1-2. Dahme kitail anahne pousehlahte wia mwurin atail papidais? Menlau kawehwehda.

 PAK depe ke kin kamwakele imwomw? Mwein mwohnte omw keseula ke kamwakelehda mwahu. Ahpw dahme pahn wiawi ma ke sohte kin pwurupwurehng kamwakele? E pahn mwadangete pwurehng saminla. Pwe imwomwo en soandi mwahu, ke anahne pwurupwurehng kamwakele.

² Kitail pil anahne pousehlahte kapwungala elen atail elen madamadau oh wiewia. Ei mehlel, mwohn atail papidaisla, kitail doadoahk laud pwehn wiahda wekidekla kan nan atail mour pwehn “kamwakeleikitailsang mehkoaros me kin kasaminehla paliwar oh elen madamadau.” (2 Kor. 7:1) Ahpw ahnsou wet kitail anahne peikiong ahn wahnpoaron Pohl kaweid en ‘usehlahte onohnsapahlih atail elen madamadau.’ (Ep. 4:23) Dahme kahrehda kitail anahne pousehlahte wia met? Pwehki irair en sampah wet kak mwadangete kahrehiong kitail en sohla mwakelekel mwohn Siohwa. Pwehn pousehlahte kaperenda Siohwa, kitail anahne kaukaule kasawih atail madamadau, atail wiewia oh atail ineng kan.

3. Ia wehwehn en ‘wekidala elen omw madamadau’? (Rom 12:2)

³ Dahme kitail anahne wia pwehn wekidala elen atail madamadau? (Wadek Rom 12:2.) En ‘wekidala elen atail madamadau’ sohte kin wehwehki me kitail anahne wia soahng mwahu  keite. Kitail anahne medewe soangen aramas dah kei kitail oh wiahda wekidekla kan pwe kitail en kak peikiong sapwellimen Siohwa koasoandi kan ni uwen atail kak. Kitail anahne wia met kaidehn pak ehute ahpw pousehlahte.

4. Ia duwen atail kak soikala sampah wet en kamwakid atail madamadau?

⁴ Ni atail unsekla, kitail pahn kak ahnsou koaros kaperenda Siohwa ni soahng koaros me kitail kin wia. Pil ni ahnsowohte, kitail anahne pousehlahte nanti laud pwehn kaperenda Siohwa. Tehk me nan Rom 12:2, Pohl koasoia me kitail anahne wekidala elen atail madamadau pwehn ese dahme Koht ketin kupwurki kitail en wia. Kitail en dehr mweidohng sampah suwed wet en kamwakid kitail. Eri keieu kitail anahne kasawih pein kitail pwehn ese ia uwen laud kitail kin mweidohng sapwellimen Koht madamadau—kaidehn sampah wet—en kamwakid atail akadei oh pilipil kan.

5. Ia duwen atail kak kasawih atail madamadau duwen kerendohn rahnen Siohwa? (Menlau kilang kilel.)

⁵ Karasepe, Siohwa ketin kupwurki kitail en “tamatamante ketidohn rahnen Siohwa.” (2 Pit. 3:12) Pein idek rehmw: ‘Mwomwen ei mour kin kasalehda me I wehwehki me sampah suwed wet pahn kereniong sohrala? Ei pilipil kan duwen iang sukuhl laud de doadoahk kan me I pahn pilada kin kasalehda me papah Siohwa me keieu kesempwal nan ei mour? I pwoson me Siohwa pahn ketin sewese ie oh ei peneinei, de I kin kalapw pwunodki kepwe kan?’ Siohwa kin uhdahn ketin kupwurperenki ni eh mahsanih atail songosong en wia kupwure ni soahng koaros me kitail kin wia.—Mad. 6:25-27, 33; Pil. 4:12, 13.

6. Dahme kitail anahne pousehlahte wia?

⁶ Kitail anahne kaukaule kasawih atail madamadau oh wiahda wekidekla kan me anahn. Pohl ndaiong mehn Korint ko: “Kumwail pousehlahte kasawih ma kumwail kin mi nan  pwoson; de pousehlahte kadehdehda soangen aramas dah kumwail.” (2 Kor. 13:5) En “mi nan pwoson” wehwehki kitail anahne wia laudsang en iang towehda mihting en Kristian kan oh iang kalohk. Met kin pidada atail madamadau, atail ineng kan oh dahme kin kamwakid kitail en men wia mehkot. Eri kitail anahne pousehlahte wekidala elen atail madamadau sang ni atail wadek Mahsen en Koht, sukuhlki en ahneki soangen madamadauohte me e ketin sapwellimanki, oh wia soahng koaros me anahn pwehn kaperenda Siohwa.—1 Kor. 2:14-16.

