1, 2. (a) Dahme kahrehda kitail kin ale kangoang sang riatail Kristian kan me kin kalokalohk wasa kan me aramas tohto sohte kin rong? (Menlau kilang tepin kilel.) (b) Dahme Sises mahsanihki duwen kalohk “nan uhdahn eh wasa”? (Menlau kilang nting tikitik kan me kileldi.)

SERGIO OH OLINDA wia pioneer pwopwoud ehu nan Wehin Amerika. Ira koaros sounpar 80 samwa. Me keren, nehra ko kin medek oh ira kin apwalki alu. Ahpw nin duwen me ira kin wia erein sounpar tohto, ira kin aluhla wasa ehu nan ara kahnimwo me diren aramas, sidohsa oh ihmw kan kuloak isuh ni menseng kan. Ira kin kesihnen karanih wasahn peidi en bus oh kasalehiong aramas akan me alu wasao neitail sawaspen Paipel kan. Pali laud en aramas ako kin pohnsehse ira, ahpw Sergio oh Olinda kin mihte ara wasao oh mas pohkomwokomw ong irail kan me kin kilang ira. Nin souwas, ira kin wawai pwurala imwarao. Manda ni menseng, ira pil pwurala ni wasahn peidi bus-o ni kuloak isuh. Ira kin pousehlahte kalohk ni menseng weneu nan wihk ehu, nan pahro pwon.

 ² Mie riatail Kristian lelepek tohto me duwehte Sergio oh Olinda me kin kalokalohk nan arail wasahn kalohk kan erein sounpar tohto, mendahki pali laud en aramas akan sohte kin rong. Mwein ke pil kin kalohk nan soangen wasa kan me duwehte met. Ma ei, se men kapingahkin uhk omw kin dadaurete oh pousehlahte kalohk mendahki e apwal. * Omw mehn kahlemeng mwahu kin kangoange riatail Kristian tohto, pil irail kan me koahiek oh wereilahr nan doadoahk wet. Tehk dahme ekei sounapwalih me kin seiloak koasoia. Emen nda: “Ni ei kin iang riatail Kristian lelepek kan nan kalohk, arail mehn kahlemeng kin uhdahn kakehlakahda ie.” Emen pil nda: “Arail lelepek kin kangoange ie en nantihong oh eimah nan ei doadoahk en kalohk.” Emen pil nda: “Arail mehn kahlemeng kin kaperenda mohngiongiet.”

3. Peidek siluh dah kan me kitail pahn koasoiapene, oh dahme kahrehda?

³ Nan iren onop wet, kitail pahn sapengala peidek siluh: Dahme kahrehda ekei pak kitail kin mwoarosala? Ia duwen atail kin wa? Dahme pahn sewese kitail en kanengamah ni atail kin wa? Atail ese pasapengpen peidek pwukat pahn kangoange kitail en pousehlahte wia doadoahk en kalohk me Sises ketikihong kitail en wia.

4. (a) Ia ahn Pohl pepehm ong ahn mehn Suhs kan ar sohte men rong ih? (b) Dahme kahrehda Pohl ahneki soangen pepehm wet?

⁴ Mie pak me ke mwoaroskihla aramas akan nan omw wasahn kalohk ar sohte men rong duwen rongamwahu en Wehin Koht? Ma ei, ke kak wehwehki pepehm en wahnpoaron Pohl. Mpen sounpar 30 e kin kalokalohk, oh e sewese me tohto en wiahla Kristian. (Wiewia 14:21; 2 Kor. 3:2, 3) Ahpw e sohte kak sewese mehn Suhs tohto en wiahla Kristian. Pali laud en irail sohte kin rong Pohl, oh ekei pil kaloke ih. (Wiewia 14:19; 17:1, 4, 5, 13) Ia duwen Pohl eh mwekidki arail sohte men rong ih? E nda: “Ia uwen ei pahtou! Ia uwen medek poatopoat me mi nan mohngiongiet.” (Rom 9:1-3) Dahme kahrehda e ahneki pepehm wet? Pwehki e uhdahn kesempwalki kalohk oh e pil poakohng aramas. Pohl uhdahn nsenohki mehn Suhs kan oh nsensuwedkihla arail soikala sapwellimen Koht kalahngan.

5. (a) Dahme kin kamwakid kitail en kalohk? (b) Dahme kahrehda ekei pak kitail kin mwoarosala?

