1. Irair mwahu dah me sapwellimen Siohwa aramas akan ahneki?

 PAIPEL kohpada me sapwellimen Koht aramas akan pahn toukihda pein irail pwehn papah Siohwa ni arail kin idawehn kaweid en Sises. (Mel. 110:3) Kokohpo uhdahn pweidahr rahnwet. Pahr koaros, sapwellimen Siohwa ladu kan kin ni ngoang wiahda awa rar rar kei nan doadoahk en kalohk. Irail sohte kin ale pweinen doadoahk wet, irail kin wia met pwehki pein nsenarail. Irail pil kin wiahda ahnsou pwehn sewese riarail Kristian kan en ale dahme re anahne, kangoange irail, oh kakehlakahla arail limpoak ong Siohwa. Elder kan oh sounsawas kan kin doadoahngkihla awa tohto pwehn kaunopada padahk ong mihting kan oh mwemweitla rehn riarail Kristian kan pwehn kangoange irail. Ia kahrepen sapwellimen Siohwa aramas akan kin wia mepwukat? Pwehki irail poakohng Siohwa oh mehn mparail kan.​—Mad. 22:37-39.

2. Nin duwen me Rom 15:1-3 mahsanih, mehn kahlemeng dah me Sises ketin kasalehda?

² Sises ketin kasalehda me e nsenohki anahn en meteikan laudsang pein ah. Kitail kin song uwen atail kak en alasang ih. (Wadek Rom 15:1-3.) Ma kitail wia met, e pahn imwila mwahu ong kitail. Sises mahsanih: “Kihwei kin kaperen sang ale.”​—Wiewia 20:35.

3. Dahme kitail pahn koasoiapene nan iren onop wet?

³ Nan iren onop wet, kitail pahn koasoiapene ekei soahng kan me Sises ketin wia pwehn sewese meteikan, oh ia duwen atail kak alasang ih. Kitail pahn pil koasoiapene ia duwen atail kak kalaudehla atail men papah meteikan.

4. Ia duwen Sises eh ketin nsenohki anahn en meteikan laudsang pein ah?

⁴ Sises ketin sewese meteikan pil ni ahnsou me e ngiralahr. Medewehla dahme Sises ketin wia ni aramas tohto ar kohdo reh ni nahna ehu me ele karanih Kapernaum. Erein pwohngo pwon, Sises ketin wie kapakap. Ele e uhdahn ngiralahr, ahpw ni eh mahsanihada pokono, e ketin poakehla me semwehmwe oh me soumwahu ko. E sohte ketin kamwahwihalahte irail, ahpw e pil wia kapahrek ehu me uhdahn kin kangoange aramas. Kapahreko iei Kapahrek en Pohn Dohl.​—Luk 6:12-20.

5. Ia duwen tapwin peneinei kan ar kin alasang Sises oh kasalehda limpoak ni arail kin pwangada?

⁵ Ia duwen tapwin peneinei kan ar kin alasang Sises. Medewehla met: Mwurin eh doadoahk laud rahno, pahpa men pwurala ni imweo uhdahn pwangada. Mwein e sohte men wia Kaudok en Peneinei ni soutiko, ahpw e peki rehn Siohwa kehl pwehn wia arail onopo. Siohwa ketin sapengala eh kapakapo, eri irail wia onopo nin duwen me kin wiawi wihk koaros. Seri ko sukuhlki mehn kasukuhl kesempwal ehu ni soutiko. Re sukuhlki me kaudok ong Siohwa iei me arail pahpa oh nohnou kin keieu kesempwalki.

6. Menlau kihda ehu karasaras duwen Sises eh ketin tounmeteikihla sapwellime ahnsou pwehn sewese meteikan.

⁶ Sises ketin wiahda ahnsou ong meteikan mehnda ma pein ih anahne ahnsou en kalapwukala. Ke kak medewehla ia sapwellimen Sises pepehm ni ahnsou me e mwahngihada me kompoakepaho Sohn Sounpapidais kamakamala? Sises uhdahn ketin pahtoukihla met. Paipel mahsanih: “Ni Sises eh karongehda met, [duwen mehlahn Sohn], e ahpw ketin iangada pwoht ehu ketila sang mwo oh ketila wasa kis pwe en kalapwukala.” (Mad. 14:10-13) Kitail kak wehwehki dahme kahrehda e kupwurki kalapwukala. Ekei aramas kin men kelehpwla ni arail kin pahtoula. Ahpw Sises sohte kak ketin kalapwukala. Pokon ehu lella wasa me Sises kupwurki kalapwukala ieo mwohn eh ketila wasao. Dahme Sises ketin wia? E ketin medewe dahme pokono anahne, oh e “ketin poakeirailla”. E mwahngih me re anahne sawas oh kangoang sang rehn Koht, eri Sises mwadangete ketin  sewese irail. “Ih eri ketin padahkihong irail soahng tohto.”​—Mark 6:31-34; Luk 9:10, 11.

