1. Kasongosong dah me Sosep lelohng, oh dahme e wia?

 NEIN Seikop pwutako Sosep lelohng kasongosong laud ehu. Lih emen ndaiong ih: “Wendi mahs rehi.” Liho pwoudiki Podipar, ahn Sosep kaun. Sosep sohte dukiong liho. Rahnwet, emen kakete medewe, ‘Dahme kahrehda Sosep soikala kasongosong wet?’ Podipar sohte mi mwo. Patehng met, Sosep wia lidu men wasao, eri liho kakete kahpwalihala eh mour ma e sohte dukiong ih. Ahpw, Sosep sohte mwahn dukiong ni liho eh pwurupwurehng kasonge en wendi reh. Dahme kahrehda? E koasoia: “Ia duwen ei pahn wiahda soangen sapwung laud wet, oh dipikihda mwohn Koht?”​—Sen. 39:7-12.

2. Ia duwen Sosep eh ese me kamwahl wia dihp ehu mwohn Koht?

² Ia duwen Sosep eh ese me eh Kohto ketin wiahki kamwahl “sapwung laud” ehu? Mehn Israel ko alehdi Kosonned en Moseso me koasoia: “Kumwail sohte pahn kamwahl” mpen sounpar riepwiki mwurin Sosep. (Eks. 20:14) Ahpw Sosep esehla mwahu Siohwa pwehn wehwehki me E sohte ketin kupwurki kamwahl. Karasepe, Sosep uhdahn ese me Siohwa ketin wiahda koasoandi en pwopwoud nanpwungente ohl emen oh lih emen. Mwein e pil rong duwen Siohwa eh ketin pere Sara, en eh pahpa kahlapo eh nohno, pak riau pwe Sara en kak lelepekohngete Eipraam. Koht pil ketin pere ahn Aisek pwoudo, Repeka, ni ahlohte. (Sen. 2:24; 12:14-20; 20:2-7; 26:6-11) Ni Sosep eh medemedewe mepwukat, e esehda dahme pwung oh sapwung mwohn silangin Koht. Pwehki Sosep poakohng eh Kohto, e koasoanehdi teng en wia dahme e ese Siohwa pahn ketin kupwurki ih en wia.

3. Dahme kitail pahn koasoiapene nan iren onop wet?

³ Ke kin poakohng me pwung? Uhdahn ke kin. Ahpw kitail  koaros sohte unsek, oh ma kitail sohte kanahieng, e pahn mengei ong kitail en alasang madamadau en sampah wet me pid dahme pwung. (Ais. 5:20; Rom 12:2) Eri, kitail pahn koasoiapene dahkot pwung oh ia duwen atail kak paiekihda atail poakohng met. Oh kitail pil pahn koasoiapene ahl siluh me kitail kak wia pwehn sewese kakehlaka atail poakohng sapwellimen Siohwa koasoandi kan.

4. Madamadau sapwung dah me aramas tohto kin ahneki duwen me pwung?

⁴ Aramas tohto ele kin medewe me aramas pwung men kin pohnmwahso, kin kauwe meteikan, de medewe me e mwahusang irail. Ahpw Koht sohte ketin kupwurki soangen irair pwukat. Ni Sises eh ketiket nin sampah, e ketin kadeikada kaunen pelien lamalam ko ahnsowo pwehki arail kin pein wiahda arail koasoandi kan ong dahme pwung. (Ekl. 7:16; Luk 16:15) Aramas men me kin kapwaiada dahme Siohwa ketin mahsanih me pwung sohte kin medewe me e mwahusang meteikan.

5. Nin duwen me Paipel mahsanih, dahkot pwung? Menlau kihda karasepe.

⁵ Pwung wia irair kaselel ehu. E kin wehwehki en wia dahme pwung mwohn silangin Siohwa Koht. Nan Paipel, mahsen kan me dokedoke dahme “pwung” kin kasalehda madamadau en mourki koasoandi kan me keieu ileile, me iei sapwellimen Siohwa koasoandi kan. Karasepe, Siohwa ketin mahsanih me sounnetinet kan anahne doadoahngki “mehn paun . . . mehlel.” (Deud. 25:15, NW) Lepin lokaiahn Ipru me kawehwehdiong “mehlel” kak pil wehwehki “pwung.” Eri, Kristian men me men pwungla mwohn silangin Koht pahn kin uhdahn mehlel ni soahng koaros nan eh pesines. Aramas pwung men pil kin poakohng pwung pahrek, de e kin suwedki kilang emen eh lelohng wiewia sapahrek. Oh ‘pwehn uhdahn kaperenda [Siohwa],’ emen me uhdahn pwung kin medemedewe ia duwen Siohwa pahn ketin kilangwohng pilipil kan me e wiahda.​—Kol. 1:10.

