Wiepe Kan ong Kamwahwihala Semwehmwe

ME KEPWEHPWE kan kamwahwihalahr kahpwal en semwehmwe, ahpw ongete pein irail. Wiepe kan me aramas kin doadoahngki pwehn kihsang kahpwal en semwehmwe rehn aramas koaros sohte kin pweida. Dahme kahrehda? Pwehki me kepwehpwe kan sohte kin men emen de mehkot en kerempwa arail mour kepwehpwe de dake me re mi ie. Nanmwarki en Israel en mahs Solomon ntingihdi: “Me milahr nan apwal akan kin wie sengiseng, oh sohte me kin sewese irail. Sohte me kin sewese irail pwehki me kahpwalihirailla kan me ahneki manaman pohrail.”—Eklesiasdes 4:1.

Ia duwe, aramas me ahneki manaman kak kamwahwihala kahpwal en semwehmwe nin sampah? Koht ketin kamwakid Solomon en ntingihdi: “I kilangehr mehkoaros me wiawiher nin sampah, eri I pahn ndaiong uhk, me mehkoaros sohte katepe. Met rasehng pwakipwakih kisinieng. Ke sohte kak kainenehla dahme pireklahr.” (Eklesiasdes 1:14, 15) Atail kin kilang wiepen kauhdi semwehmwe nan atail ahnsou kin kadehdehda mehlelpen mahsen pwukat.

Madamadau kan Duwen Paiamwahu ong Koaros

Sang nan pahr 1801 lel 1900, ni ahnsou me ekei wehi kan kepwehpwehkihla arail kin netiki oh pwainda dipwisou, iangahki wiawihdahn dipwisou kan, ekei me ahneki manaman nanpwungarail kin tepida tehkada mwahu kahpwal en semwehmwe. Ia duwe, audepen sampah me aramas kin doadoahngki kak nehnehpeseng ni pahrek?

Ekei kin medewe me koasoandi en socialism de communism kak kahrehiong koaros en alehdi soangen pai tehieu. Ahpw me kepwehpwe kan sohte pwungki madamadau wet. Mie lepin koasoi lep me irail akan me pwungki koasoandi en communism kin koasoia, “Uwen omw koahiek iei me ke pahn ale.” Me tohto pwungki met. Irail kin koapworopworki me wehi kan koaros pahn pwungki koasoandi en communism pwe sampah en kak wiahla wasahn kousoan mwahu oh kaselel ehu. Ekei wehi kepwehpwe kan pwungki ekei koasoandi en socialism oh koasoanehdi sawas oh inou ehu me re pahn apwalih koaros tohn  arail wehi erein ar mour. Irail nda me re kamwahwihalahr semwehmwe me kin kahpwalihala mouren neirail aramas akan.

Ahpw koasoandi en socialism sohte pweida nan arail mehn akadei en alehdi wasahn kousoan ehu me koaros pahn ahneki pai me pahrek. Dahme re kin nannanti en kapwaiada, me iei aramas akan en doadoahk pwe en wia kamwahu ong arail kousoano a kaidehn pein kamwahuparail, sohte pweida. Ekei sohte men sewese me semwehmwe kan pwehki re medewe me ma re pahn sewese irail, e pahn kahrehiong ren sohte men doadoahk. Mahsen kan en Paipel uhdahn mehlel: “Sohte aramas emen nin sampah me kin wia me pwung ahnsou koaros oh sohte sapwungala pak ehu. . . . Koht ketin wiaikitailda en nsenamwahu oh saledek, kitail ahpw pein kapingkitailda.”—Eklesiasdes 7:20, 29.

Pil ehu koapworopwor me aramas akan kin men en pweida iei madamadau me mehn Amerika kan ahneki, iei ren mi wasa ehu me aramas koaros me men doadoahk laud kak paiamwahula. Nan sampah pwon, wehi tohto kin doadoahngki koasoandi kan me towe kan kin usada kaun kan oh koperment sohte kin kaunda pesines kan. Koasoandi pwukat kin kahrehda Amerika en mwomwen kepwehpwe. Ahpw kaidehn wehi koaros kak ahneki madamadau wet pwehki paiamwahu me wehi kan nan Paliepeng en Amerika ahneki sohte kin kohsangete pelien politik. Arail paiamwahu pil kohsang audepen sapwarail kan oh pil arail wasa kin mengei ong kohlongodo oh kohieilahn dipwisou kan. Patehng met, pwehki siai laud ong paien wehi eh kin wiawi nin sampah, kaidehn koaros kin pweida oh paiamwahula ahpw e pil kin kahrehda aramas en luhs oh lelohng paisuwed. Ia duwe, kangoang kak kohwong wehi paiamwahu kan ren sewese irail kan me wie semwehmwehte?

