Diar Epwel Mwahu Rehn Sapwellimen Koht Aramas akan

“I ahpw pahn kapingkalahngan ong komwi mwohn pokon en sapwellimomwi aramas akan.”​—MEL. 35:18.

1-3. (a) Dahme ele kin kahrehiong en ekei Kristian akan arail nanpwungmwahu rehn Siohwa en mihla nan keper? (b) Ia wasa sapwellimen Koht aramas akan kak diar pereparail ie?

 NAN ehu ahnsou me Joe oh eh pwoud wie kommoal sang doadoahk, ira kohla pampap oh duhseli ni mad ieu me diren mwahmw ni soangsoangen poh oh sais tohto. Ira eri papalla ekis doh pwe ira en kilang keilen mado. Ni ara lel wasa me mado tepida loalla, en Joe pwoudo nda, “I leme kita nohk dohla.” A Joe nda, “Meleilei, I ese dahme I wiewia.” Joe tamanda me mwurinte mwo, e kin medemedewe, ‘Ia wasa mwahmw ko kohla ie?’ E esehda kahrepeo oh masepwehkada. Pako men wie pampap inendohngete ih sang nan wasa loalo. Sohte mehkot me kak perehsang ih pakou. Mpen piht siluh sang Joe, pakou wetsang oh kohkohla.

² Kristian emen kak kedirepwkihla mehn kamweit kan, doadoahk, oh kepwe kan nan koasoandi en Sehdan oh sohla tehk me e kohkohlahng wasa keper ehu. Joe, me wia elder men, nda, “Dahme I lelohng kahrehiong ien medemedewe duwen ihs me I kin werekiong. Pap wasa me kansenamwahu oh sohte keper, me iei nan mwomwohdiso!” Dehr mweidohng kedirepw en sampah en kahrehiong kitail en katohre kitailsang mwomwohdiso, met pahn imwila suwed. Ma kitail esehda me kitail milahr nan soangen irair wet, kitail anahne mwadang koasoanehdi kitail en pwurehng werekiong mwomwohdiso. Pwe ma soh, omw nanpwungmwahu rehn Siohwa pahn mihla nan keper.

³ Rahnwet, sampah wia wasa keper ehu ong Kristian kan. (2 Tim. 3:1-5) Sehdan ese me eh ahnsou mwotomwotalahr oh e kin nantihong kadallehla irail kan me sohte kin mwasamwasahn. (1 Pit. 5:8; Kaud. 12:12, 17) Ahpw mie perepatail. Siohwa ketikihong kitail mwomwohdisohn Kristian me kak sewese kitail en pere kitail oh pil atail nanpwungmwahu reh.

4, 5. Ia pepehm en aramas tohto ong ahnsou kohkohdo? Dahme kahrehda?

⁴ Koasoandi en aramas kin ekiste kihda epwel mwahu me pid paliwar oh pepehm en aramas. Aramas tohto kin pehm me epwelpen paliwararail kin mihla nan keper pwehki tiahk en kauwehla kosonned, tiahk lemei, pweilaudlahn kepwe, oh pil saminlahn arail wasahn kousoan. Koaros kin lelohng kahpwal en mahla oh soumwahu. Irail kan me mie arail doadoahk, imwarail, neirail mwohni, oh roson mwahu ele kin medemedewe ia uwen werei re pahn ahneki mepwukat.

⁵ Me tohto pil sohte kak ale epwel mwahu me pid arail pepehm kan. E kansensuwed me aramas tohto me koapworopworki ren diar meleilei oh nsenamwahu nan mouren pwopwoud oh pil peneinei kin diarada me dahme re kasik sohte kin pweida. Me pid arail nanpwungmwahu rehn Koht, me tohto me kin kohla sarawi kin pingida oh kin peidengki katapanpen kaweid kan me re ale. Re kin ahneki pepehm wet ni ar medewehla tiahk suwed oh padahk kan me sohte kin poahsoanda sang Paipel me arail kaunen pelian lamalam kan kin wia. Eri, aramas tohto pehm me ihte me ren wia iei en koapworopworki pelien sains de kadek oh wiewia mwahu en meteikan. E sohte kapwuriamwei me aramas akan kin pehm me uhdahn solahr arail koapworopwor de re kin pilada ren dehr nohk medewe laud duwen ahnsou kohkohdo.

6, 7. (a) Dahme kasalehda me mie wekpeseng nanpwungen irail kan me kin papah Koht oh irail me sohte kin? (b) Dahme kitail pahn tehkpene?

