Miniminpene Kin Kasalehda Kaudok Mehlel

“I pahn kapokoneikumwailpene, rasehng pelin sihpw me pwurodohng nan kehl ehu.”​—MAIKA 2:12.

1. Ia duwen sapwellimen Koht erpit eh kin sansalda nan sapwellime kapikipikda kan?

 SOUNMELKAHKA men koasoia: “Maing KAUN, ia uwen tohtohn wiepen nin limomwi kan! Ia uwen omwi kupwurokong ni omwi ketin wiairailda! Sampah inenen direkihla wiepen nin limomwi kan.” (Mel. 104:24) Sapwellimen Koht erpit kin sansalda nan mouren soangsoangen tuhke kan, mahn tikitik oh laud kan oh mwahs kan me tohto nin sampah ni arail kin sawaspene ni ahl me kapwuriamwei. Oh pil paliweromw kin wiawihkihda soangsoangen kakon kan, uduk kan oh sahl kan sang me lapala lel tikitik, koaros kin doadoahkpene oh wiahda paliweromw en kin roson mwahu.

2. Nin duwen me sansalehr pali 16, dahme kahrehda miniminpene en Kristian kan kin mwomwen mehkot kapwuriamwei?

² Siohwa ketin kapikada aramas en sawaspene. Aramas kin ahneki soangsoangen mwohmw, irair kan, oh koahiek kan. Patehng met, e ketikihong tepin aramas akan irair kan me duwehte sapwellime me pahn kahrehiong ira en sawaspene. (Sen. 1:27; 2:18) Ahpw tohnsampah ahnsou wet kin dohsang Koht oh sohte kak miniminpene. (1 Sohn 5:19) Kahrehda, ni atail kin medewehla mwomwohdisohn Kristian ni mwehin wahnpoaron ko me wiawihkihda soangsoangen aramas duwehte lidu kan en mehn Episos, lih en Krihk ndand kan, mehn Suhs me ale sukuhl laud kan, oh irail kan me kin pwongih dikedik en eni kan mahs, arail miniminpene kin mwomwen manaman kapwuriamwei ehu.​—Wiewia 13:1; 17:4; 1 Des. 1:9; 1 Tim. 6:1.

3. Ia duwen Paipel eh kin kawehwehda miniminpene en Kristian kan? Dahme kitail pahn tehk nan iren onop wet?

³ Kaudok mehlel kin kahrehiong aramas akan en sawaspene duwehte kakon kan en paliwaratail. (Wadek 1 Korint 12:12, 13.) Kitail pahn tehk ekei ire kan nan iren onop wet: Ia duwen kaudok mehlel eh kin kaminiminpene aramas akan? Dahme kahrehda Siohwa kelehpw kin kak ketin kaminiminpene aramas rar kei me kin kohsang wehi koaros? Soangen kahpwal dah kan me Siohwa kin ketin sewese kitail en powehdi? Oh me pid duwen miniminpene, ia duwen Kristian mehlel kan ar kin weksang irail kan me dene irail Kristian kan?

Ia Duwen Kaudok Mehlel Eh Kaminiminpene Aramas akan?

4. Ia duwen kaudok mehlel eh kin kaminiminpene aramas akan?

⁴ Aramas me kin iang kaudok mehlel kin wehwehki oh pwungki me Siohwa sapwellimaniki pwuhng en kaunda lahng oh sampah pwehki ih me ketin kapikada mehkoaros. (Kaud. 4:11) Eri, mendahki Kristian mehlel kan kin kousoan nan wehi tohto oh tikida nan soangsoangen irair kan, irail koaros kin peikiong sapwellimen Koht kosonned kan oh mourki kaweid en Paipel kan. Tohnkaudok mehlel koaros kin likweriki Siohwa “Samat.” (Ais. 64:8; Mad. 6:9) Eri, irail wia pirien ehu oh kak ahneki miniminpene me sounmelkahkao kawehwehda: “Ia uwen lingan, ia uwen kansenamwahu en sapwellimen Koht aramas akan ar kin miniminpene!”​—Mel. 133:1.

5. Mehnia irair me kin sewese tohnkaudok mehlel kan en miniminpene?

⁵ Mendahki Kristian mehlel kan kin soh unsek, re kin miniminpene nan kaudok pwehki re kin sukuhlki en poakpene. Siohwa ketin padahkihong irail en poakpene ni ahl me sohte emen kak padahngki. (Wadek 1 Sohn 4:7, 8.) Paipel mahsanih: “Kumwail en limpoak ong me mi nan  apwal akan, kadek, mpahi oh karakarahk, aktikitik oh kanengamah. Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr. Eri, kumwail kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel.” (Kol. 3:12-14) Limpoak wet me kin kapatapene mehkoaros iei irair me kin keieu kadehdehda Kristian mehlel kan. Pein kowe sou kin kilang me miniminpene wet kin kasalehda kilel en tohnkaudok mehlel kan?​—Sohn 13:35.

