Ia Duwen Pahpa oh Nohno kan Ar Kak Kasukuhlih Seri kan Duwen Koht? Mehnia Wiepen Kasukuhl me Keieu Mwahu?

“Dehr manokehla kosonned pwukat me I kihong kumwail rahnwet. Padahkihong noumwail seri kan. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.”​—DEUDERONOMI 6:6, 7.

EKEI pak pahpa oh nohno kan kak pehm me e apwal en wia arail pwukoa en kaiahne neirail seri kan. Ahpw ahnsou me re kin rapahki kaweid, re kin pingida pwehki soangsoangen kaweid kan me re kin rong oh wadek. Kisehrail kan oh kompoakparail kan kin mwadang en kihda kaweid. Pwuhk kan oh Internet pil kin kihong pahpa oh nohno kan kaweid tohto me kin uhpene.

Ahpw Paipel kin kihong pahpa oh nohno kan kaweid likilik kan ong dahme re anahne padahkihong neirail seri kan oh pil kaweid mwahu ong ia duwen arail pahn wia met. Nin duwen me iren Paipel kan me kileldi powe kasalehda, pahpa oh nohno kan anahne rapahki ia duwen ar pahn koasoiaiong neirail seri kan duwen Koht ehuehu rahn. Iet kaweid pahieu sang Paipel me sewesehdahr pahpa oh nohno tohto duwen arail pahn padahkihong neirail seri kan duwen Koht.

1. Padahkihong noumwail seri kan dahme re kak sukuhlki sang kapikipikda kan. Wahnpoaron Pohl ntingihedi: “Sang ni ahnsou me Koht ketin kapikada sampah, aramas kak dehdehki me ih uhdahn Koht mehlel oh sapwellime manaman me poatopoat. Mepwukat me sansal mwahu sang ni wiepen nin lime kan.” (Rom 1:20) Pahpa oh nohno kan kak sewese neirail seri kan ren wehwehki me re kak ahneki nanpwungmwahu rehn Koht sang ni arail kin sewese irail ren wehwehki oh kesempwalki sapwellimen Koht kapikipik kan oh sapwellime irair kan me kapikipikda pwukat kin kasalehda.

Sises ketin doadoahngki wiepe wet ni eh kin ketin padahki sapwellime tohnpadahk kan. Karasepe, e mahsanih: “Kumwail tehk mwahu menpihr en pahnlahng kan: re sohte kin padok wahntuhke, re sohte kin dolung, re sohte kin nahkpene nan imwen nekinek kan; a Samamwail me ketiket nanleng kin ketin apwalih irail. A ia duwe, kumwail soh kesempwalsang menpihr kan?” (Madiu 6:26) Sises ketin kasalehda wasaht duwen sapwellimen Siohwa limpoak oh kadek. Ahpw e ketin wia laudsang met. E kin ketin sewese sapwellime tohnpadahk ko ren medewe ia duwen Koht eh ketin kasalehda irair pwukat ong sapwellime seri kan.

Nanmwarki Solomon koasoia duwen erpit me Koht ketikihong ketitik kan oh doadoahngki irail pwe en kasalehda kaweid kesempwal ehu. E ntingihedi:  “Aramas pohnkahke kan uhdahn pahn ale padahk sang ni mwomwen mouren ketitik kan. Sohte arail sounkaweid, soumas, de kaun, ahpw re kin nekidala kanarail kisin mwenge ni ahnsoun karakar, kaunopadahng ahnsoun kopou.” (Lepin Padahk 6:6-8) Met wia kaweid kaselel ehu en padahngki kesempwalpen wiahda mehn akadei mwahu kan oh doadoahngki atail kehl pwe en lel mehn akadei pwukat!

Pahpa oh nohno kan kak alasang wiepen kasukuhl me Sises oh Solomon doadoahngki sang ni arail pahn wia mepwukat: (1) Idek rehn neirail seri kan mehnia tuhke oh mahn akan me re kin perenki. (2) Kalaudehla arail wehwehki duwen tuhke oh mahn pwukat. (3) Padahkihong neirail seri kan dahme re kak sukuhlki duwen Koht sang kapikipikda pwukat.

