1, 2. Dahme kahrehda ekei ele pahn men sukuhlki duwen wahntuhke pik?

 MIE soangen wahntuhke ehu me adaneki pik. Nan Paipel, mehn Israel kan kin perenki kang. (Nah. 3:12; Luk 13:6-9) Rahnwet, mie tuhkehn pik wasa tohto nan sampah. Wahntuhke pik kin mwahuong roson en paliwar, oh ekei aramas nda me e mwahuong mohngiongitail.

² Ehu pak, Siohwa ketin karasahiong aramas wahntuhke pik. E sohte ketin mahmahsanihong aramas duwen wahntuhke pik eh kak sewese arail roson E ketin mahmahsanih dahme mi nan mohngiongirail. Dahme e ketin mahsanih kak sewese kitail oh irail kan me kitail poakohng. Erein atail koasoiapene dahme e ketin mahsanih, medewe duwen dahme kitail Kristian kan anahne sukuhlki.

3. Ia wehwehn wahntuhke pik ko me kileldi nan Seremaia irelaud 24?

³ Nan pahr 617 mwohn Krais, mehn Suda kan kin wiewia soahng kan me Siohwa ketin kalahdeki. E ketikihong Seremaia kaudiahl ehu duwen dahme pahn wiawihong mehn Suda. E ketin kawehwehda kopwou en wahntuhke pik riau, me wehwehki pwihn en aramas riau. Pik ko me mi nan ehu kopwou ko “inenen kaselel,” oh pik ko me mi nan kopwou teio “inenen sakanakan.” (Wadek Seremaia 24:1-3.) Pik sakanakan ko wehwehki Nanmwarki Sedekaia oh irail kan me duwehte ih me Nanmwarki Nepukadnesar oh nah sounpei ko pahn kereniong mahweniong. Ahpw mie aramas akan me duwehte pik kaselel ko. Ekei irail iei Esekiel, Daniel oh kompoakepah silimeno oh ekei mehn Suhs me pahn kalipilipala Papilon. Ekei pahn pwurala Serusalem mwuhr oh onehda tehnpaso.​—Ser. 24:8-10; 25:11, 12; 29:10.

4. Dahme kahrehda dahme Siohwa ketin mahsaniheki duwen mehn Suda ko kin kangoange kitail?

⁴ Siohwa ketin mahsaniheki duwen aramas mwahu  ko: “I pahn kihong irail mohngiong ehu pwehn esehla ngehi, me ngehi iei Siohwa; oh re pahn wiahla nei aramas.” (Ser. 24:7, NW) Iren Paipel wet kangoange kitail pwehki e wehwehki me Koht ketin kupwurki kitail en ahneki “mohngiong ehu pwehn esehla” ih, de soangen aramas me men esehla ih oh me men wia kisehn sapwellime aramas. Ia duwen atail pahn wiahla soangen aramaso? Kitail en onopki Paipel oh kapwaiada dahme kitail sukuhlki. Eri, kitail en koluhla oh uhdihsang wiewia dihp nan atail mour. Mwuhr, kitail en inoukihong Koht atail mour oh papidaisla ni mwaren Sahmo, sapwellime Ohlo, oh sapwellimen Koht manaman. (Mad. 28:19, 20; Wiewia 3:19) Ke wiadahr kahk pwukat? De met ke kin kaukaule towehda mihting kan en Sounkadehdehn Siohwa kan oh wiewia kahk pwukat?

5. Ihs me Seremaia uhdahn ntingihedi duwe?

⁵ Mehnda ma kitail wiadahr kahk pwukat, kitail anahne pousehlahte ahneki madamadau pwung oh kanahieng mwomwen atail mwekid. Dahme kahrehda? Kitail pahn sukuhlki pasapengo ni atail koasoiapene dahme Seremaia ntingihedi duwen mohngiong. Ekei pwuhken Seremaia kin koasoia duwen wehi kan me mi limwahn Suda. Ahpw pali laud e kin koasoia duwen wehin Suda erein kaundahn eh nanmwarki limen ko. (Ser. 1:15, 16) Seremaia ntingihedi duwen irail kan me inoukihongehr Siohwa arail mour. Ni mwehin Moses, aramas ako pwungki me ren wiahla sapwellimen Siohwa. (Eks. 19:3-8) Pil ni mwehin Seremaia, aramas ako nda: “Se pahn pwuralahng rehn KAUN-O pwehki ih me atail Koht.” (Ser. 3:22) Ahpw ia duwen, re ahneki mohngiong pwung?

