“Wauneki Mehlel Irail kan me Wie Doadoahk Rehmwail”

“Kumwail en kin wauneki mehlel irail kan me wie doadoahk rehmwail, irail kan me Kaun-o ketin piladahr pwe re en kin kaweid oh panawih kumwail.”—1 DES. 5:12.

1, 2. (a) Ia mwomwen mwomwohdiso en Deselonika ni ahnsou me Pohl ntingihedi keieun nah kisinlikou ong irail? (b) Dahme Pohl kangoange mehn Deselonika kan ren wia?

MEDEWEHLA ma kowe emen tohnmwomwohdiso en Deselonika, ehu mwomwohdiso me tepin wiawihda nan Iurop ni mwehin wahnpoaron ko. Wahnpoaron Pohl doadoahngki ahnsou laud pwe en kakehlaka rie kan wasao. E ele idihada ohl mah kan en wenla mwowe, duwehte e kin wiahiong mwomwohdiso teikan. (Wiewia 14:23) Ahpw mwurin mwomwohdiso eh wiawihda, mehn Suhs kan wiahda pwihn lemei ehu pwe ren kausasang Pohl oh Sailas nan kahnimwo. Kristian kan me luwehdi ele pehm me solahr me pahn apwalih irail oh mwein re pil masepwehk.

² Ihme kahrehda, mwurin eh mweselsang Deselonika, Pohl kin nsenohki mwomwohdiso kapw wet. E song en pwurala, ahpw “Sehdan sohte mweidohng” ih. Eri, e kadarala Timoty en kangoange mwomwohdiso. (1 Des. 2:18; 3:2) Ni ahnsou me Timoty pwurodo oh wa rohng mwahu, Pohl men ntingihda kisinlikou ehu ong mwomwohdiso en Deselonika. Patehng soahng teikan, Pohl kangoange irail ren ‘kin wauneki mehlel irail kan me kin kaweid irail.’—Wadek 1 Deselonika 5:12, 13.

3. Dahme kahrehda Kristian kan nan Deselonika en uhdahn wauneki ohl mah kan?

³ Brother kan me wenla mwowe nanpwungen Kristian kan en Deselonika saikinte koahiek nin duwen sounapwalih kan duwehte Pohl oh ienge kan oh e pil sohte werei arail wia Kristian duwehte elder kan nan Serusalem. Met pwehki mwomwohdiso wet miehki mwotomwotsang sounpar ehu. Ahpw e konehng irail kan nan mwomwohdiso en kalahnganki ohl mah kan me kin “wie doadoahk” oh “kaweid” mwomwohdiso oh “panawih” irail. Mehlel, e konehng  ren “waunekin irail [elder kan] oh pil poakohng irail ni mehlel.” Kaweid wet iang ehu kaweid en Pohl me nda ‘ahnekipene meleilei nanpwungarail.’ Ia duwen ma ke mi nan Deselonika, ke pahn kasalehda omw kalahngan laud ong doadoahk en elder kan? Ia duwen omw kin kilangwohng “sapwellime kisakis en aramas akan” me Koht ketikihong omw mwomwohdiso sang ni eh ketin doadoahngki Sises?—Ep. 4:8, NW.

“Wie Doadoahk” Laud

4, 5. Dahme kahrehda e wia doadoahk laud ehu ong ohl mah kan ni mwehin Pohl ren padahkih mwomwohdiso? Dahme kahrehda met pil duwehte rahnwet?

⁴ Mwurin ar kadaralahng Pohl oh Sailas Peria, ia duwen ohl mah kan nan Deselonika ar “wie doadoahk” laud? Irail alasang Pohl oh kin padahkih mwomwohdiso ni ar kin doadoahngki iren Paipel kan. Ele ke pahn medewe ‘Kristian nan Deselonika kin kesempwalki Mahsen en Koht?’ Pwehki Paipel eh mahsanih me mehn Peria kan “men rong ira sang aramas en Deselonika. . . . oh rahn koaros irail kin onopki Pwuhk Sarawi.” (Wiewia 17:11) Ahpw met kin dokedoke mehn Suhs kan nan Deselonika, a kaidehn Kristian kan. Irail me wiahla me pwoson kan “aleier mahseno, kaidehn nin duwen padahk en aramas, ahpw nin duwen mahsen en Koht.” (1 Des. 2:13) Ohl mah kan kin uhdahn doadoahk laud pwe ren kin padahkih mwomwohdiso.