7-8. Menlau kihda ehu karasepe me elder kan kin alasang Sises ni ahnsou me emen anahne sawas nan mwomwohdiso.

⁷ Ia duwen elder kan ar kin alasang Sises. Kitail kin uhdahn kalahnganki doadoahk me elder kan kin wiahiong kitail! Pali laud en riatail Kristian kan nan mwomwohdiso sohte ese doadoahk kan me elder kan kin wia. Karasepe, ni ahnsou me kahpwal ehu pwarada oh anahne sawas en wini, brother kan me kin apwalih palien Hospital Liaison Committee kin mwadang sewese riarail Kristian kan. Soangen kahpwal wet kin kalapw wiawi ni lukepen pwong! Ahpw pwehki irail kin poakohng riarail Kristian kan me lelohng kahpwalo, elder kan iangahki arail peneinei kin nsenohki mahs anahn en riarail kan laudsang pein arail.

⁸ Elder kan pil kin iang sewese kauwada Wasahn Kaudok kan oh ihmw teikan me melimel de rerrer en sahpw kauwehla. Oh irail kin doadoahngkihla ahnsou laud pwehn padahkih oh kangoange kitail. Elder pwukat koaros oh arail peneinei kan uhdahn warohng kaping. Siohwa en ketin kapaiahda ngoang me irail kasalehda! Ei mehlel, duwehte koaros, elder kan anahne toupahrek. Irail sohte anahne doadoahngkihla ahnsou laud en wia soahng kan ong mwomwohdiso me kahrehda sohla arail ahnsou en apwalih arail peneinei.

9. Nin duwen me Pilipai 2:4, 5 mahsanih, irair dah me Kristian koaros anahne kakairada?

⁹ Wadek Pilipai 2:4, 5. Kaidehn elder kante, ahpw kitail koaros kak sukuhlki en duwehte Sises oh nsenohki anahn en meteikan  laudsang atail. Paipel mahsanih me Sises “duwehla ladu men.” (Pil. 2:7) Medewehla dahme kitail kak sukuhlkihsang met. Ladu men pahn kin rapahki ahnsou mwahu kan pwehn kaperenda eh soumas. Pwehki kitail sapwellimen Siohwa ladu kei oh kitail kin papah riatail Kristian kan, kitail men kalaudehla atail en wiahla emen me Siohwa oh riatail Kristian kan kin koapworopworki. Ke kak wia met sang ni omw medewe soahng pwukat.

10. Peidek dah kan me kitail kak pein idek rehtail?

¹⁰ Kasawih pein omw madamadau. Pein idek rehmw peidek pwukat: ‘Ia uwen laud en ei men tounmeteikihla ei ahnsou oh kehl pwehn sewese meteikan? Karasepe, dahme I pahn wia ma emen peki rehi en mwemweitla rehn brother mah men me kin mi nan wasahn me mah kan, de wahla sister mah men ni mihting kan? I kin men sawas ni ahnsou me Wasahn Kaudok kan de wasahn mihting tohrohr kan anahne kamwakel?’ Ni atail inoukihong Siohwa atail mour, kitail inoukihong ih me kitail pahn doadoahngki soahng koaros me kitail ahneki pwehn papah ih. E ketin kupwurki kitail en doadoahngki atail ahnsou, kehl, oh kepwe kan pwehn sewese meteikan. Eri, e kin ketin kupwurperenkihda ni atail kin wia soahng pwukat sang ni pein nsenatail. Ma kitail kilang me mie anahnepen kamwahwihala soahng pwukat rehtail, dahme kitail kak wia?

11. Ia duwen kapakap eh kak sewese kitail en kakairada irair en tounmetei?

¹¹ Kapakap ong Siohwa sang nan omw mohngiong. Ele ke kilang me ke anahne kalaudehla omw irair en tounmetei, ahpw ke sohte inengieng wia met. Ma ih omw pepehm en met, kapakap ong Siohwa sang nan omw mohngiong. Ke anahne en kin mehlel. Padahkihong Siohwa omw pepehm oh peki en ketin ‘kakehlakahda omw ineng en wia soahng koaros me e ketin kupwurki.’​—Pil. 2:13.

12. Ia duwen brother pwulopwul kan ar kak sewese arail mwomwohdiso?

¹² Ma kowe brother pwulopwul men me papidaislahr, peki Siohwa en ketin seweseiuk en men kalaudehla omw sewese riomw Kristian kan nan omw mwomwohdiso. Nan ekei sahpw, elder kan tohtohsang sounsawas kan, oh me tohto rehrail solahr pwulopwul. Ni sapwellimen Siohwa pwihn eh kin wie tohtohla, kitail anahne brother pwulopwul tohto pwehn sewese elder kan apwalih riatail kan nan mwomwohdiso. Ma ke men papah wasa sohte lipilipil me anahne sawas, ke pahn peren. Dahme kahrehda? Pwehki ke men kaperenda Siohwa, riomw Kristian kan pahn kilang me ke kin men sewese meteikan, oh ke pahn paiekihda omw sewese meteikan.