Koasoandi en Marshall Plan Kak Kauhdi Semwehmwe?

Mwurin Mahwen Keriau en Sampah, Iurop ohla laud oh aramas tohto sang wasao mihla nan keper pwehki duhpek. Koperment en Amerika nsenohki wehin Iurop pwehki pali laud kin pwungki koasoandi en socialism. Eri, erein sounpar pahieu, koperment en Amerika kihda mwohni laud pwehn kamwahwihala palien wiahda dipwisou kan oh palien wahnsahpw nan wehi kan me kin pwungki arail koasoandi kan. Sawas wet me kin kowohng wehin Iurop kin adaneki Marshall Plan. Irail kin nda me sawas wet pweida. Nan Palikapi en Iurop, sawas laud kohsang wehin Amerika oh kahpwal en semwehmwe tikitikla. Ia duwe, ih koasoandi wet me pahn kamwahwihala semwehmwe nan sampah pwon?

Pweidahn koasoandi en Marshall Plan kahrehiong koperment en Amerika en kihda sawas ong wehi semwehmwe kan nan sampah pwon pwehn kakairada palien wahnsahpw, roson mwahu, sukuhl oh mehn peidaid. Wehin Amerika wehkada me kahrepen arail wia met iei ong pein kamwahuparail. Wehi teikan pil song en kihda sawas ong wehi teikan pwe ren pwungkin irailla. Mwurin sounpar 60, mwurin arail doadoahngkihla mwohni laud sang dahme irail doadoahngki ong koasoandi en Marshall Plan, re nsensuwedkihla wahn arail doadoahk. Mehlel, mie ekei wehi semwehmwe kan me uhd kepwehpwehla, keieu laud wehi kan en Palimesen Eisia. Ahpw ekei wasa, mendahki sawas kohda oh malaulaula seri me kin mehla oh pil miehla sukuhl mwahu, wehi tohto kin mihmihte nan irair en semwehmwe laud.

Dahme Kahrehda Sawas Sang Sahpw Teikan Sohte Kauhdi Semwehmwe

Sewese wehi semwehmwe kan en pitsang semwehmwe kin apwal sang sewese wehi kepwehpwe kan en pwurehng mwahula mwurin mahwen kan. Miehier en wehin Iurop koasoandi en wiahda dipwisou kan, palien netinet oh palien kihla oh wahdo dipwisou kan. Ihte me anahn iei ren kamwahwihala paien wehio. Nan wehi semwehmwe kan, mendahki sawas sang liki me duwehte wiawihdahn ahl akan, sukuhl, imwen wini, ahpw aramas akan kin lokolongkihte semwehmwe laud pwehki wehi pwukat sohte itar audepen sapwarail kan, sohte arail pesines, oh sohte arail elen netinet.

 Soahng kan me kin kahrehda kahpwal en semwehmwe eh laudsang mahs iei mehkot me apwal en kamwahwihala. Karasepe, soumwahu me kin kahrehda semwehmwe oh semwehmwe me kin kahrehda soumwahu. Seri kan me sohte itar kanarail mwenge kin luwet ni paliwar oh madamadau, kahrehda ni arail laudla, re pil sohte kak apwalih pein neirail seri kan. Oh pil ni ahnsou me wehi kepwehpwe kan kin kihda “sawas” ong wehi semwehmwe kan, e kin kauwehla en soumwet kan oh soun netinet kan ar pesines, oh met kin kalaudehla irair en semwehmwe me re ahneki. Ar kin kadarala mwohni ong koperment en wehi semwehmwe kan pil kin kahrehda kahpwal. E kin mengei en pirapahla sawas kan me kohda, oh e kin kak kahrehda en mie mwersuwed oh met kin kak kalaudehla semwehmwe. Eri, sawas sang sahpw teikan sohte kin pweida pwehki e sohte kak kamwahwihala uhdahn kahrepen semwehmwe.

