1. Dahme kahrehda kitail uhdahn kamehlele me kitail mihmiher ni “imwin rahn akan”?

MA KE iang ipwidi mwurin pahr 1914, met wehwehki me erein omw mour, ke kin momour ni “imwin rahn akan” en koasoandi en sampah wet. (2 Tim. 3:1) Kitail koaros rong duwen mwekid laud kan me Sises ketin kohpada ong ahnsou wet. Mwekid pwukat kin iangahki mahwen, lehk lapalap, rerrer en sahpw, soumwahu lusulus, lalaudlahn me suwed, oh kalokolok kan me kin wiawihong sapwellimen Siohwa aramas akan. (Mad. 24:3, 7-9, 12; Luk 21:10-12) Kitail pil kin kilang mwomwen wiewiahn aramas akan ar duwehte dahme wahnpoaron Pohl kohpada. (Menlau kilang koakon me oaralape “ Mwomwen Aramas akan Ahnsou Wet.”) Nin duwen sapwellimen Siohwa tohnkaudok kan, kitail uhdahn kamehlele me kitail mihmiher ni imwiseklahn imwin rahn akan.

2. Peidek dah kan me kitail anahne sapengala?

² Pwehki ahnsou werei dower powe sangete pahr 1914, met wehwehki me kitail mihmiher ni imwiseklahn “imwin rahn akan.” Pwehki imwio eh inenen kerendohr, kitail anahne ese pasapengpen ekei peidek kesempwal kan: Mwekid laud dah kan me pahn wiawi ni imwiseklahn “imwin rahn akan”? Oh dahme Siohwa ketin kasik kitail en wia erein atail awiawih mwekid pwukat en wiawi?

3. Nin duwen me kokohpo nan 1 Deselonika 5:1-3 kasalehda, pakair dahieu me wehi kan pahn pakairki?

³ Wadek 1 Deselonika 5:1-3. Pohl koasoia duwen “rahnen Siohwa.” Nan iretikitik pwukat, rahno kin dokedoke erein ahnsou ehu me pahn tepikihda kasohralahn “Papilon Lapalap,” de pwihn  en pelien lamalam likamw koaros, oh pahn imwikihla Armakedon. (Kaud. 16:14, 16; 17:5) Mwohnte ‘rahno’ eh pahn tepida, wehi kan pahn pakairki “Popohl oh sohte keper!” Kaun akan en sampah kin ekei pak doadoahngki lepin lokaia pwukat ni arail koasoia duwen kamwahulahn nanpwungen wehi kan. * Ahpw pakairpen “popohl oh sohte keper” me Paipel mahsanih duwe pahn weksang met. Dahme kahrehda? Pwehki ni ahnsou me pakairo wiawi, aramas akan pahn medewe me kaun akan en sampah pweidahr ni arail kahrehiong sampah en wiahla wasa ehu me sohte keper oh meleilei. Ahpw ni mehlel, “kauparail” pahn lelohng irail ni “kahn kamakam kowahlap” eh tepida.​—Mad. 24:21.

4. (a) Dahme kitail pil pahn anahne ese duwen pakairpen “popohl oh sohte keper”? (b) Dahme kitail eseier duwen pakairo?

⁴ Mie soahng kei me kitail ese duwen pakairpen “popohl oh sohte keper.” Ahpw mie soahng teikan me kitail sehse. Kitail sehse dahme pahn kahrehiong kaun akan en kihda pakair wet de ia duwen pakair wet eh pahn wiawi. Oh kitail sehse ma pakair lap ehute pahn wiawi de e pahn mie pakair tohto. Sohte lipilipil dahme pahn wiawi, kitail ese met: Kitail en dehr pitida pahn meteikan oh medewe me kaun akan en sampah uhdahn kak wahdo popohl nin sampah. Ahpw pakair wet iei me Paipel padahkihong kitail en mwasamwasahn. Met wia kilel me “rahnen Siohwa” pahn tepidahr!

5. Ia duwen 1 Deselonika 5:4-6 eh sewese kitail en onopadahng “rahnen Siohwa”?

⁵ Wadek 1 Deselonika 5:4-6. Ahn Pohl kaweido padahkihong kitail ia duwen atail kak tehk mwahu me kitail onopadahngehr “rahnen Siohwa.” Kitail en “dehr wie memeir duwehte meteikan.” Ahpw kitail en kin “pepehd” oh mwasamwasahn. Karasepe, kitail en kanahieng oh kolokol atail soupoupali oh dehr iang soahng kan me pidada palien politik. Ma kitail iang pidada soahng pwukat, kitail kakete wiahla “kisehn sampah.” (Sohn 15:19) Kitail ese me Wehin Koht kelehpw me pahn wahdo popohl nin sampah.

