1. Ia duwen 2 Korint 3:1-3 eh sewese kitail en kalahnganki atail pwais kaselel en padahkihong emen duwen Paipel oh kilang eh papidaisla? (Menlau kilang kilel ni kilin Kahn Iroir wet.)

IA OMW pepehm ni omw kilang tohnsukuhl en Paipel men sang nan omw wasahn kalohk eh papidaisla? Ke kin uhdahn perenkihda met. (Mad. 28:19) Oh ma kowe me onop rehn tohnpadahk kapwo, ia uwen kaperen en kilang eh papidaisla! (1 Des. 2:19, 20) Tohnpadahk kan me ahpwtehn papidaisla kin wia “kisinlikou en kaping,” kaidehn ong irail kante me onop rehrail ahpw pil ong mwomwohdiso pwon.​—Wadek 2 Korint 3:1-3.

2. (a) Peidek kesempwal dahieu me kitail anahne koasoiapene, oh dahme kahrehda? (b) Dahkot onop en Paipel? (Menlau kilang nting tikitik kan me kileldi.)

² E uhdahn mwahu en kilang me erein sounpar pahieu samwalahro, ripoht kin kasalehda me sounpwong koaros mpen onop en Paipel * 10,000,000 kin wiawi nan sampah pwon. Erein ehuehu sounpar ko, aramas daulih 280,000 me papidaisla nin duwen Sounkadehdehn Siohwa kan oh sapwellimen Sises Krais tohnpadahk kapw kan. Ia duwen atail kak kalaudehla atail sewese tohnsukuhl en Paipel rar rar pwukat ren kak papidaisla? Siohwa kin ketin kanengamah ni eh kin ketikihong aramas akan ahnsou mwahu en wiahla sapwellime Sounkadehde kan. Ihme kahrehda kitail en wia uwen atail kak koaros pwehn sewese irail en kekeirda oh papidaisla ni ahnsou karuwaru. Ahnsou  uhdahn mwotomwotalahr!​—1 Kor. 7:29a; 1 Pit. 4:7.

3. Dahme kitail pahn koasoiapene nan iren onop wet me pid wia onop en Paipel kan?

³ Pwehki doadoahk en katohnpadahk uhdahn kesempwal ahnsou wet, Pwihn me Kin Apwalih Mwomwohdiso nan Sampah Pwon idek rehn ohpis kan en Sounkadehdehn Siohwa kan dahme kitail kak wia pwehn kalaudehla atail sewese neitail tohnsukuhl en Paipel kan pwe ren kekeirda oh papidaisla. Nan iren onop wet oh mehn mwuhro, kitail pahn kilang dahme kitail kak sukuhlkihsang pioneer koahiek kan, misineri kan, oh sounapwalih me kin seiloak kan. * (Lep. Pad. 11:14; 15:22) Irail kawehwehda dahme sounpadahk en Paipel kan oh neirail tohnsukuhl kan kak wia pwe arail onop en Paipel en pweida mwahu. Nan iren onop wet, kitail pahn koasoiapene soahng limau me tohnsukuhl koaros anahne wia pwehn kekeirda oh kak papidaisla.

4. Dahme kitail anahne wehwehki duwen wia onop en Paipel kan ni mwotomwot?

⁴ Riatail Kristian tohto kin wia onop en Paipel rehn aramas akan ni arail kesihnen ni wenihmwen tohnihmwo. Mendahki wiepe wet wia ahl mwahu ehu en tapiada onop Paipel, koasoakoasoipene wet kin kalapw mwotomwot oh sohte kin wiawi wihk koaros. Pwehn kakairada ahn tohnihmwo eh perenki onop, ekei kin idek rehn tohnihmwo neirail nempehn delepwohn oh kin call de textih irail pwehn ehukihong irail iren Paipel ehu mwohn arail pwurehng pwurala. Ele irail kin wia soangen koasoakoasoipene pwukat erein sounpwong kei ahpw e sohte wiahla onop en Paipel me pweida. Ia duwe, tohnsukuhl men pahn uhdahn kekeirda pwehn kak inoukihong Siohwa eh mour oh papidaisla ma ihte soangen ahnsou ko me e ahneki en onopki Mahsen en Koht? Mwein soh.