2. Alasang sapwellimen Sises wiewia ong irail kan me e ketin padahki. Nanpwungen aramas koaros me momour, Sises kak ketin mahsanihwei mehkan me keieu kesempwal. Ahpw e kin ketin doadoahngki ahnsou laud pwe en idek peidek kan. E kin ketin nsenohki madamadau oh pepehm en irail me e ketin padahki. (Madiu 17:24, 25; Mark 8:27-29) Pil duwehte, mie soahng kesempwal tohto me pahpa oh nohno kan kak padahkihong neirail seri kan. Ahpw, pwe ren kak pweida, re anahne alasang Sises oh kangoange neirail seri kan ren kasalehda arail pepehm ni saledek.

Ia duwen ma seri kan kin pwand en kapwaiada kaweid kesempwal kan? Medewehla ia duwen Sises eh ketin padahki sapwellime wahnpoaron kan. Ekei pak re kin akamaipene oh pwand en esehla kamwahupen ren aktikitik. Ahpw Sises kin ketin kanengamah oh pwurepwurehng mahsanih duwen anahnepen arail en aktikitik. (Mark 9:33, 34; Luk 9:46-48; 22:24, 25) Pahpa oh nohno kan me kin alasang Sises pahn kapwungala neirail seri kan ni kanengamah, oh ma anahn, re pahn pwurepwurehng padahngki ireo lao seri ko uhdahn wehwehkihla kesempwalpen ireo. *

3. Padahki seri kan sang arail mehn kahlemeng mwahu. Pahpa oh nohno kan anahne rong kaweid me wahnpoaron Pohl kihong Kristian akan nan Rom. E ntingihedi: “Ke kin padahkih meteikan—a dahme ke sohte pil padahkihki pein kowe? Ke kin nda, ‘Dehr pirap’—a ia duwe, ke sohte kin pirap?”​—Rom 2:21.

Kaweid wet kesempwal pwehki seri kan kin mwekidki laud dahme pahpa oh nohno kan kin wia sang dahme re kin nda. Ni mehlel, seri kan kin kalapw peikiong arail pahpa oh nohno kan me kin wia dahme re padahngki.

4. Tapiada padahki seri kan ni ahnsou me irail tikitik. Timoty me iang wahnpoaron Pohl nan eh seiloak en misineri kin adamwahu nan eh wasa. (Wiewia 16:1, 2) Ehu kahrepen met iei pwehki sang ni eh “kisin seri [“seri pwelel,” NW] e kin ale kasukuhl sang “Pwuhk Sarawi.” En Timoty eh nohno oh nohno kahlap kin wadek iren Paipel kan ong ih oh pil sewese ih en medemedewe padahk mehlel kan me ire ko kasalehda.​—2 Timoty 1:5; 3:14, 15.

Wasa me Ke Kak Diar Sawas

Sounkadehdehn Siohwa kan kin wiahda pwuhk tohto me kak sewese pahpa oh nohno kan ren padahkihong neirail seri kan dahme mehlel duwen Koht. Ekei kin ntingdi pwe en sewese seri tikitik kan. Ekei kak sewese pahpa oh nohno kan oh neirail mwahnakapw oh peinakapw kan ren kak koasoipene ni saledek. *

Mwohn pahpa oh nohno kan kak padahki neirail seri kan duwen Koht, irail anahne ese pasapengpen ekei peidek apwal kan me seri kan kakete idek. Karasepe, ia duwen omw pahn sapeng soangen peidek pwukat: Dahme kahrehda Koht ketin mweidohng lokolok en mie? Ia kupwuren Koht ong sampah? Ia wasa me melahr kan kin mi ie? Sounkadehdehn Siohwa kan pahn perenki seweseiuk ken sukuhlki pasapengpen peidek pwukat oh peidek teikan pwe kowe oh omw peneinei en kak karanih Koht.—Seims 4:8.

[Nting tikitik kan me mi pah]