6. Dahme kahrehda kitail en men ese dahme Koht ketin mahsaniheki duwen mohngiong?

⁶ Toahkte kan kak doadoahngki misihn kan pwehn kilang nan paliwaratail oh kilang ma mohngiongitail kehlail. Ahpw Siohwa kak ketin mwahngih atail mohngiong ni karasaras de soangen aramas dah kitail. E ketin mahsanih: “Ihs me kak wehwehki audepen mohngiong en aramas? Sohte mehkot me duwehte me diren piht; sohte kamwahupe ieu kak dierekda. Ngehi, KAUN-O, I kin rapahki oh tehk mwahu nan kapehd en aramas akan, . . . I kin katingih emenemen nin duwen me konehng mwomwen eh mour, nin duwen me konehng eh wiewia kan.” (Ser. 17:9, 10) Koht kak ketin mwahngih dahme kitail mwahuki, mwomwen atail madamadau, pepehm, oh atail mwekidki mehkot, oh atail mehn akadei kan nan mour. Koht pahn ketin kasawih mohngiongitail. Ahpw pein kowe pil kak nantihong kasawih dahme mi nan mohngiongomw.

7. Ia duwen Seremaia eh kawehwehda mohngiong en pali laud en mehn Suhs ko ni eh mwehio?

⁷ Pwehn kaunopada ong keseu wet, ele kitail kak idek, ‘Ia irair en mohngiong en pali laud en mehn Suhs ko ni mwehin Seremaia?’ Seremaia nda me mendahki mehn Suhs ko sirkumsaislahr, re “sohte kapwaiada inou me doake tiahk wet.” (Ser. 9:25, 26) Ei, mohngiongirail sohte lelepek ong Siohwa.

8, 9. Dahme pali laud en mehn Suhs ko ni mwehin Seremaia anahne wia?

⁸ Koht ketin kangoangehki mehn Suhs ko ren “tokedihsang ar mour suwed kan—wekidala ar tiahk kan oh soahng suwed kan me re kin wiewia.” (Ser. 18:11) Arail tiahk kan suwed pwehki mohngiongirail suwed. (Wadek Mark 7:20-23.) Re kin kahngohdi oh sohte men koluhla. Mohngiongirail, me iangahki arail wiewia oh madamadau, kin suwed mwohn silangin Siohwa. (Wadek Seremaia 5:23, 24; 7:24-26.) Koht ketin mahsanihong irail ia duwen arail kak koluhla ni eh ketin mahsanih: “Kumwail sirkumsaisla ong Siohwa, oh sirkumsaisihala mohngiongimwail kan.”​—Ser. 4:4, NW.

 ⁹ E mwomwen me mohngiong en mehn Suhs ko ni mwehin Seremaia anahne koadoahk. Mehn Israel kan ni mwehin Moses pil ahneki soangen kahpwal wet. (Deud. 10:16; 30:6) Ia duwen mehn Suhs ko ar kak “sirkumsaisihala” mohngiongirail? Re anahne kihsang soangen madamadau, ineng, oh wiewia koaros me kin kahrehda ren pohnsehsehla sapwellimen Siohwa kosonned kan.​—Wiewia 7:51.

10. Ia duwen atail kak alasang ahn Depit mehn kahlemeng?

¹⁰ Kitail anahne kalahnganki me Koht ketin sewese kitail en wehwehki duwen mohngiong en aramas ni karasaras.Ahpw pwehki kitail wialahr sapwellimen Siohwa ladu, kitail uhdahn anahne pwunodki mohngiongitail? Pali laud en tohn mwomwohdiso kin papah Siohwa ni lelepek oh ahneki tiahk mwakelekel. Re sohte wiewiahla “wahntuhke pik sakanakan kei.” Ahpw tamataman me ohl pwung Depit patohwanohng Siohwa: “Maing Koht, komw ketin kasawih ie, pwe komwi en mwahngih mohngiongiet; komw ketin song ie, pwe komwi en mwahngih ei lamalam akan. Komw ketin rapahki ma mie suwed ehu rehi.”​—Mel. 17:3; 139:23, 24.

11, 12. (a) Dahme kahrehda kitail anahne kasawih mohngiongitail? (b) Dahme kitail en dehr kasik Siohwa en ketin wia?

