Pasapengpen Peidek Pahieu Duwen Imwin Sampah

SISES KRAIS ketin kohpada me ni ahnsou kohkohdo, ‘imwin sampah pahn leledo.’ E mahsanih duwen rahno: “Pwe apwal en ni ahnsowo pahn laudsang apwal me kin wiawi sang mahs kohdo lel met; pil sohte me pahn duwe sang met kohla.”​—Madiu 24:14, 21.

Mahsen en Sises pwukat duwen imwin sampah iangahki ekei iren Paipel kan duwen oaralap wet, kin kahrehiong peidek kesempwal kei en pwarada. Ke sou pahkpeseng noumw Paipel oh wadek dahme e kin mahsanihki duwen peidek pwukat?

1 Dahme Pahn Imwisekla?

Paipel sohte kin padahngki me weren sampah pahn ohla. Sounmelkahkao ntingihdi: “Komw ketin koasoanehdi teng sampah pohn poahsoane, oh e sohte mwahn pahn mwekid kohkohlahte.” (Melkahka 104:5) Paipel pil sohte kin padahngki me aramas koaros nan sampah pwon pahn sohrala nan kisiniei. (Aiseia 45:18) Sises ketin kasalehda me ekei aramas pahn pitla ni imwio. (Madiu 24:21, 22) Eri, dahme Paipel kin padahngki me pahn imwisekla?

Koperment kan en aramas me Sohte Kin Pweida pahn imwisekla. Koht ketin kamwakid soukohp Daniel en ntingihdi met: “Koht en nanleng pahn ketin kauwada mwehi [“wehi,” NW] ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”​—Daniel 2:44.

Mahwen oh saminlahn sampah pahn imwisekla. Melkahka 46:9 kin kasalehda dahme Koht pahn ketin wia ni eh mahsanih: “E kin ketin katokehdi mahwen wasa koaros nin sampah; e kin ketin katimpeseng arep kan, oh kauwehla kesik ketieu kan, e kin ketin isikala nein sounpei kan mehn sansar kan.” Paipel pil padahngki me Koht pahn ketin “kauwehla irail kan me kin kauwehla sampah.”​—Kaudiahl 11:18.

Mwersuwed oh koasoandi sapwung pahn imwisekla. Mahsen en Koht inoukihda: “Aramas pwung—aramas lelepek—pahn kousoan nan sahpw wet. Ahpw Koht pahn ketin  koahkoahsang aramas suwed kan nan sahpwo oh usadahsang me dipan akan rasehng dihpw eh kin usuhsdahsang nan pwehl.”​—Lepin Padahk 2:21, 22.

2 Iahd me Imwio Pahn Leledo?

Siohwa Koht ketin koasoanehdi “ahnsawi” pwehn kaimwisekala soahng suwed kan oh kahrehiong sapwellime Wehi de koperment en kaunda sampah pwon. (Mark 13:33) Ahpw Paipel ni sansal kasalehda me kitail sohte kak ese iahd imwio pahn leledo. Sises mahsanih: “A duwen rahno oh ahnsowo, sohte emen me ese iahd e pahn leledo, oh tohnleng en nanleng kan, pil Sapwellimen Sahmo sohte mwahngih, Sahmohte me mwahngih.” (Madiu 24:36) Ahpw Sises oh sapwellime tohnpadahk ko kohpada ia pahn irair en sampah mwohnte Koht eh pahn ketikihdo imwio. Imwio pahn kerendo ni ahnsou me soahng koaros me kileldi pah pahn wiawi ni ahnsou ehute nin sampah pwon.

Suwedlahn pelien politik, koasoandi en aramas oh saminlahn sampah kin wiawi laud sang mahs. Pwehn sapengla ahn tohnpadahk ko arail peidek kan duwen imwio, Sises mahsanih: “Ehu sahpw pahn mahweniong ehu sahpw; ehu wehi pahn mahweniong ehu wehi. Wasa koaros rerrer en sahpw pahn wiawi oh lehk lapalap pahn mie. Ih soahng pwukat me pahn kohmwowehdo ahnsou duwehte medek en neitik.” (Mark 13:8) Wahnpoaron Pohl ntingihdi: “Uhdahn pahn mie ahnsou apwal ekei ni imwin rahn akan. Aramas pahn roporop ong pein irail, mehwo, aksuwei oh pohnmwahso; re pahn kamwakara, re sohte pahn peikiong ar pahpa oh nohno kan, oh re sohte pahn kin kasapahlkalahnganki mehkot. Re sohte pahn poadidi ong pelien lamalam; irail pahn sempoak, soh mahk, karaun likamw oh pehmara, lemei, oh re pahn kailongki me mwahu; re pahn pangala iangarail kan, re pahn loaumwohmw oh kalahwasa, oh re pahn inengieng pein arail peren laudsang kupwur en Koht. Re pahn kin liksansalamwahuki mwomwen atail pelien lamalam, ahpw re kin kahmahmki katepe. Kalekeiukasang aramas pwukat.”​—2 Timoty 3:1-5.

Doadoahk en kalohk kin wiawi nin sampah pwon ni soangsoangen lokaia kan. Sises mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.”​—Madiu 24:14.