⁵ Duwehte Pohl, kitail kin kalohk ong aramas akan pwehki kitail nsenohkin irail oh kitail men sewese irail. (Mad. 22:39; 1 Kor. 11:1) Kitail ese sang dahme kin wiawihong kitail me en papah Siohwa iei elen mour me keieu mwahu. Oh kitail men sewese meteikan en kilang ia uwen arail mour pil kak mwahula! Ihme kahrehda kitail kin doulahte kangoange irail en sukuhlki padahk mehlel duwen Siohwa oh pil duwen kupwure ong tohnsampah. E kin mwomwen me kitail kin wahla rehrail kisakis kaselel ehu oh peki irail nda: ‘Menlau ale kisakis wet.’ Eri ni arail kin soikala kisakiso, ‘ia uwen medek poatopoat me mi nan mohngiongitail,’ duwehte Pohl. Kitail kin ahneki soangen medek wet, kaidehn pwehki sohte atail pwoson, ahpw pwehki kitail kin uhdahn poakohng aramas. Eri mendahki ele ekei pak kitail mwoarosala, kitail kin pousehlahte kalohk. Kitail kak kamehlele dahme Elena, me wia pioneer men daulih sounpar 25, nda: “I diarada me doadoahk en kalohk kin apwal. Ahpw sohte doadoahk ehu me I men wia likin kalohk.”

6. Peidek dahieu me kitail pahn sapengala met?

⁶ Dahme kahrehda kitail kak kamehlele me kitail kak pweida nan kalohk sohte lipilipil ia  wasa kitail kin kalohk? Pwehn sapengala peidek kesempwal wet, kitail pahn koasoiapene sapwellimen Sises karasaras riau duwen anahnepen en “kin wa.” (Mad. 13:23) Keieu en karasaras kin pid tuhkehn wain ehu.

7. (a) Nan sapwellimen Sises karasaraso, ihs ‘soumweto,’ ‘tuhkehn waino,’ oh “rah koaros”? (b) Peidek dahieu me kitail anahnehte sapengala?

⁷ Wadek Sohn 15:1-5, 8. Nan karasaras wet, Sises mahsanih me Siohwa iei ‘soumweto,’ pein Sises iei ‘tuhkehn waino,’ oh sapwellime tohnpadahk kan iei “rah koaros.” * Sises eri mahsanihong sapwellime wahnpoaron ko: “Iet duwen lingaling en Sahmo eh pahn sansalda, ma kumwail pahn kapwarehda wa tohto, oh ih duwen amwail pahn wiahla nei tohnpadahk.” Eri, ia wehwehn en kin kapwarehda wa? Nan karasaras wet, Sises sohte ketin kasalehda ni sansal soangen wa dah, ahpw e ketikihda iren sawas ehu me sewese kitail en diarada pasapengpen peideko.

8. (a) Nan sapwellimen Sises karasaraso, dahme kahrehda en “kapwarehda wa” sohte kak wehwehki en kahrehiong aramas en wiahla tohnpadahk kapw kan? (b) Dahme mehlel me pid soahng koaros me Siohwa ketin kupwurki kitail en wia?

⁸ Sises mahsanihki Semeo: “Rah koaros me wosasang ie ahpw sohte wa, Semeio kin ketikihsang.” Met wehwehki me kitail kak wia sapwellimen Siohwa ladu kan ihte ma kitail kin kapwarehda wa. (Mad. 13:23; 21:43) Eri nan karasaras wet, en kapwarehda wa sohte kak wehwehki atail kin kahrehiong aramas en wiahla tohnpadahk kapw kan. (Mad. 28:19) Ma ih duwen met, Sounkadehde lelepek kan me sohte sewese emen en wiahla sapwellimen Sises tohnpadahk pahn duwehte rah kan me sohte kin kapwarehda wa. Ahpw met sohte kak mehlel! Dahme kahrehda? Pwehki kitail sohte kak idingkihong aramas akan en wiahla tohnpadahk kan. Oh Siohwa kin ketin limpoak. E sohte pahn ketin kupwurki kitail en wia mehkot me kitail sohte kak wia. E ketin kupwurkihte kitail en wia dahme kitail kak wia.​—Deud. 30:11-14.

9. (a) Ia duwen atail kin kapwarehda wa? (b) Karasaras dahieu me kitail pahn koasoiapene?

⁹ Eri, ia wehwehn en kapwarehda wa? Met iei mehkot me kitail koaros kak wia. Soangen doadoahk dahieu me Siohwa ketikihong sapwellime ladu kan koaros? Kalohki rongamwahu en Wehin Koht. * (Mad. 24:14) Sapwellimen Sises karasaras me pid sounkamwarako kasalehda met. Eri kitail pahn koasoiapene karasaras wet.

