1, 2. (a) Ia ahn Sounkadehdehn Siohwa kan pepehm ong Paipel? (b) Pali dahieu nan Paipel me ke keieu perenki?

 NIN duwen Sounkadehdehn Siohwa kan, kitail kin perenki Paipel. E kin kamweitkitailla, kihda koapworopwor oh kaweid kan me kitail kak likih. (Rom 15:4) Paipel kaidehn pwuhk ehu me audaudki madamadau en aramas ahpw e wia “mahsen en Koht.”​—1 Des. 2:13.

² Mie pali kan nan Paipel me emenemen kitail kin keieu perenki. Ekei perenki pwuhken Rongamwahu kan pwehki Rongamwahu pwukat kasalehda sapwellimen Siohwa irair kaselel kan me Sises kasalehda. (Sohn 14:9) Ekei perenki pwuhken kokohp kan duwehte pwuhken Kaudiahl me kin kasalehiong kitail “soahng kan me pahn wiawi mwadang mwurin ahnsou kis.” (Kaud. 1:1) Ekei kin ale kamweit sang ni arail wadek pwuhken Melkahka, oh ekei kin perenki wadek kaweid mwahu kan nan pwuhken Lepin Padahk. Eri e sansal me Paipel wia pwuhk ehu ong aramas koaros.

3, 4. (a) Ia atail pepehm ong neitail sawaspen Paipel kan? (b) Sawaspen Paipel dah kan me kitail kin alehdi me wiawihda ong soangen pwihn ehu?

³ Pwehki kitail kin perenki Paipel, kitail pil perenki neitail  sawaspen Paipel kan pwehki pwuhk pwukat kin poahsoankihda Mahsen en Koht. Siohwa me kin ketikihda pwuhk kan, kisin pwuhk kan, makasihn oh sawaspen Paipel teikan koaros me kitail alehdi. Oh pwuhk pwukat kin sewese kitail en mihmi karanih ih oh kolokol atail pwoson en kehlail.​—Taitus 2:2.

⁴ Neitail sawaspen Paipel tohto kin wiawihda ong Sounkadehdehn Siohwa kan koaros. Ahpw, mie ekei sawaspen Paipel me wiawihda ongete soangen pwihn ehu, duwehte me pwulopwul kan de pahpa nohno kan. Pali laud en ire kan de kasdo kan nan neitail website kin wiawihda ong aramas akan me kaidehn Sounkadehdehn Siohwa kan. Soangsoangen sawaspen Paipel pwukat kin kasalehda me Siohwa ketin kolokolete sapwellime inou en ketikihda kaweid tohto ong sapwellime kan koaros.—Ais. 25:6.

5. Dahme kitail kak kamehlele me Siohwa kin ketin kupwurperenki?

⁵ Pali laud en kitail kin men en mie atail ahnsou laud pwehn wadek Paipel oh neitail sawaspen Paipel kan. Ahpw ele kitail sohte kin ahnsou koaros doadoahngki uwen ahnsou tehieu pwehn onopki sawaspen Paipel koaros me kitail alehdi. Kitail kak kamehlele me Siohwa kin ketin kupwurperenkihda atail kin doadoahngki atail ahnsou ni loalokong pwehn wia wadawad oh onop. (Ep. 5:15, 16) Ahpw, mie soangen keper ehu me kitail anahne kanahieng oh soikala. Keper dahieu met?

6. Dahme kak kahrehiong kitail en katihasang kamwahupen ekei soahng kan me Koht ketikihda?

⁶ Ma kitail sohte kanahieng, kitail kakete medewe me ekei pali nan Paipel de ekei neitail sawaspen Paipel kan sohte kadoadoahk ong kitail. Karasepe, ia duwen ma ehu pali nan Paipel sohte mwomwen pwungiong atail irairo? De ia duwen ma kitail sohte iang kisehn pwihn ehu me sawaspen Paipelo kin dokedoke? Ia duwe, kitail kin wadekala mwadang de pil sohte douluhl wadek? Ma ei, kitail kakete katihasang ire kesempwal kan me pahn wia kamwahu ong kitail. Ia duwen atail kak soikala keper wet? Kitail anahne tamataman me iren sawas koaros me kitail ale kin pwilisang rehn Siohwa. Paipel mahsanih: “Ngehi me KAUN-O omw Koht, me kupwurki padahkihiuk pwe en wia kamwahu ehu ong uhk.” (Ais. 48:17) Nan iren onop wet, kitail pahn koasoiapene iren sawas siluh me pahn sewese kitail en paiekihda soahng koaros me Siohwa ketikihong kitail.