3 Dahme Pahn Wiawi Mwurin Imwio Eh Leledo?

Paipel sohte kin padahngki me aramas mwahu koaros pahn kohdahla nanleng pwehn mour kohkohlahte. Ahpw Sises ketin padahngki me kupwuren Koht ong aramas sangete nin tapio pahn pweida. Sises mahsanih: “Meid pai me nan kapehd opampap akan; pwe re pahn sohsohki sampah.”(Madiu 5:5, NW; 6:9, 10) Paipel kin kihda koapworopwor en kaiasada ong irail akan me mehla mwohn imwio eh pahn leledo. (Sohp 14:14, 15; Sohn 5:28, 29) Dahme pahn wiawi mwurin imwio eh leledo?

Sises pahn ketin kakaun sang nanleng nin duwen nanmwarki en Wehin Koht. Soukohp Daniel ntingihdi: “Nan kaudiahl en nipwongo, I pil kilangada emen me likamwete aramas [Sises me iasadahr]. E ketiket kohdo nanpwungen depwek kan oh pakahrlahng mwohn ih me sapwellimanki mour poatopoato [Siohwa Koht]. E [Sises] ahpw ale manaman en kaunda wasa, wahu, oh lingan en nanmwarki, pwe tohn wehi kan koaros, keinek koaros, oh me kin lokaiahki soangen lokaia teikan en kin papah ih. Sapwellime manaman en kaunda wasa pahn poatopoat, oh sapwellime wehi sohte pahn imwisekla.”​—Daniel 7:13, 14; Luk 1:31, 32; Sohn 3:13-16.

Irail kan me pahn mi pahn kaundahn Wehin Koht pahn ahneki roson unsek, nsenamwahu oh mour soutuk. Soukohp Aiseia ntingihdi: “Aramas akan pahn kauwada imwarail kan oh kousoanla loale—sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan—ahpw sohte emen tohrohr pahn kak  adihasang ar wain.” (Aiseia 65:21-23) Wahnpoaron Sohn ntingihdi met duwen ahnsowo: “Iet tehnpas en Koht rehn aramas akan! E pahn ketiket rehrail, oh irail pahn wiahla sapwellime aramas. Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”​—Kaudiahl 21:3, 4.

4 Dahme Ke Anahne Wia Pwehn Pitsang Imwio?

Wahnpoaron Piter kasalehda me ekei me momour ni ahnsoun imwi pahn kepitki koasoi me Koht pahn ketin kauwehla koasoandi en aramas oh kihsang soahng suwed koaros pohn sampah. (2 Piter 3:3, 4) Mendahki met, Piter kangoange irail kan me momour nan atail ahnsou en kapwaiada kaweid pwukat.

Sukuhlki sang dahme wiawi nan poadopoad. Piter ntingihdi: “Koht sohte ketin kupwurehla mehn kawa ko, ahpw e ketikihdiong pohn tohnsampah suwed ko Nohlik Lapalapo; ihte me e ketin komourala Noha, iei ih me lohkiseli duwen mour pwung pahn kupwur en Koht, oh pil iangahki aramas isimen.” (2 Piter 2:5) Me pid duwen irail kan me kin kepit, Piter koasoia: “Irail sohte kin men ese duwen Koht eh ketin mahsenier kawao, oh duwen nanleng oh sampah eh wiawihkihda mahseno, duwen sampah eh pwarada oh wiawihda sang pihl oh nan pihl, oh  duwen eh ohkihla pihl kawao, iei pilen Nohlik Lapalapo. Ahpw, nanleng oh sampah * en ahnsou wet mihmihehki mahsenohte en Koht oh wie nekinek ong ni ahnsou re pahn ohkihla kisiniei. Re wie nekinek ong ni rahnen kadeik, iei rahnen kamwomwmwomwlahn me suwed kan.”​—2 Piter 3:5-7.

Momourki sapwellimen Koht koasoandi duwen tiahk pwung. Irail me men pitla sang imwio, arail “mour uhdahn pahn konehng en kin mwakelekel oh kasarawihong Koht.” (2 Pit. 3:11) Tehk me Piter kin kasalehda anahnepen mour me “kin mwakelekel oh kasarawihong Koht.” Ke anahne wia laudsang ndahte me mie omw pwoson. Ke sohte kak pohnsehsehla Koht erein ahnsou reirei ehu oh medewe me mwohnte imwio pahn leledo, ke pahn wekidala omw mour pwe ken kak pitla.

Soangen wiewia dah kan me Koht kin kupwurki? Ke sou kapahrekihpene dahme ke ese oh dahme Paipel kin padahngki? Sounkadehdehn Siohwa kan pahn perenki sewese iuk. Idek rehrail en kasalehiong uhk sang nan noumw Paipel duwen arail pasapeng kan. Ni omw pahn wia met, e pahn sewese iuk en ahneki koapworopwor ong ahnsou kohkohdo oh sohte masak soahng kan me kin wiawihong kitail.

[Nting tikitik me mi pah]

[Blurb nan pali 7]

Sampah sohte pahn ohla, ahpw irail me kin kauwehla me pahn sohrala