Aramas Mwahu Koaros Kin Kohdahla Nanleng?

PWOHNG me manda Sises ketin kamakamala oh mwurin kaimwiseklahn sapwellime konot rehn wahnpoaron ko, Sises ahpw ketin inoukihong irail me re pahn ale keting en mi nanleng. E mahsanih: “Pere tohto mie nan tehnpesen Semei; ma sohte, I sohte pahn ndaiong kumwail me I pahn kohla oh kaunopadahng kumwail deumwail.” (Sohn 14:2) Dahme kahrehda Sises pahn ketin kaunopada dewerail nanleng? Dahme irail pahn wia wasao?

Sises kin ketin medemedewe duwen pwais tohrohr ehu ong sapwellime tohnpadahk ko. Ni soutikohte e pil mahsanih: “Kumwail kin mihmihte rehi ahnsou koaros nan ei apwal akan; oh nin duwen Semei eh ketikihongieier manaman en kaunda wasa, I pil pahn kihong kumwail soangen manamanohte.” (Luk 22:28, 29) Koht ketin inoukihong Sises me ih me pahn ketin wia Nanmwarki me pahn kaitarala ehu anahn en aramas me keieu laud iei ehu koperment me mwahu. Sises pahn ketin kapitala aramas sang lokolok oh kauwehla irail kan me kin pitipitih aramas. Sises pahn ketin kaunda sang nanleng ahpw sapwellime kaunda pahn lellahng “irepen sampah.”​—Melkahka 72:4, 8; Daniel 7:13, 14.

Eri ahpw Sises sohte pahn ketin kelehpw kakaun. Ihme kahrehda, e ketin inoukihong sapwellime wahnpoaron ko dewerail nanleng. Iei irail me tepin pilipilda pwehn iang kaunda sampah nin duwen nanmwarki kei.—Kaudiahl 3:21.

Meh depe pahn kohdahla nanleng? E pil duwehte koperment teikan, irail me pahn iang kakaun nan Wehin Koht nanleng malaulau sang irail kan me pahn mi pahn eh kaunda. Ong irail kan me pahn iang ih kakaun, Sises mahsanih: “Kumwail kisin pwihn sihpw, kumwail dehr perki mehkot. Pwe Samamwail kupwurperenkidahr en ketikihong kumwail sapwellime wehi.” (Luk 12:32) “Kisin pwihn” wet pahn lel me 144,000. (Kaudiahl 14:1) Irail pwukat malaulau sang irail me rar kei me pahn mour kohkohlahte nin sampah nin duwen towe lelepek kei en Wehio.​—Kaudiahl 21:4.

Eri, kaidehn aramas mwahu koaros pahn kohdahla nanleng. Me pid Nanmwarki mwahu Depit, wahnpoaron Piter mahsanih: “Depit sohte kohdahla nanleng.” (Wiewia 2:34) Sohn Sounpapidais wia ohl mwahu men. Ahpw Sises mahsanih me e sohte pahn iang kakaun nin duwen nanmwarki men nanleng. Sises mahsanih: “Sohte aramas emen nin sampah mie me lapalapasang Sohn Sounpapidais. Ahpw me keieu tikitik nan Wehin Koht, lapalapasang ih.”​—Madiu 11:11.

Ke Pahn Ale Ketingpen Aramas Mwahu kan?

Dahme aramas emen anahne wia pwehn ale keting en mour soutuk nin sampah? Sises mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Tehk me sapwellimen Koht limpoak ong aramas kin kamwakid ih en ketikihong koaros koapworopwor en mour soutuk ahpw ihte irail kan me “kin pwosonla” me pahn alehdi keting wet.

Pwoson anahne poahsoankihda padahk mehlel. (Sohn 17:3) Ke kak kasalehda me kowe aramas mwahu men sang ni omw kin sukuhlki duwen kupwuren Siohwa ong aramas akan. Pwoson oh mwekidki dahme ke sukuhlki oh tamataman me uhdahn mie omw koapworopwor en mour soutuk.

 [Koakon nan pali 7]

Dahme Paipel Mahsanih?

Peidek:

Dahme kin wiawihong aramas akan ni arail kin mehla?

Pasapeng:

“Me melahr akan sohte ese mehkot.”​—EKLESIASDES 9:5.

Peidek:

Ia koapworopwor ong aramas mwahu kan ong ahnsou kohkohdo?

Pasapeng:

“Ahnsou ehu pahn kohdo me irail koaros me mihmi nan sousou kan pahn rong kapitie [en Sises], oh re pahn pedoisang nan arail sousou kan.”​—SOHN 5:28, 29.

Peidek:

Ia wasa pali laud en aramas mwahu kan pahn kousoan ie?

Pasapeng:

“Me pwung kan pahn koukousoan nan sahpwo [“sampah,” NW] oh re pahn sapwenikihla kohkohlahte.”​—MELKAHKA 37:29.