 ⁶ Ia uwen wekpeseng en madamadau en irail kan me kisehn mwomwohdisohn Kristian oh irail kan me kaidehn kisehn mwomwohdisohn Kristian! Mendahki ma kitail, me wia sapwellimen Siohwa aramas akan, kin lelohng soangen kahpwal pwukat me mehn mpatail kan kin lelohng, atail mwekidki mepwukat kin weksang irail. (Wadek Aiseia 65:13, 14; Malakai 3:18.) Dahme kahrehda? Pwehki kitail kin diar pasapeng mwahu kan sang Paipel ong soangen irair me aramas akan kin mi loale, oh met kin sewese kitail en apwalihala kahpwal kan nan atail mour. Met imwikihla atail sohte kin nohn pwunodki duwen ahnsou kohkohdo. En wia sapwellimen Siohwa tohnkaudok kan kin pere kitailsang padahk oh madamadau likamw akan me sohte poahsoanda sang Paipel, tiahk samin kan oh imwilahn soahng pwukat. Eri, tohn mwomwohdiso kan en Kristian kin ahneki popohl me meteikan sohte kin ese duwe.​—Ais. 48:17, 18; Pil. 4:6, 7.

⁷ Ekei mehn kahlemeng kan ele kak sewese kitail en medemedewe duwen epwel mwahu me irail kan me kin papah Siohwa kin ahneki. Met kin weksang ahn irail kan me sohte kin papah ih. Mehn kahlemeng pwukat ele kin kamwakid kitail en kasawih atail madamadau oh wiewia kan oh tehk ma kitail en doadoahngki mwahu sapwellimen Koht kaweid kan me kin wiawihda pwehn pere kitail.​—Ais. 30:21.

“Kereniongehr Ei Koapworopwor Pahn Sohla”

8. Dahme sapwellimen Siohwa ladu kan kin wia ahnsou koaros sangete mahs?

⁸ Sangete mahs, irail akan me pilada ren papah oh peikiong Siohwa kin nantihong ren dehr werekiong irail akan me sohte kin. Ni mehlel, Siohwa ketin kasalehda me sapwellime tohnkaudok kan oh irail me kin idawehn Sehdan pahn kin imwintihtipene. (Sen. 3:15) Pwehki sapwellimen Koht aramas akan kin tengediong kapwaiada sapwellime kaweid kan, irail kin weksang meteikan. (Sohn 17:15, 16; 1 Sohn 2:15-17) E sohte kin mengei en wia met. Ni mehlel, ekei nanpwungen sapwellimen  Siohwa ladu kan kin ekei pak peidengki ma e wia elen erpit en pilada mour en tounmetei.

9. Menlau kawehwehda kahpwal me sounnting en Melkahka 73 ahneki.

⁹ Emen sapwellimen Siohwa ladu kan me tepida peidengki ma e wiahda pilipil pwung iei sounnting en Melkahka 73. Mwein ih emen kadaudok en Asap. Sounmelkahkao kin peidengki dahme kahrehda irail me suwed kan kin mwomwen me re pweida, peren oh kepwehpwe, a irail me kin nantihong papah Koht kin lelohng kahpwal kan.​—Wadek Melkahka 73:1-13.

10. Dahme kahrehda ire kan me sounmelkahkao kihda kin kesempwal ong uhk?

¹⁰ Mie pak ke kin tepida idek peidek kan me duwehte me sounnting en melkahkao kilelehdi? Ma ei, ke sohte anahne nohn pwunodki me ke dipada de medewe me sohla omw pwoson. Ni mehlel, ekei sapwellimen Siohwa ladu kan iangahki ekei me Siohwa ketin doadoahngki en ntingihedi Paipel kin ahneki madamadau pwukat. (Sohp 21:7-13; Mel. 37:1; Ser. 12:1; Apak. 1:1-4, 13) Ei, koaros me kin inengieng papah Siohwa anahne medemedewe mwahu oh kamehlele pasapengpen peidek wet: Ia duwe, papah oh peikiong Koht iei me keieu mwahu? Met kin pidada peidek kesempwalo me Sehdan kihda nan mwetuwel en Ihden me pid duwen ihs me sapwellimanki pwuhng en kaunda mehkoaros nanleng oh sampah. (Sen. 3:4, 5) Eri, e mwahu kitail koaros en medemedewe ire me sounmelkahkao kihda. Ia duwe, kitail en peirinki irail me suwed oh suwei kan me mwomwen sohte kahpwal nan arail mour? Kitail en ‘sohla koapworopworki’ Siohwa oh alasang irail? Ih met me Sehdan men kitail en wia.

11, 12. (a) Ia duwen sounmelkahkao eh powehdi eh peikasal? Dahme met padahkihong kitail? (b) Dahme seweseiuk en ahneki madamadau me duwehte en sounmelkahkao?