6. Ia duwen koapworopwor en Wehio eh kin sewese kitail en miniminpene?

⁶ Tohnkaudok mehlel kan pil kin miniminpene pwehki re kin kilangwohng Wehin Koht me iei ihte koapworopwor ong aramas akan. Re ese me Wehin Koht pahn kereniong wiliandi koperment en aramas akan oh kapaiahki aramas peik kan popohl mehlel me poatopoat. (Ais. 11:4-9; Dan. 2:44) Eri, Kristian kan kin peikiong dahme Sises mahsanihki sapwellime tohnpadahk ko: “Duwehte ngehi me kaidehn kisehn sampah, pil ih duwen irail, kaidehn irail kisehn sampah.” (Sohn 17:16) Kristian mehlel kan kin soupoupali me pid en aramas en sampah ar kin uhpene nanpwungarail, ihme kahrehda re kak miniminpene mendahki mehn mparail kan kin mahwenpene.

Utupen Padahk Mehlel Mehteieu

7, 8. Ia duwen padahk en Paipel eh kin sewese atail miniminpene?

⁷ Kristian kan ni mwehin wahnpoaron ko kin miniminpene pwehki irail koaros kin ale kaweid sang wasa teieu. Re kin pohnese me Sises kin ketin doadoahngki pwihn ehu me wiawihkihda wahnpoaron ko oh ohl mah kan nan Serusalem pwe en padahki oh kaweid mwomwohdiso. Ohl poadidi pwukat kin wiahda arail pilipil me kin poahsoankihda Mahsen en Koht oh re kin kehsehkin irail sounapwalih kan me kin seiloakseli arail pilipil ong mwomwohdiso en sahpw tohto. Paipel mahsanih duwen ekei sounapwalih pwukat: “Ni arail kotekote kahnimw kan, irail ahpw koasoiaiong me pwoson akan duwen kosonned akan me koasoandier sang rehn wahnpoaron ako oh me mah kan nan Serusalem; oh re padahkihong irail re en kapwaiada kosonned pwukat.”​—Wiewia 15:6, 19-22; 16:4.

⁸ Duwehte rahnwet, Pwihn me kin apwalih mwomwohdiso nan sampah pwon me wiawihkihda Kristian keidi kan kin sewese miniminpene en mwomwohdiso kan nan sampah. Pwihno kin wiahda pwuhk en sawaspen Paipel kan ni lokaia tohto. Padahk kan kin poahsoankihda Mahsen en Koht. Eri dahme kitail kin sukuhlki kaidehn kohsang rehn aramas ahpw sang rehn Siohwa.​—Ais. 54:13.

9. Ia duwen doadoahk me Koht ketikihong kitail eh kin sewese kitail en miniminpene?

⁹ Kristian sounapwalih kan pil kin sewese miniminpene sang ni ar kin tiengla mwowe nan doadoahk en kalohk. Nanpwungmwahu rehn irail kan me kin doadoahkpene ni ar papah Koht kin kehlail sang nanpwungmwahu en meteikan en sampah me kin ihte werekpene. Mwomwohdiso en Kristian kin poahsoankihda kaidehn ihte en werekpene, ahpw en wauneki Siohwa oh kapwaiada doadoahk en kalohki rongamwahu,  katohnpadahk, oh kakehlaka mwomwohdiso. (Rom 1:11, 12; 1 Des. 5:11; Ipru 10:24, 25) Ihme kahrehda wahnpoaron Pohl kak koasoiahki Kristian kan: “Kumwail tengetengkipene kahrepeteieu, oh miniminkipene anahnteieu, ni amwail kin nantihong pwoson me konehng rongamwahwo.”​—Pil. 1:27.

10. Ia ekei ahl kan me kitail kin miniminpene nin duwen sapwellimen Koht aramas akan?

¹⁰ Nin duwen sapwellimen Siohwa aramas akan, kitail kin miniminpene pwehki kitail kin pwungki sapwellime pwuhng en kaunda, poakohng riatail kan, koapworopworki Wehin Koht, oh wauneki irail kan me Koht kin ketin doadoahngki en apwalih kitail. Siohwa ketin sewese kitail en powehdi soangen madamadau kan me kin kohsang atail soh unsek oh kakete kauwehla atail miniminpene.​—Rom 12:2.