5. Dahme Sises mahsanih nan Luk 14:27-33 me kitail kak doadoahngki pwehn sewese neitail tohnsukuhl en Paipel kan?

⁵ Ehu ahnsowo, Sises ketin karasahda dahme emen anahne wia pwehn wiahla sapwellime tohnpadahk. E mahsanih duwen emen me men wiahda imwen doulik ehu oh duwen nanmwarki men me men kohla mahwen. Sises mahsanih me sounwiahda ihmwo anahne “mwohndi mahs oh kapatahda uwen pweine” pwehn kanekehla imwen douliko oh me nanmwarkio anahne “mwohndi mahs oh ale kaweid” pwehn kilang ma nah sounpei ko kak kanekehla dahme re koasoanehdi en wia. (Wadek Luk 14:27-33.) Pil duwehte, Sises mwahngih me aramas emen me men wiahla sapwellime tohnpadahk anahne tehk kanahieng dahme e anahne wia pwehn idawehn ih. Ong kahrepe wet, kitail anahne  kangoange neitail tohnsukuhl en Paipel kan en onop rehtail nan wihk koaros. Ia duwen atail kak wia met?

6. Dahme kitail ele kak wia pwe tohnsukuhl kan en kekeirda?

⁶ Tepikihda sang ni omw kareireila onop en Paipel kan me kin wiawi ni wenihmw en tohnihmw kan. Ele ni ahnsou me ke mwemweitla, ke kak koasoia iren Paipel riau ahpw kaidehn ehute. Ni ahnsou me tohnihmwo soanamwahuki omw kin mwemweitla ni ahnsou werei, peki reh ma mie wasa me kumwa kak mwohdpene oh pousehla amwa koasoi. En tohnihmwo pasapeng pahn kasalehda ia uwen eh kesempwalki onop en Paipel. Kedekedeo, pwehn sewese ih en mwadang esehla, ele ke pil kak idek rehn tohnsukuhlo ma e pahn men onop Paipel pak riau nan wihk ehu. Ahpw miehte soahng kei me ke anahne wia likin onop pak ehu de riau ehuehu wihk.

7. Ia duwen sounpadahk men eh kak kaunopada mwahu ong ehuehu onop en Paipel?

⁷ Nin duwen sounpadahk men, ke anahne kaunopada mwahu ong ehuehu onop en Paipel. Ke kak tepikihda sang ni omw wadek dahme kumwa pahn onopki oh pil kilang iren Paipel kan. Medemedewe mwahu ire kesempwal kan. Medewe duwen oaralap en iren mehn kasukuhlo, sawaspen oaralap kan, peidek kan, iren Paipel kan me nda “wadek,” kilel kan, oh kisin kasdo kan me kak sewese kawehwehda ireo. Mwuhr, medewe duwen noumw tohnsukuhlo oh ia duwen omw pahn kawehwehda ire ko ni ahl me mengei oh sansal pwe en mengei ong noumw tohnsukuhlo en kak wehwehki oh doadoahngki.—Neh. 8:8; Lep. Pad. 15:28a.

8. Dahme wahnpoaron Pohl koasoia nan Kolose 1:9, 10 me padahkihong kitail duwen en kapakapki neitail tohnsukuhl en Paipel kan?

⁸ Pwehn wia kisehn omw kaunopada, kapakapkihong Siohwa duwen tohnsukuhlo oh eh anahn kan. Peki rehn Siohwa en ketin seweseiuk padahk sang nan Paipel ni ahl ehu me pahn sair mohngiong en tohnsukuhlo. (Wadek Kolose 1:9, 10.) Song en kasawihada ma mie mehkot me tohnsukuhlo kin apwalki wehwehki de pwungki. Tamataman me omw mehn akadei iei en sewese ih kekeirda oh papidaisla.

9. Ia duwen sounpadahko eh kak sewese tohnsukuhlo en kaunopada ong eh onop en Paipel? Menlau kawehwehda.

⁹ Se koapworopworki me sang omw kaukaule wia onop en Paipel, met pahn sewese tohnsukuhlo en kalahnganki soahng koaros me Siohwa oh Sises ketin wiahda oh e pahn men kalaudehla eh onop. (Mad. 5:3, 6) Pwehn paiekihda  laud eh onop en Paipel, tohnsukuhlo anahne uhdahn nsenohki dahme e sukusukuhlki. Pwehn sewese ih en wia met, kawehwehiong ia uwen kesempwal me en kaunopada ong ehuehu onop en Paipel sang ni eh wadekala mwowe iren mehn kasukuhlo oh medemedewe ia duwen eh kak doadoahngki dahme e kin sukuhlki. Ia duwen sounpadahko eh kak sewese? Iang tohnsukuhlo kaunopada ehu iren mehn kasukuhl pwehn kasalehiong ih ia duwen met pahn wiawi. * Kawehwehiong ih ia duwen eh pahn diarada pasapengpen peidek kan en onopo, oh kasalehiong ih me en lainihalahte lepin lokaia kesempwal kan pahn sewese ih en tamataman pasapengo. Mwuhr, peki en sapeng peidek kan ni pein eh lokaia. Ni eh wia met, ke pahn kak ese uwen laud en eh wehwehkihla dahme kumwa onopki. Ahpw pil miehte mehkot me ke kak kangoangehki noumw tohnsukuhlo en wia.

