“MAHWEN en mahs kan koaros . . . sohte pahrekiong uwen laud en kahpwal me wiewiawi nan Iurop met.” Iei met me Kahn Iroir en September 1, 1915, koasoiahki mahwen keieun sampah, me sahpw 30 pil iang pidada. Pwehki mahwen pwukat, Kahn Iroiro ripohtki me “doadoahko [en Wehio] uhdi ahnsou kis nan ekei wasa, ahpw mehlel nan Sehmen oh France.”

Ni Tohnsukuhl en Paipel kan ar mihla nan pingiping laud wet me lelpesengehr sampah pwon, re sohte uhdahn wehwehki ire mehlel me pid duwen Kristian kan ar pahn soupoupali. Ahpw, re koasoanehdi teng ren kalohki rongamwahwo. Pwehn iang wia eh pwukoahn doadoahk en Wehio, Wilhelm Hildebrandt oahte kisin doaropwe kan me oaralape The Bible Students Monthly ni lokaiahn France. E sohte kohla France pwehn kalohk ahpw e kohla mwo nin duwen sounpei en Sehmen men. Met wia mehkot kapwuriamwei ong mehn France ko me kin alu daulih pwehki e likawih likoun sounpei en arail imwintihti kan ahpw e kin lohkiong irail duwen popohl.

Kisinlikou kan nan Kahn Iroiro kasalehda me pil mie ekei mehn Sehmen me wia Tohnsukuhl en Paipel me inengieng kalohki rongamwahu en Wehio erein arail iang sounpei. Brother Lemke, me iang sounpei en palien nansed (navy), ripohtki me mie ienge tohndoadoahk meh limmen me perenki rong. E ntingihedi: “Mendahte I mi pohn sohp pwoat, I wie dondolung wahn ei doadoahk ong kalinganpen Siohwa.”

Georg Kayser kohla mahwen nin duwen sounpei men ahpw e pwurala ni imweo nin duwen ladu en Koht mehlelo. Dahme wiawi? E alehdi pwuhk ehu sang Tohnsukuhl en Paipel kan, uhdahn pwungki padahk mehlel duwen Wehio, oh sohla iang mahwen. Ih eri tepida wia doadoahk kan me sohte pidada pei nan mahwen. Mwurin mahweno, e wiahla pioneer ngoang men erein sounpar tohto.

Mendahki Tohnsukuhl en Paipel ko sohte uhdahn wehwehki ire kan me pid soupoupali, arail madamadau oh wiewia uhdahn weksang madamadau oh wiewia en irail kan me kin utung mahweno. Ni sounpolitik oh kaunen pelien lamalam kan ar utung mahweno, Tohnsukuhl en Paipel kan kin utung “Sounpeidi en Popohl.” (Ais. 9:6, NW) Ekei sohte kin uhdahn kolokol arail  soupoupali, ahpw re kamehlelehte ire mehlelo me emen Tohnsukuhl en Paipel ko Konrad Mörtter kasalehda, “I uhdahn wehwehki sang Mahsen en Koht me Kristian men en dehr kemehla aramas.”​—Eks. 20:13. *

Nan Sehmen, arail kosonnedo sohte pwungki pilipil en irail kan me iang sounpei ahpw sohte doadoahngki tehtehn mahwen. Mendahki met, mie Tohnsukuhl en Paipel tohtohsang 20 me pilada en sohte douluhl iang pei nan mahweno. Mehn Sehmen ko katohrehla irail nin duwen aramas sahliel kei, duwehte Gustav Kujath me irail salihdi nan wasahn aramas me ahneki soumwahu en madamadau oh kihong wini laud. Hans Hölterhoff pil sohte men iang sounpei. E selidi oh kahng wia soangen doadoahk koaros me pidada palien mahwen. Tohndoadoahk en imwetengo kalikawihkihda sekid me adaneki straitjacket lao peh ko koaros ketiketla. Ni kalokolok pwukat ar sohte kaluwetehla eh pwoson, tohndoadoahk ko uhd mwomwehda me re pahn kasikihdi ih. Ahpw, Hans kolokolte eh lelepek erein mahweno pwon.

Brother teikan me pekederla en iang sounpei kahng doadoahngki tehtehn mahwen kan oh peki ma re kak wia soangen doadoahk kan me sohte pidada pei. * Johannes Rauthe iang wia met oh pekederla pwehn doadoahk wasahn wiahda elen kisa kan. Konrad Mörtter iang wia sawaspen toahkte, oh Reinhold Weber wia emen nurse. August Krafzig kalahnganki me doadoahk me e alehdi sohte kahrehiong ih en iang pei nan mahweno. Tohnsukuhl en Paipel pwukat oh meteikan me duwehte irail koasoanehdi teng en papah Siohwa pwehki arail wehwehki duwen limpoak oh en loalopwoat.

Pwehki wiewiahn Tohnsukuhl en Paipel ko erein mahweno, kaun en koperment kan kin tetehk mwahu irail. Nan sounpar kan mwuhr, Tohnsukuhl en Paipel kan nan Sehmen anahne kohla nan mwoalen kopwung pwehn kopwungki ire tohtohie pwehki arail doadoahk en kalohk. Pwehn sewese irail, ohpis en Sounkadehdehn Siohwa kan nan Sehmen wiahda ohpis ehu nan Pedel en Magdeburg me pwukoahki palien repen pwuhng.

Sounkadehdehn Siohwa kan ekisekis kalaudehla arail wehwehki ire kan me pid soupoupali. Ahnsou me mahwen keriaun sampah tepida, re kolokol arail soupoupali sang ni arail uhdahn katohreirailsang soahng koaros me pidada mahwen. Met kahrehda sapwen Sehmen kin wiahkin irail imwintihti kei oh kihong irail kalokolok laud. Ahpw poadopoad wet pahn mi nan ehu oaralap me pahn kohda mwuhr nan “Neitail Pwuhk oh Dipwisou en Mahs kan.”​—Neitail Pwuhk oh Dipwisou en Mahs kan nan Iurop.