Powehdi Pohnmwahso oh Peirin

11. Dahme kahrehda pohnmwahso kin katohrepeseng aramas? Ia duwen Siohwa eh kin ketin sewese kitail en powehdi met?

¹¹ Pohnmwahso kin katohrepeseng aramas. Aramas aklapalap men kin medewe me e siksang meteikan oh e kin perenki suwei. Ahpw met kin kalapw kasohwe kaminimin oh irail kan me kin rong eh suwei ele kin peirinkihda. Tohnpadahk Seims kin padahkihong kitail ni inen: “Aklapalap . . . me sapwung.” (Seims 4:16) E sohte wia elen limpoak en wiahki meteikan me re sohte kesempwal. Siohwa kin ketikihda mehn kahlemeng mwahu en aktikitik sang ni sapwellime wiewia kan ong aramas soh unsek kan duwehte kitail. Depit ntingihedi: “Omwi aktikitik me kahrehiong ie en lapalapala.” (2 Sam. 22:36, NW) Mahsen en Koht kin sewese kitail en powehdi pohnmwahso sang ni eh kin padahkihong kitail en medemedewe soahng kan ni ahl pwung. Pohl ntingihedi: “Ihs me wiahiong uhk ke en siksang meteikan? Sohte; pwe Koht me ketikihong uhk omw mehkoaros. Eri a, ia duwe, mehnda ke pahn suweiki mehkot, ni omw mehkoaros eh wia kisakis ehu sang rehn Koht?”​—1 Kor. 4:7.

12, 13. (a) Dahme kahrehda e mengei en kasalehda peirin? (b) Dahme pahn wiawi ma kitail ahneki sapwellimen Siohwa madamadau ong meteikan?

¹² Peirin iei ehu irair me kin kasohwe miniminpene. Pwehki kitail sohsohki dihp, kitail koaros kin kalapw peirin, oh Kristian kan me wereilahr ele ekei pak kin peirinki ahn meteikan arail kepwe kan, pwais kan, koahiek kan de pil soangen irair me re ahneki. (Ekl. 4:4) Karasepe, emen brother me pwopwoud oh naineki seri ele kin peirinki pwais kaselel kan me emen me kin doadoahngki pali laud en eh ahnsou ong doadoahk ong Siohwa kin ahneki, ahpw e sehse me brothero pil kakete peirinki eh naineki seri kan. Ia duwen atail kak irehdi peirin wet pwe atail miniminpene en dehr ohla?

¹³ Pwehn sewese kitail en soikala irair en peirin, tamanda me Paipel kin kapahrekihpene irail tohn mwomwohdiso keidi kan ong kakon kan en paliwar en aramas. (Wadek 1 Korint 12:14-18.) Karasepe, mesomw kan kin sansal ong aramas laudsang mohngiongomw, ahpw ira koaros kin kesempwal. Pil duwehte, Siohwa kin ketin kesempwalki tohn mwomwohdiso koaros mehnda ma ekei kin mwomwen siksang meteikan erein ahnsou ehu. Eri kitail en ahneki sapwellimen Siohwa madamadau wet ong riatail kan. Kitail dehr peirinki irail ahpw kitail kak kasalehda atail nsenohkin irail. Sang ni atail wia met, kitail kin sewese kasalehda wekpeseng en nanpwungen Kristian mehlel kan oh pelien lamalam en irail kan me dene irail Kristian.

Katohrohr Kin Sansal Rehn Kristian Likamw kan

14, 15. Ia duwen Kristian likamw akan ar kin tohrohrpeseng?

¹⁴ Miniminpene en Kristian mehlel kan kin weksang akamai me mi nanpwungen pelien lamalam kan en Kristian likamw. Mwohn pahr  300, padahk likamw en Kristian uhdahn rekla kahrehda kaunen Rom men kamehlelehla oh uhd doadoahngki. Met sewese kalaudehla kekeirdahn Kristian likamw kan. Mwuhr, wehi tohto eri katohreirailsang Rom oh uhd wiahda pein arail pelien sarawi nan arail wehi kan.

¹⁵ Tohto en wehi pwuko kin mahwenpene erein sounpar epwiki kei. Erein ahnsou sang pahr 1601 lel 1800, aramas akan en Britain, France oh Amerika kin kalaudehla arail kin poadidi ong arail wehi, eri madamadau en uhki wehi mwomwen wiahla pelien lamalam ehu. Erein ahnsou sang pahr 1801 lel 2000, pali laud en aramas akan tapiada ahneki madamadau en uhki wehi. Kedekedeo, pelien lamalam en Kristian likamw akan eri tohrohrpeseng oh wiahla pwihn tohto, oh pali laud en irail kin ahnekihte madamadau en uhki wehi. Towe kan en pelien lamalam pwukat pil kin mahweniong iengerail tohn kaudok kan en sahpw teikan. Rahnwet, Kristian likamw akan kin tohrohrpeseng pwehki arail padahk kan oh pil arail madamadau en uhki wehi.

