1-2. Nin duwen me 1 Timoty 6:20 mahsanih, dahme kohiengehr Timoty?

KITAIL kin kalapw nekidala atail dipwisou kesempwal kan pahn epwelpen meteikan. Karasepe, ele kitail kin nekidedi neitail mwohni nan pangk. Ni atail wia met, kitail kin kasik me neitail mwohnio pahn nekinekdi mwahu oh sohte pahn salongala de pirapala. Eri kitail wehwehki ia wehwehn en likihong emen mehkot me kitail kin kesempwalki.

² Wadek 1 Timoty 6:20. Wahnpoaron Pohl katamankihong Timoty me e alehdier mehkot kesempwal, me iei loalokong pwung en kupwuren Koht ong aramas. Siohwa pil ketin likihongehr Timoty pwais en “kalohki mahseno” oh en “wia doadoahk en sounkalohki rongamwahwo.” (2 Tim. 4:2, 5) Pohl kangoange Timoty en kanahieng dahme kohiengehr ih ni likilik. Duwehte Timoty, mie soahng kesempwal kan me kohiengehr kitail ni likilik. Dahkei mwo? Oh dahme kahrehda kitail anahne kanahieng soahng kesempwal pwukat me Siohwa ketikihongehr kitail?

3-4. Ia ekei kahrepe kan me padahk mehlel en Paipel kesempwal?

³ Ni kadek Siohwa ketikihong kitail loalokong pwung en padahk mehlel me dierek nan sapwellime Mahsen, Paipel. Padahk mehlel pwukat kesempwal pwehki e kin padahkihong kitail ia duwen atail en ahneki nanpwungmwahu rehn Siohwa oh kin kawehwehda dahme kin wahdo peren mehlel nan mour. Ni atail kin kamehlele padahk mehlel pwukat, padahk likamw sohte pahn pitih kitaildi oh kitail kak ahneki mour me mwakelekel.—1 Kor. 6:9-11.

⁴ Pil ehu kahrepen padahk mehlel en Paipel kin kesempwal iei me Siohwa kin ketin kasalehda padahk pwukat ong me aktikitik kante me “ahneki mohngiong mwahu.” (Wiewia 13:48) Aramas aktikitik kan kin pwungki me ladu lelepek oh loalokongo  kin padahkihong kitail duwen Paipel ni ahnsou wet. (Mad. 11:25; 24:45) Kitail sohte kak wehwehki duwen Paipel ma sohte sawas, oh sohte mehkot me kesempwalsang en wehwehki Paipel.​—Lep. Pad. 3:13, 15.

5. Dahme Siohwa pil ketin likihong kitail en wia?

⁵ Siohwa pil ketin likihong kitail pwais kaselel en padahkihong meteikan padahk mehlel duwen ih oh kupwure kan. (Mad. 24:14) Sapwellimen Siohwa rohng me kitail kin kalohki uhdahn kesempwal pwehki e kin sewese aramas en wiahla kisehn sapwellimen Siohwa peneinei oh kihong irail ahnsou mwahu en alehdi mour soutik. (1 Tim. 4:16) Sohte lipilipil ma kitail kin iang kalohk ekiste de laud, kitail kin sewese doadoahk me keieu kesempwal me wiewiawi ni ahnsou wet. (1 Tim. 2:3, 4) Ia uwen eh wia pai kaselel ehu en wia iengen Koht tohndoadoahk kei!​—1 Kor. 3:9.

6. Dahme wiawihong ekei me sohla kanahieng dahme re alehdi?

⁶ Ni mwehin Timotyo, ekei Kristian kan sohte kesempwalki arail pwais kaselel en wia iengen Koht tohndoadoahk kei. Pwehki Demas poakohng kepwehn sampah wet, e uhdihsang eh pwais kaselel en iang Pohl papah. (2 Tim. 4:10) E mwomwen me Pikehlus oh Ermokenihs uhdihsang iang kalohk pwehki ira masak me ira pahn lelohng soangen kalokolok me wiawihong Pohl. (2 Tim. 1:15) Aimenihus, Aleksander, oh Pailihdus kesehla oh uhwongada kaudok mehlel oh uhdihsang papah Siohwa. (1 Tim. 1:19, 20; 2 Tim. 2:16-18) Irail pwukat koaros poakohng Siohwa mwoweo, ahpw mwuhr re uhdihsang medewe me soahng kan me e ketikihong irail kin kesempwal.