6. Dahme kitail men sewese meteikan en wia, oh dahme kahrehda?

⁶ Likin atail en kin wie pepehd, kitail pil men sewese meteikan en sukuhlki dahme Paipel kohpada me pahn wiawi nin sampah. Kitail en tamataman me ni ahnsou me kahn kamakam kowahlapo pahn tepida, e pahn solahr ahnsou ong aramas akan en tepida papah Siohwa. Ihme kahrehda atail doadoahk en kalohko inenen kesempwal! *

7. Dahme Siohwa ketin kasik kitail en wia ahnsou wet?

⁷ Erein ahnsou mwotomwot me luhwe mwohn sapwellime ‘rahno’ pahn tepida, Siohwa ketin kasik me kitail en soupisengki doadoahk en kalohko. Kitail en tehk mwahu me kitail kin “pwerisekiong wia soahng tohto nan doadoahk en Kauno.” (1 Kor. 15:58) Sises ketin kohpada  dahme kitail pahn wia. Ni eh mahsanih duwen soahng kan koaros me pahn wiawi ni imwin rahn akan, e pil mahsanih: “Pil nan wehi kan koaros, rongamwahu uhdahn pahn lohkseli mahs.” (Mark 13:4, 8, 10; Mad. 24:14) Nna medewehla: Ahnsou koaros me ke kin kohla kalohk, ke kin iang sewese pweidahn kokohp wet!

8. Ia duwen doadoahk en kalohki Wehio eh pousehlahte kekeirda?

⁸ Dahme kitail kak ndahki pweidahn doadoahk en kalohki Wehio? Sounpar koaros, aramas me kin rong rongamwahwo kin wie tohtohla. Karasepe, medewehla uwen tohtohlahn sounkalohk kan en Wehio nan sampah pwon ni imwin rahn akan. Nan pahr 1914, mie sounkalohk 5,155 nan sahpw 43. Rahnwet, mie sounkalohk mpen meh welirar limelopw (8.5 million) nan sahpw 240! Ahpw mendahki met, atail doadoahko saikinte nek. Kitail anahne doulahte kalohki me Wehin Koht kelehpw me pahn kamwahwihala ahn aramas kahpwal kan.​—Mel. 145:11-13.

9. Dahme kahrehda kitail en pousehlahte kalohki rongamwahu en Wehio?

⁹ Atail doadoahk en kalohki Wehio sohte pahn nek lao Siohwa mahsanih me e nekier. Ia uwen laud en ahnsou me luhluhwe ong aramas akan en esehla Siohwa Koht oh Sises Krais? (Sohn 17:3) Kitail sehse. Ahpw kitail ese me lao lel ahnsou me kahn kamakam kowahlapo pahn tepida, koaros me “ahneki mohngiong mwahu en ale mour soutuk” kak mwekidkihte rongamwahwo oh pilada en papah Siohwa. (Wiewia 13:48) Ia duwen atail kak sewese aramas pwukat mwohn eh pahn pwandala?

10. Soangen sawas dah me Siohwa ketikihda pwe kitail en padahkihong aramas akan duwen padahk mehlel?

¹⁰ Siohwa ketin doadoahngki sapwellime pwihn pwehn ketikihda soahng koaros me kitail anahne en padahkihong aramas akan duwen padahk mehlel. Karasepe, kitail kin ale kaiahn ehuehu wihk nan atail mihting en nan wihk. Mihting wet kin sewese kitail en ese dahme kitail pahn nda ni tepin atail tuhwong aramas oh pil ni atail pwurehng pwurala rehrail. Oh e pil padahkihong kitail ia duwen atail en wia onop en Paipel rehn aramas. Sapwellimen Siohwa pwihn pil kihda mehn sawas kan nan neitail Koakon en Kasukuhl. Mepwukat kin sewese kitail en . . .

• tepida koasoiong aramas akan,

• koasoi ni ahl ehu me aramas pahn perenki rong,

• kamwakid aramas akan en men kalaudehla arail esehla Paipel,

• padahki padahk mehlel ni onop en Paipel kan, oh

• luke aramas akan en kohla nan neitail website oh pil ni atail Wasahn Kaudok kan.

 Ahpw e sohte itar en ihte naineki mehn sawas pwukat. Kitail anahne doadoahngki mepwukat. * Karasepe, ma mwurin omw koasoiong emen me perenki rong oh ke kihong nah kisin doaropwe de makasihn, e pahn kak doula wadek lao ke kak pwurehng tuhwong ih. Kitail me pein pwukoahki en doulahte soupisengkihla doadoahk en kalohki Wehio sounpwong koaros.