¹¹ Dahme sewese sounmelkahkao en powehdi dahme e kin peikasalki? Mendahki e wehkada me e kereniong sohpeisang me pwung, eh madamadau wekila ni ahnsou me e pidelong nan ‘Tehnpas’ en Koht, iei ahnsou me e werekiong meteikan me kin mwohneki mahs arail kaudok nan tehnpaso, oh pil ni eh medemedewe kupwuren Koht. Eri e sansal ong sounmelkahkao me e sohte men imwila duwehte me suwed kan. E kak kilang me arail mwekid oh pilipil kan nan arail mour kin kahrehiong irail en mi pohn “wasa likekiris kei.” Sounmelkahkao wehwehki me irail koaros me kin sohpeisang Siohwa pwehki arail tiahk suwed kan pahn uhdahn “mwadangete mwomwla,” ahpw Siohwa pahn ketin apwalih irail kan me kin papah ih. (Wadek Melkahka 73:16-19, 27, 28.) Ke kak kilang mehlelpen met. Aramas tohto ele perenki mourki pein nsenarail oh sohte kin nsenohki sapwellimen Koht kosonned kan, ahpw met pahn uhdahn imwila suwed.​—Kal. 6:7-9.

¹² Dahme kitail pil sukuhlki sang sounmelkahka menet? E kin diar epwel mwahu oh erpit nanpwungen sapwellimen Koht aramas akan. E tapiada medemedewe mwahu ni eh kohla wasahn kaudok ong Siohwa. Duwehte rahnwet, kitail kak diarada sounkaweid erpit kan oh kin paiekihda padahk kan sang nan Paipel me pid duwen Koht me kin wiawi nan mihting en mwomwohdiso kan. Eri, kahrepe mwahu Siohwa en ketin padahkihong sapwellime ladu kan en towehda mihting en Kristian kan. Ih wasao me re pahn ale kangoang en sawaspene pwe ren kasalehda wiewia mwahu kan.​—Ais. 32:1, 2; Ipru 10:24, 25.

Pilada Werek Mwahu

13-15. (a) Dahme wiawihong Daina kin karasahda dahieu? (b) Dahme kahrehda werekiong iengomw Kristian akan kin pere iuk?

¹³ Karasaras en nein Seikop serepein Daina kasalehda duwen emen me lelohng kahpwal pwehki eh werekiong irail me sohte kin kaudokiong Koht. Pwuhken Senesis padahkihong kitail me Daina kin kalapw werekiong serepein kan en Kenan, wasa me eh peneinei kin kousoan ie. Mehn Kenan kan sohte kin ahneki tiahk min duwehte sapwellimen Siohwa tohnkaudok kan. Dahme irail me sukuhliki dipwisou en mahs ko diarada sang sapwen mehn Kenan kin kasalehda me wasao kin direkihla kaudok en dikedik en eni, tiahk suwed, kaudok me kin  pidada nenek oh tiahk lemei. (Eks. 23:23; Lip. 18:2-25; Deud. 18:9-12) Ke tamanda dahme lelohng Daina ni eh kin werekiong soangen aramas pwukat?

¹⁴ Aramas akan koasoiahki Sekem, me ih mwahnakapw men wasao “me keieu wahu nan eh peneinei.” E kilangete Daina “oh mwahukihda, e ahpw angkehlailiong.” (Sen. 34:1, 2, 19) Ia uwen kansensuwed! Ke leme me mie pak Daina medewe me e pahn kak lelohng soangen kahpwalo? Ele e kin ihte men kompoakepahnki me pwulopwul kan wasao, me e sohte leme pahn keper ong ih. Ahpw, met uhdahn pitihdi Daina.

¹⁵ Dahme met padahkihong kitail? Kitail sohte kak kasik me sohte kahpwal pahn lelohng kitail ma kitail werekiong irail me sohte iang padahk mehlel. Paipel mahsanih me “werekiong aramas suwed kan e kin kauwehla tiahk mwahu.” (1 Kor. 15:33) Ni pali teio, en werekiong aramas akan me kin iang uhk kamehlele padahk mehlel, tiahk min oh limpoak ong Siohwa iei perepomw. Soangen werek mwahu wet pahn kangoange iuk ken mwekid ni loalokong.​—Lep. Pad. 13:20.

“Kumwail Mwakelekelsangehr Dihp”

16. Dahme wahnpoaron Pohl koasoiahki duwen ekei nan mwomwohdisohn Korint?

¹⁶ Mwomwohdisohn Kristian kin sewesehda me tohto ren kamwakelehda irail sang arail wiewia samin kan. Ni wahnpoaron Pohl eh ntingihedi keieun nah kisinlikou ong mwomwohdiso nan Korint, e koasoia wekidekla kan me Kristian akan wasao anahne wia pwe ren mourki mour me pahrekiong sapwellimen Koht koasoandi kan. Ekei irail kin nenek, pwongih dikedik en eni kan, kamwahl, ohl mwahuki ohl de lih mwahuki lih, lipirap, kamamsakau ape. Pohl padahkihong irail: “Ahpw met kumwail mwakelekelsangehr dihp.”​—Wadek 1 Korint 6:9-11.

