1-2. (a) Dahme kahrehda me tohto rahnwet kin apwalki likih irail kan me ahneki manaman? (b) Dahme kitail pahn koasoiapene nan iren onop wet?

 RAHNWET me tohto kin apwalki likih emen me ahneki manaman. Irail kilang me koperment kan oh palien kosonned kin kalapw pere me kepwehpwe kan oh me ahneki manaman, ahpw sohte kin nohn sewese me semwehmwe kan. Paipel mahsanih: “Ekei aramas ahneki manaman, a ekei kin wie lokolok pahn ar manaman.” (Ekl. 8:9) Patehng met, ekei kaunen pelien lamalam kan kin wia soahng suwed kan me kahrehda ekei aramas en sohla likih Koht. Eri ma kitail kin onop Paipel rehn emen, kitail anahne sewese ih en likih Siohwa oh irail kan me e ketin idihada nin sampah.

² Ei mehlel, kaidehn tohnsukuhl en Paipel kante me anahne sukuhlki en likih Siohwa oh likih sapwellime pwihn. Mehnda ma kitail papahki Siohwa erein sounpar tohto, kitail en ahnekihte pwoson me Siohwa kin ketin wia dahme pwung ahnsou koaros. Ekei pak, mehkot kakete wiawi me pahn kasonge atail likih Siohwa. Nan iren onop wet, kitail pahn koasoiapene irair siluh me atail pwoson kakete lelohng songosong: (1) ni atail wadek ekei wasa nan Paipel, (2) ni atail alehdi kaweid sang sapwellimen Siohwa pwihn, oh (3) ni atail lelohng kahpwal kan ni ahnsou kohkohdo.

3. Ia duwen ekei koasoipen Paipel ar kakete kasonge atail likih Siohwa?

 ³ Ni atail kin wadek Mahsen en Koht, ele kitail kin peidengki mwomwen sapwellimen Siohwa wiewia ong ekei aramas  oh ekei pilipil kan me e ketin wiahda. Karasepe, nan pwuhken Nempe, kitail wadek duwen Siohwa eh ketin kadeikada ohlen Israel men en kamakamala pwehki e weseituwi ni rahnen Sapad. Nan keriaun pwuhken Samuel, kitail sukuhlki me sounpar tohto mwuhr, Siohwa ketin mahkikihong Nanmwarki Depit eh wiahda dipen kamwahl oh kamaramas. (Nemp. 15:32, 35; 2 Sam. 12:9, 13) Ele kitail pahn medewe, ‘Dahme kahrehda Siohwa ketin mahkikihong Depit eh kemehla aramas oh wiahda dipen kamwahl ahpw ketin kadeikada ohl teio en kamakamkihla mehkot me mwomwen sohte wiahda dihp laud ehu?’ Pwehn sapengala peidek wet, medewehla soahng siluh me kitail anahne tamataman ni atail wadek Paipel.

4. Ia duwen Senesis 18:20, 21 oh Deuderonomi 10:17 eh sewese kakehlakahla atail likih sapwellimen Siohwa pilipil kan?

⁴ Paipel sohte kin ahnsou koaros oaritikiada duwen soahng kan me wiawi. Karasepe, kitail ese me Depit uhdahn koluhkihla eh wiewia ko. (Mel. 51:2-4) Ahpw, soangen aramas dahmen ohl me kauwehla kosonned en Sapado? E koluhkihla dahme e wiao? E kin sapeikiong sapwellimen Siohwa kosonned kan mahso? E kin pohnsehsehla de pil soikala mehn kataman kan? Paipel sohte kasalehda. Ahpw, kitail kak kamehlele met: Siohwa “kin ketin wiahda dahme pwung oh pahrek.” (Deud. 32:4) Sapwellime pilipil kan kin poahsoankihda ire mehlel koaros​—kaidehn sang ni dahme meteikan kin nda, de lipilipilki aramas, de pil soangen kahrepe teikan me kin kalapw kahrehiong aramas en kadeik ni ahl sapwung. (Wadek Senesis 18:20, 21; Deuderonomi 10:17.) Ni atail kin kalaudehla atail sukuhlki duwen Siohwa oh sapwellime koasoandi kan, atail likih sapwellime kadeik kan pil pahn laudla. Mehnda ma kitail wadek Paipel oh ahneki peidek kan me kitail sohte kak sapengala met, kitail eselahr me atail Kohto kin “ketin pwung ni mehkoaros me e kin ketin wia.”​—Mel. 145:17.