16. Soangen ire dah kan me kin katohrepeseng Kristian likamw akan?

¹⁶ Nan pahr 1900 samwa, ekei pwihn en Kristian likamw akan koasoanehdi ren tapiada kaminiminpene pelien lamalam koaros. Ahpw sounpar tohto mwurin arail wia met, ekeite pelien lamalam me patpene oh wiahla ehu, ahpw towe kan kin pingpingkihte soangen peidek kan me dene aramas kohsang mwengki, kaiohla, ohl mwahuki ohl oh lih mwahuki lih, oh duwen lih akan ar kak ahneki pwukoa laud nan arail pelien lamalam. Ekei pelien lamalam pwukat, ar kaun akan kin song en kaminiminpene tohn sarawi en ehuehu pwihn sang ni arail solahr kesempwalki padahk kan me kin katohreirailpeseng mahs. Ahpw arail wia met kin kaluwetala pwoson en aramas akan oh sohte kin kaminiminpene arail pelien lamalam kan.

Kaudok Mehlel Sikdahsang Lamalam en Uhki Wehi

17. Ia duwen Paipel eh kohpada me kaudok mehlel pahn kaminiminpene aramas akan “ni rahn akan me pahn kohdo”?

¹⁷ Mendahki ahnsouwet aramas akan kin saminiminpene laudsang mahs, irair en miniminpene kin pousehlahte kasalehda me tohn kaudok mehlel kan kin weksang irail. Soukohp Maika kohpada: “I pahn kapokoneikumwailpene, rasehng pelin sihpw me pwurodohng nan kehl ehu.” (Maika 2:12) Maika kohpada duwen kaudok mehlel eh pahn sikdahsang soangen kaudok koaros, sohte lipilipil ma kaudokiong koht likamw akan de ar wehi kan nin duwen koht men. E ntingihedi: “Ni rahn akan me pahn kohdo dohl me Tehnpas Sarawien KAUN-O uhda powe pahn wiahla dohl me keieu ile nanpwungen dohl kan; e pahn sikdahsang dohl koaros. Wehi tohto pahn pokondohng ie, Pwe wehi koaros kin pwongih oh peikiong arail koht kan, a kiht, se pahn kin pwongih oh peikiong KAUN-O, at Koht.”​—Maika 4:1, 5.

18. Soangen wekidekla dah kan me kaudok mehlel kin sewese kitail wiahda?

¹⁸ Maika pil kawehwehda ia duwen kaudok mehlel eh pahn kaminiminpene aramas akan me kin imwintihtipene mahs. “Towe kan pahn nda, ‘Nna, kitail kohdahla nin nahnahn KAUN-O, ni Tehnpas Sarawien Koht en Israel. Pwe e pahn ketin padahkihong kitail dahme e kupwurki kitail en wia; kitail pahn weid nan ahl  akan me e ketin pilada.’ . . . Eri, irail pahn wekidohng neirail kedlahs akan ni mehn deipwel, oh neirail ketieu kan ni naip en pal tuhke. Sohte wehi ehu pahn mahweniong ehu wehi, de pil pwurehng onopada ong mahwen.” (Maika 4:2, 3) Irail akan me kesehla kaudok en dikedik kan de kaudok ong wehi kan pwe ren iang kaudokiong Siohwa kin miniminpene nan sampah pwon. Koht kin ketin padahkihong irail en weid ni elen limpoak.

19. Dahme miniminpene en aramas rar kei nan kaudok mehlel kin kadehdehda?

¹⁹ Miniminpene en Kristian mehlel kan nan sampah pwon rahnwet kin uhdahn sikla oh kin wia mehn kadehde sansal me Siohwa kin pousehlahte ketin kaweidki sapwellime aramas akan eh manaman. Aramas akan sang wehi koaros kin miniminpene ni uwe ehu me laudsang mahs nan poadopoad en aramas. Met iei pweidahn kokohp en Kaudiahl 7:9, 14, oh e pil kasalehda me sapwellimen Koht tohnleng kan pahn kereniong kadarala “ahng pahieun sampah” me pahn kasorehla koasoandi suwed wet. (Wadek Kaudiahl 7:1-4, 9, 10, 14.) E uhdahn wia pai kaselel ehu en kin miniminiong riatail kan koaros nan sampah pwon. Ia duwen atail kak sewese kakairada minimin wet? Kitail pahn tehkpene met nan iren onop en mwuhr.

Ia Duwen Omw Pahn Sapeng?

• Ia duwen kaudok mehlel eh kin kaminiminpene aramas akan?

• Ia duwen atail kak irehdi peirin pwe en dehr kauwehla atail kin miniminpene?

• Dahme kahrehda madamadau en uhki wehi sohte kin katohrepeseng tohn kaudok mehlel kan?

[Peidek en Onop]

[Kilel nan pali 16]

Kristian akan ni mwehin wahnpoaron ko kin kohsang soangsoangen irair en mour

[Kilel nan pali 18]

Ia duwen omw sewese kauwada Wasahn Kaudok kan eh kin kakairada miniminpene?