1. Ia duwen sapwellimen Siohwa aramas akan ar kin soandi mwahu ni mwehin tepin Kristian ko?

 AHNSOU koaros me Siohwa kin ketikihong sapwellime aramas akan pwukoa ehu, e ketin kasik me re pahn kapwaiada ni ahl me soandi mwahu. (1 Kor. 14:33) Karasepe, kupwuren Koht iei me rongamwahwo en lohkseli nan sampah pwon. (Mad. 24:14) Siohwa ketikihong Sises pwukoahn kaweid doadoahko. Oh Sises ketin tehk mwahu me met wiawi ni ahl me soandi mwahu. Ni mwehin tepin Kristian ko, ni mwomwohdiso kan ar kin wiawihda nan soangsoangen wasa kan, elder kan kin idihdda pwehn kihda kaweid oh tiengla mwowe. (Wiewia 14:23) Nan Serusalem, pwihn en elder kan me wiawihkihda wahnpoaron oh ohl mah kan kin wiahda pilipil kan me mwomwohdiso kan koaros pahn idawehn. (Wiewia 15:2; 16:4) Pwehki Kristian ko kin peikiong kaweid kan me re alehdi, “mwomwohdiso kan eri kin kehlailla nan pwoson oh towe kan wie tohtohla rahn koaros.”—Wiewia 16:5.

2. Sangete pahr 1919, ia duwen Siohwa eh kin ketikihda kaweid oh kaweid sang Mahsen en Koht?

² Pil rahnwet, Siohwa kin ketin pousehlahte koasoanehdi sapwellime aramas akan. Sangete pahr 1919, Sises kin ketin doadoahngki kisin pwihn tikitik en ohl keidi kan pwe ren koasoanehdi doadoahk en kalohk oh kihong sapwellime tohnpadahk kan kaweid sang Mahsen en Koht ni ahnsou me konehng. a (Luk 12:42) E sansal me Siohwa kin ketin kapaia ahn pwihn wet doadoahk.—Ais. 60:22; 65:​13, 14.

3-4. (a) Menlau kihda ehu karasaras ong ia duwen atail kin paiekihda atail soandi mwahu. (b) Dahme kitail pahn koasoiapene nan iren onop wet?

 ³ Ma kitail sohte soandi mwahu, kitail sohte pahn kak wia doadoahk me Sises ketikihong kitail. (Mad. 28:​19, 20) Karasepe, ma brother kan sohte koasoanehdi wasahn atail kalohk kan koaros, eri emenemen pahn kak kalohk wasa me e mwahuki. Kitail kakete pwurupwurehng kalohk ekei wasa, a ekei wasahn kalohk soh. Ke kak medewehla ahl teikan me kitail kak paiekihda atail kin soandi mwahu?

⁴ Duwehte Sises eh kin ketin koasoanehdi sapwellime tohnpadahk kan erein eh ketiket nin sampah, e kin pousehlahte koasoanehdi sapwellimen Koht aramas akan rahnwet. Nan iren onop wet, kitail pahn koasoiapene mehn kahlemeng me Sises ketikihda oh ia duwen atail pwihn kin idawehn mehn kahlemengo. Kitail pahn pil koasoiapene ia duwen atail kak kasalehda me kitail kalahnganki sapwellimen Siohwa pwihn.

ATAIL PWIHN KIN IDAWEHN MEHN KAHLEMENG EN SISES

5. Ia ehu ahl me kitail kin idawehn mehn kahlemeng en Sises? (Sohn 8:28)

⁵ Sises ketin sukuhlkihsang Semeo nanleng dahme e pahn wia oh koasoia. Sapwellimen Siohwa pwihn kin idawehn mehn kahlemeng en Sises sang ni arail kin doadoahngki Mahsen en Koht pwehn sewesei kitail en ese dahme pwung oh sapwung oh pwehn kaweid atail mour. (Wadek Sohn 8:28; 2 Tim. 3:​16, 17) Kitail kin pwurupwurehng alehdi mehn kataman en wadek oh doadoahngki Mahsen en Koht. Ia duwen atail kin paiekihda atail idawehn kaweid wet?