7. Dahme kahrehda kitail en toupahrek ni atail wadek Paipel?

⁷ Ahneki toupahrek ni omw wadawad. Mehlel me ekei pali nan Paipel kin ntingdi ong soangen aramas men de pwihn en aramas ehu. Ahpw, Paipel mahsanih ni sansal me “audepen Pwuhk Sarawi unsek pwilisang rehn Koht, oh e mwahu.” (2 Tim. 3:16) Ihme kahrehda kitail anahne toupahrek ni atail wadek Paipel. Emen brother song en tamanda me e kak sukuhlki iren kasukuhl kei sang koasoipen Paipel ehute. Met sewese ih en diarada nan ire ko mehn kasukuhl kan me sohte nohn sansal. Eri mwohn atail wadek Paipel, kitail anahne peki rehn Siohwa en ketikihong kitail erpit oh toupahrek pwehn wehwehki iren mehn kasukuhl kan me e ketin kupwurki kitail en sukuhlki.​—Esra 7:10; wadek Seims 1:5.

8, 9. (a) Ni ahnsou me kitail kin wadewadek Paipel, peidek dah kan me kitail ele pahn pein idek rehtail? (b) Dahme koasoandi kan me Kristian elder kan anahne kapwaiada padahkihong kitail duwen Siohwa?

⁸ Idek peidek kan. Ni omw wadek Paipel, uhdi oh pein idek rehmw peidek pwukat:  ‘Dahme ire wet padahkihong ie duwen Siohwa? Ia duwen ei kak doadoahngki ire wet nan ei mour? Ia duwen ei kak doadoahngki ire wet pwehn sewese meteikan?’ Ni atail doudouloale peidek pwukat, kitail pahn paiekihda laud atail wadawad en Paipel. Kitail tehkpene karasepe ehu. Paipel kasalehda koasoandi kei me Kristian elder kan anahne kapwaiada. (Wadek 1 Timoty 3:2-7.) Ahpw pali laud en kitail kaidehn elder kei, eri kitail kakete medewe me ireo sohte uhdahn kak sewese kitail. Ahpw kitail en doadoahngki peidek siluh ko me kitail koasoia mwoweo pwehn kilang ia duwen soangen koasoandi ko me elder kan anahne kapwaiada ar kak sewese kitail koaros.

⁹ Dahme ire wet padahkihong ie duwen Siohwa? Siohwa ketikihong kitail koasoandi kei ong elder kan. E ketikihda koasoandi mwahu kan ong ohl akan me kin apwalih mwomwohdiso. Met kasalehda me mwomwohdiso kin kesempwal ong Siohwa. Paipel mahsanih me Siohwa ketin pwaindahr mwomwohdiso “pwehki ntahn sapwellime Iehros.” (Wiewia 20:28) Eri Siohwa ketin kasik me elder kan en wia mehn kahlemeng mwahu oh re pahn wehkohng Koht arail wiewia kan ong tohnmwomwohdiso. Siohwa ketin kupwurki kitail en sohte ahneki pepehm en perki mehkot pahn epwelparail. (Ais. 32:1, 2) Eri ni atail wadek duwen koasoandi pwukat, kitail sukuhlki ia uwen laud en Siohwa eh uhdahn ketin nsenohki kitail.

10, 11. (a) Ni atail wadek koasoandi kan me elder kan anahne kapwaiada, ia duwen atail kak doadoahngkihong pein atail mour? (b) Ia duwen atail kak doadoahngki ire pwukat pwehn sewese meteikan?

¹⁰ Ia duwen ei kak doadoahngki ire wet nan ei mour? Ma kowe emen elder, ke anahne kaukaule kousapahlih koasoandi kan me ke anahne kapwaiada oh song en kamwahwihala omw wia met. Ma ke kin “nantihong ale pwukoa en sounapwalih men,” ke anahne kapwaiada koasoandi pwukat ni uwen omw kak. (1 Tim. 3:1, NW) Ahpw Kristian koaros kak sukuhlkihsang koasoandi pwukat. Karasepe, Siohwa kin ketin kasik me kitail koaros en kin toupahrek oh “ahneki madamadau pwung.” (Pil. 4:5; 1 Pit. 4:7, NW) Ni elder kan ar wia “kahlemengihpen pwihn sihpw,” kitail kak sukuhlkihsang rehrail oh “kahlemengih ar pwoson.”—1 Pit. 5:3; Ipru 13:7.