⁵ Rahnwet, pwihnen ladu lelepek oh loalokong kin kihong sapwellimen Koht pelin sihpw “kanarail kisin mwenge ahnsou me konehng.” (Mad. 24:45) Irail kan nan mwomwohdiso ele naineki sawaspen pwuhken Paipel tohto oh nan ekei lokaia kan mie soangen sawas duwehte Watch Tower Publications Index oh Watchtower Library nan CD-ROM. Patehng met, pahn kaweid en laduwo, elder kan kin doadoahk laud pwe ren padahkih mwomwohdiso. Ni ar kin wia met, elder kan kin doadoahngki ahnsou laud pwe ren kaunopada arail padahk pwe ren kak wia padahk ni ahl me kak kamwakid me rongorong kan. Mie pak ke medewe ia uwen laud en elder kan ar kin doadoahngki ahnsou pwe ren kaunopada arail padahk ong mihting kan oh kapokon kan?

6, 7. (a) Mehn kahlemeng dahieu me Pohl wia ong ohl mah kan nan Deselonika? (b) Dahme kahrehda e kakete apwal ong elder kan rahnwet ren alasang Pohl?

⁶ Ohl mah kan nan Deselonika kin tamataman mehn kahlemeng mwahu me Pohl wiahda ni eh kin apwalih pelin sihpw. Doadoahk en silepen sihpw kin pidada apwalih anahn en mwomwohdiso ni kadek oh limpoak, a kaidehn ni mehnseiren. Nin duwen atail koasoiapene nan iren onop en mwowe, Pohl “kin kadek . . . duwehte nohno men ni eh kin apwahpwalih nah seri kan.” (Wadek 1 Deselonika 2:7, 8.) E pil perenki ‘kihong irail pein eh mour.’ Ni arail kin apwalih pelin sihpw, ohl mah kan anahne duwehte Pohl.

⁷ Kristian sounapwalih kan rahnwet kin alasang Pohl sang ni ar kin apwalih mwahu pelin sihpw. Ekei aramas ele sohte kin kadek oh meteikan kin apwalki patehng irail. Ahpw elder kan kin song en wehwehki oh diar mehkot mwahu rehrail. Mehlel, pwehki eh soh unsek, elder men ele apwalki ahneki madamadau pwung duwen emenemen. Ahpw ni eh song uwen eh kak en kadek ong koaros, ia duwe, kitail sou kin kapinga ih duwen eh nannanti en wia silepen sihpw mwahu men me mi pahn Krais?

8, 9. Ia ekei ahl me elder kan rahnwet “sohte kin tokedihsang apwahpwalih” kitail?

⁸ E konehng kitail koaros en “peikiong” elder kan. Nin duwen me Pohl ntingihedi, “re sohte kin tokedihsang apwahpwalih” atail mour. (Ipru 13:17) Lepin lokaia wet katamankin kitail duwen silepen sihpw men me sohte kin meir pwe en pere nah pelin sihpw. Duwehte met, elder kan rahnwet ele tounmeteikihla arail ahnsoun meir pwe ren apwalih anahn kan en irail kan me soumwahu de nsensuwed de apwalki kapwaiada kaweid en Paipel kan. Karasepe, brother kan me kin iang pwihn me kin sewese me soumwahu kan ong ni palien wini me pid dok en nta kin pirida ni arail memeir pwe ren sewese irail kan me ahneki kahpwal me pid palien  wini. Eri, ni atail kin lelohng soangen kahpwal wet, ia uwen atail kin kalahnganki arail sawas!

