1-3. Ia duwen atail wadewadek Paipel oh kapwaiada dahme kitail sukuhlki ar kin sewese kitail?

 EMEN riatail sister mah nda, “Ni menseng koaros I kin kalahngankihong Siohwa eh ketin sewese I en wehwehki Paipel.” Mendahki e wadekehr Paipel tohtohsang pak 40, e kin wadewadekte. Sister pwulopwul men ntingihedi me wadewadek Paipel kin sewese en ese me Siohwa uhdahn mie oh en ahneki nanpwungmwahu keren reh. E nda, “I uhdahn peren laudsang mahs.”

² Wahnpoaron Piter padahkihong kitail me kitail anahne poakohng padahk mehlel me kohsang Mahsen en Koht. (1 Pit. 2:2) Ni atail kin onopki Paipel oh kapwaiada dahme e kin padahngki, kitail kak ahneki nsenmwakelekel oh atail mour pahn mie kahrepe. Padahk kan en Paipel kak sewese kitail en ahneki nanpwungmwahu rehn meteikan me pil kin poakohng oh papah Koht mehlelo. Mepwukat wia kahrepe mwahu me kitail en “perenkihda kosonned en Koht.” (Rom 7:22) Ia pil ekei ahl me onop Paipel kak sewese kitail?

³ Uwen laud en omw sukuhlki duwen Siohwa oh sapwellime Ohlo, ih uwen laud en omw poakohng ira oh meteikan pahn kekeirda. Paipel pahn pil padahkihong uhk ia duwen Koht eh pahn ketin doarehla aramas pwung kan ni eh pahn ketin kasohrehla me suwed. Mie rohng mwahu ken padahkihong aramas nan omw doadoahk en kalohk. Oh ke kak kamehlele me Siohwa pahn ketin sewese iuk ni omw padahkihong meteikan dahme ke sukuhlki.

4. Ia wehwehn en wadek Paipel “ni ngihl tikitik”?

⁴ Siohwa ketin kupwurki kitail en kihong ahnsou en medewe oh wehwehki dahme kitail wadek nan Paipel. E ketin mahsanihong Sosua: “Ke sohte pahn uhdihsang koasoakoasoia  duwen pwuhken kosonnedo, oh ke pahn kin wadek ni ngihl tikitik nin rahn oh nipwong.” (Sos. 1:8, NW; Mel. 1:2) Ia duwe, met wehwehki me kitail anahne ngihl laud de mwenginingin ni atail wadek Paipel pwon? Soh. E wehwehki me ke anahne wadek ni uwen wawai me itar pwe ken kak medemedewe dahme ke wadek. Met pahn sewese iuk ken medemedewehte ire tikitik kan me ke kak doadoahngki oh kangoange iuk. Ma ke diar iren kangoang de koasoipen emen, wadek ni wawai, mwein pil nda lepin lokaia ko ni ngihl tikitik. Eri dahme ke wadewadek kak uhdahn sair omw mohngiong. Dahme kahrehda met kesempwal? Pwehki ni omw wehwehkihla mehlel sapwellimen Koht kaweid, ke pahn men idawehn nan omw mour.

5-7. Menlau kihda karasaras kan duwen wadewadek Mahsen en Koht ni wawai oh keneinei eh kak sewese iuk ken (a) peikohng sapwellimen Koht kosonned kan; (b) lokaia kadek ong meteikan; (c) likih Siohwa nan ahnsou apwal akan.

⁵ Ni atail wadewadek pwuhken Paipel kan me kitail medewe me apwal en wehwehki, e kak sawas ma kitail wadek ni wawai oh keneinei pwe kitail en kak medewe dahme kitail wadewadek. Karasepe, medewehla duwen brother pwulopwul men me wadewadek pwuhken Oseia ni keneinei. Nan irelaud 4, e uhdi pwehn medemedewe mwurin eh wadek iretikitik 11 lel 13. (Wadek Oseia 4:11-13.) Dahme kahrehda e medemedewehte iretikitik pwukat? Me keren, e lelohng kasongosong nan sukuhl en wia tiahk samin. Ahpw ni eh kin medemedewe iretikitik pwukat, e ndaiong pein ih: ‘Siohwa kin ketin mwahngih soahng suwed kan me aramas kin wia oh pil ni arail kin kelehpwla. I sohte men kansensuwedihala ih.’ Brothero pilada me e pahn tehk mwahu me e kin peikiong sapwellimen Siohwa kosonned akan me pid tiahk.

