Wiewia Suwed Kan Pahn Imwisekla!

KOHT ketikihong kitail sapwellime Mahsen me kawehwehda kahrepen aramas ar kin wia soahng suwed kan. E pil ketikihong kitail saledek en wiahda pilipil oh koahiek en kaunda atail ineng oh pepehm kan. Met kin sewesei kitail en pilada en dehr wia soahng suwed kan. (Deuderonomi 30:15, 16, 19) Pwehki met, kitail kak pohnese soangen ineng suwed kan me kitail kakete ahneki oh kapwungala. Ni atail kin liksang wiewia suwed kan, met pahn kahrehiong kitail oh meteikan en nsenamwahu.​—Melkahka 1:1.

 Mendahki met, sohte lipilipil ia uwen atail kin nantihong soikala wiewia suwed kan, sampah pahn dindirekihte wiewia suwed kan en aramas. Paipel kin mahsanih: “Eri, tamataman mepwukat. Uhdahn pahn mie ahnsou apwal ekei ni imwin rahn akan.” Pwehn kasalehda dahme kahrehda rahn akan pahn “apwal,” e pousehlahte mahsanih: “Aramas pahn roporop ong pein irail, mehwo, aksuwei oh pohnmwahso; re pahn kamwakara, re sohte pahn peikiong ar pahpa oh nohno kan, oh re sohte pahn kin kasapahlkalahnganki mehkot. Re sohte pahn poadidi ong pelien lamalam; irail pahn sempoak, soh mahk, karaun likamw oh pehmara, lemei, oh re pahn kailongki me mwahu; re pahn pangala iangarail kan, re pahn loaumwohmw oh kalahwasa, oh re pahn inengieng pein arail peren laudsang kupwur en Koht. Re pahn kin liksansalamwahuki mwomwen atail pelien lamalam, ahpw re kin kahmahmki katepe. Kalekeiukasang aramas pwukat.”​—2 Timoty 3:1-5.

Mwein ke tehk mahsen en kokohp pwukat, “imwin rahn akan.” Ia wehwehn met ong uhk? Pali laud en aramas kin wehwehki me “imwin rahn akan” kin wehwehki me mehkot pahn imwisekla. Dahme pahn imwisekla? Tehk dahme Koht ketin inoukihda nan sapwellime Mahsen.

Aramas suwed akan pahn sohrala.

“Ahnsou keren aramas suwed kan pahn sohrala; ke pahn rapahkin irail, ke ahpw sohte pahn diar irail; a me aktikitik kan pahn sapwenikihla sahpwo oh re pahn paiamwahu oh popohl.”​—MELKAHKA 37:10, 11.

“E kin ketin sinsile irail kan me kin poakohng, a e pahn ketin kamwomwala aramas suwed akan.”​—MELKAHKA 145:20.

Solahr pahn mie lokolok.

“E kin ketin kapitala me semwehmwe kan me kin likweriong, oh pil irail kan me paisuwedlahr oh me lekdekla kan. E kin ketin kapitirailla sang nan arail kehnaudek oh angkehlail kan; e kin ketin kesempwalki ar mour.”​—MELKAHKA 72:12, 14.

“Audepen lahng oh sampah uhdahn pahn maiaudahsang mouren liduwih mehla, oh pahn iang sapwellimen Koht seri kan nan arail saledek lingan.”​—ROM 8:21.

Ahn aramas anahn en war pahn kaitarala.

“Aramas koaros pahn mour meleilei pahn mwetehn arail tuhkehn wain de tuhke pik kan; re sohte pahn perki mehkot.”​—MAIKA 4:4.

“Aramas akan pahn kauwada imwarail kan oh kousoanla loale—sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan—ahpw sohte emen tohrohr pahn kak adihasang ar wain. Nei aramas akan pahn mour werei, rasehng tuhke kei. Re pahn nsenamwahuki mehlel dipwisou kan me re koadoahkihada.”​—AISEIA 65:21, 22.

Pwung pahn mihla wasa koaros.

“Mehlel me Koht sohte pahn ketin kahrehiong pwung en wiawi rehn sapwellime kan me pilipildahr me kin pekipek sawas reh ni pwong oh nin rahn . . . ? I ndaiong kumwail, E pahn ketin kahrehiong pwung en mwadang wiawihong irail.”​—LUK 18:7, 8, NW.

“KAUN-O kin kupwurperenki dahme pwung oh sohte kin likidmeliehla sapwellime aramas loalopwoat akan. E kin ketin sinsile irail ahnsou koaros.”​—MELKAHKA 37:28.

“Irail koaros pahn esehla dahkot pwuhng.”​—AISEIA 26:9.

“Eri, kitail koapworopwor oh awiawih lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr.”​—2 PITER 3:13.

 Aramas Pil Kin Wekila Ahnsou Wet

Kitail koaros kin perenkihda inou pwukat. Ahpw dahme kahrehda kitail kak kamehlelehki me mepwukat pahn pweida? Ni mehlel, mehn kadehde me kin kasalehda me sapwellimen Koht inou kan pahn pweida mieier nan atail ahnsou. Ia mehn kadehdehn? Iei me sansalda sang aramas rar kei nin sampah pwon rahnwet me perenda ni arail kihsang irair en roporop, tiahk suwed, de tiahk lemei kan nan arail mour oh sukuhlki en wiahla aramas mehlel, popohl oh kadek. Rahnwet, Sounkadehdehn Siohwa isirar samwa kin wiahla pirien ehu nin sampah pwon me kin powehdi lamalam en lipilipilki aramas sang keinek, sahpw de wehi teikan. Soangen lamalam pwukat me kin kahrehda kailok, lemei oh kamalahn aramas me kin wiawi nan poadopoad en sampah. Soangen wekidekla pwukat kin wia mehn kadehde kehlail me inou en Koht akan uhdahn pahn pweida nin sampah pwon.