10. (a) Ia wehwehn werentuhkeo oh pwehlo nan sapwellimen Sises karasaraso? (b) Dahme tuhkehn wihd pwoat kin kapwarehda?

¹⁰ Wadek Luk 8:5-8, 11-15. Nan karasaras en sounkamwarako, Sises ketin kawehwehda me werentuhkeo iei “mahsen en Koht,” de rohng me pid Wehin Koht. Pwehlo iei mohngiong en aramas. Werentuhke me pwupwudiong nan pwelmwahu kin katengehdi kalewe kan, wosada oh wiahla tuhke pwoat. Eri, tuhkeo “wa​—weren kaparapar epwiki.” Ma tuhkeo iei tuhkehn wihd, soangen wa dah me e pahn kapwarehda? Kisin tuhkehn wihd tikitik kis? Soh, e pahn kapwarehda werentuhke kan, me pahn keirda oh wiahla tuhkehn wihd mwuhr. Nan karasaras wet, ehu werentuhke kin kapwarehda werentuhke 100. Dahme met padahkihong kitail duwen atail doadoahk en kalohk?

11. (a) Dahme karasaras en sounkamwarako kin padahkihong kitail duwen atail doadoahk en kalohk? (b) Ia duwen atail kin kapwarehda werentuhke kapw?

¹¹ Ni atail pahpa nohno Kristian kan de Sounkadehde teikan ar tepin padahkihong kitail duwen Wehin Koht, e mwomwen me re padokedi  werentuhke ehu nan pwelmwahu. Irail uhdahn peren ni arail kilang me kitail kin mwekidki rongamwahwo. Werentuhkeo pousehlahte kekeirda lao e pahn kapwarehda wa. Duwehte tuhkehn wihdo me kitail koasoia mwoweo eh sohte kin kapwarehda kisin tuhkehn wihd kapw ahpw werentuhke kapw, kitail sohte kin kapwarehda tohnpadahk kapw kan, ahpw werentuhke kapw. * Ia duwen atail kin wia met? Ahnsou koaros me kitail kin padahkihong meteikan duwen Wehin Koht, e mwomwen me kitail kin kamwakamwarak werentuhke me poadidier nan mohngiongitail. (Luk 6:45; 8:1) Eri, erein ahnsou me kitail kin kalokalohki rongamwahu en Wehin Koht, kitail kin “kanengamah, e lao kin wa.”

12. (a) Dahme kitail sukuhlkihsang sapwellimen Sises karasaras en tuhkehn waino oh sounkamwarako? (b) Ia omw pepehm ong mehn kasukuhl wet?

¹² Dahme kitail sukuhlkihsang sapwellimen Sises karasaras en tuhkehn waino oh pil sounkamwarako? Kitail sukuhlki me “kapwarehda wa” sohte kin poahsoandahsang aramas kin rong rongamwahwo de soh. E poahsoandahsang atail kin pousehlahte kalokalohk de soh. Pohl koasoia mehkot me duwehte met ni eh kawehwehda: “Emenemen pahn ale ketingpe nin duwen eh doadoahk.” (1 Kor. 3:8, NW) Siohwa pahn ketin katingih kitail pwehki atail doadoahk, kaidehn pwehki lipwen atail doadoahk. Matilda, me kin wia doadoahk en pioneer erein sounpar 20, nda: “E kaperen en ese me Siohwa kin ketin katingih atail nannanti.”

13, 14. Nin duwen me Rom 10:1, 2 kasalehda, ia kahrepe kan me Pohl sohte kin uhdihsang eh kalohk?

¹³ Dahme pahn sewese kitail en “kanengamah, e lao kin wa”? Kitail pahn tehk mwahu ahn Pohl mehn kahlemeng. Kitail ese me Pohl kin mwoaroskihla mehn Suhs ko ar soikala rohng en Wehio. Ahpw Pohl sohte kin uhdihsang eh kalohk ong irail. E kawehwehda eh pepehm ong irail mehn Suhs ko ni eh nda: “Ia uwen ei ngoangki sang nan mohngiongi unsek pwe riei mehn Suhs akan en mourla! Ia  uwen ei ngidingid oh kin kapakapkin irail rehn Koht! Pwe I kak kadehde duwen arail inenen poadidiong Koht, ahpw sohte kekeid ni pwungen marain mehlel.” (Rom 10:1, 2) Eri dahme kahrehda Pohl kin pousehlahte kalokalohk?