7. Dahme Sehdan kin wia pwehn song en kahrehiong kitail en wia dahme e men kitail en wia?

⁷ Ia duwen Sehdan eh song en kahrehiong kitail en kesehla soahng kesempwal kan me Siohwa ketin likihong kitail? Tehk ekei wiepe kan me Sehdan kin doadoahngki. E kin doadoahngki TV, kasdo, nuhs de pwuhk kan pwehn kahrehiong kitail en medewe oh mwekid ni ahl ehu me pahn kahrehiong kitail en ekisekis uhdihsang poakohng Siohwa de peikiong sapwellime kosonned kan. E kin song en kamasak kitail sang ni eh kin doadoahngki meteikan en kapailoke de kaloke kitail pwe kitail en uhdihsang iang kalohk. Oh e kin song en kasonge kitail en rong padahk en irail me kesehla oh uhwongada kaudok mehlel pwe kitail en kesehla padahk mehlel.​—1 Tim. 6:20, 21.

8. Dahme ke sukuhlkihsang emen brother me adaneki Daniel?

⁸ Ma kitail sohte kanahieng, kitail kakete ekisekis kohkohsang padahk mehlel. Tehk dahme wiawihong Daniel, * me perenki mwadongki video game kan. E nda: “I tepida mwadongki  video game kan ni ahnsou me I sounpar eisek. Nin tapio, I kin mwadongki video game kan me sohte keper. Ahpw ekisekis I tepida mwadongki video game kan me uhdahn lemei oh me kin pidada wunahni.” Kedekedeo, e kin mwadomwadongki video game kan erein awa 15 ehuehu rahn. E nda. “Koasoi mehlel, I ese me soangen mehn mwadong pwukat oh uwen ahnsou me I kin mwadongki kin kadohwaneweiehsang Siohwa. Ahpw, I anahne kamehlelehiong pein ngehi me I sohte anahne wia dahme Paipel mahsanih.” Eri ma kitail sohte kin kanahieng, mehn kamweit kan kakete mengei en kahrehiong kitail en sohla kolokol padahk mehlel. Ma met kin wiawi, kitail kakete imwikihla atail sohla kolokol soahng kesempwal kan me Siohwa ketikihongkitailehr.

9. Nin duwen me 1 Timoty 1:18, 19 mahsanih, dahme Pohl kapahrengkihong Timoty?

⁹ Wadek 1 Timoty 1:18, 19. Pohl kapahrekihong Timoty duwehte sounpei men oh kangoange ih en “pousehlahte peiki mahwen me waun.” Pohl sohte koasokoasoia duwen uhdahn mahwen ehu nanpwungen sounpei kan. Ni ahl dahieu me Kristian kan kin duwehte sounpei kan nan mahwen? Irair dah kan me kitail anahne kakairada nin duwen sounpei en Krais? Kitail pahn koasoiapene mehn kasukuhl limau me kitail kak sukuhlkihsang en Pohl karasaraso. Mehn kasukuhl pwukat kak sewese kitail en kolokolete padahk mehlel.

10. Dahkot poadidiong Koht, oh dahme kahrehda kitail anahne met?

¹⁰ Kalaudehla omw poadidiong Koht. Sounpei mwahu men kin loalopwoat. E pahn kin pei kehlail pwehn pere emen me e kin poakohng de mehkot me e kesempwalki. Pohl kangoange Timoty en kakairada eh poadidiong Koht, me iei en uhdahn loalopwoatohng Koht. (1 Tim. 4:7) Ni atail limpoak oh poadidiong Koht kin laudla, atail ineng en men kolokolete padahk mehlel pahn pil laudla.​—1 Tim. 4:8-10; 6:6.

