1. Dahme kahrehda kitail anahne uhpahiong Siohwa?

KITAIL anahne uhpahiong * Siohwa pwehki ih me Sounkapikpatail. Pwehki kahrepe wet, e sapwellimanki pwuhng en mahsanihong kitail dahme kitail en wia. (Kaud. 4:11) Ahpw pil mie ehu kahrepe me kitail anahne peikiong ih​—sapwellime elen kaunda iei me keieu mwahu. Nan poadopoad, aramas tohto kin kaunda meteikan. Ahpw ma kitail kapahrekihpene mwomwen arail kin kaunda ong sapwellimen Siohwa elen kaunda, kitail kilang me Siohwa iei Kaun emen me keieu ketin erpit, limpoak, kadek kalahngan, oh ketin poakehla aramas laudsang kaun teikan koaros.​—Eks. 34:6; Rom 16:27; 1 Sohn 4:8.

2. Kahrepe dah kan me Ipru 12:9-11 kihong kitail pwehn uhpahiong Siohwa?

² Siohwa ketin kupwurki kitail en peikiong ih, kaidehn pwehki kitail masak ih, ahpw pwehki kitail poakohng ih oh kitail kin kilangwohng ih nin duwen Samatail limpoak. Nan nah kisinlikowo ong mehn Ipru kan, Pohl kawehwehda me kitail en “men uhpah Sahmo” pwehki e ketin kaiahne kitail “ong kamwahupatail.”​—Wadek Ipru 12:9-11.

3. (a) Ia duwen atail kasalehda me kitail kin uhpahiong Siohwa? (b) Peidek dah kan me kitail pahn sapengala?

³ Kitail kin uhpahiong Siohwa sang ni atail wia uwen atail kak koaros en peikiong ih ni soahng koaros oh sang ni atail soikala ineng en koapworopworki pein atail loalokong. (Lep. Pad. 3:5) Kitail kin diar me e mengei en uhpahiong Siohwa ni atail esehla sapwellime irair kaselel kan. Dahme kahrehda? Pwehki irair kaselel pwukat iei me kin kamwakid soahng koaros me e kin ketin  wia. (Mel. 145:9) Ni atail kin kalaudehla atail sukuhlki duwen Siohwa, met kin kalaudehla atail pahn poakohng ih. Oh ni atail kin poakohng Siohwa, kitail sohte anahne kosonned tohto me kin padahkihong kitail dahme kitail en wia oh dahme kitail en dehr wia. Kitail kin song en sukuhlki en ahneki madamadau oh pepehm ni ahl me Siohwa ketin kupwurki kitail en wia oh en soikala dahme suwed. (Mel. 97:10) Ahpw ekei pak, ele e sohte kin mengei en peikiong Siohwa. Dahme kahrehda? Oh dahme elder kan, pahpa kan, oh nohno kan kak sukuhlkihsang mehn kahlemeng en Kepina Nehmaia; Nanmwarki Depit; oh Mery, inen Sises? Iren onop wet pahn sapengala peidek pwukat. 

4-5. Nin duwen me Rom 7:21-23 mahsanih, dahme kahrehda e kak apwal en uhpahiong Siohwa?

⁴ Ehu kahrepe me kitail ele kin apwalki uhpahiong Siohwa iei me kitail koaros sohsohki dihp oh soh unsek. Ele kaidehn ahnsou koaros kitail men peikiong Koht. Mwurin Adam oh Ihp uhwongada Koht oh kang wahn tuhkeo me keinapwidi, ira pein pilada ong ira dahme mwahu oh dahme suwed. (Sen. 3:22) Rahnwet, pali laud en aramas akan kin pilada en pohnsehsehla Siohwa oh pilada ong pein irail dahme pwung oh dahme sapwung.

⁵ Pil irail kan me kin ese oh poakohng Siohwa ele kin apwalki uhpahiong ih ni unsek. Wahnpoaron Pohl pil kin lelohng met. (Wadek Rom 7:21-23.) Duwehte Pohl, kitail men wia dahme pwung mwohn silangin Siohwa. Ahpw kitail anahne ahnsou koaros pelianda ineng en wia dahme sapwung.

6-7. Ia kahrepe keriau me e kak apwal en uhpahiong Siohwa? Menlau kihda ehu karasaras.

⁶ Pil ehu kahrepe e kak apwal en uhpahiong Siohwa iei pwehki kitail kin mwekidki tiahk oh madamadau en wasa me kitail tikida ie. Aramas tohto pahn ndaiong kitail soahng kan me weksang dahme Siohwa ketin mahsanih. Eri kitail anahne nantihong en dehr ahneki madamadau me duwehte ahn aramas pwukat. Kitail tehk karasaras ehu.