13-14. Dahme kitail kak wia pwehn sewese riatail Kristian kan? (Menlau kilang kilel ni kilin Kahn Iroir wet.)

¹³ Tehk mwahu me meteikan anahne sawas. Pohl padahkihong Kristian kan me kin kousoan nan Sudia: “Kumwail dehr manokehla wia me mwahu oh ehukihong meteikan dahme kumwail ahneki, pwe Koht kin ketin kupwurperenki soangen meirong pwukat.” (Ipru 13:16) Kaweid mwahu ehu met! Sohte pwand mwurin arail alehdi kisinlikowo, Kristian kan nan Sudia anahne kohkohsang imwarail kan, arail pesines kan, oh kisehrail kan me kaidehn Kristian kei oh “tepida tangalahng nin nahna kan.” (Mad. 24:16) Ni ahnsowo, e uhdahn kesempwal me irail anahne sawaspene. Ma mwohn mwo irail kin doadoahngki en Pohl kaweido me irail en ehukihpene dahme re ahneki, e pahn mengei ong irail en ahneki soahng malaulau keite wasa me re keseula ie.

¹⁴ Ele riatail Kristian kan sohte kin ahnsou  koaros padahkihong kitail dahme re anahne. Karasepe, ele en brother men eh pwoud mehla. Ia duwe, brothero anahne sawas ong wiahda mwenge, mehn peidaid, de kamwakele imweo? Ele e sohte men peki sawas pwehki e sohte men kedirepwa kitail. Ahpw e uhdahn pahn kalahnganki atail sewese ih mwohn eh peki atail sawas. Kitail en dehr medewe me emen pahn sewese ih de e pahn kin ahnsou koaros padahkihong kitail dahme e anahne. Pein idek rehmw, ‘Soangen sawas dah me I pahn anahne ma I mi nan eh irairo?’

15. Dahme kitail anahne wia ma kitail men sewese meteikan?

¹⁵ Kamengeiong meteikan en peki rehmw sawas. Mwein ke ese Kristian kan nan omw mwomwohdiso me kin ahnsou koaros perenki sewese meteikan. Irail sohte kin kahrehiong kitail en pehm me kitail kedirepwa irail. Kitail ese me irail pahn ahnsou koaros perenki sewese kitail oh kitail men duwehte irail! Elder men me sounpar 45 kin kamengeiong meteikan en men peki sawas reh. Alan ndahki sapwellimen Sises mehn kahlemeng: “Sises kin ketin soupisek, ahpw me pwulopwul oh mah kan kin perenki ih oh sohte perki peki reh sawas. Irail ese me e kin uhdahn ketin nsenohkin irail. I men duwehte Sises oh I men meteikan en wiahkin ie soangen aramas me kin kadek oh nsenohki meteikan.”

16. Ia duwen atail doadoahngki Melkahka 119:59, 60 eh kak sewese kitail en idawehn kanahieng sapwellimen Sises mehn kahlemeng?

¹⁶ Kitail sohte anahne mworusala ma kitail sohte kin alasang Sises ni unsek. (Seims 3:2) Tohnsukuhl men sohte kak alasang ni unsek en eh sounpadahko doadoahk. Ahpw, ni eh sukuhl sang eh sapwung kan oh nantihong ni uwen eh kak en idawehn mehn kahlemeng en eh sounpadahko, e pahn mwamwahula.  Duwehte met, ma kitail kin kapwaiada dahme kitail sukuhlkihsang atail onopki Paipel, oh nantihong kamwahwihala soahng suwed kan rehtail, kitail pahn kak idawehn kanahieng sapwellimen Sises mehn kahlemeng.​—Wadek Melkahka 119:59, 60.

17-18. Ia duwen atail pahn paiekihda atail alasang Sises?

¹⁷ Ni atail kin men sawas, e pahn kamwakid meteikan en pil men wia soahngohte. Emen elder me adaneki Tim koasoia: “Ekei brother kan me uhdahn pwulopwul wiahlahr sounsawas kei. Ehu kahrepen arail wia met iei pwehki irail kin kilang meteikan ar kin perenki sawas oh irail pil men duwehte irail. Irail brother pwulopwul pwukat kin sewese at mwomwohdiso oh kin sewese laud elder kan.”

¹⁸ Aramas tohto nan sampah rahnwet kin roporop ong pein irail. Ahpw sapwellimen Siohwa aramas akan sohte duwehte irail. Sapwellimen Sises mehn kahlemeng en tounmetei kin kamwakid kitail, oh kitail men alasang sapwellime mehn kahlemeng. Ei mehlel, kitail sohte kak idawehn ih ni unsek, ahpw kitail kak “idawehn mwahu dahme e kin ketin wia.” (1 Pit. 2:21) Ni atail kin wia uwen atail kak en idawehn sapwellimen Sises mehn kahlemeng en tounmetei, kitail pil pahn peren pwehki kitail kin kaperenda Siohwa.