke pahn diarada me e mengei en koasoiaiong ih soahng kan me ele apwal ong ih en pwungki. Mie soangen peidek tohto nan pwuhko Enjoy Life Forever! Karasepe, iren mehn kasukuhl 04 idek: “Ia pahn sapwellimen Siohwa madamadau ni omw doadoahngki mwareo?” Iren mehn kasukuhl 09 idek: “Soahng dah kan me ke men kapakapki?” Ni tapio, ele noumw tohnsukuhlo pahn anahne ahnsou pwehn medewe pasapengpen peidek ko. Ke kak sewese ih sang ni omw kaiahne en medewe duwen iren Paipel oh kilel kan nan pwuhko.

7. Ia duwen atail kak doadoahngki mwahu koasoiepen meteikan?

⁷ Ni ahnsou me noumw tohnsukuhlo esehda dahme e anahne wia, doadoahngki koasoipen meteikan pwehn kangoange ih en wia met. Karasepe, ma noumw tohnsukuhlo sohte kin kaukaule iang towehda mihting, ke kak kasalehiong ih kisin kasdo Jehovah Cared for Me nan wasa me nda “Explore” nan iren mehn kasukuhl 14. Ke pahn diarada koasoipen meteikan nan tohtohn iren mehn kasukuhl ko nan pwuhko Enjoy Life Forever! wasa me nda “Dig Deeper” de “Explore.” * Kanahieng ke de kapahrengkihong noumw tohnsukuhlo emen ni omw nda, “Ma e kak wia met, ke pil kak wia met.” Mweidohng tohnsukuhlo en pein medewehda met. Ahpw koasoia ire kan me sewese aramaso nan kasdohu en kapwaiada padahk en Paipel kan. Ele ke kak koasoia iren Paipel kesempwal ehu de mehkot me aramaso wia me pweida mwahu. Ma kak, kasalehda ia duwen Siohwa eh ketin sewese aramaso.

8. Ia duwen atail kak sewese neitail tohnsukuhlo en poakohngala Siohwa?

⁸ Sewese noumw tohnsukuhlo en poakohngala Siohwa. Ia duwen? Rapahki ahnsou mwahu kan me ke kak sewese noumw tohnsukuhlo en kalaudehla eh ese sapwellimen Siohwa irair kaselel kan. Sewese noumw tohnsukuhlo en ese me Siohwa iei Koht peren men me kin ketin sewese irail kan me poakohng ih. (1 Tim. 1:11; Ipru 11:6) Kasalehiong tohnsukuhlo me e pahn paiekihda ma e kapwaiada met, oh kawehwehiong me kamwahu pwukat kin kasalehda me Siohwa ketin poakohng ih. (Ais. 48:17, 18) Ni noumw tohnsukuhlo eh kakehlakahla eh limpoak ong Siohwa, eh men wiahda wekidekla kan pahn pil laudla.​—1 Sohn 5:3.

9. Nin duwen me Mark 10:29, 30 mahsanih, dahme kak sewese aramas men en wiahda tounmetei kan pwehn wiahla tohnpadahk papidaisla men?

⁹ Pwehn kekeirda oh papidaisla, tohnsukuhl en Paipel men anahne wiahda tounmetei kan.  Duwehte ohl kepwehpweo me kitail koasoiapene mwoweo, ele ekei tohnsukuhl kan anahne tounmeteikihla arail kepwe kan. Ma doadoahk me re kin wiao sohte kin pwungiong kaweid en Paipel kan, ele irail anahne rapahkihda ehu doadoahk tohrohr. Me tohto ele anahne uhdihsang kompoakepahnki irail kan me sohte kin poakohng Siohwa. Ekei ele arail peneinei kan keseirailla pwehki re sohte pwungki Sounkadehdehn Siohwa kan. Sises mahsanih me ele e pahn apwal ong ekei en wiahda soangen tounmetei pwukat. E mahsanih me irail kan me kin idawehn ih sohte pahn nsensuwedla. Siohwa pahn ketin katingih irail sang ni eh ketikihong irail peneinei limpoak ehu nanpwungen sapwellime aramas akan. (Wadek Mark 10:29, 30.) Ia duwen omw kak sewese noumw tohnsukuhl en Paipelo en paiekihda kisakis kaselel wet?