7. Nin duwen me Episos 4:31, 32 mahsanih, dahme kitail pil anahne wia, oh dahme kahrehda e kakete apwal?

⁷ Wadek Episos 4:31, 32. Likin atail wekidala atail madamadau, kitail anahne “pwuhriong nan mour kapw.” (Ep. 4:24) Kitail anahne doadoahk laud pwehn wia met. Nanpwungen soahng teikan, kitail anahne doadoahk laud pwehn powehdi irair suwed kan me kitail ahneki duwehte kailok, lingeringer oh mwehl. Dahme kahrehda met kakete apwal? Pwehki e kakete uhdahn apwal en wekidala ekei irair suwed kan me kitail ahneki. Karasepe, Paipel mahsanih me ekei aramas kin “mwadang en lingeringer” oh kin “kahrehda akamai.” (Lep. Pad. 29:22) Emen me ahneki soangen irair suwed pwukat ele pahn anahne pousehlahte nantihong en wekila, pil mwurin eh papidaisla. Ih met me wiawihong emen me kitail pahn koasoiapene.

8-9. Ia duwen dahme wiawihong Stephen eh kasalehda me kitail anahne pousehlahte kesehla atail mouren mahs?

⁸ E uhdahn apwal ong brother men me adaneki Stephen en kaunda eh lingeringer. E koasoia: “Pil mwurin ei papidaisla, I kin anahne pousehlahte kaunda ei lingeringer. Karasepe, ehu rahno ni ei kalokalohk ihmw lel ihmw, I pwakih sounpirap men me pirapahsang nei redio nan werei sidohsao. Ni ei kerenlahng limwah, e kesehdi redio oh tang. Ni ei padahkihong meteikan ia duwen ei pwurehng alehdi nei redio, elder men nan pwihno idek rehi, ‘Stephen, dahme ke pahn wia ma ke koledi ih?’ Peidek wet kahrehiong ie en medewe oh kamwakid ie en pousehlahte nantihong en wiahda popohl.” b

⁹ Dahme wiawihong Stephen kasalehiong kitail me kitail kak kasalehda irair suwed ni atail sohte kasik, pil mwurin atail medewe me kitail solahr kin wia soahngo. Ma met wiawihong uhk, dehr mworusala oh medewe me ke wia Kristian suwed men. Wahnpoaron Pohl pil koasoia: “Ni ahnsou me I mwahuki wia dahme pwung, dahme suwed me kin mi rehi.” (Rom 7:21-23) Kristian soh unsek koaros anahne powehdi irair suwed kan me kin pwarada me duwehte pwelpar oh pwehl me kin dirala nan imwatail kan. Kitail anahne pousehlahte doadoahk laud pwehn mwakelekelte. Ia duwen atail kak wia met?

10. Ia duwen atail kak powehdi ineng sapwung kan? (1 Sohn 5:14, 15)

¹⁰ Kapakapkihong Siohwa duwen irair ehu me ke kin apwalki wekidala, oh kamehlele me e pahn ketin karongeiuk oh seweseiuk. (Wadek 1 Sohn 5:14, 15.) Mendahki Siohwa sohte pahn ketikihsang kahpwalo ni ahl kapwuriamwei ehu, e kak ketikihong uhk kehl pwe ken dehr kasalehda soangen irairo. (1 Pit. 5:10) Eri, pwehn pahrekiong omw kapakap, wia uwen omw kak pwehn dehr wia dahme ke kin wia mahso. Karasepe, kanahieng omw kin kilang kasdo kan, prokram en TV kan de wadek soai kan me e mwomwen pwung en ahneki irair  kan me ke songosong en kihsang. Oh dehr medemedewehte omw ineng suwed kan.—Pil. 4:8; Kol. 3:2.