6. Ia ehu ahl me kitail kin paiekihda atail onopki Paipel?

⁶ Kitail kin paiekihda laud atail kin onopki Paipel oh doadoahngki neitail sawasepen Paipel kan. Karasepe, kitail kak kapahrekihong dahme Paipel mahsanih ong kaweid me kitail alehdihsang atail pwihn. Ni atail kin kilang me kaweid me kitail alehdio poahsoandahsang Paipel, atail likih sapwellimen Siohwa pwihn kin laudla.—Rom 12:2.

7. Rohng dah me Sises kin ketin kalohki, oh ia duwen sapwellimen Siohwa pwihn eh kin idawehn eh mehn kahlemeng?

⁷ Sises ketin kalohki duwen “rongamwahu en Wehin Koht.” (Luk 4:​43, 44) Sises pil ketin kehkehlingkihong sapwellime tohnpadahk kan en kalohki duwen Wehio. (Luk 9:​1, 2; 10:​8, 9) Koaros me kin iang sapwellimen Siohwa pwihn rahnwet kin kalohki rongen Wehio sohte lipilipil wasa re mi ie de ia uwen tohtohn pwukoa me re ahneki.

8. Pai kaselel dahieu me kitail ahneki?

⁸ Kitail kin uhdahn wiahki pai kaselel ehu en ehukihong meteikan duwen Wehin Koht! Kaidehn koaros ahneki pai wet. Karasepe, ni Sises eh ketiket nin sampah, e sohte ketin mweidohng ngehn suwed kan en kalohki duwen ih. (Luk 4:41) Rahnwet, mwohn emen eh tepida iang Sounkadehdehn Siohwa kan kalohk, e anahne mourki mour ehu me kin kaperenda Koht. Kitail kin kasalehda ia uwen atail kalahnganki pai en kalohk sang ni atail koasoiaiong aramas akan duwen Wehin Koht ahnsou oh wasa sohte lipilipil me kitail kak. Kitail men duwehte Sises, eri kitail kin wia uwen atail kak en kalohk ong aramas akan oh padahkihong irail me mehlelo.—Mad. 13:​3, 23; 1 Kor. 3:6.

9. Ia duwen sapwellimen Siohwa pwihn ar kasalehda mwaren Koht?

⁹ Sises kasalehda mwaren Koht. Sises kapakap ong Semeo oh mahsanih: “Ngehi me kahrehiong irail en ese mwaromwi.” (John 17:26) Sapwellimen Siohwa pwihn kin alasang mehn kahlemeng en Sises sang ni arail wia uwen  arail kak koaros pwehn sewese meteikan en esehla mwaren Koht. Ehu ahl me atail pwihn kin wia met iei sang ni Kawehwe en Sampah Kapw. Kawehwehn Paipel wet kapwurehiong mwaren Koht wasa kan me e pwarada ni ahnsou me Paipel tepin ntingdi. Met miehier kawehwehn Paipel wet pwon de ni pali kei ni lokaia daulih 270. Nan pwuhko Sawas ong Onopki Mahsen en Koht irelaud 1 oh 2, ke kak sukuhlki dahme kahrehda oh ia duwen mwaren Koht kapwurpwuriong nan Paipel. Appendix C nan Study Bible kihda mehn kadehde tohto me mwaren Koht anahne pwarada pak 237 nan palien Paipel ni lokaiahn Krihs.

10. Dahme ke sukuhlkihsang dahme emen lih nan Myanmar koasoia?

¹⁰ Duwehte Sises, kitail men sewese aramas tohto ni uwen me kak en esehla mwaren Koht. Ni ahnsou me lih emen nan Myanmar me sounpar 67 sukuhlki me mie mwaren Koht, e tepida sengiseng oh koasoia: “Ehdin nan ei mour me I rong me mwaren Koht iei Siohwa. . . . Kumwail padahkihong ie mehkot me keieu kesempwal ien esehla.” Sang ni dahme wiawio, ni aramas akan ar sukuhlki mwaren Koht, e kak wekidala arail mour.