Kahrepen Semwehmwe

Semwehmwe kin kohsang ineng en roporop me wehi kan, koperment kan, oh aramas akan kin ahneki. Karasepe, koperment en wehi kepwehpwe kan sohte kin nohn nsenohki kamwahwihala kahpwal en semwehmwe me kin wiawi nan sampah pwon pwehki tohn arail wehi me kin usada irail oh re anahne pahsan neirail tohn usuhs kan. Ihme kahrehda re sohte kin mweidohng soumwet kan nan wehi semwehmwe kan en netikihong wehi kepwehpwe kan arail dipwisou kan pwe e de kahrehda neirail soumwet kan ren luhs sang arail pesines. Pil ehu, kaun en wehi kepwehpwe kan kin kihda mwohni laud pwehn sewese neirail soumwet kan en netikihla dipwisou laudsang soumwet nan wehi semwehmwe kan.

Eri, e sansal me aramas me kin kahrehda semwehmwe pwehki aramas oh koperment kan kin men pere soahng kante me pein irail kin nsenohki. Solomon, emen sounnting en Paipel, kawehwehda nin duwen met: “Ekei aramas ahneki manaman, a ekei kin wie lokolok pahn ar manaman.”—Eklesiasdes 8:9.

Eri, mie koapworopwor en kamwahwihala kahpwal en semwehmwe? Mie koperment me kak kihsang ineng en roporop me kin mi rehn aramas?

[Koakon nan pali 6]

Kosonned Ehu ong Apwalihala Semwehmwe

Siohwa Koht ketikihong wehin Israel kosonned kei me ma re pahn peikiong, e pahn pereirailsang semwehmwehla. Kosonnedo kasalehda me peneinei koaros kak sohsohki sahpw, ihte keinek en samworo iei mehn Lipai ko me soh. Arail sohsohn peneinei sohte kak kohsang irail kohkohlahte pwehki e pahn pwurehng kapwurupwurulahng irail. Mwurin sounpar 50 koaros, sahpw koaros pahn kin kapwurupwurulahng aramas me uhdahn sapwenikio de eh peneinei. (Lipai 25:10, 23) Ma soumwahu, kahpwal de dangahnga me kahrehda emen eh pahn netikihla sapweo, sahpwo pahn kapwurupwurulahng ih ni soh isepe mwurin sounpar 50. Sohte ehu dih en peneinei pahn mihla nan semwehmwe.

Pil ehu sapwellimen Koht Kosonned limpoak kadek iei me kin mweidohng aramas emen en netikihla pein ih en wiahla lidu pwehki kahpwal me e lelohng. Pweineo pahn mwadang kohieng ih pwehn pwainla eh pweipwando. Ma e pil sohte kapwungala eh pweipwando ni keisuhwen pahro, e pahn saledekla oh weren tuhke kan oh mahn akan pahn kowohng ih pwehn kak pwurehng wie mwetuwel. Patehng met, ma aramas semwehmwe men pweipwandkihda mwohni, Kosonnedo sohte mweidohng mehn Israel kan en ale wihn en mwohnio. Kosonnedo pil kehkehliki me aramas akan en dehr pelehsang wahnsapwarail ko me mi ni idin mwahto pwe me semwehmwe kan en ale kanarail. Eri, mehn Israel kan sohte pahn anahne pekipek.—Deuderonomi 15:1-14; Lipai 23:22.

Ahpw poadopoad kin kasalehda me ekei mehn Israel kan semwehmwehla. Dahme kahrehda? Mehn Israel ko sohte peikiong sapwellimen Siohwa Kosonned. Eri met kahrehda ekei aramas me sapweniki sahpw en kin kepwehpwehla a me sohla sapwarail uhd semwehmwehla. Mie semwehmwe nanpwungen mehn Israel kan pwehki ekei irail kin sapeikiong sapwellimen Koht Kosonned oh kin nsenohkihte pein arail anahn laudsang en meteikan.—Madiu 22:37-40.