1. Mehn kahlemeng mwahu dah me sapwellimen Siohwa tohnkaudok kan wiadahr sangete mahs leledo ahnsouwet?

 KE KIN kesempwalki omw nanpwungmwahu rehn Siohwa? Ei uhdahn! Oh kaidehn kowe kelehpw. Mahso, aramas tohto pil kin ahneki soangen pepehmohte me ke ahneki. (Mel. 104:​33, 34) Me tohto wiadahr tounmetei kan pwehn kaudokiong Siohwa. Ih met me Nasaraid kan kin wia nan Israel mahso. Ihs irail, oh dahme kitail kak sukuhlkihsang arail mehn kahlemeng?

2. (a) Ihs Nasaraid kan? (Nempe 6:​1, 2) (b) Dahme kahrehda ekei mehn Israel kan pilada en wiahla Nasaraid kei?

² “Nasaraid” kohsang lepin lokaiahn Ipruo me wehwehki “Emen me Tohrohrla.” Nasaraid kan wia mehn Israel ngoang kei me pein pilada en papah Siohwa ni ahl tohrohr ehu. Kosonned en Moseso mweidohng ohl oh lih emen en wiahda inou tohrohr ehu sang ni arail pilada en wia Nasaraid men ong ahnsou ehu. a (Wadek Nempe 6:​1, 2.) Ni mehn Israel men inoukihda en wiahla Nasaraid men, e anahne idawehn kaweid kan me mehn Israel teikan sohte anahne kapwaiada. Eri, dahme kahrehda mehn Israel men kin pilada en wiahla Nasaraid men? Pwehki eh limpoak laud ong Siohwa oh kalahnganki sapwellime kapai kan.—Deud. 6:5; 16:17.

3. Ia duwen sapwellimen Koht aramas akan ar kin duwehte Nasaraid ko?

³ Koasoandi en Nasaraid kan uhdi ni ahnsou me “kosonned en Krais” wiliandi Kosonned en Moseso. (Kal. 6:2; Rom  10:4) Ahpw, duwehte Nasaraid kan, sapwellimen Siohwa aramas akan rahnwet kin pousehlahte kasalehda irail men papah ih ni mohngiong, mour, madamadau, oh kehl unsek. (Mark 12:30) Kitail kin men wiahda inou en papah Siohwa ni atail inoukihong ih pein kitail. Pwehn mour pahrekiong inou wet, kitail anahne wia kupwuren Siohwa oh wiahda tounmetei kan en papah ih. Ni atail kin tehk ia duwen Nasaraid kan ar kin mour pahrekiong arail inou kan, kitail pil kak sukuhlki mehn kasukuhl kesempwal kan duwen atail en kolokolete atail inowo. b (Mad. 16:24) Kitail pahn koasoiapene ekei karasaras.

PERENKI WIAHDA TOUNMETEI KAN

4. Nin duwen me Nempe 6:​3, 4 mahsanih, soangen tounmetei dah me Nasaraid ko wiahda?

⁴ Wadek Nempe 6:​3, 4. Nasaraid kan anahne liksang sakau en wai koaros oh soahng kan me kohsang tuhke kreip, duwehte kreip oh reisin kan. Meteikan kin perenki kang soangen mwenge pwukat pwehki e sohte sapwung en wia met. Paipel mahsanih me “wain mehn kaparanda nan kapehde” oh e wia kisakis ehu sang rehn Koht. (Mel. 104:​14, 15) Mendahki soahng pwukat kak kahrehiong aramas akan en perenki mour, Nasaraid ko soikala soahng pwukat. c

5. Soangen tounmetei dah me Madián oh Marcela pilada en wia oh dahme kahrehda?

⁵ Duwehte Nasaraid kan, kitail pil kin wiahda tounmetei kan pwehn kalaudehla atail papah Siohwa. Medewehla mehn kahlemeng en Madián oh Marcela. d Pwopwoud Kristian wet ahneki mour nsenamwahu. Madián ahneki doadoahk mwahu ehu me kak kahrehiong ira en kak mi nan ihmw kaselel ehu. Ahpw, ira men kalaudehla ara papah Siohwa. Pwehn kapwaiada ara mehn akadeio, ira pilada en wiahda ekei wekidekla kan. Ira koasoia, “Se katikala at kin doadoahngki mwohni. Se keseula nan kisin ihmw ehu oh netikihla warat sidohsao.” Madián oh Marcela sohte anahne wiahda tounmetei pwukat—ahpw ira pilada en wiahda tounmetei pwukat pwehn kalaudehla ara doadoahk en kalohk. Ira itarki oh perenki me ira wiahda pilipil pwukat.

