Dahme Sises Ketin Padahngki Duwen Pein Ih

“Sises sohte peikasalki ihs ih, ia wasa e ketsang ie, dahme kahrehda e ketidihdo nin sampah, oh dahme e pahn ketin wia ni ahnsou kohkohdo.”​—AUTHOR HERBERT LOCKYER.

MWOHN atail kak pwungki oh kamehlele dahme Sises kin ketin padahngki, kitail anahne ese soahng kan duwen ih. Ihs Sises? Ia wasa e ketsang ie? Ia kahrepen e ketin momour nin sampah? Nan pwuhken Rongamwahu kan, Madiu, Mark, Luk oh Sohn, kitail kak kilang pasapeng kan duwehte atail pahn rong sang rehn Sises.

E ketin ieias mwohn e ketin ipwidi nin sampah: Ehu ahnsowo, Sises mahsanih duwen lingan me e sapwellimanki “mwohn sampah wet eh saikinte kepikipikda.” (Sohn 17:5) Sampah wet mieier mwohn Adam eh miehla. Oh Adam momour mpen sounpar 4,000 mwohn Sises eh ketiket pohn sampah. Ahpw, Sises ketin ieias mwohn Koht ketin kapikada sampah. Ia wasa me Sises ketiket ie? E mahsanih: “I kohdihdo sang nanleng.”​—Sohn 6:38.

Sapwellimen Koht Ohlo: Siohwa sapwellimanki tohnleng tohto. Ahpw Sises weksang irail koaros. Sises mahsanih me ih iei “Sapwellimen Koht Iehros.” (Sohn 3:18) Lepin mahsen wet kin wehwehki me Sises kelehpw me Siohwa ketin pein kapikada. Ahpw Siohwa ketin doadoahngki sapwellime Iehroso en kapikada soahng teikan koaros.​—Kolose 1:16.

“Nein-Aramas”: Sises ketin doadoahngki lepin mahsen wet pak tohto sang meteikan ong pein ih. (Madiu 8:20) E ketin kasalehda me ih kaidehn tohnleng men me pwuhriong nan paliweren aramas. Ahpw ih uhdahn aramas emen. Koht ketin doadoahngki sapwellime manaman pwehn kasau mouren sapwellime Ohlo sang nanleng ong sampah, oh kahrehiong lih meipwon Mery en liseiankihda Sises. Met kahrehiong Sises en ketin ipwidi nin duwen aramas unsek oh sohte dipan.​—Madiu 1:18; Luk 1:35; Sohn 8:46.

Mesaia me inoupe mie: Lihen Sameria men patohwanohng Sises: “I ese me Mesaia . . . pahn ketido.” Sises eri mahsanih: “Iei ngehi ih, me koasoakoasoi ong uhk.” (Sohn 4:25, 26) Lepin mahsen pwukat “Mesaia” oh “Krais,” kin wehwehki “Me Keidi men.” Sises iei me keidi men me Koht ketin pilada pwehn kapwaiada pwukoa kesempwal ehu ong pweidahn sapwellime inou kan.

Kahrepe keieu kesempwal me e ketikihdo: Ehu ahnsowo Sises mahsanih: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.” (Luk 4:43) Mendahki e kin ketin wiahda soahng mwahu tohto ong aramas akan me kin anahne sawas, ahpw kalohki duwen Wehin Koht iei me e keieu kesempwalki nan sapwellime mour. Kitail pahn koasoia dahme e kin ketin padahngki me pid duwen Wehio mwuhr.

E sansal me Sises sohte duwehte aramas teikan. * Nin duwen me kitail pahn kilang mwuhr, mour me e sapwellimanki nanleng kin kalaudehla wehwehn sapwellime mahsen kan nin sampah. Eri kitail sohte anahne pwuriamweiki eh kin ketin kalohki mahsen kan me kin kamwakid laud mouren aramas rar kei nin sampah.

[Nting tikitik me mi pah]