⁷ Nan ekei sahpw me pwulopwul kan kin pehm me irail anahne wiahda mwohni laud. Emen sister me adaneki Mary * lelohng nan soangen irair wet. Mwohn e sukuhlki duwen Siohwa, e kin iang ehu sukuhl laud me ndand nan sapweo. En Mary peneineio kin song en idingkihong ih en ale doadoahk ehu me e kak wiahda mwohni tohto oh meteikan pahn wauneki ih. E pil men ahneki soangen doadoahko. Ahpw mwurin eh sukuhlki duwen Siohwa oh tepida poakohng ih, e wekidala eh mehn akadei kan. Mendahki met, e nda: “Ekei pak I kin diar elen wiahda mwohni tohto, ahpw I ese me e pahn kerempwa ie sang ei pahn papah Siohwa duwehte me I kin wia ahnsou wet. Pwehki mwomwen ei tikida, I kin apwalkihte en nda soh. I anahne peki rehn Siohwa en ketin sewese ie pelianda kasongosong en ale doadoahk me kakete kihsang ei ahnsou en papah ih.”​—Mad. 6:24.

8. Dahme kitail pahn koasoiapene ahnsou wet?

⁸ Kitail paiekihda ni atail kin uhpahiong Siohwa. Ahpw irail kan me ahneki manaman, duwehte elder kan, pahpa kan, oh nohno kan, pil ahneki ehu kahrepe en idawehn sapwellimen Koht kaweid. Kahrepeo iei irail kak sewese meteikan. Met kitail pahn koasoiapene ekei mehn kahlemeng kan nan Paipel me padahkihong kitail ia duwen atail en doadoahngki manaman ni ahl ehu me kin kaperenda Siohwa.

9. Soangen kahpwal dah kan me Nehmaia lelohng?

⁹ Siohwa ketikihong elder kan pwukoa kesempwal en apwalih sapwellime aramas akan. (1 Pit. 5:2) Elder kan kak sukuhlki laud ni arail tetehk mwahu duwen ahn Nehmaia eh wiewia ong sapwellimen Siohwa aramas akan. Nin duwen Kepina en Suda, Nehmaia ahneki manaman laud. (Neh. 1:11; 2:7, 8; 5:14) Medewehla ekei kahpwal kan me Nehmaia lelohng. E esehda me aramas ako kasaminehla tehnpas sarawio oh sohte kin kihda arail sawas en mwohni ong mehn Lipai ko nin duwen me Kosonnedo padahkihong irail en wia. Mehn Suhs ko kin kauwehla kosonned en Sapad, oh ekei ohl ako pwoudikihda lih akan sang wehi kan me sohte kin kaudokiong Siohwa. Kepina Nehmaia pahn anahne apwalihala kahpwal wet.​—Neh. 13:4-30.

10. Ia duwen Nehmaia eh apwalihala kahpwal kan me e lelohng?

¹⁰ Nehmaia sohte doadoahngki eh manaman pwehn idingkihong aramas akan en idawehn eh koasoandi kan. Ahpw e kin uhdahn rapahki sapwellimen Siohwa kaweid nan eh kapakap, oh padahkihong aramas ako sapwellimen Siohwa Kosonnedo. (Neh. 1:4-10; 13:1-3) Ni aktikitik, Nehmaia pil iang aramas ako onehda sapahl dihd en Serusalem.​—Neh. 4:15.

11. Nin duwen me 1 Deselonika 2:7, 8 mahsanih, ia pahn mwomwen ahn elder kan ar wiewia ong tohn mwomwohdiso?

¹¹ Ele elder kan sohte anahne lelohng soangen kahpwal kohte me Nehmaia lelohng, ahpw irail kak kahlemengih ih ni ahl tohto. Karasepe, irail kin doadoahk laud pwehn wia kamwahu ong riarail Kristian kan. Oh irail sohte kin medewe me irail mwahusang meteikan pwehki manaman me re ahneki. Ahpw irail kin apwalih riarail Kristian kan nan mwomwohdiso ni elen limpoak. (Wadek 1 Deselonika 2:7, 8.) Arail limpoak laud oh wiewia aktikitik kin kamwakid mwomwen arail kin koasoiong meteikan. Andrew, me wia elder men ahnsou werei, nda: “I kin tehk me ni elder men eh kasalehda  kadek, e kin sair mohngiong en rie Kristian kan. Irair kaselel pwukat kin kamwakid irail en miniminiong elder kan.” Tony, me pil wereilahr wia elder men, nda: “I kin song en kapwaiada kaweid en Pilipai 2:3 oh kin ahnsou koaros nantihong medewe me meteikan mwahusang ie. Met kin sewese ien dehr idingkihong meteikan en peikiong ie.”

