Ire wet wia ehu rehn ire teikan me sapwellimen Sises imwintihti ko doadoahngki pwehn rapahki sapwung en Sises oh sapwellime tohnpadahk ko. Kosonned en Moseso kasalehda duwen kehkehlik kei me pid tiahk en kamwakel, duwehte kamwakel ong soahng kan me kohsang ni paliwar en aramas, tokutok, oh doahke paliwar en aramas oh mahn mehla kan. Kosonnedo pil kihda kaweid ong ia duwen arail kak kihsang soumwahu de soahng samin kan. Re kak wia met sang ni arail wia meirong, kamwakelki de usupki pihl.​—Lipai, irelaud 11-15; Nempe, irelaud 19.

Sounpadahk en mehn Suhs ko kin kawehwehda ire pisetik koaros en kosonned pwukat. Ehu pwuhk kasalehda me re anahne koasoiapene kahrepen ehuehu soahng samin kan, duwehte “soangen irair dah kan me emen kakete alehdi, ia duwen oh ia uwen laud eh kak doupeseng, dipwisou dah kan me kak de sohte kak saminla, oh wiepe dah me re anahne idawehn pwe ren kamwakelehda soangen samin pwukat.”

Sapwellimen Sises imwintihti kan patohwan kalelapek reh: “Dahme sapwellimomwi tohnpadahk kan sohte kin iangki kapwaiada tiahk kedeudeu en samatail mehn kawa ko, ni ar kin iangete mwenge sohte omwiomw mahs?” (Mark 7:5) Irail imwintihti pwukat sohte koasokoasoia me e pahn suwed ong roson en paliwar ma re sohte omwiomw mwohn mwenge. Nin duwen tiahk, sounpadahk pwuko padahngki me emen anahne wudekidi pihl pohn pehrail kan mwohn arail pahn mwenge. Pwuhko pil kapatahiong: “Irail pil kin akupwungki mehnia dipwisou me re pahn doadoahngki pwehn wudeki pihlo, soangen pihl dah me konehng doadoahngki, ihs me pahn wudeki pihlo, oh ia wasa ni pehrail ko me anahne omwiomw.”

Dahme Sises ketin sapengki soangen kosonned pwukat koaros me pein aramas wiahda? E ketin mahsanihong irail kaunen pelien lamalam en mehn Suhs ko en ahnsowo: “Mehlelete me Aiseia me pwung ni eh kohpadahr duwen amwail mwalaunen, duwen me ntingdiero: ‘Koht mahsanih, aramas pwukat kin kahkahkin ie ni arail lokaia, a kapehdirail kan inenen dohsang ie [Siohwa]. Sohte katepen ar kin kaudokiong ie, pwe re kin padahkihweite kosonned en aramas dene e pwilisang rehn Koht!’ E ahpw pil mahsanih, ‘Kumwail kin kesehla kosonned en Koht, oh kin nsenohkihte kapwaiada tiahk kedeudeu en aramas akan.’”​—Mark 7:6-8.