 ¹¹ Ia duwen ei kak doadoahngki ire wet pwehn sewese meteikan? Kitail kak doadoahngki koasoandi ko me elder kan anahne kapwaiada pwehn sewese tohnsukuhl en Paipel kan oh pil meteikan me perenki rong ren wehwehki ia duwen Kristian elder kan ar weksang kaunen pelien lamalam kan. Koasoandi pwukat kak pil sewese kitail en tamataman doadoahk laud me elder kan kin wia nan atail mwomwohdiso. Oh met pahn sewese kitail en wauneki brother pwukat. (1 Des. 5:12) Ma kitail uhdahn wauneki irail, irail pahn uhdahn perenki wia arail pwukoa.​—Ipru 13:17.

12, 13. (a) Ni atail doadoahngki mehn sawas kan me kitail alehdi, soangen wiepen roporop dah me kitail kak wia? (b) Menlau kihda ehu karasaras ong ia duwen wasa ehu nan Paipel eh kak kasalehda mehn kasukuhl kan me kitail sohte kin mwadangete kilangada.

¹² Wia roporop. Ni atail onopki Paipel, kitail kak rapahki pasapengpen peidek pwukat:

•   Ihs me ntingihedi pali wet nan Paipel?

•   Ia wasa oh iahd me e ntingdi?

•   Mwekid kesempwal dahieu me wiawi ni ahnsou me pwuhk wet ntingdi?

 Soangen ire pwukat kak sewese kitail en kilang mehn kasukuhl kan me kitail sohte kin mwadangete kilangada.

¹³ Karasepe, Esekiel 14:13, 14 mahsanih: “Ma wehi ehu pahn wiahda dihp oh soaloalopwoatohng ie, I pahn kapahla limei oh kamwomwala eh wahnsahpw akan. I pahn kadarodo lehk lapalap oh kemehla aramas oh mahn akan. ‘Mehnda ma ohl silimeno, Noha, Daniel, oh Sohp iang koukousoan wasao, ar lelepek pahn doarehlahte pein ar mour.’ KAUN-O, Wasa Lapalahpie, me mahmahsen.” Ma kitail wia roporop, kitail sukuhlki me Esekiel ntingihedi mahsen pwukat mpen sounpar 612 mwohn Krais. Noha oh Sohp mehlahier erein sounpar tohtohie, ahpw Siohwa ketin tamatamante ara kin lelepek. Ahpw, Daniel wie momourte. Mwein e sounpar 20 ahnsou me Siohwa ketin mahsanih me e wia aramas pwung men duwehte Noha oh Sohp. Dahme kitail sukuhlki? Kitail sukuhlki me Siohwa kin ketin mwahngih oh pil kesempwalki sapwellime ladu lelepek kan koaros, iangahki me pwulopwul kan.​—Mel. 148:12-14.

14. Ia duwen pwuhk kan me wiawihda ong me pwulopwul kan ar kak sewese irail, oh ia duwen ar kak pil wia kamwahu ong meteikan? (Menlau kilang tepin kilel.)

¹⁴ Pwuhk kan ong me pwulopwul kan. Kitail sukuhlkiher me kitail kak paiekihda sang pali koaros en Paipel. Ni ahlohte, kitail pil kak paiekihda sang neitail sawaspen Paipel koaros. Kitail tehkpene ekei karasepe kan. Sounpar kei mwoweo, Siohwa ketikihda soangsoangen ire tohto ong me pwulopwul kan. ^[1] Soangen ire pwukat kin sewese irail en dadaur pahn kasongosong kan nan sukuhl oh pil soangen apwal kan me irail kin lelohng ni arail wie kekeirda. Ahpw ia duwen kitail koaros kak paiekihda atail wadek sawaspen Paipel pwukat? Ni atail wadek ire pwukat, kitail sukuhlki duwen kahpwal kan me me pwulopwul kan ahneki oh kitail kak sewese oh kangoange irail.