11. Dahme kitail kak wia pwehn pousehlahte pwuhriong nan mour kapw?

¹¹ Mendahki ke keselahr mouren mahs, e kesempwal en kakairada ehu me kapw. Ia duwen omw kak wia met? Wiahda mehn akadei en kahlemengih Siohwa ni omw sukuhlki sapwellime irair kaselel kan. (Ep. 5:1, 2) Karasepe, ni omw kin wadek ire ehu me kasalehda sapwellimen Siohwa mahk, pein idek rehmw, ‘I kin mahkohng meteikan?’ Ni omw kin wadek duwen Siohwa eh kin ketin kupwurehla me semwehmwe kan, pein idek rehmw, ‘I kin ahneki soangen nsenoh ong riei Kristian kan me anahne sawas ong kepwe ape, oh I kin kasalehda sang ni ei wiewia kan?’ Pousehlahte wekidala elen omw madamadau sang ni omw kin pwuhriong nan mour kapw oh kanengamah ni omw kin wia met.

12. Dahme wiawihong Stephen me kadehdehda me Paipel kak wekidala aramas?

¹² Stephen, me kitail koasoiapene mwoweo, diarada me e kak ekisekis pwuhriong nan mour kapw. E koasoia: “Sangete ahnsou me I papidaisla, I mi nan irair kei me I anahne kaunda ei lingeringer. I sukuhlki en kohkohsang aramas me songosong en kalingeringerih ie, de kauhdi irairo en laudla. Aramas tohto iangahki ei pwoudo kin kapingahki ei kin meleilei erein irair pwukat. I pil pwuriamweikihla pein ngehi! I sohte men suweiki wekidekla kan me I wiahda. Ahpw I kamehlele me soahng pwukat kadehdehda me Paipel kak wekidala aramas.”

13. Dahme pahn sewese kitail en kakairada ineng kan me konehng? (Kalesia 5:16)

¹³ Wadek Kalesia 5:16. Pwehn sewese kitail en kana nan peio oh wia dahme pwung, ni kadek Siohwa ketikihong kitail sapwellime manaman. Ni atail kin onopki Mahsen en Koht, kitail kin mweidohng sapwellime manaman en kamwakid kitail. Kitail pil kin alehdi sapwellime manaman ni atail kin iang towehda atail mihting kan. Nan mihting kan, kitail kin patehng riatail Kristian kan me kin songosong en wia dahme pwung duwehte kitail oh met kin kangoang. (Ipru 10:24, 25; 13:7) Oh ni atail kin kapakapohng Siohwa ni ngidingid, oh peki sapwellime sawas ong ekei atail luwet kan, e pahn ketikihong kitail sapwellime manaman pwehn kakehlaka kitail pwe kitail en kak pousehlahte peiong. Ele soahng pwukat sohte pahn kihsang atail ineng sapwung kan, ahpw e pahn sewese kitail en pelianda atail men wia soahng pwukat. Nin duwen me Kalesia 5:16 mahsanih, irail kan me kin weweidki sapwellime manaman “sohte mwahn pahn kin kapwaiada ineng en uduk.”

14. Dahme kahrehda e kesempwal en pousehlahte kakairada ineng kan me konehng?

¹⁴ Ni ahnsou me kitail tepida wia soahng kan me kin sewese kitail en ahneki nanpwungmwahu rehn Siohwa, e kesempwal me kitail en wiahte dahme kitail kin wia oh pousehlahte kakairada ineng pwung kan. Dahme kahrehda? Pwehki emen sang atail imwintihti kan sohte kin uhdihsang peiong kitail. Imwintihtio iei kasongosong en wia dahme sapwung. Pil mwurin papidais ele kitail kin diarada me kitail kin inengieng soahng kan me kitail anahne soikala, me iangahki pilein mwohni, kamamsakau de kilang kilel suwed kan. (Ep. 5:3, 4) Emen brother pwulopwul koasoia: “Ehu ineng me apwal ong ien powehdi iei I kin mwahuki ohl. I medewe me pepehm pwukat pahn kedekedeo sohrala,  ahpw I kin ahnekihte pepehm ko.” Dahme kak seweseiuk ma ke kin ahneki ineng ehu me uhdahn kehlail?