12. Dahme kahrehda e kesempwal ong elder kan en kin aktikitik?

¹² Elder kan anahne aktikitik, duwehte Siohwa me ketin aktikitik. Mendahki Siohwa iei Kaunepen lahng oh sampah, e kin ketin “mahsendihdo” pwehn pwekada “me semwehmwe kan sang nanpwel.” (Mel. 113:6, 7) Ni mehlel, Siohwa ketin kalahdeki irail kan me kin pohnmwahso oh aklapalap.​—Lep. Pad. 16:5.

13. Dahme kahrehda elder men anahne “salihedi teng lowe”?

¹³ Elder men me kin uhpahiong Siohwa anahne “salihedi teng lowe.” Ma e sohte wia met, e sohte pahn kasalehda kadek ma emen sohte wauneki ih. (Seims 1:26; Kal. 5:14, 15) Andrew, me kitail koasoiapene mwoweo, nda: “Ekei pak, I sohte men kasalehda kadek ni ei koasoiong riei Kristian men me mwomwen sohte waunekin ie nin duwen elder men. Ahpw, I kin doudouloale mehn kahlemeng en ohl lelepek kan nan Paipel, oh met kin sewese ie en sukuhlki kesempwalpen en aktikitik oh mpahi.” Elder kan kin kasalehda arail uhpahiong Siohwa sang arail kasalehda limpoak oh kadek ni arail koasoiong tohn mwomwohdiso, pil iangahki iengarail elder kan.​—Kol. 4:6.

14. Pwukoa dahieu me Siohwa ketikihong pahpa kan, oh dahme e ketin kasik sang irail?

¹⁴ Siohwa ketin koasoanehdi me pahpa men en wia tapwin eh peneinei, oh e ketin kasik me en kaiahne oh kapwungala nah seri kan. (1 Kor. 11:3; Ep. 6:4) Ahpw mie irepen en pahpao eh manaman. Mwohn silangin Siohwa, e pwukoahki mwomwen eh apwalih eh peneineio. (Ep. 3:14, 15) Pahpa kan kin kasalehda arail uhpahiong Siohwa sang arail doadoahngki arail manaman ni ahl ehu me kin kaperenda Koht. Irail kak sukuhlki laud sang arail onopki duwen mouren Nanmwarki Depit.

15. Dahme kahrehda Nanmwarki Depit wia mehn kahlemeng mwahu ong pahpa kan?

¹⁵ Siohwa ketin idihada Depit en wia tapwin eh peneinei oh pil wehin Israel pwon. Nin duwen nanmwarki, Depit ahneki manaman laud. Ekei pak, e doadoahngki eh manaman ni ahl sapwung oh wiahda sapwung laud kan. (2 Sam. 11:14, 15) Ahpw e kasalehda eh uhpahiong Siohwa sang eh pwungki ale kaweid sang reh. E kasalehiong Siohwa audepen eh  mohngiong nan eh kapakap. Oh e song en wia uwen eh kak pwehn peikiong sapwellimen Siohwa kaweid. (Mel. 51:1-4) Patehng met, e aktikitik oh ale kaweid mwahu kaidehn ihte sang ohl akan ahpw pil lih akan. (1 Sam. 19:11, 12; 25:32, 33) Depit sukuhlkihsang eh sapwung kan oh wiahkihla papah Siohwa me keieu kesempwal nan eh mour.

16. Dahme pahpa kan kak sukuhlkihsang Depit?

¹⁶ Dahme pahpa kan kak sukuhlkihsang Nanmwarki Depit? Dehr doadoahngki ni ahl sapwung manaman me Siohwa ketikihong uhk. Wehkada omw sapwung kan oh ale kaweid en Paipel sang meteikan. Ma ke wia met, omw peneinei pahn waunekin uhk pwehki omw aktikitik. Ni omw kin iang omw peneinei kapakap, kasalehiong Siohwa audepen omw mohngiong, mweidohng irail en rong ia uwen omw kin koapworopworki ih. Kesempwal sang met, wiahki omw papah Siohwa me keieu kesempwal nan omw mour. (Deud. 6:6-9) Omw mehn kahlemeng mwahu iei ehu kisakis me keieu kesempwal me ke kak kihong omw peneinei.

