Ke Kin Perenki Wia Pein Omw Onop?

LADU en Koht koaros me kin mehlel nan arail kaudok pahn perenki kihong ahnsou laud en wia pein arail onop Paipel. (Melkahka 1:1, 2) Ahpw pwehki soahng tohto me re kin anahne wia oh met kin kihsang arail ahnsou, me tohto kin apwalki kihong uwen ahnsou me re mwahuki ong pein arail onop.

Pwe sapwellimen Koht ladu koaros en nannantihte papah ih, koaros anahne kakehlaka arail peren oh kehl ehuehu rahn sang ni arail pahn rapahki soahng kapw de loal kan en padahk mehlel en Mahsen en Koht. Mwein ekei padahk mehlel nan Paipel me kamwakid uhk laud mahso solahr nohn kin kamwakid uhk met. Ihme kahrehda e kesempwal kitail en nantihong alehdi soahng kapw kan nan padahk mehlel pwehn pousehlahte kamwakid kitail en papah Koht.

Ia duwen sapwellimen Siohwa ladun mahs kan ar kin kakehlaka arail nanpwungmwahu rehn Koht sang ni arail kin pein onopki sapwellime Mahsen? Ia duwen irail sapwellime ladu kan rahnwet ar kin wiahki arail onop mehkot kaperen oh pweida mwahu? Ia duwen arail kin paiekihda arail nannanti?

Pein Arail Onop Pwurehng Kakehlailihirailda

Nanmwarki en Suda me adaneki Sosaia kalaudehla eh ngoangki eh doadoahk en kamwakelehsang wehio kaudok likamw mwurin wadawaden “pwuhken Kosonned en KAUN-O, Kosonned me Koht ketikihong Moses.” Sansal me kaidehn ih tepin eh wadek en mwo ahpw ni eh rong sang uhdahn pwuhk en Kosonned me Moses ntingihdio, met kamwakid ih laud en nantihong en kolokolete kaudok mehlel.—2 Kronikel 34:14-19.

Soukohp Daniel kasawihada sounpar depe Serusalem pahn tehnla oh e diarada ire mehlel pwukat kaidehn ihte sang nan pwuhken Seremaia ahpw e pil diarada nan “pwuhk sarawi kan.” Pwuhk sarawi pwukat iei pwuhken Lipai (26:34, 35), Aiseia (44:26-28), Oseia (14:4-7), oh Eimwos (9:13-15). Dahme e kadehdehda sang  ni eh pwerisekiong onopki pwuhken Paipel pwukat kahrehiong ohl poadidi menet en rapahki Koht ni kapakap ngidingid. Eh pekipek ni ngidingid pasapengla ni Koht eh ketikihong ih kaudiahl ehu oh mehn kamehlel me pid kahnimw en Serusalem oh ienge mehn Suhs akan.—Daniel irelaud 9.

Sosaia me “wiahda mehkoaros me kin kaparanda kupwuren KAUN-O” oh Daniel me ‘Koht pein kupwuramwahwih,’ sohte weksang kitail rahnwet. (2 Nanmwarki 22:2; Daniel 9:23) Ara nantihong onopki iren Paipel kan me mie ni ahnsowo kakehlakahda ara nanpwungmwahu rehn Koht. Met pil duwehte irail sapwellimen Siohwa ladun mahs teikan me duwehte Sepda, sounmelkahka men nan kadaudok en Asap, Nehmaia oh Stipen. Irail pwukat koaros kin pein onopki iren Paipel kan me mie nan arail ahnsowo.—Sounkopwung 11:14-27; Melkahka 79; 80; Nehmaia 1:8-10; 8:9-12; 13:29-31; Wiewia 6:15–7:53.

Wiahki Doadoahk en Kalohk Mehn Kangoang Ehu

Pali laud en sapwellimen Siohwa ladu kan rahnwet me kin papah ih erein ahnsou reirei kin ahneki koasoandi en wia pein arail onop en Paipel. Irail kin kilang me met kesempwal pwe irail en kak pepehd oh kapwaiada arail pwukoahn Kristian akan. Ahpw me tohto kin pwungki me e sohte mengei ahnsou koaros en toupahrek ong arail kin doadoahngki arail ahnsou oh kehl ong onop oh soahng teikan me re kin anahne wia.

Ahpw en pepehd sang ni arail kin pwerisekiong pein arail onop kesempwal pwe irail en kak apwalih arail anahn kan nan doadoahk en kalohk me kin wiawi ahnsou wet nan sampah pwon. Irail kan me kin perenki soahng kapw oh loal kan en Mahsen en Koht kak sewese irail kan me kin rapahki padahk mehlel. Met mehlel mehnda ma emen kin kalohk nan wasa ehu me aramas tohto kin rong de ma emen kin kalohk nan wasa ehu me pali laud sohte kin perenki rong.