5. Ia duwen soh unsek eh kak kamwakid atail kin kadeik soahng kan? (Menlau kilang kisin koakono “ Soh Unsek Kahrehda Sawehwe.”)

⁵ Kitail sohte kak kadeik ni pwung ahnsou koaros pwehki kitail soh unsek. Koht ketin wiaikitailda rasehng ih, eri kitail kin men wiewia pahrek en wiawihong aramas akan. (Sen.  1:26) Ahpw pwehki kitail soh unsek, kitail kakete kadeikada soahng kan ni ahl sapwung, mehnda ma kitail medewe me kitail alehdi ire mehlel koaros. Karasepe, tamanda ia uwen Sona eh sapwungki Siohwa eh ketin pilada en mahkohng mehn Ninipe kan. (Sona 3:10–4:1) Ahpw medewehla ia imwilahn met. Mehn Ninipe daulih 120,000 me koluhla poadoandoarla! Eri, Sona kadeikada aramas ako ni sapwung, ahpw kaidehn Siohwa.

6. Dahme kahrehda Siohwa sohte anahne ketin kawehwehiong kitail sapwellime pilipil kan?

⁶ Siohwa sohte anahne ketin kawehwehiong aramas akan kahrepen sapwellime pilipil kan. Mehlel, Siohwa ketin mweidohng sapwellime ladu kan mahso ren kasalehda arail pepehm duwen pilipil kan me e ketin wiahda, de me e pahn ketin wia. (Sen. 18:25; Sona 4:2, 3) Oh ekei pak, e kin ketin kawehwehda sapwellime pilipil kan. (Sona 4:10, 11) Ahpw, Siohwa sohte anahne ketin kawehwehiong kitail kahrepen sapwellime pilipil kan. Pwehki ih me Sounkapikpatail, e sohte anahne mweimwei sang kitail mwohn de mwurin eh ketin wia mehkot.​—Ais. 40:13, 14; 55:9.

7. Dahme kakete apwal ong kitail, oh dahme kahrehda?

⁷ Kitail kin uhdahn pwungki me Siohwa kin ketin wia dahme pwung ahnsou koaros. Ahpw, e kakete apwal ong kitail en likih ohl akan me e ketin idihada. Ele kitail kin medewe ma ekei me ahneki manaman nan sapwellimen Siohwa pwihn kin uhdahn kapwaiada sapwellimen Siohwa kaweid de pein arail kaweid. Ekei nan Paipel kakete ahneki madamadau wet. Medewehla karasaras kan nan  parakrap 3. Ele emen kisehn ohl me kauwehla kosonned en Sapado medewe ma Moses uhdahn koasoiong Siohwa mwohn ohlo pakadeikda oh kamakamala. Oh emen kompoakepahn Uraia mehn Ido, me eh pwoudo wiahda dipen kamwahl rehn Depit, ele medewe me Depit doadoahngki eh manaman nin duwen nanmwarki men pwehn pitsang kamakamala me e uhdahn konehng ale. Ni mehlelo, kitail sohte kak nda me kitail likih Siohwa ma kitail sohte kin likih irail kan nin sampah me E ketin idihada. Siohwa kin ketin likih irail.