6. Dahme kahrehda Kristian kan kin wiahda tounmetei kan rahnwet? (Pil kilang kilel.)

 ⁶ Kristian kan rahnwet perenki wiahda tounmetei kan pwe ren kak kalaudehla arail papah ih. (1 Kor. 9:​3-6) Siohwa sohte ketin mahsanih me kitail anahne wiahda tounmetei pwukat, oh e sohte sapwung en wia soahng pwukat. Karasepe, ekei kin sohla ahneki doadoahk ehu me irail mwahuki, imwarail kan, de naineki mahn. Me tohto kin pilada en kiripw erein ahnsou reirei de sohte naineki seri mwurinte ar pwopwoudida. Ekei kin pilada en papah wasa me anahne sounkalohk kan mehnda ma irail anahne kohkohsang arail peneinei de kompoakparail kan. Pali tohtohn kitail kin men wiahda tounmetei pwukat pwehki kitail men patohwanohng Siohwa uwen atail kak koaros. Ke kak kamehlele me Siohwa uhdahn ketin kesempwalki tounmetei sohte lipilipil, ma laud de tikitik, me ke pilada en wia pwehn papah ih.—Ipru 6:10.

MEN WEKSANG METEIKAN

7. Kasongosong dah me Nasaraid men kin lelohng pwehki eh kin kolokolete eh inowo? (Nempe 6:5) (Pil kilang kilel.)

⁷ Wadek Nempe 6:5. Nasaraid kan kin inoukihda me ren dehr sehk pitenmoangarail. Irail kin kasalehda ni ahl wet me irail uhdahn uhpahiong Siohwa. Ma mehn Israel men wiahla Nasaraid men ni ahnsou werei, pitenmoange ko pahn reireila oh meteikan pahn mwadang tehkada. Ma meteikan wauneki ih oh kangoange en kolokolete eh inowo, e pahn mengeiong Nasaraid menet en weksang meteikan. Mie ahnsou kan nan poadopoad en Israel me meteikan sohte kin kalahnganki oh utung Nasaraid kan. Ni mwehin soukohp Eimwos, mehn Israel kan me kin uhwong kin “idingohng Nasaraid kan en nim wain” pwehn kasonge irail en kauwehla arail inou en liksang wain. (Eimw. 2:12) Ekei pak, Nasaraid men anahne eimah pwehn kolokolete eh inowo oh weksang meteikan.

8. Ia duwen ahn Benjamin mehn kahlemeng eh kangoangeiuk?

⁸ Pwehki sapwellimen Siohwa sawas, kitail pil kak ni eimah weksang meteikan, mehnda ma kitail kin namenek. Medewehla mehn kahlemeng en Benjamin, Sounkadehde pwulopwul men me sounpar eisek nan Norway. Pwehki mahweno nan Ukraine, eh sukuhlo wia kasarawi ehu pwehn kasalehda arail utung aramas akan nan Ukraine. Seri kan anahne koulki koul ehu oh likawih likoun arail wehio. Pwe en dehr iang kasarawio, Benjamin uhda dohsang wasa me kasarawio wiawi. Sounpadahk men kilangada oh likwerih oh nda: “Ke anahne kohdo iang kiht met. Kiht koaros awiawih iuk!” Ni eimah, Benjamin kohla rehn sounpadahko oh nda: “I soupoupali,  oh I sohte kin iang pidada kasarawi kan me pid politik. Ni mehlel, Sounkadehdehn Siohwa tohto mi nan imweteng pwehki arail sohte kin iang mahwen.” Sounpadahko pwungki dahme Benjamin padahkihong oh mweidala en dehr iang kasarawio. Ienge tohnsukuhl ko tepida idek reh dahme kahrehda e sohte iangih irail. Benjamin uhdahn salohda me kahrehong en kereniong sengiseng, ahpw ni eimah e pwurehng kawehwehiong ienge tohnsukuhl ko koaros dahme e ndaiong sounpadahko. Mwurin mwo, Benjamin ndaiong eh pahpa nohnou me e kehn me Siohwa ketin sewese ih en uhki dahme e kamehlele.