6. Dahme kahrehda kitail kak likih sapwellimen Siohwa koasoandi kan ong dahme pwung oh sapwung? (Aiseia 55:8, 9)

⁶ Paipel kawehwehda me Siohwa iei Utupen pwung. Pwehki met, Paipel kahdaneki Siohwa “wasahn kousoan en pwung.” (Ser. 50:7, NW) Nin duwen Sounkapikada, Siohwa kelehpw me sapwellimanki pwuhng en koasoanehdi dahme pwung oh sapwung. Pwehki kitail dipan oh soh unsek, kitail sohte kak ese dahme pwung oh sapwung. Ahpw Siohwa ketin unsek, eri e ketin mwahngih dahme uhdahn pwung oh sapwung. (Lep. Pad. 14:12; wadek Aiseia 55:8, 9.) Kitail wiawihda rasehng Koht, kahrehda kitail kak kapwaiada sapwellime koasoandi pwung kan nan atail mour. (Sen. 1:27) Oh kitail kin perenki wia met. Atail poakohng Samatailo kin kamwakid kitail en kahlemengih ih ni uwen atail kak.​—Ep. 5:1.

7. Dahme kahrehda kitail anahne koasoandi kan me kitail kak likih? Menlau kihda ehu karasaras.

⁷ Kitail kin paiekihda atail idawehn sapwellimen Siohwa koasoandi kan ong dahme pwung oh sapwung. Dahme kahrehda? Medewehla dahme pahn wiawi ma pangk koaros pein wiahda arail koasoandi ong ia uwen ehuehu mwohni. Met pahn kahrehda pingiping laud. Oh ma toahkte kan sohte peikiong koasoandi kan duwen arail en apwalih aramas, ekei me soumwahu kakete mehla. Ma mie koasoandi pwung ehu me aramas kin doadoahngki pwehn apwalihala soahng kan, e pahn wia mehn pereper ehu ong irail. Duwehte met, sapwellimen Koht koasoandi ong dahme pwung oh sapwung kin pere kitail.

8. Kapai dah kan me irail kan me poakohng me pwung kin kasikasik?

 ⁸ Siohwa kin ketin kapaia irail kan me kin idawehn sapwellime koasoandi kan. E ketin inoukihda: “Me pwung kan pahn koukousoan nan sahpwo oh re pahn sapwenikihla kohkohlahte.” (Mel. 37:29) Ke kak medewehla ia uwen laud en peren, miniminpene, oh popohl me aramas pahn ahneki ma irail koaros kin idawehn sapwellimen Siohwa koasoandi kan? Siohwa ketin kupwurki ken ahneki soangen mouro. Kitail koaros ahneki kahrepe mwahu en poakohng dahme Siohwa ketin mahsanih me pwung! Ia duwen atail kak kakehlaka atail poakohng irair wet? Kitail pahn koasoiapene ahl siluh me kitail kak wia met.

9. Dahme pahn sewese kitail en poakohng me pwung?

⁹ 1: Poakohng ih me ketin wiahda koasoandi kan. Pwehn poakohng me pwung, kitail anahne kalaudehla atail poakohng Siohwa, me ketin wiahda koasoandi ong dahme pwung oh sapwung. Uwen laud en atail poakohng Siohwa iei ih uwen laud en atail pahn men idawehn sapwellime koasoandi pwung kan. Karasepe, ma Adam oh Ihp poakohng Siohwa, ira sohte pahn sapeikiong ih.​—Sen. 3:1-6, 16-19.