11. Dahme kahrehda Online Bible Study Lessons wiawihda?

¹¹ Pil ehu karasepen Siohwa eh kin ketin sewese aramas akan en sukuhlki duwen padahk mehlel, Online Bible Study Lessons pil wiawihda nan jw.org^®. (Menlau kilang pahn BIBLE TEACHINGS > ONLINE LESSONS.) Dahme kahrehda iren mehn kasukuhl pwukat wiawihda? Sounpwong koaros, aramas tohtohie nan sampah pwon kin rapahki nan Internet iren mehn kasukuhl kan en Paipel. Mehn kasukuhl kan nan neitail website kak sewese aramas akan sampah pwon ren tepida sukuhlki padahk mehlel en Paipel. Ekei aramas me ke koasoiong ele kin pweieksang en onop Paipel rehmw. Ma ei, kasalehiong irail wasa kan nan neitail website de kadarohng irail ehu link ong iren mehn kasukuhl pwukat. *

12. Dahme emen kak sukuhlki sang neitail Online Bible Study Lessons?

¹² Neitail Online Bible Study Lessons kasalehda oaralap pwukat: “Paipel oh Meno me Wiahda” (The Bible and Its Author), “Aramas akan nan Paipel me Kitail Pahn Medewe” (The Bible’s Main Characters), oh “Koapworopwor me Paipel Kasalehda” (The Bible’s Message of Hope). Oaralap pwukat kin padahngki:

• Ia duwen Paipel eh kak sewese emen

• Ihs Siohwa, Sises, oh tohnleng kan

• Dahme kahrehda Koht ketin kapikada aramas akan

• Dahme kahrehda lokolok oh suwed mihmiehki

Iren mehn kasukuhl pwukat pil padahngki ia duwen Siohwa eh pahn ketin . . .

• kauhdi lokolok oh mehla,

• kaiasada me melahr akan, oh

• wiliankihda koperment kan me sohte kin pweida sapwellime Wehi.

13. Iren mehn kasukuhl kan online wiliandiher koasoandi en onop Paipel rehn aramas akan? Menlau kawehwehda.

¹³ Iren mehn kasukuhl kan online sohte kin wiliandi koasoandi en onop Paipel rehn aramas akan. Sises ketikihong kitail pwais kaselel en wia doadoahk en katohnpadahk. Kitail koapworopworki me aramas me men rong pahn wadek iren mehn kasukuhl kan online, pwungki dahme re sukuhlki, oh men kalaudehla arail esehla mepwukat. Ma ei, ele re pahn men onop Paipel. Ni imwin ehuehu iren mehn kasukuhl ko, sounwadawado kin ale luhk en wiahda pekipek pwe emen en kohla oh onop Paipel reh. Nan neitail websiteo, rahn koaros kitail kin alehdi pekipek ong onop Paipel sang aramas daulih 230 nan sampah pwon! Eri atail kohla oh onop Paipel rehn emen kin uhdahn kesempwal!

14. Nin duwen me sapwellimen Sises kaweid kasalehda nan Madiu 28:19, 20, dahme kitail en song wia ni uwen atail kak, oh dahme kahrehda?

¹⁴ Wadek Madiu 28:19, 20. Ni atail kin wia onop en Paipel, kitail en song uwen atail kak en “padahkihong aramas . . .  ren wiahla [sapwellimen Sises] tohnpadahk” oh ‘padahkihong irail en kapwaiada mehkoaros me e ketin kehkehlingkihong irail.’ Kitail anahne sewese aramas akan ren wehwehki uwen eh kesempwal ong irail en pilada en papah Siohwa oh utungada sapwellime Wehi. Met wehwehki me kitail en nantihong kamwakid irail en doadoahngki dahme re sukuhlki oh wiahkihla padahk mehlel arail,  inoukihong Siohwa arail mour, oh papidaisla. Ihte ni arail wia met me re pahn kak pitila ni rahnen Siohwa.​—1 Pit. 3:21.

15. Dahme kitail sohte ahneki ahnsou en wia, oh dahme kahrehda?

¹⁵ Nin duwen me kitail koasoia mwoweo, luhwen ahnsou sang met lel ni imwin koasoandi wet uhdahn mwotomwot. Pwehki met, sohte atail ahnsou en pousehlahte onohnop Paipel rehn aramas akan me sohte kin kasalehda ni sansal me re men wiahla sapwellimen Krais tohnpadahk. (1 Kor. 9:26) Atail doadoahk uhdahn karuwaru! Mie aramas tohto me anahnehte rong rongamwahu en Wehio mwohn eh pahn pwandala.

16. Nin duwen me Kaudiahl 18:2, 4, 5, 8 mahsanih, dahme kitail koaros anahne wia? (Pil kilang nting tikitik kan me mi pah.)