11. Dahme kahrehda kitail anahne kaiahne pein kitail?

¹¹ Kaiahnehda pein kowe pwehn wia dahme pwung. Sounpei men anahne kaiahnehda pein ih pwe en kak ahnsou koaros onopada en mahwen. Timoty kak peiong ahn Sehdan kasongosong kan pwehki e kin idawehn en Pohl kaweid oh kin doadoahk laud pwehn pelianda ineng sapwung kan, kakairada irair kaselel kan, oh werekiong rie Kristian kan. (2 Tim. 2:22) Timoty anahne kaiahne pein ih. Kitail anahne kaiahne pein kitail pwehn kana ni atail pelianda atail ineng sapwung kan. (Rom 7:21-25) Pil patehng, kitail anahne kaiahne pein kitail en doadoahk laud pwehn wekidala mwomwatail oh kakairada irair mwahu kan. (Ep. 4:22, 24) Oh ni atail kin pwangada mwurin atail doadoahk laud, ele kitail kin anahne iding pein kitail en kohla iang mihting.​—Ipru 10:24, 25.

12. Ni ahl dah kan me kitail kak kamwahwihala atail kin doadoahngki Paipel?

¹² Sounpei men anahne kin praktiski mwomwen eh pahn doadoahngki nah mehn mahwen kan. Pwehn koahiekla, e anahne kin kaukaule wia met. Pil duwehte, kitail anahne uhdahn koahiekla en doadoahngki Mahsen en Koht. (2 Tim. 2:15) Kitail kak sukuhlki ekei ahl en wia met nan atail mihting kan. Ahpw ma kitail men sewese meteikan en pil iang kamehlele me padahk mehlel en Paipel kak sewese irail, kitail anahne kaukaule onopki Paipel. Kitail anahne doadoahngki Mahsen en Koht pwehn kakehlakahda atail pwoson. Met wehwehki me kitail sohte kin wadekete Paipel. Kitail anahne doudouloale dahme kitail wadek oh wia roporop nan neitail sawaspen Paipel kan pwe kitail en kak wehwehki iren Paipel kan ni pwung oh kapwaiada. (1 Tim. 4:13-15) Eri kitail pahn kak en doadoahngki Mahsen en Koht pwehn padahkih  meteikan. Met wehwehki me kitail sohte kin ihte wadek ong irail iren Paipel kan. Kitail men sewese irail kan me kitail kin kalohk ong en wehwehki iren Paipelo oh ia duwen ar pahn kapwaiada. Sang ni atail kin kaukaule wia pein atail onop en Paipel, kitail kak kamwahwihala atail koahiek en doadoahngki Mahsen en Koht oh padahkihong meteikan.​—2 Tim. 3:16, 17.

13. Pwehn pahrekiong dahme Ipru 5:14 mahsanih, dahme kahrehda kitail anahne ese wekpeseng en dahme pwung oh sapwung?

¹³ Ese wekpeseng en dahme pwung oh sapwung. Sounpei men anahne kin onopadahng kahpwal oh soikala. Kitail pil anahne pohnese irair kan me kakete keper ong kitail oh eri mwekid pwehn soikala kepero. (Lep. Pad. 22:3; wadek Ipru 5:14.) Karasepe, kitail anahne pilada ni loalokong mehn kamweit kan. Kasdo kan kin kalapw kasalehda tiahk samin. Kitail kin soikala soangen mehn kamweit pwukat pwehki e kakete ekisekis kaluwetehla atail limpoak ong Siohwa. Kitail ese me Siohwa kin ketin kalahdeki tiahk samin oh irail kan me kin wia soahng pwukat kin kamedekihirailla oh meteikan.​—Ep. 5:5, 6.

14. Ia duwen en ese wekpeseng en dahme pwung oh sapwung eh sewese Daniel?

¹⁴ Daniel, me kitail koasoiapene mwoweo, tepida esehda me en mwadongki video game kan me uhdahn lemei oh pidada wunahni kin wia kahpwal ehu. E wia roporop nan Watchtower Library pwehn rapahki ire kan me kak sewese ih en kamwahwihala eh kahpwalo. Ia duwen met eh kamwakid ih? E uhdihsang mwadongki video game kan me sohte konehng. E kauhdi nah subscription kan oh uhdihsang iang sounmwadong teikan. Daniel nda, “I sohla mwadongki video game kan, oh I tepida sohla kalapw mihmihte nan ihmw oh I kin patehng kompoakepahi kan nan mwomwohdiso.” Met Daniel wia pioneer men oh elder.