⁹ Pwihn en elder kan me kin apwalih koukoudahn Wasahn Kaudok kan, oh pil pwihn me kin sawas ahnsoun melimel ape kin doadoahk laud pwe ren sewese riatail kan. E konehng kitail en uhdahn utungada irail! Medewehla irail ko me kohla iang sawas mwurin melimel Nargis eh lel Myanmar nan pahr 2008. Pwe ren kak lella mwomwohdisohn Bothingone me karanih sehd nan Irrawaddy, wasa me melimelo kauwehla laud, pwihn me kolahng sawaso anahne tang nan wasa kan me ohkihla melimelo oh paliwar en me melahr kan kin wonohnseli nanialo. Ni ahnsou me brother kan wasao kilangada emen brother me wia sounapwalih me kin seiloak mahs ieiang pwihn en sawas me tepin lella Bothingone, re wer nda: “Kilang, atail sounapwalih me kin seiloak! Siohwa ketin doareikitaillahr!” Ia duwe, ke kin pohnese doadoahk laud me elder kan kin wia nin rahn oh nipwong? Ekei elder kin idihdida pwe ren iang pwihn me kin apwalihala kahpwal kan me pidada dihp laud kan. Elder pwukat sohte kin suweiki dahme re kin wia, ahpw irail kan me paiekihda arail sawas kin uhdahn kalahnganki arail doadoahk.—Mad. 6:2-4.

10. Ia pil ekei doadoahk kan me elder kan kin wia?

¹⁰ Elder tohto rahnwet pil pwukoahki wiahda kisinlikou kan, ripoht kan oh doaropwe teikan. Karasepe, soun koasoanehdi pwihn en elder kan kin kaunopada koasoandi en mihting kan nan wihk kan. Sekteri en mwomwohdiso kin kihpene ripoht en kalohk nan ehuehu sounpwong oh sounpar. Sounapwalih en Sukuhl ong Sapwellimen Koht Doadoahk kin nsenohki wiahda koasoandi kan ong sukuhlo. Nan sounpwong siluh koaros, petehkpen ripoht en mwohni en mwomwohdiso kin wiawi. Elder kan kin wadek kisinlikou kan sang ohpis en Sounkadehdehn Siohwa kan oh doadoahngki kaweid kan me kin sewese kolokol “ehupene ni minimin en pwoson.” (Ep. 4:3, 13) Pwehki ar nannanti oh doadoahk laud, elder pwukat kin “wiahda mehkoaros nin duwen me konehng oh koasoandi pwung.”—1 Kor. 14:40.

‘Re en Kin Kaweid Kumwail’

11, 12. Ihs me kin kaweid mwomwohdiso? Wiewia dahieu me kin pidada?

¹¹ Pohl kawehwehda duwen ohl mah kan nan Deselonika me kin doadoahk laud en “kaweid” mwomwohdiso. (1 Des. 5:12) Ni lokaiahn Krihk lepin lokaia wet pil kak wehwehki “kesihnenda mwowe.” Pohl koasoiahki elder kohte me re kin “wie doadoahk” laud. E kin koasoia kaidehn duwen emente me kin “kaweid” mwomwohdiso ahpw duwen ohl mah kan koaros nan mwomwohdiso. Rahnwet, pali laud en elder kan kin kesihnenda mwowe nan mwomwohdiso oh apwalih mihting kan. Wekidekla me ahpwtehn wiawi ong kadoadoahkpen ahd wet “soun koasoanehdi pwihn en elder kan” kin sewese kitail en kilangwohng elder kan koaros nin duwen towe kan en pwihn me kin miniminpene.

¹² En “kaweid” mwomwohdiso kin pidada laudsang wia padahk. Lepin lokaia “apwahpwalih” me kileldi nan 1 Timoty 3:4 ahneki wehwe teieu. Pohl koasoia me sounapwalih men anahne wia ohl men me kin “apwahpwalih mwahu eh peneinei, oh nah seri kan pahn peikiong ni wahu unsek.” Wasaht lepin lokaia “apwahpwalih” kin sansal me e pidada kaidehn ihte padahkih nah seri kan ahpw pil wenla mwowe nan eh peneinei oh sawas pwe “nah seri kan pahn peikiong ni wahu unsek.” Ei, elder kan kin apwalih mwomwohdiso pwe ren sewese koaros ren peikiong Siohwa.—1 Tim. 3:5.