8. Ia duwen dahme kileldi nan Wiewia 16:4, 5 eh duwehte dahme kin wiawi nan mwomwohdisohn Kristian kan rahnwet?

⁸ Rahnwet, Siohwa kin ketin kahluwa sapwellime pwihn nin sampah sang ni eh ketin doadoahngki ‘ladu lelepek oh loalokongo.’ (Mad. 24:45) Duwehte pwihn me kin apwalih mwomwohdiso kan ni mwehin tepin Kristian ko, ladu menet kin apwalih sapwellimen Koht aramas akan nan sampah pwon oh kihda kaweid ong elder kan nan mwomwohdiso. (Wadek Wiewia 16:4, 5.) Eri elder kan kin tehk mwahu me irail kin idawehn kaweido nan mwomwohdiso. Kitail kin kasalehda me kitail likih me Siohwa kin ketin wia dahme pwung ahnsou koaros ni atail kin peikiong kaweid me kitail alehdihsang sapwellime pwihn oh pil elder kan.

9. Iahd me e kakete apwal ong kitail en utung pilipil kan me elder kan wiahda, oh dahme kahrehda?

⁹ Ekei pak, ele kitail kin apwalki utung pilipil kan me elder kan wiahda. Karasepe, nan pahr samwalahr ko, mie wekidekla kan nan mwomwohdiso tohto. Nan ekei wasa, ekei elder kan kin peki rehn sounkalohk kan en kohla iangala ehu mwomwohdiso tohrohr pwehn audehla sehr kan nan atail Wasahn Kaudok kan. Ma elder kan peki kitail en kohla iangala ehu mwomwohdiso, ele e pahn apwal ong kitail en kohkohsang kompoakepatail oh atail peneinei kan. Ia duwe, elder kan kin alehdi kaweid sang rehn Koht me padahkihong irail ia wasa me ren kadarala emenemen sounkalohk?  Soh. Eri met kakete apwal ong kitail en idawehn kaweid me kitail alehdi. Ahpw Siohwa ketin likih elder kan en wiahda soangen pilipil pwukat, oh kitail pil anahne likih irail. *

10. Dahme kahrehda kitail anahne utung elder kan? (Ipru 13:17)

¹⁰ Dahme kahrehda kitail anahne utung pilipil kan me elder kan wiahda, mehnda ma kitail sohte pwungki pilipil pwukat? Pwehki ni atail kin wia met, kitail kin sewese sapwellimen Koht aramas akan en miniminpene. (Ep. 4:2, 3) Mwomwohdiso kan kin kekeirda ni ahnsou me koaros kin uhpah ni aktikitik pilipil kan me pwihn en elder kan wiahda. (Wadek Ipru 13:17.) Kesempwal sang met, kitail kin kasalehiong Siohwa me kitail kin likih ih sang ni atail utung irail kan me e ketin likih pwehn apwalih kitail.​—Wiewia 20:28.

11. Dahme kak sewese kitail en kakehlaka atail likih kaweid kan me kohsang elder kan?

¹¹ Kitail kak kakehlaka atail likih koasoandi kan me kitail alehsang elder kan sang ni atail tamataman me irail kin kapakapki sapwellimen Koht manaman ni arail kin koasoiapene ire kan me pid mwomwohdiso. Irail pil kin tehk kanahieng kaweid kan sang nan Paipel me konehng irairo oh kaweid kan sang sapwellimen Siohwa pwihn. Irail uhdahn men kaperenda Siohwa oh sewesehki sapwellime aramas akan dahme keieu mwahu. Ohl lelepek pwukat ese me Koht uhdahn ketin nsenohki mwomwen arail kin apwalih sapwellime aramas akan. (1 Pit. 5:2, 3) Medewehla met: Nan sampah ehu me keinek, pelien lamalam, oh pelien koperment kin katohrepeseng aramas, sapwellimen Siohwa aramas akan kin miniminpene kaudokiong Koht mehlelo. Met kak wiawi ihte pwehki Siohwa kin ketin sewese sapwellime pwihn!