10. Dahme ke sukuhlkihsang dahme Manuel koasoia?

¹⁰ Kakairada nanpwungmwahu keren rehn noumw tohnsukuhlo. E kesempwal ken kasalehiong noumw tohnsukuhlo me ke nsenohki ih. Dahme kahrehda? Tehk dahme Manuel, sang Mexico koasoia. E kawehwehda ia duwen eh sounpadahko eh sewese ih ni eh wia tohnsukuhl en Paipel men. E nda: “Mwohn ehuehu at ahnsoun onop, ei sounpadahko pahn kin idek ia irei. E sewese ie en meleilei oh mweidohng ie en koasoiaiong ih soahng sohte lipilipil. I kak pehm me e uhdahn nsenohkin ie.”

11. Ia duwen neitail tohnsukuhl kan ar kak paiekihda ni atail wiahda ahnsou ong irail?

¹¹ Duwehte Sises eh kin ketiket rehn sapwellime tohnpadahk ko, wiahda ahnsou pwe ken mi rehn noumw tohnsukuhl kan. (Sohn 3:22) Ma noumw tohnsukuhl en Paipelo kin wiahda wekidekla kan, ele ke kak lukehdo ih ni imwomwo pwehn nim koahpi, de mwenge, de kilang ehu neitail broadcast ko. Ele noumw tohnsukuhlo pahn keieu kalahnganki omw luke ih ni kompoakepah oh eh peneinei kan ar iang kasarawi kan oh ele e pahn sangat. Kazibwe, sang Uganda nda: “I medewe I sukuhlki laud duwen Siohwa sang ni ei mi rehn ei sounpadahko laudsang erein at onop. I kilang ia uwen Siohwa eh ketin nsenohkin sapwellime aramas akan  oh ia uwen arail peren. Ih met me I men wia nan ei mour.”

12. Dahme kahrehda kitail anahne kahre soangsoangen sounkalohk kan ong onop en Paipel ehu?

¹² Luke soangsoangen sounkalohk kan ong omw onop Paipelo. Ekei pak ele kitail kin medewe me e mengei en kelehpw kohla de kahrehte emen sounkalohk me kin kalapw iang kitail. Mehnda ma kitail medewe me e mengei ong kitail en wia met, e pahn uhdahn sewese neitail tohnsukuhl en Paipelo ma kitail kahre soangsoangen sounkalohk en iang kitail. Dmitrii, sang Moldova nda: “Emenemen sounkalohk me kin kohdo ni ei onop en Paipelo kin kawehwehda soahng kan ni ahl me wekpeseng. Met sewese ie en kilang ahl teikan me I kak doadoahngki dahme I sukuhlkio. I pil sohla nohn namenek ni ei tepin iang towehda mihting, pwehki I tuhwongehr Kristian tohto.”

13. Dahme kahrehda kitail anahne sewese neitail tohnsukuhlo en iang towehda mihting kan?

¹³ Sewese noumw tohnsukuhlo en iang towehda mihting kan. Dahme kahrehda? Pwehki Siohwa ketin kehkehlingkihong sapwellime tohnkaudok kan en kin tuhpene, met iei kisehn atail kaudok. (Ipru 10:24, 25) Pil patehng, riatail kan nan mwomwohdiso kin wiahla pein atail peneinei. Ni atail kin patpene ni mihting kan, e kin duwehte atail kohpene oh kang mwenge iou. Ma ke kin sewese noumw tohnsukuhl en Paipelo en iang towehda mihting kan, ke kin sewese ih en wia mehkot me uhdahn kesempwal pwehn kak papidaisla. Ahpw met kakete apwal ong ih en tepida wia. Ia duwen pwuhko Enjoy Life Forever! eh kak sewese noumw tohnsukuhlo en powehdi soangsoangen kahpwal me kin kahrehiong ih en dehr iang towehda mihting?

14. Ia duwen atail kak kamwakid neitail tohnsukuhlo en iang towehda mihting kan?

¹⁴ Doadoahngki iren mehn kasukuhl 10 en pwuhko Enjoy Life Forever! pwehn seweseiuk kamwakid noumw tohnsukuhlo. Mwohn pwuhko eh wiawihda, pekipek kowohng ekei sounkalohk kan en doadoahngki iren mehn kasukuhlo rehn neirail tohnsukuhl kan. Irail nda me mehn kasukuhl wet uhdahn mwahu oh e sewese neirail tohnsukuhl ko ren iang towehda mihting kan. Ei ni mehlel, ke sohte anahne awih lao lel iren mehn kasukuhl 10 pwehn luke noumw tohnsukuhlo en iang towehda mihting kan. Luke ih ni ahnsou mwadang oh pousehlahte wia met. Kahpwal kan me tohnsukuhl kan kin lelohng wekpeseng. Eri tehk kanahieng dahme noumw tohnsukuhlo anahne, oh kilang ma ke kak kihda mehn sawas me pahn kak sewese ih. Dehr mworusala ma e pahn anahne ahnsou werei mwohn e tepida iang mihting kan. Kanengamah ahpw pousehlahte luke ih.