10. Dahme kahrehda e kesempwal en wadek Paipel rahn koaros, oh dahme tohnsukuhl men anahne wia pwehn uhdahn paiekihda eh wadawad en Paipel?

¹⁰ Tohnsukuhlo pahn paiekihda eh pahn pein wia soahng kei ehuehu rahn likin eh kin onop Paipel wihk koaros rehn sounpadahko. E kesempwal ong ih en rong oh kapakap ong Siohwa. E kak rong Koht sang ni eh kin wadek Paipel rahn koaros. (Sos. 1:8; Mel. 1:1-3) Kasalehiong ia duwen eh kak doadoahngki de print nah copy en “Koasoandi ong Wadawad en Paipel” me mi nan jw.org. * Ei mehlel, pwehn sewese ih en uhdahn paiekihda eh wadawad en Paipel, kangoange ih en doudouloale dahme Paipel padahkihong ih duwen Siohwa oh ia duwen eh kak doadoahngki dahme e sukuhlki nan eh mour.​—Wiewia 17:11; Seims 1:25.

11. Ia duwen tohnsukuhl men eh kak sukuhlki en kapakap ni ahl me konehng, oh dahme kahrehda e kesempwal ong ih en kalapw kapakap ong Siohwa?

¹¹ Kangoange noumw tohnsukuhlo en koasoiong Siohwa sang ni eh kin kapakap rahn koaros. Kapakap sang omw mohngiong ni tepin oh imwin ehuehu onop en Paipel, oh kapakapki noumw tohnsukuhlo. Ni eh rong omw kapakap kan, e pahn sukuhlki ia duwen eh pahn kapakap sang eh mohngiong oh en kapakap ong Siohwa Koht ni mwaren Sises Krais. (Mad. 6:9; Sohn 15:16) Medewehla ia duwen wadawad en Paipel rahn koaros (rong Siohwa) oh kapakap (koasoiong Siohwa) eh pahn sewese noumw tohnsukuhlo en uhdahn karanihala Koht! (Seims 4:8) Ma e wia mepwukat rahn koaros, met pahn  sewese ih en kekeirda oh inoukihong Siohwa eh mour oh papidaisla. Ahpw dahme pil pahn sewese ih?

12. Ia duwen sounpadahk men eh kak sewese tohnsukuhl men en kakairada eh nanpwungmwahu rehn Siohwa?

¹² Kitail men neitail tohnsukuhl kan en sukuhlki duwen Siohwa. Ahpw dahme e sukuhlki pil anahne sair eh mohngiong pwe en kak men doadoahngki dahme e sukuhlki. Sises ketin padahkihong aramas akan soahng tohto oh re perenki sukuhl sang reh. Ahpw aramas akan pil kin idawehn ih pwehki sapwellime padahk kan kin sair arail mohngiong. (Luk 24:15, 27, 32) Noumw tohnsukuhlo anahne wehwehki me Siohwa kak ketin wiahla Emen me e kak kakairada nanpwungmwahu reh, oh wiahki Seme, eh Koht, oh Kompoakepah. (Mel. 25:4, 5) Erein omw kin wia onop en Paipel, sewese noumw tohnsukuhlo en tehk mwahu duwen sapwellimen Koht irair kaselel kan. (Eks. 34:5, 6; 1 Pit. 5:6, 7) Wia met ong oaralap koaros me kumwa koasoia. Sewese ih en wehwehkihla sapwellimen Siohwa irair kaselel kan—limpoak, kadek, oh poakehla aramas. Sises mahsanih me en “poakohng Siohwa omw Koht” iei me “keieu kesempwal oh ih keieun kehkehlik.” (Mad. 22:37, 38) Sewese tohnsukuhlo en poakohng Siohwa sang eh mohngiong.