9. Ni ahl dah me kitail kak kaperenda kupwuren Siohwa?

⁹ Pwehki kitail pilada en peikiong Siohwa, meteikan kin tehk me kitail weksang irail. Kitail anahne eimah pwehn padahkihong meteikan ni wasahn doadoahk de sukuhl me kitail Sounkadehdehn Siohwa kan. Oh ni wiewia oh madamadau en sampah wet eh wie susuwedla, ele kitail kin apwalki mour pahrekiong kaweid en Paipel kan oh ehukihong meteikan rongamwahwo. (2 Tim. 1:8; 3:13) Ahpw ahnsou koaros tamataman me kitail kin “kaperenda” Siohwa ni atail kin eimah oh weksang meteikan me sohte kin papah ih.—Lep. Pad. 27:​11, NW; Mal. 3:18.

DOULAHTE MWOHNEKI MAHS SIOHWA NAN OMW MOUR

10. Ia duwen en idawehn kaweid kan nan Nempe 6: 6, 7 eh kakete wia kasongosong ehu ong Nasaraid kan?

¹⁰ Wadek Nempe 6:​6, 7. Nasaraid kan sohte kak kohla karanih paliwar en me mehla men. Ele ke sohte medewe me met wia tounmetei laud ehu. Ahpw nan Paipel, met kakete wia kahpwal laud ehu ong Nasaraid men ni emen kiseh kan mehla. Tiahk en mehla nan Paipel kin kaweidki aramas akan en karanih paliweren me mehlao. (Sohn 19:​39, 40; Wiewia 9:​36-40) Pwehki inou me Nasaraid men wiahda, e sohte kak idawehn soangen tiahk pwukat. Pil ni ahnsou me eh peneinei kin pahtou laud, Nasaraid men kin kasalehda eh pwoson kehlail sang ni eh kin kolokolete eh inowo. Siohwa kin uhdahn ketin kakehlakahda sapwellime tohnkaudok loalopwoat pwukat en dadaurete pahn kahpwal kan me re kin lelohng.

11. Dahme Kristian men anahne koasoanehdi teng en wia ni eh kin wiahda pilipil kan duwen eh peneinei? (Pil kilang kilel.)

¹¹ Ni duwen Kristian kei, kitail kin uhdahn kesempwalki atail inou ong Siohwa. Met kin  pidada atail pilipil kan oh wiewia ong atail peneinei. Kitail kin doadoahk laud pwehn apwalih anahn en atail peneinei ahpw kitail en dehr kesempwalki dahme atail peneinei mwahuki laudsang dahme Siohwa ketin kupwurki kitail en wia. (Mad. 10:​35-37; 1 Tim. 5:8) Ele ekei pak kitail kin wiahda pilipil kan me atail peneinei sohte perenki ahpw Siohwa ketin kupwurperenki.

12. Dahme Alexandru wia oh sohte wia ni eh kin apwalihala irair apwal ehu nan eh peneinei?

¹² Medewehla dahme wiawihong Alexandru oh eh pwoudo, Dorina. Ni ara onopki Paipel erein sounpar ehu, Dorina pilada en uhdi oh e men Alexandru en pil uhdi. Ni kadek oh meleilei Alexandru padahkihong eh pwoudo me e pahn pousehlahte onop. Dorina sohte perenki oh song en kauhdi. Alexandru nda me e song en wehwehki dahme kahrehda eh pwoudo ahneki soangen pepehmo, ahpw e sohte mengei. Ekei pak Dorina kin kauwe oh nda soahng kan me kamedek me kahrehiong ih en pehm me e anahne uhdihsang onop Paipel. Ahpw Alexandru kin pousehlahte mwohneki Siohwa, oh pil ni ahnsowohte kasalehiong eh pwoudo limpoak laud oh wahu. Pwehki eh mehn kahlemeng mwahu, eh pwoudo pwurehng koasoanehdi en onop Paipel oh mwuhr e papidaisla.—Menlau kilang kasdou Alexandru and Dorina Văcar: “Love Is Patient and Kind” pahn oaralapo “Truth Transforms Lives.” nan jw.org.