17. Pwukoa dahieu me Siohwa ketikihong nohno kan?

¹⁷ Siohwa ketikihong nohno men pwukoa kesempwal ehu nan peneinei, oh e ketikihong ih uwen manaman me konehng en ahneki pohn nah seri kan. (Lep. Pad. 6:20) Ni mehlel, dahme nohno men wia oh nda kak kamwakid nah seri kan erein arail mour. (Lep. Pad. 22:6) Tehk dahme nohno kan kak sukuhlkihsang Mery, inen Sises.

18-19. Dahme nohno kan kak sukuhlkihsang mehn kahlemeng en Mery?

¹⁸ Mery esehla mwahu Pwuhk Sarawi. E uhdahn wauneki Siohwa oh ahneki nanpwungmwahu keren reh. E uhdahn men uhpahiong sapwellimen Siohwa kaweid, mendahki met kin wehwehki soahng koaros nan eh mour wekila.​—Luk 1:35-38, 46-55.

¹⁹ Nohno kan, kumwail kak kahlemengih Mery ni ahl tohto. Ia duwen? Keieu, ke anahne kakehlakahda omw nanpwungmwahu rehn Siohwa sang omw pahn pein wia omw onop en Paipel oh kapakap. Keriau, iei sang omw pahn men wiahda wekidekla kan nan omw mour pwehn kaperenda Siohwa. Karasepe, ele ke tikida rehn pahpa nohno me kin kehn lingeringer oh lokaia lemei ong neirail seri kan. Eri ke medewe me e sohte sapwung en wia met ong noumw seri kan. Pil mwurin omw sukuhlki sapwellimen Siohwa koasoandi kan, ele ke kin apwalki en meleilei oh kanengamahiong noumw seri kan, ahpw mehlel ma re sohte peikiong uhk ni ahnsou me ke kin pwang. (Ep. 4:31) Nan soangen ahnsowo, ke anahne kalaudehla omw likih Siohwa ni omw kapakap.  Emen nohno me adaneki Lydia, nda: “Ekei pak, I anahne kapakap ni ngidingid pwe I en dehr lokaia lemei ong nei pwutako ni eh sohte peikiong ie. I pil kin uhdi nanwerengen ei koasoi oh kapakapki sapwellimen Siohwa sawas ni ngihl tikitik. Kapakap kin kahrehong ien meleilei.”​—Mel. 37:5.

20. Soangen kahpwal dah me ekei nohno kin ahneki, oh ia duwen ar kak powehdi kahpwalo?

²⁰ Pil ehu kahpwal me ekei nohno kin ele ahneki iei en kasalehiong neirail seri kan me re poakohng. (Taitus 2:3, 4) Ekei lih tikida nan peneinei me arail pahpa nohno sohte kin ahneki nanpwungmwahu rehn neirail seri kan. Ma mwomwen omw tikida duwehte met, ke sohte anahne wia sapwung kohte me omw pahpa nohno wiahda. Nohno men me kin uhpahiong kupwuren Siohwa ele anahne sukuhlki duwen eh pahn kasalehiong nah seri kan limpoak. Ele e pahn apwalki wekidala mwomwen eh madamadau, pepehm, oh wiewia. Ahpw met kak wiawi, oh wekidekla pwukat pahn wia kamwahu ong ih oh eh peneineio.

21-22. Nin duwen me Aiseia 65:13, 14 mahsanih, kamwahu dah kan me kitail kin alehdi ni atail uhpahiong Siohwa?

²¹ Nanmwarki Depit ese kamwahupen uhpahiong Siohwa. E ntingihedi: “Kosonned en KAUN-O me pwung; oh irail kan me kin peikiong kin pereperen. Sapwellime mahsen kan me uhdahn pwung oh kin kamarainihada lamalam en aramas. Sapwellimomwi mahsen kan kin kamarainih sapwellimomwi ladu menet; I kin ale ketingpen ei kin peikiong sapwellimomwi mahsen kan.” (Mel. 19:8, 11) Rahnwet, kitail kak kilang wekpeseng en irail kan me kin uhpahiong Siohwa oh irail kan me kin soikala sapwellime kaweid limpoak. Irail kan me kin uhpahiong Siohwa pahn “kokoulki ar peren.”​—Wadek Aiseia 65:13, 14.

²² Ni elder kan, pahpa kan, oh nohno kan kin men uhpahiong Siohwa, arail mour kin mwahula, arail peneinei nsenamwahula, oh miniminpenehn tohnmwomwohdiso kin laudla. Kesempwal sang met, irail kin kaperenda kupwuren Siohwa. (Lep. Pad. 27:11) Kapai wet iei me keieu laud me kitail kak ahneki!