15. Dahme kahrehda koasoi likamw kan keper?

¹⁵ Duwehte Timoty, kitail pil anahne ese keperpen koasoi likamw kan me irail me kesehla oh uhwongada kaudok mehlel kin kihpeseng. (1 Tim. 4:1, 7; 2 Tim. 2:16) Karasepe, re kakete song en kihpeseng koasoi likamw kan duwen riatail Kristian kan de kahrehiong kitail en peikasalki sapwellimen Siohwa pwihn. Soangen koasoi pwukat kakete kaluwetehla atail pwoson. Kitail en dehr kamehlele koasoi pwukat. Dahme kahrehda? Pwehki soangen koasoi pwukat kin kohpeseng “sang rehn aramas akan me arail madamadau sapwungalahr oh solahr wehwehki me mehlelo.” Arail mehn akadei iei en tapiada “akamai oh akupwungki lepin lokaia kan.”  (1 Tim. 6:4, 5) Irail men kitail en kamehlele arail koasoi likamw ko oh sohla likih riatail Kristian kan.

16. Mehn kerempwa dah kan me kitail anahne soikala?

¹⁶ Soikala soahng kan me kin kerempwa kitail. Nin “duwen sounpei mehlel men en Krais Sises,” Timoty anahne medemedewehte doadoahk en kalohk ahpw kaidehn en medewe kepwehn sampah oh eh mehn akadei teikan. (2 Tim. 2:3, 4) Duwehte Timoty, kitail en dehr mweidohng ineng en ahneki kepwe tohto en kerempwakitailla. “Manaman widing en dipwisou kan” kak kasokehla atail limpoak ong Siohwa, atail kalahnganki Mahsen en Koht, oh atail ineng en men ehukihong meteikan. (Mad. 13:22) Kitail en ahneki mour me sohte kin kedirepwki soahng kan me sohte uhdahn kesempwal ahpw en doadoahngki atail ahnsou oh kehl en “pousehlahte rapahki mahs Wehio.”​—Mad. 6:22-25, 33.

17-18. Dahme kitail kak wia pwehn pere atail nanpwungmwahu rehn Siohwa?

¹⁷ Onopada en kin mwadang en mwekid. Sounpei men anahne wiahda eh koasoandi kan duwen dahme e pahn kin wia pwehn pere pein ih. Ma kitail men pere soahng kan me Siohwa ketin likihong kitail, kitail anahne mwadang en mwekid ni ahnsou me kitail kilang keper. Dahme kak sewese kitail en wia met? Kitail anahne wiahda atail koasoandi kan mwowe duwen dahme kitail pahn wia ma mie keper ehu pwarada.

¹⁸ Karasepe, ni atail kin iang sompihr ehu, soun pakair ko kin kalapw ndaiong kitail en esehda wasahn pedoi kan mwohn sompihro eh pahn pihrda. Dahme kahrehda? Pwe kitail en kak mwadang pedoi ma kahpwal ehu pwarada. Pil duwehte, kitail kak kaunopada dahme kitail pahn wia ma kilel en tiahk samin, tiahk uhdahn lemei, de soahng kan me irail me kesehla oh uhwongada kaudok mehlel kin kihda pwarada ni soh kasikpe erein atail doadoahngki Internet de kilikilang kasdo ehu. Ma kitail kaunopada ong dahme kakete wiawi, kitail kak mwadang en pere atail nanpwungmwahu rehn Siohwa oh kolokolete atail mwakelekel mwohn silangi.​—Mel. 101:3; 1 Tim. 4:12.

19. Kapai dah kan me kitail pahn ahneki ma kitail kanahieng soahng kesempwal kan me Siohwa ketikihongehr kitail?

¹⁹ Kitail anahne kanahieng soahng kesempwal kan me Siohwa ketikihongehr kitail, me iei padahk mehlel en Paipel oh pwais kaselel en padahkihong meteikan. Ni atail wia met, kitail pahn ahneki nsenmwakelekel, mour ehu me mie katepe, oh peren en sewese meteikan en esehla Siohwa. Sang ni sapwellime sawas, kitail pahn kak kanakanahieng dahme e ketikihongehr kitail.​—1 Tim. 6:12, 19.