Kaukaule Onop Mahsen en Koht

Dahme meteikan kin wia kak seweseiuk kalaudehla omw perenki omw koasoandi en onop de ia duwen kowe oh omw peneinei kak paiekihda laud amwail doadoahngki ahnsoun onop. Nanpwungen soahng kan me ladun Koht men anahne wia iei kaukaule wadek Mahsen en Koht. Me tohto wiahda mehn akadei en wadekala irelaud siluh de pahieu en Paipel ehuehu wihk. Ke men wadekala Paipelo pwon erein sounpar ehu? Eri, ke pahn men doadoahngki laud omw ahnsou pwehn wadek Paipel. Mwein elep en awa nan ehuehu rahn.

Ke wadekalahr Paipelo pwon tohto sang pak ehu? Ke sou wiahda mehn akadei kapw? Emen lih Kristian wadekala pwuhk en Paipel kan tepisang pwuhk me tepin ntingda lel pwuhk me ntingdi keieu mwuhr. E kilangada oaritik tohto sang irekidien wiewia kan nan Paipel me e sehse mahso. Pil emen lih Kristian wadekalahr Paipel pwon pak limau erein sounpar limau. Ehuehu ahnsou, e kin doadoahngki soangsoangen wiepe kei. Nin tapio e wadekalahte Paipelo pwon. Keriaun eh wadawado, e kin oaralapihada audepen ehuehu irelaud ni sentence ehu de riau nan nah kisin pwuhk kis. Tepisang kesiluh en pahro, e uhd doadoahngki Paipel laud en New World Translation (lokaiahn wai). Keieu e kin pilada iren Paipel kan me mi nan werengen Paipel laudo oh kin tehk kanahieng nting tikitik kan me mi pah iangahki oaritik kan me kileldi nan tihnsewen Paipel laudo. Ni kelimaun ahnsowo, e doadoahngki map kan pwehn kalaudehla eh wehwehki sahpw kan nan Paipel. Liho koasoia: “Ong ie, wadawad en Paipel wiahla mehkot kaperen duwehte ei kin mwenge.”

Ekei tohnsukuhl en Paipel ngoang kan kin diar me e mwahu ren naineki ehu Paipel ongete ar wia pein arail onop. Re kin ntingihdi nan neirail Paipelo ire kesempwal kan, karasaras mwahu kan, de sawaspen Paipel kan me re kak tehk mwuhr. Emen pioneer nda me e kin wia mehkot kaperen en ntingihdi ire kapw kan me e sukuhlki nan nah Paipel en onopo ni imwin ehuehu sounpwong. E nda: “Ei kin kasik  ahnsou kesempwal wet kin sewese ie I en mwadang lel mehn akadei teikan nan sounpwongo.”

Iren Sawas Kaselel kei

Ke pehm me omw koasoandi kin direkihla soahng tohto me ke anahne wia oh ke anahne sawas pwe ken kak doadoahngki mwahu omw ahnsou? Eri, wahda dahme ke men wadek oh wadek ni ahnsoun omw kommoal. Wia uwen omw kak pwehn koasoanehdi pwuhk kan oh mehn onop teikan nan imwomw de wasa me ke kin kalapw onop ie pwehn mengei ong uhk en doadoahngki. Wiahda omw wasahn onop en kansenamwahu ahpw en dehr daulihla dahme konehng pwe ke de meirla. Mie padahk me ke pahn wia? Mwadang wadekala ire kan ong omw padahko pwe ken kak medewehda ire kan ni omw kin kommoal de wia seli omw doadoahk en ihmw ape.

Meteikan kak sewese iuk ken doadoahngki mwahu omw ahnsou pwe kumwa koaros en kak paiekihda. Karasepe, ke kak peki emen en wadek ong uhk ni ngihl laud ekei kisin ire kan ni omw kin wia omw doadoahk nan ihmw de ni omw kin wiahiong ih nime koahpi. Ia duwen ma peneinei pwon pwungkipene ahnsou ehu me koaros kak wia pein arail onop oh sohte katairong? Ekei pak ke kak idek rehn emen: “Dahme ke perenki sang omw wadawad?” Ni ahl wet, ke kak diarada dahme kompoakepahmw kan kin sukuhlkihdi.

Ke kin perenki rapahkihda wiepe kapw kan ong omw koasoandi en onop? Ke kak koasoanehdi awa depe ke pahn doadoahngki ong onop duwehte me tohto me kin koasoanehdi awa depe re pahn doadoahngki pwe ren koasoiaiong meteikan Paipel. Emen pioneer koasoanehdi awa depe nan ehuehu sounpwong me e pahn doadoahngki ong onop oh e kin peren ni eh kilang eh mehn akadei kan pweida. Ekei kin katikala arail ahnsoun kilang kasdo oh wiahda ahnsou ong onop. Me tohto kin pilada ehu oaralap me irail pahn onopki ong erein ahnsou ieu. Karasepe, soahng kan me duwehte wahn sapwellimen Koht manaman kan, ihs me ntingihda, mehnia pahr oh pil soahng teikan me pid pwuhk kan en Paipel de wiepen padahk. Ekei kin perenki ntingihdi irekidien nanmwarki en Israel kan oh soukohp * kan de audepen pwuhken Wiewia oh pil kisinlikou kan me Pohl ntingihdi.