POUSEHLAHTE LIKIH ATAIL PWIHN

11. Ia duwen elder kan ar kak kasalehda arail kalahnganki sapwellimen Siohwa pwihn? (Pil kilang kilel.)

¹¹ Ia ehu ahl me elder kan kak kasalehda me irail kalahnganki sapwellimen Koht pwihn? Ni arail alehdi kaweid, elder kan anahne wadek mwahu kaweido oh eri wia uwen arail kak koaros en kapwaiada. Karasepe, irail kin ale kaweid kaidehn ongete ia duwen arail pahn wia padahk, ia duwen arail pahn kapakap nan mwomwohdiso, ahpw re pil kin ale kaweid ong ia duwen en apwalih sapwellimen Krais sihpw kan. Ni elder kan ar kin kapwaiada kaweid koaros me irail alehsang sapwellimen Siohwa pwihn, riatail Kristian kan kin pehm me Siohwa kin ketin poakohng oh apwalih irail.

12. (a) Dahme kahrehda kitail anahne idawehn irail kan me kin tiengla mwowe? (Ipru 13:​7, 17) (b) Dahme kahrehda kitail anahne medemedewehte irair mwahu kan en irail me kin tiengla mwowe?

¹² Ni atail alehdi kaweid sang elder kan, kitail en men idawehn. Ma kitail wia met, e pahn mengeiong irail kan me kin tiengla mwowe en wia arail doadoahk. Paipel kangoange kitail en peikiong oh uhpahiong irail kan me kin tiengla mwowe. (Wadek Ipru 13:​7, 17.) Met kakete apwal ong ekei. Dahme kahrehda? Pwehki ohl pwukat sohte unsek. Ahpw, ma kitail medemedewehte arail irair sapwung kan a kaidehn arail irair mwahu kan, kitail pahn sewesewese atail imwintihti kan. Ni ahl dah me kitail kin wia met? E pahn katikala atail likih sapwellimen Koht pwihn, oh ih met me irail kan me kin uhwong kitail men wia. Dahme kitail kak wia pwehn ese oh soikala ahn atail imwintihti kan likamw?

DEHR MWEIDOHNG METEIKAN EN KALUWETALA OMW LIKIH ATAIL PWIHN

13. Ia duwen sapwellimen Koht imwintihti kan ar kin song en kahdsuwedihala sapwellime pwihn?

¹³ Irail kan me kin uhwong Koht, kin song en wekidala soahng mwahu kan en sapwellime pwihn ong ni me suwed. Karasepe, kitail sukuhlkihsang nan Paipel me Siohwa kupwurki kitail en mwakelekel, atail tiahk en mwakelekel, oh en kaudokiong ni ahl me e ketin kupwurki. E ketin mahsanih me mehmen me kin wiewia me suwed oh sohte men wekidala eh wiewia, sohte kak wia kisehn mwomwohdiso. (1 Kor. 5:​11-13; 6:​9, 10) Kitail kin peikiong kehkehlik en Paipelo. Ahpw pwehki kitail kin peikiong kehkehlik wet, irail me kin uhwong kitail kin nda me kitail sohte kin poakohng aramas oh me kitail kin kadeik irail oh sohte pwungki emen me weksang kitail.

14. Ihs me kin uhdahn kihpeseng koasoi likamw duwen atail pwihn?

 ¹⁴ Wehwehkihla ihs me kin uhdahn uhwong kitail. Tepilo kin kihpeseng soahng likamw kan duwen atail pwihn. Ih me “semen likamw.” (Sohn 8:44; Sen. 3:​1-5) Eri kitail pahn kasik me Sehdan pahn doadoahngki atail imwintihti kan pwehn kihpeseng soahng likamw kan duwen sapwellimen Siohwa pwihn. Ih met me wiawihong tepin Kristian ko.