¹¹ Siohwa ketin kupwurki emenemen kitail en esehla ih, me iei en pwungla reh oh kolokolete irair wet reh. Seremaia nda me Siohwa kin ketin kasawih me pwung kan oh E kin ketin mwahngih “audepen nan kapehdirail kan.” (Ser. 20:12) Pwehki Siohwa pil kin ketin kasawih mohngiong en me pwung kan, kitail koaros anahne kasawih dahme uhdahn mi nan mohngiongitail. (Wadek Melkahka 11:5.) Ni atail wia met, ele kitail kak diarada nan mohngiongitail me kitail ahneki madamadau, pepehm, de mehn akadei sapwung kan me kahrehda mohngiongitail en sohte pehmitikiong soahng sapwung kan. Mwein kitail kin pwand en peikiong Siohwa. Ele kitail anahne mohngiongitail en koadoahk ni karasaras pwehn kihsang soahng suwed kan. Soangen madamadau de pepehm sapwung dah me kakete mi nan mohngiongitail? Ia duwen atail kak wiahda wekidekla kan?​—Ser. 4:4, NW

¹² Siohwa sohte pahn ketin idingkihong kitail en wiahda wekidala kan. E ketin mahsaniheki duwen “wahntuhke pik kaselel” ko me e pahn “kihong irail mohngiong ehu pwehn esehla” ih. Ahpw e sohte pahn ketin idingkihong irail ren wekidala mohngiongirail. Re anahne men esehla Koht, oh kitail anahne wia soahngohte.

13, 14. Ia duwen dahme mi nan mohngiong en emen eh kak keper ong ih?

¹³ Sises mahsanih me dahme mi nan mohngiong en emen kak kahrehiong en ahneki “lamalam suwed kan,” kamaramas de kamwahl, de wia soangen tiahk samin teikan. (Mad. 15:19) Karasepe, ma aramas emen ahneki ineng suwed kan nan eh mohngiong, e pahn kakete wiahda dipen kamwahl de nenek. Ma e sohte koluhla, e  pahn luhs sang sapwellimen Koht kupwuramwahu kohkohlahte. Mendahki e sohte wiahda dihp laud ehu, e pahn kakete mweidohng ineng suwed kan en lalaudla nan eh mohngiong. (Wadek Madiu 5:27, 28.) E kesempwal en tehk mwahu me kitail en dehr ahneki soangen ineng suwed pwukat nan mohngiongitail. Ke kin medemedewe emen ni rir ni ahl ehu me Siohwa sohte ketin kupwurki? Ke anahne wiahda wekidekla kan nan omw mohngiong?

¹⁴ Pil duwehte, Kristian men kakete mweidohng eh lingeringer pahn emen en laudla lao eh tepida kailongki nan eh mohngiong. (Lip. 19:17) E anahne nantihong laud pwehn kihsang soangen pepehm pwuko.​—Mad. 5:21, 22.

15, 16. (a) Ia duwen Kristian men eh kak sohte “kapwaiada” sapwellimen Siohwa inou? (b) Dahme kahrehda ke leme me atail sohte “kapwaiada” sapwellimen Siohwa inou sohte pahn kaperenda ih?

¹⁵ Pali laud en Kristian kan sohte kin mweidohng pein irail en ahneki soangen ineng oh pepehm pwukat nan mohngiongirail. Ahpw Sises pil mahsanih duwen “lamalam suwed kan.” Karasepe, kitail kakete medewe me atail loalopwoat ong atail peneinei iei me keieu kesempwal. Ei mehlel, Kristian kan kin men poakohng kisehrail kan, a kaidehn ren duwehte irail kan nan sampah rahnwet me kin “sempoak.” (2 Tim. 3:1, 3) Ahpw kitail kak nohn daulihala ni atail kin loalopwoatohng atail peneinei. Me tohto kin medewe me arail peneinei iei me keieu kesempwal. Ma emen kansensuwedihala emen tohn arail peneinei, re pil kin iang nsensuwedla. Rien Daina pwutak ko inenen lingeringerda pwehki aramas tiahk suwedih. Imwila, irail kemehla ohl tohto. (Sen. 34:13, 25-30) Oh pepehm suwed me Apsalom ahneki nan eh mohngiong kahrehiong eh kemehla Amnon. (2 Sam. 13:1-30) Ei, “lamalam suwed kan” kak uhdahn keper.