 Me pwulopwul kan, kumwail men kakehlailihala amwail pwoson? Ke sou pilada ehu sawaspen Paipel ken onopki mwahu ni omw pahn kommoal sang sukuhl? Emen tohnsukuhl en high sukuhl me papidaisla, pilada pwuhken Mankind’s Search for God (lokaiahn wai), me Watch Tower Society wiahda. Mwurin ehuehu irelaud, e kin oaralapihada ire kan me e sukuhlkihdi nan ehu pwuhk. E sohte mengei oh e sohte kasik me e pahn anahne ahnsou laud. Ahpw, ni ahnsou me e kanekehla pwuhko pwon, e pwuriamweikihla uwen mehlel en Paipel.

Kalaudehla Omw Men Sukuhl

Rahnwet sapwellimen Siohwa ladu tohto kin soupisengki soahng tohto pwe ren papah ih. (1 Korint 15:58) Mehnda ma ke pwurehng tehk omw koasoandi oh wia uwen omw kak, omw koasoandio me ke kin wia ehuehu wihk mwein sohte pahn wekila laud. Ahpw e pahn mie lipwen omw ngoangki oh men esehla soahng loal kan en padahk mehlel oh omw kin tetehk mwahu pweidahn kupwuren Siohwa.

E wia mehn kangoang ehu en rong duwen kapai kan me kin kohwong irail kan me kin kamwahwihala arail koasoandi en onop. Emen ohl Kristian diarada me e solahr nohn perenki rapahki soahng loal kan me pid padahk mehlel. Ih eri wiahda eh koasoandi pwe en kak kihong ahnsou laud ong wia pein eh onop. E koasoia: “Met kihong ie soangen peren me I sohte kin ahneki mahso. Pwehki eh lalaudla ei kamehlele me Paipel kohsang rehn Koht, I kilang me met I kin ngoangki koasoiaiong meteikan dahme I kamehlele. I pehm me I kin ale kasukuhl mwahu, ei nanpwungmwahu rehn Siohwa kehlailla oh I kin nsenamwahu ni imwin ehuehu rahn.”

Emen Sounkadehdehn Siohwa me wia sounapwalih me kin seiloak mwemweitla nan mwomwohdiso tohto pil kawehwehda ekei kapai kan: “Irail kan me kin pwerisekiong arail onop kin kalapw peren ni arail koasoi. Irail sohte kin apwalki ehuiong meteikan oh irail sohte pil kin mwadang nsensuwedkihla dahme meteikan kan kin nda. Ni ahnsoun kalohk, irail kin tetehk anahn en aramas akan oh re pil kin koahiek en wekidala arail koasoi pwehn kaitarala arail anahn.”

E pil kasalehda ehu ire me ekei pahn men tamataman ni arail pahn kasawih arail koasoandi en onop. E koasoia: “Ni ahnsoun mihting kan, me tohto kin ahnla wadek pasapeng kan sang nan sawaspen Paipel me re onopkio. Irail pahn paiekihda laud ma irail pahn doudouloale ia duwen ire kan me re onopkio kin pid dahme re sukuhlkier mahso de pein arail mour.” Ke lemeleme ke kak doadoahngki kaweid pwukat?

Soukohp Daniel pehm me e saikinte wehwehkihla mwahu sapwellimen Siohwa ahl akan mendahki e mahkier sounpar 90. Ni imwin eh mour, e peidengki mehkot me pein ih sohte kak uhdahn wehwehki: “Maing, ahpw ia duwen eh pahn imwisekla?” (Daniel 12:8) E sansal me pwehki eh ngoangki esehla laud duwen sapwellimen Koht padahk mehlel me kahrehiong eh kolokolete eh lelepek mendahki soahng tohto wiawi nan eh mour.—Daniel 7:8, 16, 19, 20.

Emenemen sapwellimen Siohwa ladu pil anahne tengedi nin duwen Sounkadehde men. Nantihong kolokol omw nanpwungmwahu rehn Siohwa. Song ken doadoahngki wiepe kapw ehu de riau nan omw koasoandi en onop nan ehuehu wihk, sounpwong de sounpar. Ke pahn kilang ia duwen Koht eh pahn ketin kapaiada omw nannanti. Eri, perenki omw onop en Paipel oh kapai kan me pahn kohsang koasoandi wet.—Melkahka 107:43.

[Nting tikitik me mi pah]