Sises Krais​—Uwen Kehlail en Sapwellime Mahsen

“Mehn kadehde me keieu kehlail duwen ohl loalokong menet sang Kapernaum iei eh kin kamwakid mohngiong oh madamadau en aramas tohto leledo rahnwet.” *—AUTHOR GREGG EASTERBROOK.

MIE manaman en lokaia kan. En kanahieng oh pilada lepin lokaia kan kak kamwakid mohngiong en aramas, kihong irail koapworopwor, oh wekidala arail mour. Sohte emen me eh koasoi manaman duwehte sapwellimen Sises Krais mahsen kan. Emen me iang rong sapwellimen Sises Kapahrek en Pohn Dohl mwuhr ntingihdi: “Kedekedeo, Sises lao ketin kaimwisekala sapwellime mahsen pwukat, pokono ahpw pwuriamweikihla kowahlap duwen mwomwen eh kin ketikihwei sapwellime padahk.”—Madiu 7:28.

Leledo rahnwet, aramas tohto nin sampah pwon kin ese duwen sapwellimen Sises mahsen kan. Tehk ekei sapwellime mahsen kan me mie wehwe laud.

“Kumwail sohte kak papah Koht oh pil kepwehn sampah kan.”—Madiu 6:24.

“Kumwail wiahiong meteikan me kumwail kin anahne aramas akan en kin wiahiong kumwail.”—Madiu 7:12.

“Kumwail kihong Sihsar mehkan me en Sihsar, a ong Koht mehkan me sapwellimen Koht.”—Madiu 22:21.

“Kihwei kaperen sang ale.”—Wiewia 20:35.

Sises ketin wia laudsang ihte mahsanih mahsen kesempwal kan. Mahsen kan me e ketin padahngki me manaman pwehki e kin kasalehda dahme mehlel duwen Koht, padahkihong aramas akan ia duwen arail kak diarada ia uhdahn kahrepen arail mour oh kasalehda me Wehin Koht pahn kamwahwihala kahpwal kan koaros en aramas. Ni atail pahn kasawih mahsen pwukat nan pali kan en mwuri, kitail pahn diarada dahme kahrehda Sises kin ketin kamwakid “mohngiong oh madamadau en aramas tohto” leledo rahnwet.

[Nting tikitik me mi pah]