10. Dahme Eipraam wia pwehn wehwehkihla mwahu Siohwa?

¹⁰ Kitail sohte men wiahda soangen sapwungohte me Adam oh Ihp wiahda. Kitail kak soikala met ma kitail pousehlahte sukuhlki duwen Siohwa, kalahnganki sapwellime irair kaselel kan, oh song en wehwehki sapwellime madamadau. Ni atail wia met, atail poakohng Siohwa pahn laudla. Medewehla Eipraam. E uhdahn poakohng Siohwa. Mendahki e apwal ong ih en wehwehki sapwellimen Siohwa koasoandi kan, Eipraam sohte uhwongada. Ahpw, e song en esehla mwahu Siohwa. Karasepe, ni eh esehda me Siohwa ketin koasoanedier en kasohrehla Sodom oh Komora, Eipraam tepte masak me “Sounkopwung en sampah pwon” pahn kasohrehla me suwed kan iangahki me pwung kan. Ong Eipraam, met sohte kak wiawi, eri ni aktikitik e patohwan idek rehn Siohwa iren kalelapek kei. Oh ni kanengamah Siohwa ketin sapengala. Mwuhr, Eipraam esehda me Siohwa kin ketin kasawih mohngiong en aramas koaros oh E sohte kin ketin kaloke me sohte wiahda sapwung kan, ahpw irail me suwed kante.​—Sen. 18:20-32.

11. Ia duwen Eipraam kasalehda me e poakohng oh likih Siohwa?

¹¹ Eipraam uhdahn mwekidki dahme ih oh Siohwa koasoiapene duwen kahnimw kan en Sodom oh Komora. Eh uhdahn poakohngala oh waunekihla Semeo laudsang mwoweo. Ahpw sounpar kei mwuhr, Eipraam mihla nan irair ehu me kahrehda e uhdahn apwal ong ih en likih Siohwa. Siohwa ketin mahsanihong en meirongkihla nah pwutako Aisek. Ahpw met e uhdahn esehla mwahu eh Kohto, kahrehda e sohte idek peidek kan. Eipraam tepida kapwaiada dahme Siohwa ketin mahsanihong ih. Ahpw medewehla ia uwen eh kamedek ong ih ni eh kaunopada en wia met! Ele Eipraam medemedewe laud duwen dahme e esehlahr duwen Siohwa. E ese me Siohwa sohte pahn ketin wia mehkot me sohte pwung de sempoak. Wahnpoaron Pohl koasoia me Eipraam lemeleme me Siohwa pahn kak ketin kaiasada nah pwutak kompoakeo Aisek. (Ipru 11:17-19) Met pwehki Siohwa ketin inoukihda me kadaudok en Aisek pahn wiahla wehi ehu, mendahki ahnsowo sohte nein Aisek seri. Eipraam poakohng Siohwa, eri e likih me Semeo pahn ahnsou koaros ketin wia dahme pwung. Mendahki e apwal ong ih, ahpw eh pwoson kamwakid ih en peikiong.​—Sen. 22:1-12.

12. Ia duwen atail kak alasang Eipraam? (Melkahka 73:28)

 ¹² Ia duwen atail kak alasang Eipraam? Duwehte ih, kitail en pousehlahte esehla mwahu duwen Siohwa. Ni atail wia met, kitail pahn karanihala ih oh atail poakohng ih pahn pil laudla. (Wadek Melkahka 73:28.) Kadeikpen loalatail pahn kaiahnda mwahu pwehn alasang sapwellimen Koht madamadau. (Ipru 5:14) Eri, ni emen eh song en kasonge kitail en wia mehkot sapwung, kitail pahn soikala. Kitail sohte pahn medewehda en wia mehkot me pahn kamedekihala Samatailo oh kauwehla atail nanpwungmwahu reh. Ahpw, ia pil ehu ahl me kitail kak kasalehda me kitail poakohng me pwung?