¹⁶ Kristian mehlel kan sohte kin kemehla aramas. Ahpw ekei ele kin inenen lingeringerda ni ahnsou me mehkot suwed kin wiawihong emen tohn arail peneinei. De mwein re pein medewe me mehkot suwed wiawihong emen tohn arail peneinei. Eri ia mwomwen arail wiewia ong meno me re medewe me wiahda suwedo? Ele re sohla kin patehng de luke en kohla mwemweit rehrail. (Ipru 13:1, 2) Ahpw Kristian men me kin kasalehda limpoak ong rie kan sohte pahn mwekid ni ahl wet. Siohwa ketin mwahngih dahme mi nan mohngiongitail. Ma e ketin mahsanihada pepehm suwed pwukat nan mohngiongitail, e pahn ketin mahsanih me kitail sohte ‘kapwaiada eh  inou.’ (Ser. 9:25, 26) Siohwa ketin mahsanih: “Kumwail . . . sirkumsaisihala mohngiongimwail kan.”​—Ser. 4:4, NW.

17. Ma kitail wauneki Siohwa, dahme kahrehda e pahn mengei en wiahda wekidekla kan nan mohngiongitail?

¹⁷ Ni ahnsou me ke kasawih omw mohngiong, ele ke pahn diar me ke sohte kin mwadang en peikiong sapwellimen Siohwa kaweid kan nin duwen me ke anahne wia. Eri mwein ni ahl ehu ke sohte kin “kapwaiada” sapwellimen Siohwa inou. Mwein ke kin masak dahme meteikan pahn medewehkin uhk. De ele ke men ndand de naineki mwohni tohto. Ekei pak ele ke pahn kahngohdi de ngihtehtehki wia sohte lipilipil dahme ke men wia. Ekei kin ahneki soangen pepehm wet. (Ser. 7:24; 11:8) Seremaia ntingihedi me mehn Suhs soaloalopwoat ko ni eh ahnsowo kin “kahngohdi oh keptakai.” Re sohte wauneki Siohwa, mendahki e ketin poakohng irail oh ketikihong irail soahng koaros me re anahne. (Ser. 5:23, 24) Ma kitail kin wauneki Siohwa, kitail pahn kihsang me suwed nan mohngiongitail. E pahn mengei ong kitail en wiahda wekidekla kan nan mohngiongitail oh wia soahng koaros me Siohwa ketin mahsanihong kitail.

18. Dahme Siohwa ketin inoukihong irail kan me iang inou kapwo?

¹⁸ Ni atail kin nannantihong wia met, Siohwa pahn ketikihong kitail “mohngiong ehu pwehn esehla” ih. E ketin inoukihda me e pahn ketin wia met ong me keidi ko me iang inou kapwo. E ketin mahsanih: “I pahn kihdi ei kosonned nan kapehdirail kan oh ntingihediong nan mohngiongirail kan. I pahn wiahla ar Koht, oh re pahn wiahla nei aramas.” E ketin pousehlahte mahsanih: “Sohte emen rehrail pahn anahne padahkihong tohn eh wehi men en ese KAUN-O, pwehki koaros pahn ese ie, sang me tikitik lel me lapalap. I pahn mahkikihong diparail kan oh I solahr pahn tamanda arail sapwung kan.”​—Ser. 31:31-34. *

19. Dahme kitail kak kasikasik?

¹⁹ Kitail kin kasikasik dahme Koht ketin inoukihda. Kitail koaros kin men esehla Siohwa oh iang kisehn sapwellime aramas akan. Ahpw kitail kak esehla Siohwa kohkohlahte ihte ma kitail ale mahkpen dipatail kan me poahsoankihda sapwellimen Krais meirong. Pwehki kitail kak ale mahkpen dipatail kan, kitail pil men mahkohng meteikan, mehnda ma e mwomwen apwal en wia met. Kitail anahne doadoahk laud pwehn kihsang soangen lingeringer oh kailok koaros me kitail ahneki ong meteikan. Met pahn sewese kitail en kasalehda me kitail men papah Siohwa oh esehla ih mwahu. Kitail pahn duwehte irail ko me Siohwa ketin mahsaniheki: “Kumwail pahn rapahkin ie, oh kumwail pahn diar ie, pwe kumwail pahn rapahkin ie sang nan kapehdamwail kan unsek. Ei, I mahsanih me kumwail pahn diar ie.”​—Ser. 29:13, 14.