15. Dahme kahrehda e wia mehn kangoang en ese me ineng sapwung kan kin “lelohng aramas koaros”? (Menlau kilang kilel.)

¹⁵ Ni omw kin pelianda ineng sapwung ehu me uhdahn kehlail, tamataman me ke sohte kelehpw. Paipel mahsanih: “Songosong me kin lelohng kumwail, ih me pil kin lelohng aramas koaros.” (1 Kor. 10:13a) Ehu kawehwe kawehwehdi iretikitik wet ni ahl wet: “Sohte kasongosong ehu me kin lelohng kumwail me sohte lelohng aramas akan.” Ire wet ntingdihong ohl oh lih Kristian kan nan Korint. Ekei irail mahso kin kamwahl, ohl mwahuki ohl oh lih mwahuki lih, oh kamamsakau. (1 Kor. 6:9-11) Ke medewe me mwurin arail papidaisla, sohla mie ineng sapwung kan me re anahne powehdi? Mwein soh. Mehlel irail koaros wia Kristian keidi kei, ahpw irail pil soh unsek. Ele irail kin anahne nantihong en powehdi ineng sapwung kan ehuehu ahnsou. Met wia kangoang ong kitail. Dahme kahrehda? Pwehki e kasalehda me sohte lipilipil ineng sapwung dah me ke kin nannanti en powehdi, mie me powehdier. Mehlel, ke kak ahneki ‘pwoson kehlail, pwe ke ese me riomw kan koaros nan sampah pil kin lelohng soangen lokolok me ke pil kin lelohng.’—1 Pit. 5:9

16. Madamadau keper dah me kitail anahne soikala, oh dahme kahrehda?

¹⁶ Soikala keperpen medemedewe me sohte emen kak wehwehki luwet me ke ahneki. En medemedewe met kak kahrehiong uhk en medewe me sohte koapworopworpen omw irairo oh me ke sohte kak soikala ineng sapwung kan. Met weksang dahme Paipel mahsanih: “Koht me lelepek oh e sohte pahn ketin mweidohng kumwail en ale songosong me kumwail sohte kakohng, ahpw ni songosong eh leledo, e pahn ketikihda elen pitsang pwe kumwail en kak dadaurete.” (1 Kor. 10:13b) Eri, mehnda  ma ineng sapwung ehu kin kehlail, kitail kak lelepekohngete Siohwa. Sang ni sapwellimen Siohwa sawas, kitail kak pousehlahte soikala wia dahme sapwung.

17. Mendahki kitail sohte kak kihsang douluhl ineng sapwung kan, dahme kitail kak kaunda?

¹⁷ Ahnsou koaros tamataman met: Pwehki kitail soh unsek, kitail sohte kak kihsang douluhl ineng sapwung kan. Ahpw ni atail ahnekihda ineng sapwung, kitail kak mwadangete soikala duwehte me Sosep wia ni ahnsou me e mwadangete tangasang ahn Podipar pwoudo. (Sen. 39:12) Ke sohte anahne dukula pahn omw ineng sapwung kan!

18-19. Peidek dah kan me kitail kak pein idek rehtail ni atail kin nannanti en wekidala elen atail madamadau?

¹⁸ En wekidala elen atail madamadau kin wehwehki me kitail anahne pousehlahte tehk mwahu me atail madamadau oh wiewia kan kin kaperenda Siohwa. Eri kitail anahne kaukaule kasawih pein kitail oh idek: ‘I kin mwekid ni ahl ehu me kasalehda me I pohnese me kitail kin momour ni ahnsou ehu me karuwaru? I kin kekeirda ni ei pwuhriong nan mour kapw? I kin mweidohng sapwellimen Siohwa manaman en kaweid ei mour pwe I en dehr dukula pahn ineng sapwung kan?’

¹⁹ Ni omw kasawih pein kowe, dehr kasik me ken unsek, ahpw perenki omw kekeirda. Ma ke kilang me ke anahne kamwahwihala ekei wasa, dehr mworusala. Ahpw idawehn kaweid en Pilipai 3:16: “Nin duwen atail kekeirdahr, kitail en pousehlahte kekeid ni pwung ni soangen ahl wet.” Ni omw wia met, kamehlele me Siohwa pahn ketin kapaia omw nannanti en doulahte wekidala elen omw madamadau.