13. Ia duwen atail kak wia me pwung? (Lepin Padahk 15:9)

¹³ 2: Song en kakairada omw poakohng me pwung ehuehu rahn. Ma kitail men paliwaratail en kehlail, kitail anahne doadoahk laud pwehn nantihong eksersais rahn koaros. Duwehte met, kitail pil anahne doadoahk laud pwehn kakairada atail poakohng dahme Siohwa ketin mahsanih me pwung. Kitail kak wia met rahn koaros. Siohwa kin ketin toupahrek, oh e sohte ketin kasik kitail en wia laudsang dahme kitail kak. (Mel. 103:14) E ketin kamehlelehiong kitail me e “kin ketin kupwur limpoak ong me kin wia me pwung.” (Wadek Lepin Padahk 15:9.) Ma kitail kin songosong en lel mehn akadei ehu nan sapwellimen Siohwa doadoahk, kitail kin nannantihte pwehn lel mehn akadeio. Met duwehte atail kin songosong en wia me pwung. Oh ni kanengamah Siohwa pahn ketin sewese kitail en kekeirda oh ekisekis mwamwahula.​—Mel. 84:5, 7.

14. Dahkot mehn “perehpen pwung,” oh dahme kahrehda kitail anahne?

¹⁴ Ni limpoak Siohwa ketin katamankihong kitail me e sohte nohn apwal en wia me pwung. (1 Sohn 5:3) Met wia mehn perehpe ehu ong kitail oh kitail anahne met rahn koaros. Tamataman tehtehn mahwen me wahnpoaron Pohl kawehwehda. (Ep. 6:14-18) Dahme sounpeio kin perehki eh mohngiong? E kin ‘perehki mwaremware perehpen pwung,’ de sapwellimen Siohwa koasoandi pwung kan.  Duwehte mehn perehpe ehu me kin pere mohngiong, sapwellimen Siohwa koasoandi pwung kan kak pere omw mohngiong, de dahme mi loalomw. Ihme kahrehda e kesempwal en tehk kanahieng me omw perehpen pwung en iangete omw tehtehn mahweno!​—Lep. Pad. 4:23.

15. Ia duwen omw kak pwuhriong mehn perehpen pwung?

¹⁵ Ia duwen omw kak pwuhriong mehn perepen pwung me pahn pere mwaremwaromw? Ke kak wia met sang ni omw medemedewe duwen dahme Koht ketin kupwurki ken wia ni omw wiahda pilipil kan rahn koaros. Ni omw pahn pilada dahme ke pahn nda, koul dah me ke pahn rong, mehn kamweit dah me ke pahn kilang, de soangen pwuhk dah me ke pahn wadek, pein idek rehmw: ‘Dahme I pahn kihong nan ei madamadau? Siohwa pahn ketin kupwurki soahng wet? De met kin kangoange tiahk samin, lemei, noahrok, roporop​—soahng kan me Siohwa ketin mahsanih me sohte pwung?’ (Pil. 4:8) Ma ke pilada en wia soahng kan me Siohwa ketin kupwurki, omw mohngiong pahn pereiukasang soahng suwed kan.

16-17. Ia duwen Aiseia 48:18 eh kamehlelehiong kitail me kitail kak idawehn sapwellimen Siohwa koasoandi kan kohkohlahte?

¹⁶ Mie pak ke pwunodki ma ke pahn kak pousehlahte idawehn sapwellimen Siohwa koasoandi pwung kan ehuehu rahn de sounpar koaros? Medewehla karasaras ehu me Siohwa ketin doadoahngki me mi nan Aiseia 48:18, NW *. (Wadek.) Siohwa ketin inoukihda me atail pwung kak “duwehla ilok en nansed.” Medewehla me ke kesikesihnen pohn oaroahr ehu, kilikilang ilok kan eh pwungupwungdo oh sohte uhdi. Nan ahnsou meleileio, ke pahn pwunodki me ehu rahn ilok ko pahn uhdi? Soh! Ke ese me ilok ko kin pwungupwungdo erein sounpar kid kid kei oh sohte pahn uhdi.

¹⁷ Omw pwung kak duwehte ilok en nansed! Ia duwen? Ni omw pahn wiahda pilipil ehu, medewe mahs dahme Siohwa pahn ketin kupwurki ken wia. Kowe eri kapwaiada. Sohte lipilipil ia uwen apwal en pilipilo, Siohwa pahn ahnsou koaros ketin ieiang uhk pwehn ketikihong uhk kehl oh seweseiuk en doulahte wia dahme pwung ahnsou koaros.​—Ais. 40:29-31.