13. Menlau kihda ehu karasaras duwen omw pahn sewese tohnsukuhl men en sukuhlki duwen sapwellimen Siohwa irair kaselel kan.

¹³ Ni omw kin koasoakoasoiong noumw tohnsukuhlo, kawehwehiong ih dahme kahrehda ke poakohng Siohwa. Met pahn sewese ih en pohnese me e anahne wiahla kompoakepahn Siohwa oh sukuhlki en poakohng ih. (Mel. 73:28) Karasepe, mie sendens ehu nan pwuhko me kumwa onopki de iren Paipel ehu me kasalehda sapwellimen Siohwa irair en limpoak, erpit, pwung pahrek, de manaman me sair omw mohngiong? Koasoiaiong noumw tohnsukuhlo duwen met, oh padahkihong me met wia ehu nanpwungen kahrepe tohto me ke kin poakohngki Samatailo nanleng. Pil mie mehkot me tohnsukuhl en Paipel koaros anahne wia pwehn kekeirda oh papidaisla.

14. Dahme Ipru 10:24, 25 padahkihong kitail duwen mihting kan en mwomwohdiso me kak sewese tohnsukuhl en Paipel men en kekeirda?

¹⁴ Kitail koaros kin men neitail tohnsukuhl kan en kekeirda oh papidaisla. Ehu ahl kesempwal me kitail kak sewese irail iei sang ni atail pahn kangoange irail en iang mihting kan en mwomwohdiso. Sounpadahk kan me koahieklahr  nda me tohnsukuhl kan me mwadang en tepida iang mihting kin mwadang en kekeirda. (Mel. 111:1) Ekei sounpadahk kan kawehwehiong neirail tohnsukuhl kan me irail pahn sukuhlki soahng tohto nan mihting kan me re sohte pahn sukuhlki nan arail onop en Paipel. Wadek Ipru 10:24, 25 ong noumw tohnsukuhlo, oh kawehwehiong kamwahupe kan me e pahn alehdi ma e kohla iang mihting. Kasalehiong ih kisin kasdou Dahme Kin Wiawi nan Atail Wasahn Kaudok? * Sewese noumw tohnsukuhlo en koasoanehdi teng en dehr katihasang mihting kan.

15. Dahme kitail kak wia pwehn kangoange tohnsukuhl men en kaukaule iang mihting kan?

¹⁵ Dahme ke kak wia ma noumw tohnsukuhlo saikinte iang mihting de kin iangete ekei pak? Kasalehda ni peren soahng ehu me ke sukuhlki nan mihting me ke ahpwtehn iango. Ni eh kilang omw kin perenki mihting kan, ele e pahn men kohdo iang. Kihong nah Kahn Iroir de Doaropwehn Kasukuhl ong Mihting en Mour oh Kalohk me mwomwohdiso kin doadoahngki nan wihko. Kasalehiong ih dahme mwomwohdiso pahn koasoiapene ni mihting en mwurin mwo, oh idek reh pali dahieu me e keieu men esehla. Dahme noumw tohnsukuhlo kilang oh rong ni keieun eh iang mihting pahn uhdahn mwahusang dahme e kin rong sang pelien lamalam teikan. (1 Kor. 14:24, 25) E pahn tuhwong meteikan me ahneki mehn kahlemeng mwahu kan me e kak alasang oh me pahn sewese ih en kekeirda oh papidaisla.

16. Dahme ke anahne wia pwehn wia onop en Paipel me kak sewese emen en papidaisla, oh dahme kitail pahn sukuhlki nan iren onop en mwuhr?

¹⁶ Ia duwen atail kak wia onop en Paipel kan me kak sewese emen en papidaisla? Kitail kak sewese emenemen tohnsukuhl en kilang uwen kesempwal en onopki Paipel sang ni atail kangoange ih en onop wihk koaros oh kaunopada ong ehuehu onop ko. Kitail pil men kangoange ih en kapakap ong Siohwa oh pil rong Ih rahn koaros oh kakairada pein eh nanpwungmwahu reh. Kitail men kamwakid tohnsukuhlo en iang mihting kan en mwomwohdiso. (Menlau kilang koakon me mi pali 12, “ Dahme Tohnsukuhl kan Anahne Wia Pwehn Kekeirda oh Papidaisla.”) Ahpw, iren onop en mwuhr pahn kawehwehda soahng limau me sounpadahk kan pil kak wia pwehn sewese tohnsukuhl kan en papidaisla.