13. Dahme kahrehda ahnsou anahn pwe elder kan en pwungkipene pilipil ehu nan arail mihting?

¹³ Pwe ren apwalih mwahu pelin sihpw, elder kan kin koasoiapene nanpwungarail anahn akan en mwomwohdiso oh ia duwen ar pahn sewese mwomwohdiso ni ahl me keieu mwahu. E kakete mwadang ma emente elder wia pilipil kan koaros. Ahpw arail kin idawehn mehn kahlemeng en pwihn me kin apwalih mwomwohdiso pwon ni mwehin wahnpoaron ko, pwihn en elder kan rahnwet kin koasoiapene ire kan ni saledek oh rapahki kaweid kan sang Paipel. Arail mehn akadei iei en doadoahngki kaweid en Paipel kan ong anahn akan en mwomwohdiso. Met kin keieu pweida ni emenemen elder eh kin kaunopada ong mihting en elder kan oh medemedewe  iren Paipel kan oh kaweid kan me kohsang pwihn en ladu lelepek oh loalokong. Mehlel, met anahne ahnsou. Ni ahnsou me mie wekpeseng en madamadau, me duwehte ahnsou me pwihn me kin apwalih mwomwohdiso koasoiapene duwen sirkumsais ni mwehin wahnpoaron ko, ahnsou laud oh roporop kakete anahn pwe ren ahneki madamadau ehute me kin poahsoankihda iren Paipel kan.—Wiewia 15:2, 6, 7, 12-14, 28.

14. Ke kin kalahnganki me pwihn en elder kan kin doadoahkpene ni minimin? Dahme kahrehda ke ahneki soangen pepehm wet?

¹⁴ Dahme kakete wiawi ma emen elder ngihtehtehki oh kehlailki me eh ahl oh madamadau me mwahu? De ia duwen ma emen kahrehda saminimin me duwehte Diohtrepihs ni mwehin wahnpoaron ko? (3 Sohn 9, 10) Mwomwohdiso pwon pahn uhdahn lokolok. Ma Sehdan songehr en kapingada mwomwohdiso nan mwehin wahnpoaron ko, kitail kak kamehlele me e pil men kauwehla popohl en mwomwohdiso rahnwet. E kakete doadoahngki ineng en roporop en aramas me duwehte ineng en men ndandla. Eri, elder kan anahne kakairada irair en aktikitik oh doadoahkpene nin duwen pwihn minimin ehu. Kitail kin uhdahn kalahnganki elder kan arail aktikitik oh kin sawaspene nin duwen pwihn ehu.

“Panawih Kumwail”

15. Dahme kin kamwakid elder kan ni ar kin panawih Kristian kan?

¹⁵ Pohl eri kasalehda doadoahk ehu me apwal ahpw kesempwal ong ohl mah kan, iei en panawih pelin sihpw. Nan Palien Pwuhk Sarawi ni Lokaiahn Krihk, Pohl kelehpw me doadoahngki lepin lokaiahn Krihk me kawehwehda “panawih.” Lepin lokaia wet kak dokedoke kaweid kehlail me sohte kin wiawi ni lemei.  (2 Des. 3:15) Karasepe, Pohl ntinglahng mwomwohdisohn Korint: “I ndindawohng kumwail mepwukat nan kisinlikou kiset, kaidehn pwe I men kanamenekihkumwailla, ahpw pwe I men panawih kumwail, pwe kumwail nei seri kompoake kei.” (1 Kor. 4:14) Eh limpoak oh nsenohki meteikan kin kamwakid ih en panawih irail.

16. Dahme elder kan konehng tamataman ni ar kin panawih meteikan?

¹⁶ Elder kan kin tamataman me mwomwen arail koasoi kin kesempwal ni arail kin panawih meteikan. Re kin nantihong alasang Pohl sang ni arail kin kadek, limpoak oh kihda sawas. (Wadek 1 Deselonika 2:11, 12.) Ahpw elder kan en kin ‘tengeteng ni mahseno, me likilikpe mie, iei duwen met ar pahn kak kakehlakahki meteikan padahk mehlel.’—Taitus 1:5-9.