15. Dahme neitail tohnsukuhl kan ele kin masak?

¹⁵ Ke tamataman omw ekis masepwehk en wiahla emen Sounkadehdehn Siohwa? Mweinele ke medewe me ke sohte douluhl pahn kak iang kalohk ihmw lel ihmw de mwehin ke masak me omw peneinei de kompoakepahmw kan kakete uhwong uhk. Ma ei, ke wehwehki en noumw tohnsukuhl en Paipelo eh pepehm. Sises mahsanih me ekei ele pahn ahneki soangen masak wet. Ahpw, e kangoangehki sapwellime tohnpadahk ko en dehr mweidohng masepwehk en kauhdi arail papah Siohwa. (Mad. 10:16, 17, 27, 28) Ia duwen Sises eh ketin sewese sapwellime tohnpadahk ko en powehdi arail masak? Oh ia duwen omw kak alasang sapwellime mehn kahlemeng?

16. Ia duwen atail kak kaiahne neitail tohnsukuhlo en padahkihong meteikan dahme e kin sukuhlki?

¹⁶ Ekisekis kaiahne noumw tohnsukuhlo en ehukihong meteikan dahme e kamehlele. Ele sapwellimen Sises tohnpadahk ko saloh ni eh poaroaneirailla ren kalohk. Ahpw Sises ketin  sewese irail sang ni eh mahsanihong irail dahme re pahn kalohki oh wasa me re pahn kalohk ie. (Mad. 10:5-7) Ia duwen omw kak kahlemengih Sises? Sewese noumw tohnsukuhlo en ese iahd me e kak kalohk. Karasepe, idek reh ma mie me e ese me pahn kak paiekihda eh sukuhlki padahk mehlel en Paipel ehu. Kowe eri sewese ih en kaunopada dahme e pahn nda sang ni omw kasalehiong ih ahl mengei en padahkihong meteikan me mehlelo. Ma kak, ke kak iang ih praktis sang ni omw doadoahngki wasa me nda “Some People Say” oh “Someone May Ask,” me mi nan pwuhko Enjoy Life Forever! Ni omw wia met, nantihongete en sewese noumw tohnsukuhlo en doadoahngki Paipel pwehn wia pasapeng mengei oh kamantik.

17. Ia duwen atail kak doadoahngki Madiu 10:19, 20, 29-31, pwehn sewese neitail tohnsukuhlo en kin likih Siohwa?

¹⁷ Sewese noumw tohnsukuhlo en likih Siohwa. Sises mahsanihong sapwellime tohnpadahk ko me Siohwa pahn ketin sewese irail pwehki E ketin poakohng irail. (Wadek Madiu 10:19, 20, 29-31.) Katamankihong noumw tohnsukuhlo me Siohwa pahn pil ketin sewese ih. Ke kak sewese ih en koapworopworki Siohwa ni omw iang ih kapakapki eh mehn akadei kan. Franciszek, sang Poland, nda: “Ei sounpadahko kin kalapw kapakapki ei mehn akadei kan. Ni ei kilang me Siohwa ketin sapengala en ei sounpadahko kapakap ko, I mwadangete tepida kapakap. I kak pehm me Siohwa ketin sewese ie ni ei peki ien kommoal pwe ien iang towehda mihting oh mihting tohrohr kan mendahki ei doadoahko kapw.”

18. Ia sapwellimen Siohwa pepehm duwen doadoahk kan me Kristian kan kin wia?

¹⁸ Siohwa uhdahn ketin nsenohki neitail tohnsukuhl en Paipel kan. E ketin mwahngih ia uwen laud en tohnpadahk kan ar kin doadoahk pwehn sewese aramas en karanihala ih, oh e ketin poakohng irail pwehki met. (Ais. 52:7) Ma ke sohte kin wia onop en Paipel rahnpwukat, ke kak sewese tohnsukuhl en Paipel kan en kekeirda oh papidaisla sang ni omw iang sounkalohk teikan nan arail onop.