¹⁴ Keieu, Pohl nda me e men kalohk ong mehn Suhs kan pwehki ‘eh ngoangki sang nan eh mohngiong unsek.’ E uhdahn men irail en mourla. (Rom 11:13, 14) Keriau, e koasoia duwen eh “ngidingid oh kin kapakapkin irail rehn Koht.” Pohl kin peki rehn Siohwa en ketin sewese emenemen mehn Suhs ko en mwekidki rohng en Wehio. Kesiluh, Pohl koasoia duwen “arail inenen poadidiong Koht.” Pohl kilang soahng mwahu kan rehn aramas oh duwen arail kak papah Siohwa. E ese me mehn Suhs poadidi ko kakete wiahla sapwellimen Krais tohnpadahk ngoang kei, duwehte ih.

15. Ia duwen atail kak alasang Pohl? Menlau kihda karasepe kan.

¹⁵ Ia duwen atail kak alasang Pohl? Keieu, kitail uhdahn pahn men diarada irail kan me “ahneki mohngiong mwahu en ale mour soutuk.” Keriau, kitail kin peki rehn Siohwa en ketin sewese aramas akan me ahneki mohngiong mehlel ren rong ni atail kin kalohk ong irail. (Wiewia 13:48, NW; 16:14) Ih met me Silvana, me wia doadoahk en pioneer kereniong sounpar 30, wiahier. E nda: “Mwohn ei kin kohla ni ehu ihmw nan wasahn ei kalohk, I kin kapakapohng Siohwa, peki reh en ketikihong ie madamadau pwung.” Kitail pil kin kapakapki me tohnleng kan pahn sewese kitail en diar aramas akan me men rong. (Mad. 10:11-13; Kaud. 14:6) Robert, me wia doadoahk en pioneer dauliher sounpar 30, nda: “E kaperen en iang doadoahk rehn tohnleng kan me ese dahme kin wiawi nan mouren tohnihmw kan.” Kesiluh, kitail kin song en kilang soahng mwahu kan rehn aramas oh arail kak papah Siohwa. Carl, emen elder me papidaisla daulih sounpar 50 samwalahro, nda: “I kin rapahki soahng tikitik kis rehn aramaso me kak kasalehda me e ahneki mohngiong mehlel, mwein sang ni eh sirei, mwomwen meseo, de sang eh peidek.” Ma kitail kin wia soahng pwukat, kitail kak “kanengamah, e lao kin wa,” duwehte me Pohl kin wia.

16, 17. (a) Dahme kitail kak sukuhlkihsang Eklesiasdes 11:6? (b) Melau kawehwehda ia duwen atail kalohk eh kin kamwakid irail kan me kilikilang kitail.

¹⁶ Kitail en dehr manokehla uwen laud en aramas ar kin mwekidki atail kalohk, mendahki ma e mwomwen me sohte me kin rong. (Wadek Eklesiasdes 11:6.) Aramas akan kin kilikilang kitail. Irail kin tehk me atail likou kan kin soandi mwahu oh kitail kin kadek oh wauneki meteikan. Met kak kamwakid irail, oh kedekedeo, irail kan me kin ahneki madamadau sapwung duwen kitail mahso pil kakete tepida ahneki madamadau pwung duwen kitail. Sergio oh Olinda diarada me met mehlel.

¹⁷ Sergio nda: “Pwehki at soumwahu, se sohte kohla ni at wasahn kalohko erein ahnsou kis. Ni at pwurala, aramas ako kin idek, ‘Dahme wiawi? Se sohla kin kilang kumwa.’” Olinda sirei oh nda: “Sountangahki bus ko kin oalei kiht oh ekei kin werkihdo sang dewerailo, ‘Doadoahk mwahu!’ Re pil kin peki nait makasihn kan.” Sergio oh Olinda uhdahn pwuriamweila ni emen ohl eh kohla ni ara mehn kadar en kalohko oh kihong ira wahnrohs kaselel kei oh kalahngankihong ira doadoahk me ira kin wia.

18. Dahme kahrehda ke kin koasoanehdi teng en “kanengamah, e lao kin wa”?

¹⁸ Erein atail kin “padokedi nimenseng oh pil nin soutik” weren Wehio, kitail iang ahneki pwukoa kesempwal en wia “kadehde . . . ong aramas koaros.” (Mad. 24:14) Keieu kesempwal, ke kak ahneki peren laud pwehki ke ese me ke kin kaperenda Siohwa. E kin ketin poakohng koaros me kin “kanengamah, e lao kin wa”!