13. Ia duwen atail kak kasalehda me kitail poakohng Siohwa oh atail peneinei?

¹³ Siohwa me ketin wiahda koasoandi en peneinei oh e kupwurki kitail en ahneki mouren peneinei nsenamwahu. (Ep. 3:​14, 15) Ma kitail uhdahn men ahneki peren mehlel, kitail anahne wia dahme Siohwa ketin kupwurki kitail en wia. Kamehlele me Siohwa ketin kesempwalki tounmetei me ke wiahda pwehn papah ih ni omw apwalih omw peneinei ni limpoak oh wahu.—Rom 12:10.

KANGOANGE EMENEMEN EN DUWEHTE NASARAID KAN

14. Ihs me kitail anahne keieu kangoange?

¹⁴ Koaros me pilada en kaudokiong Siohwa rahnwet anahne uhdahn men wiahda tounmetei kan pwehki arail poakohng ih. Ekei pak e apwal en wia met. Ia duwen atail kak sewese emenemen en wiahda tounmetei kan ong Siohwa? Sang ni atail kangoange emenemen. (Sohp 16:5) Ia duwe, mie ekei nan omw mwomwohdiso me kin song en dehr kedirepwkihla soahng kan me sohte nohn kesempwal pwehn kalaudehla arail papah Siohwa? Mie me pwulopwul  kan me ke ese me kin nantihong kesihnenda teng pwehn weksang meteikan nan sukuhl mendahki e apwal ren wia met? Mie tohnsukuhl kan en Paipel de iengomw tohnkaudok kan me kin kolokolete arail lelepek mendahki uhwong sang peneinei? Koasoanehdi teng ken wia uwen omw kak en kangoange irail oh padahkihong irail me ke perenki dahme irail kin wia ong Siohwa.—Pail. 4, 5, 7. 

15. Ia duwen ekei ar sewese irail kan me kin doadoahngki pali laud en ahnsou ong papah Siohwa?

¹⁵ Ekei pak, ele kitail kak sewese iengatail Kristian kan me kin doadoahngki pali laud en ahnsou ong papah Siohwa. (Lep. Pad. 19:17; Ipru 13:16) Ih met me sister lelepek mah men nan Sri Lanka men wia. Nah mwohni me e kin ale ekis laudla oh e men sewese sister pwulopwul riemen en pousehlahte ara doadoahk en pioneer mendahki ira ahneki kahpwal en mwohni. Eri e koasoanehdi ehuehu sounpwong uwen mwohni kis pwehn sewese pwain neira delepwohn. Sister menet uhdahn kadek!

16. Dahme kitail kak sukuhlkihsang koasoandi en Nasaraid kan mahso?

¹⁶ Kitail uhdahn kak sukuhlki laud sang mehn kahlemeng en Nasaraid kan mahso! Inou me Nasaraid ko wiahda pil padahkihong kitail mehkot duwen Samatailo nanleng, Siohwa. E mwahngih me kitail men kaperenda ih oh me kitail uhdahn men wiahda tounmetei kan pwehn mour pahrekiong atail inou ong ih. E ketin wauneki oh ketikihong kitail ahnsou mwahu pwehn kasalehiong ih me kitail poakohng Ih. (Lep. Pad. 23:​15, 16; Mark 10:​28-30; 1 Sohn 4:19) Koasoandi en Nasaraid kan kasalehda me Siohwa ketin mwahngih oh kesempwalki tounmetei kan me kitail wiahda pwehn papah ih. Eri, kitail koasoanehdi teng en pousehlahte papah Siohwa, men patohwanohng ih uwen atail kak koaros.