Dahme Kahrehda Ohlahn Pwopwoud?

“Parisi kei ahpw patohla rehn Sises oh song lidipiheki ar peidek ni ar kalelapak, ‘Ia duwe, atail Kosonnedo mweidohng ohl emen en mweisang eh pwoud pwehki kahrepe ieu sohte lipilipil?’”—Madiu 19:3.

NI MWEHIN Sises ekei kin peidengki ma mouren pwopwoud kak mihmi kohkohlahte de ma e anahne mihmi kohkohlahte. Sises mahsanihong irail: “Kumwail sohte kin wadek mahsen wet nan Pwuhk Sarawi duwen Sounwiepen aramas eh ketin wiahda ohl oh lih nin tapio? Oh Koht mahsanih, ‘Iei kahrepen me ohl pahn mweikihsang seme oh ine oh patehng eh pwoud, oh ira riemen pahn wiahla warteieu.’ Ira eri solahr wia riemen, pwe warteieu. Eri, kaleke aramas de kamweidpeseng me Koht ketin kapatapenehr.” * (Madiu 19:4-6) E sansal me Koht kupwurki pwopwoud en mihmi kohkohlahte.

Nan sahpw tohto rahnwet, mpen persent 40 en pwopwoud kan de laudsang kin tohrohrpeseng oh imwikihla ‘mweipeseng.’ Eri ia duwe, kaweid en Paipel duwen pwopwoud meringlahr oh solahr kak doadoahk? E kakete me mouren pwopwoud kan sohte kin pweida pwehki mie mehkot sapwung nan koasoandi me wiawihda ong pwopwoud?

Medewehla duwen karasaras wet: Pwopwoud riemen pwainda soangen sidohsa tehieu. Ehu pwopwoudo kin apwalih oh tangahki mwahu werara sidohsao. Kahrehda werara sidohsao sohte ohla. Pwopwoud teio sohte kin kihong ahnsou pwehn apwalih werara sidohsao oh sohte kin kanahieng ara tangahki. Sidohsao eri ohla oh sohla kak doadoahk. Dahme sapwung? Sidohsao de me waraniki ko? E sansal me ira me warankio me sapwung.

Duwehte met, ohlahn pwopwoud kan sohte wehwehki me mie mehkot sapwung nan koasoandi me wiawihda ong pwopwoud. Pwopwoud rar kei me pweida nan arail mouren pwopwoud kadehdehda me sohte mehkot sapwung nan koasoandi me wiawihda ong pwopwoud. Pwopwoud pwukat kin wahdo nsenamwahu oh kakehlailih emenemen, tohn peneinei oh tohn wasahn kousoan kan. Pwe pwopwoud ehu en dehr ohla, duwehte sidohsao, ira anahne nannanti apwapwahli ni keneinei ara mouren pwopwoud.

Mehnda ma ke wie pwopwoudkier rahn kei de ahnsou reirei, kaweid en Paipel ong mouren pwopwoud kin uhdahn pweida. Tehk ekei karasepe kan nan iren mwuhr kan.

[Nting tikitik me mi pah]