12. Dahme elder kan anahne medemedewe kanahieng ni arail pilada ma emen koluhla?

¹² Siohwa ketikihong elder kan pwukoa kesempwal en kolokol mwakelekel en mwomwohdiso. Ma Kristian men wiahda dihp laud ehu, Siohwa ketin kupwurki elder kan en tehkada ma me wiahda dihpo kak mihmihte nan mwomwohdiso. Ehu rehn soahng kan me re anahne wia iei en esehda ma aramaso uhdahn koluhkihla dahme wiao. E kakete nda me e koluhla, ahpw ia duwe, e uhdahn kailongki dahme e wiao? E koasoanehdi teng en dehr pwurehng wia dihpo? Ma ehu kahrepen eh wiahda dihpo iei werek suwed, e pahn men uhdihsang werekiong aramas ko? Elder ko kin kapakap ong Siohwa, koasoiapene ire mehlel kan oh dahme Paipel mahsanih, oh tehk ma ia en me wiahda dihpo pepehm ong dahme e wiao. Irail eri pilada ma me wiahda dihpo pahn mihmihte nan mwomwohdiso. Nan ekei irair, e anahne piskenla.​—1 Kor. 5:11-13.

13. Dahme kitail kakete medewe ma kompoakepatail men de kisehtail men piskenla?

¹³ Ia duwen atail likih elder kan eh kak lelohng songosong? Ma aramas me piskenlao kaidehn kompoakepahmw keren men de omw peneinei, ele e pahn mengeiong uhk en pwungki pilipil kan me elder kan wiahda. Ahpw ma me piskenlao wia emen kompoakepahmw keren, ele e pahn apwal ong uhk. Ele kitail kin pwunodki me elder kan sohte tehkada ire kan koaros, de ele kitail kin medewe ma mehlel irail wiahda pilipilo nin duwen me Siohwa pahn ketin wia. Dahme kak sewese kitail en ahnekihte madamadau pwung duwen pilipilo?

14. Dahme kak sewese kitail ma elder kan pilada me kompoakepatail men de kisehtail anahne piskenla?

¹⁴ Kitail anahne tamataman me Siohwa  me ketin wiahda koasoandi en piskenla oh me koasoandi wet wia kamwahu ong mwomwohdiso oh pil ong me wiahda dihpo. Ma me wiahda dihpo sohte koluhla oh mihmihte nan mwomwohdiso, e kakete kamwakid meteikan en pil wiahda dihp. (Kal. 5:9) Patehng met, ele e kakete sohte pohnese uwen laud en dihp me e wiahdao, oh ele e kilang me sohte kahrepen en wekidala eh madamadau oh wiewia pwehn kak pwungla rehn Siohwa. (Ekl. 8:11) Kitail kak uhdahn kamehlele me elder kan kin kapwaiada arail pwukoa ni keneinei ni arail kin pilada ma aramaso anahne piskenla. Irail ese me duwehte sounkopwung kan nan Israel mahso, irail “sohte mwekimwekidki manaman en aramas, ahpw manaman en” Siohwa.​—2 Kron. 19:6, 7.

15. Dahme kahrehda kitail anahne kalaudehla atail kin likih sapwellimen Siohwa kaweid kan ahnsou wet?

¹⁵ Ni imwin koasoandi suwed wet eh kerendohr, kitail anahne kalaudehla atail likih me Siohwa kin ketin wia dahme pwung ahnsou koaros. Dahme kahrehda? Erein kahn kamakam kowahlapo, ele kitail pahn alehdi kaweid kan me pahn mwomwen apwal en wehwehki de peikiong. Ei mehlel, Siohwa sohte uhdahn pahn ketin mahsendohng kitail. Ahpw e pahn ketikihda kaweid kan sang ni eh pahn ketin doadoahngki irail kan me e ketin idihada. Kaidehn ih ahnsowo me kitail en peikasalki kaweido de medewe, ‘Kaweid wet uhdahn kohsang rehn Siohwa, de pein madamadau en brother kan me kin tiengla mwowe?’ Ke pahn likih Siohwa oh sapwellime pwihn erein ahnsou kesempwalo? Pasapengo ele pahn sansalda sang mwomwen omw kin kilangwohng kaweid kan ahnsou wet sang irail me Koht ketin idihada. Ma ke likih kaweid me ke alehdi rahnwet oh mwadang peikiong, ke pahn pil wia duwehte erein kahn kamakam kowahlapo.​—Luk 16:10.