15. Dahme kaunen pelien lamalam kan wiahiong Sises oh sapwellime tohnpadahk kan?

¹⁵ Mendahki sapwellimen Koht Ohlo Sises unsek oh wiahda manaman kapwuriamwei kan, Sehdan kin doadoahngki ekei aramas pwehn kihpeseng soahng likamw tohto duwen ih. Karasepe, kaunen pelien lamalam kan kin padahkihong aramas akan me manaman me Sises kin ketin doadoahngki kohsang rehn “kaunen ngehn suwed kan” pwehn kausasang ngehn suwed rehn aramas akan. (Mark 3:22) Ni ahnsou me Sises ale kopwung, kaunen pelien lamalam ko karaunehki me e lahlahwe oh kamwakid pokono en kemehla. (Mad. 27:20) Mwuhr, ni sapwellimen Krais tohnpadahk ko ar kin kalohki rongamwahwo, irail kan me kin uhwong “kamwoarongehda mehn liki kan” pwe ren kaloke Kristian ko. (Wiewia 14:​2, 19) Me pid Wiewia 14:​2, Kahn Iroir en December 1, 1998, koasoia: “Mehn Suhs pwukat me kin uhwong Kristian akan sohte kin itarki pein irail te en uhwong padahk en Kristian akan, ahpw irail kin song en kahrehong mehn liki kan koaros en pil uhwong Kristian akan.”

16. Dahme kitail anahne tamataman ma kitail rong koasoi likamw kan?

¹⁶ Sehdan kin wiewiahte eh likamw kan rahnwet. E kin ‘pitipitihete sampah pwon.’ (Kaud. 12:9) Ma ke rong koasoi likamw kan  duwen sapwellimen Koht pwihn de brother kan me kin tiengla mwowe, tamataman dahme sapwellimen Koht imwintihti kan wiahiong Sises oh tepin Kristian ko. Sises mahsanih me aramas akan pahn uhwong irail kan me kin papah Siohwa oh pahn kinehda likamw duwen irail. Oh ih met me wiewiawi rahnwet. (Mad. 5:​11, 12) Kitail sohte pahn kamehlele koasoi likamw kan ma kitail ese ihs me kin kahrehda oh mwadang wia mehkot pwehn pere kitail. Ia duwen atail kak pere pein kitail?

17. Ia duwen atail kak soikala koasoi likamw kan? (2 Timoty 1:13) (Menlau pil kilang koakono “ Dahme Ken Wia ni Omw Rong Koasoi Likamw kan.”)

¹⁷ Soikala koasoi likamw kan. Wahnpoaron Pohl kasalehda ni sansal dahme kitail anahne wia ma kitail rong koasoi likamw kan. E padahkihong Timoty en “kehkehlingkihong aramas ekei ren dehr kin . . . tehk soai likamw kan” oh en “soikala soai likamw akan.” (1 Tim. 1:​3, 4; 4:7) Medewehla met: kisin seri kis kakete pwekada mehkot sang nan taht oh kihong nan ewe, ahpw aramas laud men sohte kin wia met pwehki e ese me met kak kasoumwahuwihda. Kitail kin soikala koasoi likamw kan pwehki kitail ese ia wasa e kohsang. Ahpw kitail kin rongete “padahk mehlel.”—Wadek 2 Timoty 1:13.

18. Ia duwen atail kak kasalehda me kitail kalahnganki sapwellimen Siohwa pwihn?

¹⁸ Mie soangen ahl tohto me sapwellimen Koht pwihn kin alasang Sises, ahpw kitail koasoiapenehte ahl siluh. Ni omw onopki Paipel, song rapahki ahl teikan me atail pwihn kin idawehn mehn kahlemeng en Sises. Sewese meteikan nan omw mwomwohdiso en kalaudehla arail kalahnganki atail pwihn. Oh pousehlahte kasalehda omw kalahngan sang ni papah Siohwa ni lelepek oh karanihete atail pwihn me Siohwa kin ketin doadoahngki pwehn kapwaiada kupwure. (Mel. 37:28) Eri kitail en ahnsou koaros kalahnganki atail wia kisehn sapwellimen Siohwa aramas akan me kin limpoak oh loalopwoat.