17, 18. Dahme ke anahne tamataman ma elder men panawih iuk?

¹⁷ E mehlel me elder kan soh unsek oh ele kin nda soahng kan me re kin koluhkihla mwuhr. (1 Nan. 8:46; Seims 3:8) Elder kan pil kin ese me ni riarail Kristian kan ar kin ale kaweid, met kin kalapw ‘kahrehiong irail nsensuwed, kaidehk peren.’ (Ipru 12:11) Eri ni elder men eh pahn panawih emen, eldero kin medemedewe oh kapakapki duwen met mwohn eh pahn tuhwong aramaso. Ma ke ale peneu, ke kin kalahnganki en eldero eh kin nsenohkin uhk?

¹⁸ Nna medewehla ma ke ahneki soumwahu ehu me ke sohte kak mwadang esehda kahrepen soumwahwo. Toahkte men eri kawehwehda kahrepeo, ahpw ke apwalki pwungki dahme e nda. Ia duwe, ke pahn mwemwehl pahn toahkteo? Soh! Ahpw ma e kangoange iuk ken ale pwal, ele ke pahn pwungki ale pwal pwe ke kamehlele me e pahn wia kamwahu ong uhk. Ele mwomwen en toahkteo kawehwehda omw soumwahwo kin kansensuwediukala, ahpw ia duwe, ke pahn mweidohng omw pepehm en wiahda omw pilipil? Mwein soh. Pil duwehte, ken dehr mweidohng mwomwen omw ale peneu en irehiukedihsang omw men rong irail akan me Siohwa oh Sises ele kin ketin doadoahngki pwehn padahkihong uhk ia duwen omw kak sewese oh pere omw nanpwungmwahu rehn Siohwa.

Kalahnganki Siohwa Eh Ketikihda Elder kan

19, 20. Ia duwen omw pahn kasalehda omw kalahnganki sapwellimen Koht “kisakis en aramas akan”?

¹⁹ Dahme ke pahn wia ma ke alehdi kisakis ehu me wiawihda ong uhk? Ia duwe, ke pahn kasalehda omw kalahngan sang ni omw kin doadoahngki? Siohwa ketin doadoahngki Sises pwe en ketikihong uhk “sapwellime kisakis en aramas akan.” Ehu ahl ken kasalehda me ke kin kalahnganki kisakis pwukat iei sang omw kin rong kanahieng padahk en elder kan oh song en doadoahngki kaweid kan me re kasalehda. Ke pil kak kasalehda omw kalahngan sang ni omw kin wia pasapeng mwahu kan nan mihting kan. Sewese doadoahk me elder kan kin tiengla mwowe wia me duwehte doadoahk en kalohk. Ma ke paiekihda kaweid me ke alehdi sang emen elder, ke sou ndaiong ih met? Patehng mepwukat, ke sou kasalehda omw kalahngan rehn arail peneinei kan? Ken tamataman me ni elder men eh kin doadoahk laud nan mwomwohdiso, eh peneinei kin tounmeteikihla arail ahnsou me re kak ahneki reh.

²⁰ Ei, mie kahrepe tohto kitail en kasalehda atail kalahngan ong elder kan me kin doadoahk laud nanpwungatail, kaweid oh panawih kitail. “Sapwellime kisakis en aramas akan” iei uhdahn koasoandi limpoak sang rehn Siohwa!

Ke Tamataman?

• Dahme kahrehda Kristian kan nan Deselonika anahne kalahnganki irail akan me kin wenla mwowe nanpwungarail?

• Ia duwen elder kan ar kin doadoahk laud ong uhk nan omw mwomwohdiso?

• Ia duwen omw kin paiekihda elder kan ar kin kaweid uhk?

• Ma elder men panawih iuk, dahme ke anahne tamataman?

[Peidek en Onop]

[Kilel nan pali 27]

Ke wehwehki doadoahk tohto me elder kan kin apwalihki mwomwohdiso?