17. Ia duwen mourki koasoandi kan en Paipel eh kin wekidala mour en me tohto?

¹⁷ Aramas akan me sohte ahneki pwoson sohte kin ale kaweid mwahu. Re kin pein koasoanehdi ar mour de re kakete iang soangen mour samin me meteikan kin wia, duwehte dahme ekei irail mehn Korint kan wia mwohn arail wiahla Kristian. (Ep. 4:14) Ahpw loalokong pwung duwen Mahsen en Koht oh kupwure kan ahneki manaman en wekidala mour en irail akan me kin pwoson oh kapwaiada kaweid en Paipel kan. (Kol. 3:5-10; Ipru 4:12) Rahnwet, tohto tohnmwomwohdiso en Kristian kak padahkihong uhk me mwohn arail esehla oh kapwaiada sapwellimen Siohwa koasoandi pwung kan, re kin ahneki mour saledek oh wia dahme re men wia. Ahpw re sohte kin nsenamwahu oh peren. Re diarada popohl ihte ni ahnsou me re tepida werekiong sapwellimen Koht aramas akan oh mourki mour me pahrekiong kaweid kan en Paipel.

18. Dahme me pwulopwul men lelohng? Dahme met kadehdehda?

¹⁸ Weksang met, ekei irail me mahs pilada en kohkohlahsang mwomwohdiso en Kristian, ‘wasa me sohte keper,’ met re uhdahn koluhkihla arail pilipil. Emen sister Tanya, * kawehwehda me e “tikida rehn irail kan nan padahk mehlel,” ahpw ni eh sounpar 16, e kohkohlahsang mwomwohdiso pwehn “rapahki mehkan en sampah me e men wia.” Ekei soahng kan me imwikihla eh wia met iei liseian oh kaiohla. Met e nda: “Sounpar siluh me I kohkohlahsang mwomwohdiso kin kahrehiong ei ahnekihda soangen pwunod kei me I sohte kak manokehla. Mehkot me I sohte kak manokehla iei me I kemehla nei serio. . . . I men ndaiong me pwulopwul kan koaros me men ‘song’ sampah mehnda ma erein ahnsou kiste: ‘Kumwail  dehr!’ E kakete kaperen ni tapio, ahpw e pahn imwihla suwed. Sampah kin ihte kihong uhk kansensuwed. I ese pwe I songehr. Mihmihte nan sapwellimen Siohwa pwihn! Met ihte ahl en mour me kin wahdo peren.”

19, 20. Perepe dahieu me mwomwohdiso en Kristian kin kihda? Ia duwen?

¹⁹ Nna medewehla dahme pahn wiawihong uhk ma ke kesehla perepomw nan mwomwohdiso en Kristian. Me tohto kin tamanda arail mour me soh katepe mwohn arail ale padahk mehlel, re ahpw sohte mwahn kin men medewe duwen met. (Sohn 6:68, 69) Omw werekiong riomw Kristian akan kak kahrehiong ken kak pousehlahte diar epwel mwahu oh pere iuk sang kahpwal oh kansensuwed me rek nan en Sehdan sampah. Omw werekiong irail oh kaukaule iang towehda mihting en mwomwohdiso kan pahn kaukaule katamankin uhk erpit en sapwellimen Siohwa koasoandi pwung kan oh pahn kangoange iuk ken mourki mepwukat. Ke kin ahneki kahrepe koaros en ‘kapingkalahngan ong Siohwa mwohn pokon en sapwellime aramas akan,’ duwehte me sounmelkahkao wia.​—Mel. 35:18.

²⁰ Mehlel, pwehki soangsoangen kahrepe kan, Kristian koaros kin lelohng ahnsou kan me kin mwomwen apwal ong irail en kolokol arail lelepek. Re mwein kin anahne emen en kasalehiong irail ahl pwung me re kak keid loale. Dahme kowe oh meteikan nan mwomwohdiso kak wia pwehn sewese iengomw me pwoson kan nan soangen ahnsowo? Nan iren onop en mwuhr, kitail pahn kasawih ia duwen omw kak “kakehlakahda” oh sewese riomw kan.​—1 Des. 5:11.

[Nting tikitik me mi pah]

Ia Duwen Omw Pahn Sapeng?

• Dahme kitail sukuhlki sang dahme lelohng sounnting en Melkahka 73?

• Dahme kitail sukuhlki sang dahme wiawihong Daina?

• Dahme kahrehda ke kak diar epwel mwahu nan mwomwohdiso en Kristian?

[Peidek en Onop]

[Kilel kan nan pali 9]

Pampap wasa me sohte keper, mihmihte nan mwomwohdiso!