15. Dahme kahrehda Kristian me laud kan en men wadek ire kan me wiawihda ong me pwulopwul kan?

¹⁵ Kristian me laud kan en dehr aklapalap oh sohte wadek ire kan ong me pwulopwul kan. Kahpwal tohto me oaralap pwukat kin koasoia kin kamwakid Kristian koaros. Karasepe, kitail koaros anahne uhki dahme kitail kamehlele, kaunda atail pepehm kan, soikala kasongosong sang meteikan, oh soikala werek suwed oh pil mehn kamweit suwed kan. Eri mendahki sawaspen Paipel pwukat wiawihda  ong me pwulopwul kan, ire kan loale kin kohsang nan Paipel oh Kristian koaros kak paiekihda.

16. Dahme neitail sawaspen Paipel kan pil kin sewesehki me pwulopwul kan en wia?

¹⁶ Sawaspen Paipel kan me wiawihda ong me pwulopwul kan pil kak sewese irail en kakehlaka arail nanpwungmwahu rehn Siohwa. (Wadek Eklesiasdes 12:1, 13.) Me laud kan pil kak paiekihda. Karasepe, Awake! (lokaiahn wai) en April 2009 kasalehda oaralap ehu me koasoia ia duwen atail kak paiekihda wadawad en Paipel. (Young People Ask . . . How Can I Make Bible Reading Enjoyable?) Oaralap wet kihda mehn sawas kei iangahki koakon ehu me kitail kak sehkasang, nekidala, oh doadoahngki ong onop. Ia duwe, me laud kan pil paiekihda oaralap wet? Emen lih pwopwoud me naineki seri nda me wadawad en Paipel kin ahnsou koaros apwal ong ih en wia. Ahpw e doadoahngki sawas kan nan ire wet oh met e kin perenki kilang ia duwen pwuhk kan nan Paipel ar kin dokpene oh kasalehda mehkot kaselel. E nda: “Met I kin kasikasik ei wadawad en Paipel,” oh e pil nda, “Sohte pak ehu mwoweo me I kin perenki ei wadawad en Paipel duwehte met.”

17, 18. Ia duwen atail kak paiekihda atail wadek sawaspen Paipel kan me wiawihda ong wehipokon? Menlau kihda ehu karasaras.

¹⁷ Pwuhk kan ong wehipokon. Sang pahr 2008, kitail kin perenki Kahn Iroir ong onop. E kin wiawihda ong Sounkadehdehn Siohwa kan, ahpw pil mie makasihn kan me wiawihda ong wehipokon. Ia duwen atail pil kak paiekihda mepwukat? Kitail tehkpene ehu karasepe. Ni omw luke emen en kohdo ni atail Wasahn Kaudok oh e kohdo, ke kin perenda. Ni me wia padahko kin padapadahk, ke kin medemedewe aramaso me ke lukehdo. Ke kin medewe ia ahn aramaso pepehm ong soahng kan me e rongorong oh ia duwen ire ko ar kak wekidala eh mour. Imwilahn met, ke kin mwekidkihda oh met pil kalaudehla omw kalahnganki oaralapo.

¹⁸ Met pil kak wiawiong kitail ni atail kin wadek sawaspen Paipel kan me wiawihda ong wehipokon. Karasepe, oaralap kan en Kahn Iroir me wiawihda ong wehipokon oh pil oaralap kan me mi nan jw.org. kin kawehwehda Paipel sang ni ar doadoahngki lepin lokaia kan me mengei ong kitail en wehwehki. Ni atail wadek oaralap pwukat, e kin kalaudehla atail wehwehki oh poakohng padahk mehlel kan en Paipel me kitail esehier. Pil ehu, kitail kak sukuhlki wiepe kapw kan pwehn kawehwehda dahme kitail kamehlele nan atail doadoahk en kalohk. Ni ahlohte, makasihno Awake! kin kakehlaka dahme kitail kamehlele duwen Sounkapikadao. Makasihno pil kin sewese kitail en sukuhlki ia duwen atail kak uhki dahme kitail kamehlele.​—Wadek 1 Piter 3:15.

19. Ia duwen atail kak kasalehda atail kalahnganki dahme Siohwa kin ketikihda?

¹⁹ E sansal me Siohwa kin ketikihda kaweid tohto pwehn wia kamwahupatail. (Mad. 5:3) Kitail en pousehlahte wadek oh doadoahngki soahng koaros me e ketikihong kitail. Ma kitail wia met, kitail pahn paiekihda oh pahn kasalehiong Siohwa me kitail kin kalahnganki soahng koaros me e kin ketikihda.​—Ais. 48:17.