18. Dahme kahrehda kitail en dehr kadeik meteikan oh medewe me kitail mwahusang irail?

¹⁸ 3: Mweidohng Siohwa en ketin kadeik. Ni atail kin nanti laud en idawehn sapwellimen Siohwa koasoandi pwung kan, kitail en dehr kadeik meteikan oh medewe me kitail mwahusang irail. Kitail en dehr kilengdiong meteikan me dene kitail ahneki pwuhng en kadeik irail oh me kitail mwahusang irail. Ahpw, kitail en tamataman me Siohwa iei “Sounkopwung en sampah pwon.” (Sen. 18:25) Siohwa sohte ketikihong kitail pwuhng en kadeik meteikan. Ni mehlel, Sises ketin kehkehlikiong kitail: “Uhdihsang amwail kin kadeik meteikan pwe kumwail en dehr pakadeikda.”​—Mad. 7:1. *

19. Ia duwen Sosep eh kasalehda me e likih sapwellimen Siohwa kadeik?

¹⁹ Kitail pwurehng medewehla mehn kahlemeng en ohl pwungo Sosep. E sohte kadeik meteikan, pil irail kan me wiahiong ih me suwed. Pein rie pwutak ko wiahiong ih tiahk lemei, netikihla, oh pitiheki arail pahpao me  Sosep mehla. Sounpar kei mwuhr, Sosep pwurehng tuhwong eh peneinei. Ni ahnsowo Sosep wia kaun emen oh e kak kadeik rie ko ni lemei oh dupuk ong irail. Rien Sosep ko masak me e pahn wia met, mendahki irail uhdahn koluhkihla dahme re wiao. Ahpw Sosep ndaiong irail: “Kumwail dehr perki mehkot. I sohte kak wiliandi Koht.” (Sen. 37:18-20, 27, 28, 31-35; 50:15-21) Ni aktikitik, Sosep mweidohng Siohwa en ketin kadeik.

20-21. Ia duwen atail kak soikala wia emen me kin medewe me e mwahusang meteikan?

²⁰ Duwehte Sosep, kitail kin mweidohng Siohwa en ketin kadeik. Karasepe, kitail sohte kin medewe me kitail ese dahme kamwakid riatail Kristian kan en wia dahme re wia. Kitail sohte kak ese dahme mi nan mohngiong en emen, ahpw Siohwa kelehpw ‘me pahn ketin teneki lamalam akan.’ (Lep. Pad. 16:2) E ketin poakohng soangen aramas koaros, sohte lipilipil soangen mour oh tiahk dah me re tikida loale. Oh Siohwa ketin kangoange kitail en “ritingada douluhl [atail] mohngiong.” (2 Kor. 6:13) Kitail kin nantihong en poakohng riatail Kristian kan koaros, a kaidehn en kadeik irail.

²¹ Met pil wehwehki me kitail en dehr kadeik irail kan likin mwomwohdiso. (1 Tim. 2:3, 4) Ia duwe, ke pahn kadeik kisehmw men me sohte kin papah Siohwa oh nda, “Aramas menet sohte pahn esehla padahk mehlel?” Uhdahn soh, pwehki met pahn wehwehki me kitail aklapalap, oh medewe me kitail mwahusang meteikan. Siohwa kin ketin mweidohng “aramas akan wasa koaros” ahnsou mwahu ren koluhla. (Wiewia 17:30) Ahnsou koaros tamataman me Siohwa kin ketin wiahki irail kan me medewe me irail pwung aramas kei me sohte pwung.

22. Dahme kahrehda ke koasoanehdi teng en poakohng me pwung?

²² Atail poakohng dahme Siohwa mahsanih me pwung pahn kahrehiong kitail en peren, oh pahn sewese kitail en wia mehn kahlemeng mwahu ong meteikan pwe irail en kalaudehla arail poakohng kitail oh Koht. Kitail en dehr uhdihsang “inengieng me pwung.” (Mad. 5:6) Kamehlele me Siohwa kin ketin pohnese omw nannanti oh me e kin ketin kupwurperenki omw kin kekeirda. Ni aramas en sampah ar kalaudehla ar sohte kin wia me pwung, kitail en dehr nsensuwed! Ahnsou koaros tamataman me Siohwa “kin ketin poakohng sapwellime aramas pwung kan.”​—Mel. 146:8.