16. Ia duwen atail likih sapwellimen Siohwa pilipil kan eh kak lelohng songosong ni ahnsou kohkohdo?

¹⁶ Kitail pil anahne medemedewe kanahieng ia duwen atail pahn mwekidki sapwellimen Siohwa kadeik kan ni imwin koasoandi suwed wet. Ahnsou wet, kitail koapworopworki me aramas tohto me sohte kin papah Siohwa, iangahki kisehtail kan me kaidehn Sounkadehde kei, pahn pilada en papah ih mwohn imwio eh leledo. Ahpw nan Armakedon, Siohwa pahn ketin doadoahngki Sises en ketin pilada dahme pahn wiawihong irail. (Mad. 25:31-33; 2 Des. 1:7-9) Kitail sohte pahn pilada ihs me pahn ale sapwellimen Siohwa kadek kalahngan oh ihs me sohte pahn. (Mad. 25:34, 41, 46) Ia duwe, kitail pahn kak likih sapwellimen Siohwa pilipil kan, de kitail pahn sohla papah ih pwehki kitail sohte pwungki? E sansal  me kitail anahne kakehlaka atail likih Siohwa met pwe kitail en kak likih ih ni unsek ni ahnsou kohkohdo.

17. Ia duwen atail pahn paiekihda sapwellimen Siohwa kadeik kan ni imwin koasoandi wet?

¹⁷ Medewehla ia pahn atail pepehm nan sapwellimen Koht sampah kapwo ni atail kilang imwilahn sapwellimen Siohwa kadeik kan. Pelien lamalam likamw kan pahn sohla mie, oh pesines mwersuwed kan oh koperment kan me kin kahpwalihala aramas sangete mahs lel met pil sohla pahn mie. Kahpwal en roson, mahla, oh mehlahn emen me kitail poakohng sohla pahn wiawi. Sehdan oh ngehn suwed kan sohla pahn kedirepwe aramas akan erein sounpar kid. Soahng suwed koaros me wiawi pwehki arail uhwongada Koht sohla pahn mie. (Kaud. 20:2, 3) Ni ahnsowo, ia uwen atail pahn kalahnganki me kitail kin likih me Siohwa kin ketin wia dahme pwung ahnsou koaros!

18. Dahme kitail kak sukuhlkihsang mehn kahlemeng en mehn Israel ko me kileldi nan Nempe 11:4-6 oh 21:5?

¹⁸ Ia duwe, e pahn mie kahpwal nan sapwellimen Koht sampah kapwo me kakete kasonge atail likih me Siohwa kin ketin wia dahme keieu mwahu ahnsou koaros? Karasepe, medewehla dahme wiawi mwurinte mehn Israel ko pitsang kalidu nan Isip. Ekei tepida kaulimki arail sohla kang mwenge mwahu nan Isip, oh irail mwamwahliki manna me Siohwa ketikihda ong irail. (Wadek Nempe 11:4-6; 21:5.) Ia duwe, kitail kak ahneki soangen madamadauohte mwurin kahn kamakam kowahlapo imwisekla? Kitail sehse ia uwen doadoahk laud me kitail anahne wia pwehn kamwakelehda sampah oh ekisekis kaparadaisihala. Ele e pahn mie doadoahk tohto oh e pahn ekis apwal nin tapio. Ia duwe, kitail pahn kaulimki dahme Siohwa pahn ketikihda ahnsowo? Kitail kak kamehlele me ma kitail kalahnganki soahng kan me Siohwa kin ketikihda ahnsou wet, kitail pahn pil kalahnganki soahng kan me e ketikihda ni ahnsowo.

19. Ia duwen omw pahn oaralapihada ire kesempwal kan nan iren onop wet?

¹⁹ Sapwellimen Siohwa wiewia kan kin ahnsou koaros pwung. Kitail anahne kamehlele met. Kitail pil anahne likih irail kan me Siohwa ketin likih en kapwaiada sapwellime kaweid kan. Dehr manokehla dahme Siohwa ketin mahsanih ni eh ketin doadoahngki sapwellime soukohpo Aiseia: “Kumwail pahn kehlail ni amwail kin meleilei oh kasalehda amwail likih ie.”​—Ais. 30:15, NW.