Ahpw dahme kin kahrehda soangen wekidekla pwukat? Pasapeng dierekda nan ehu inou en Paipel me soukohp Aiseia ntingihedi. Iet me e ntingihdi:

“Kidi en wel kan oh sihpw kan pahn kousoanpene ni popohl, lepard kan pahn kin wendi mpen kisin kuht kan. Koupwul kan oh laion pwulopwul kan pahn kin mwengepene, oh kisin seri kan me pahn wia sileparail. . . . Laion kan pahn kin kang dihpw duwehte kou kan. Seri pwelel men sohte pahn ohla ma e pahn mwadong limwahn sineik pwoisin men. Sohte meninkau de mehkot suwed pahn mie nan Saion, sapwellimen Koht dohl sarawio. Pwe sampah pahn direkihla kupwurokong en KAUN-O, duwehte madau eh kin direkihla pihl.”​—Aiseia 11:6-9.

Ia duwe, kokohp wet kin pidadahte ahnsou ehu me mahn akan pahn kousoan rehn aramas akan ni popohl? Soh, e kin pid laudsang met. Tehk me kaimwiseklahn ireo kin kasalehda kahrepen wekidekla wet: “Sampah pahn  direkihla kupwurokong en KAUN-O.” Ia duwe, mahn akan kak wekidala arail wiewia kan pwehki kupwurokong en Koht? Sohte kak. Ahpw e kak wekidala mouren aramas oh met kin wiawi! Kokohp wet kin kasalehda me irail kan me ni karasaras ahneki irair en mahn akan pahn kihsang nan arail mour soangen irair pwukat oh uhd kakairada irair kan en Krais pwehki ar sukuhlki oh kapwaiada dahme Paipel kin padahngki.

Karasepe, medewe duwen Pedro. * E kin kamehlele me e kin peiki koasoandi pwung ni eh iangala pwihn me kin wiahda mwekid keper kan. Mwurin eh ale kasukuhl, kaweid kohwong ih en kaposehpeseng ihmw akan en pilismen kan. E selidi ni ahnsou me e wie kaukaunop. Pedro kin ieiangete en pwihno mwekid kan mendahki e mi nan imweteng sounpwong 18. Ni ahnsowo, en Pedro pwoudo tepida onop Paipel rehn Sounkadehdehn Siohwa kan. Ni ahnsou me Pedro sapwadekla, e pil tepida onop Paipel oh dahme e sukuhlki duwen Siohwa Koht kamwakid ih en wiahda wekidekla laud nan eh mour. Pedro nda: “I kalahngankihong Siohwa ei sohte kemehla emen ni ei kin ieiang pwihn mwersuwedo. Met I kin doadoahngki kedlahs en sapwellimen Koht manaman, Paipel, pwehn padahkihong aramas duwen popohl mehlel oh koasoandi pwung, me iei rongamwahu en Wehin Koht.” Pedro pil mwemweitla ni ihmw  kan me e pilahn en kauwehla pwehn ehukihong irail duwen sampah ehu me sohte tiahk lemei ahpw popohl me pahn uhd mie.

Uwen kehlail en Mahsen en Koht ni eh kin kamwakid aramas akan kin kihong kitail kahrepe laud en pwoson sapwellimen Koht inou me imwin soahng suwed koaros uhdahn pahn wiawi. Aramas sohte pahn wia soahng suwed kan kohkohlahte ahpw irail pahn wiahla aramas mwahu kei. Ni ahnsou keren, Siohwa pahn ketikihsang ih me tapiada soahng suwed kan koaros me iei Sehdan me Tepil. Ih me kin pitipitih sampah pwon. Paipel mahsanih: “Kitail ese me kitail kisehn Koht, mehnda ma sampah unsek mi pahn manaman en Me Suwedo.” (1 Sohn 5:19) Ahpw kereniong e pahn kasohrala. Irail akan me pil sohte men kesehla arail wiewia suwed kan pahn sohrala. Ia uwen mwahu en iang mour ni ahnsowo!

Dahme emen anahne wia pwehn iang mour ni ahnsowo? Taman me “kupwurokong en KAUN-O” me kin wekidala mouren aramas akan rahnwet oh ih me pahn wekidala mouren aramas koaros nin sampah ni ahnsou keren. Ni omw pahn esehla padahk en Paipel oh kapwaiada duwehte me Pedro wia, ke pil kak kasikasik en iang mour nan sampah ehu me pwung pahn mihmi ie. (2 Piter 3:13) Se kangoange iuk en doadoahngki ahnsou me luhluhwe pwehn sukuhlki duwen Koht oh Sises Krais pwe met kak kihong uhk mour soutuk.—Sohn 17:3.

[Nting tikitik me mi pah]

[Blurb nan pali 9]

Ke pil kak kasikasik mour nan sampah ehu me pwung pahn mihmi ie.​—2 PITER 3:13