¹⁶ Wadek Kaudiahl 18:2, 4, 5, 8. Iren Paipel pwukat kasalehda pil ehu soahng tohrohr me Siohwa ketin kasik sang sapwellime tohnkaudok kan. Kristian mehlel koaros anahne tehk kanahieng me re sohte kin iang pidada Papilon Lapalap, sohte lipilipil ni ahl dah. Mwohn tohnsukuhl en Paipel men eh sukuhlki padahk mehlel, ele e kin iang pelien lamalam likamw ehu. Mwein e kin iang irail sarawi oh pil iang wia arail koasoandi kan. De ele e kin kihda sawas en mwohni ong pwihn wet. Mwohn tohnsukuhl en Paipel men kak warohng en wiahla sounkalohk men me saikinte papidais, e anahne tehk mwahu me e solahr wia kisehn pelien lamalam likamw ehu. E anahne ntingihada kisinlikou ong pelien lamalam me e kin iang mwoweo oh pil pwihn teikan koaros me e solahr wia tohn arail pwihno. *

17. Soangen doadoahk dah kan me Kristian men en soikala, oh dahme kahrehda?

¹⁷ Kristian mehlel men anahne tehk mwahu me eh doadoahk en mwohni sohte kin pidada Papilon Lapalap, sohte lipilipil ni ahl dah. (2 Kor. 6:14-17) Karasepe, e sohte pahn wia tohndoadoahk en ihmw sarawi ehu. Pil ehu, Kristian men me doadoahk ong pesines ehu sohte pahn men wia soahng tohto ong ihmw ehu me kin utung kaudok likamw. Oh ma mie pein eh pesines, e sohte pahn men alehdi doadoahk de kontirak ehu me wia kisehn Papilon Lapalap. Dahme kahrehda kitail en koasoanehdi teng en dehr wia mepwukat? Pwehki kitail sohte douluhl men iang kisehn padahk likamw kan oh wiewia sapwung kan en pelien lamalam kan me samin mwohn silang Koht.​—Ais. 52:11. *

18. Ia duwen brother men eh tengedihongete kaweid oh ire mehlel kan sang nan Paipel nan eh doadoahko?

 ¹⁸ Sounpar kei samwalahro, emen elder me ahneki pesines ehu alehdi pekipek sang sounkontirak men en iang wia doadoahk en daiksang ni ihmw sarawi ehu nan kahnimwohte me e kin kousoan ie. Sounkontirako ese me brothero kin ahnsou koaros nda me e sohte pahn wia doadoahk ong ihmw sarawi kan. Ahpw ni ahnsowo, sounkontirako uhdahn anahne emen en wia doadoahko. Mendahki met, brothero tengedihongete en idawehn kaweid oh ire mehlel kan sang nan Paipel oh sohte wia doadoahko. Mwurin wihk ehu, doaropwehn nuhs en wasao kasalehda kilel en emen kapinte tohrohr eh kidahng lohpwu ehu ni ihmw sarawio. Ma brothero wekidala eh madamadau oh wia doadoahko, ele ih me pahn mi nan kilelo. Medewehla ia uwen met eh pahn kauwehla eh adamwahu rehn ienge Kristian kan! Pil medewehla ia pahn mwomwen sapwellimen Siohwa pepehm ong met.

19-20. (a) Dahme kitail sukuhlkiher? (b) Dahme kitail pil anahne sukuhlki?

¹⁹ Paipel mahsanih me kokohp kesempwal me pahn kereniong pweida nan koasoandi en sampah wet iei me wehi kan pahn pakairki “popohl oh sohte keper.” Pwehki dahme Siohwa ketin padahkihongehr kitail, kitail ese me wehi kan sohte pahn wahdo popohl mehlel oh poatopoat. Dahme kitail en wia mwohn mwekid wet eh pahn wiawi oh kasohrala me pahn wiawi mwuri? Siohwa ketin kasik me kitail en soupisengki doadoahk en kalohki rongamwahu en Wehio oh nantihong sewese aramas tohto ren wiahla tohnpadahk en Sises. Pil ni ahnsowohte, kitail anahne kalekeikitailsang pelien lamalam likamw koaros. Met iangahki atail en uhdihsang wia towe oh pil soikala wia doadoahk kan me pidada Papilon Lapalap.

²⁰ Mie mwekid teikan mwurin met me pahn wiawi ni imwiseklahn “imwin rahn akan.” Pil mie soahng teikan me Siohwa ketin kasik kitail en wia. Soahng dah kei me, oh ia duwen atail kak kaunopada pein kitail ong soahng koaros me pahn wiawi ni ahnsou kohkohdo? Kitail pahn tehkpene mepwukat nan iren onop en mwuhr.