⁶ Keriau en karasaras, medewehla sister men me wadewadek ni keneinei pwuhken Soel lao lel irelaud 2 iretikitik 13. (Wadek Soel 2:13.) Iretikitik wet kahrehiong en pohnese me e anahne alasang Siohwa, me ketin “kupwurkalahngan oh diren mahk; ih me ketin kanengamah.” E pilada en wiahda wekidekla kan pwehki ekei pak e kin koasoi kamedek oh lingeringer ong eh pwoud oh meteikan.

⁷ Karasaras kesiluh, medewehla brother men me mie eh pwoud oh nah seri. E sohla doadoahk oh kin pwunodki ia duwen eh pahn apwalih eh peneinei. E wadek ni keneinei pwuhken Nahum. E wadek nan Nahum 1:7 me Siohwa ketin mwahngih irail kan me kin likih ih oh me e pahn ketin pere irail “ni ahnsou apwal.” Met sewese brothero en pohnese me Siohwa ketin poakohng ih oh eh peneinei, oh met e solahr kin pwunod laud. Ih eri wadek ni keneinei iretikitik 15. (Wadek Nahum 1:15.) E pohnese me e kak kadehdehda me e likih Siohwa ni eh kin kalokalohki rongamwahwo mendahki e mi nan ahnsou apwal. Eri, erein eh kin raparapahki ehu doadoahk kapw, e pahn doadoahngki ahnsou laud ong kalohk nan wihko.

8. Menlau kawehwehda ni mwotomwot mehkot me ke sukuhlki sang omw wadek Paipel?

⁸ Karasaras pwukat me kitail koasoiapenehr kin sawas oh re kohsang pwuhken Paipel kan me ekei kin medewe e apwal en wehwehki. Ahpw ni omw pahn diarada iretikitik kangoang kan nan pwuhk pwukat, ke pahn men wadewadekete. Re kak kansenamwahwihala kitail oh kahrehda kitail en loalokongla. Pwuhken Paipel koaros kak sewese kitail ni ahlohte. Mahsen en Koht duwehte wasa ehu me diren takai kesempwal kan kin seridi ie. Ni omw wadek Paipel pwon, rapahki ken diar “takai kesempwal kan” de kaweid oh kangoang kesempwal kan me mi loale.

9. Dahme kitail kak wia pwehn wehwehkihla mwahu Paipel?

⁹ E kesempwal en wadek Paipel rahn koaros. Ahpw ken pil tehk mwahu me ke wehwehki  dahme ke wadewadek. Eri, wia roporop nan neitail sawaspen Paipel kan pwehn sukuhlki duwen aramas akan, wasa kan, oh mwekid kan me ke wadek. Ma ke sohte nohn wehwehki ia duwen omw pahn doadoahngki dahme ke wadek nan Paipel, ke kak peki sawas rehn emen elder de Kristian koahiek men. Kristian men ni mwehin wahnpoaron ako me ede Apolos anahne sawas pwehn kalaudehla eh wehwehki ni pwung padahk mehlel.

10, 11. (a) Ia duwen Apolos eh alehdi sawas en wiahla sounkalohk mwahu men en rongamwahwo? (b) Dahme kitail kak sukuhlki sang mehn kahlemeng en Apolos? (Menlau kilang kakon “ Dahme Ke Padahngki Kin Pahrekiong Padahk Kapw kan?”)

¹⁰ Apolos iei Kristian mehn Suhs men me uhdahn ese Paipel oh wia sounkalohk ngoang men. Pwuhken Wiewia koasoia me e kin kalohki duwen Sises. Ahpw, Apolos sehse me Sises ketin padahkihong sapwellime tohnpadahk ko mehkot kapw duwen papidais. Pwopwoud Kristian ehu me adaneki Persila oh Akwila rongada ahn Apolos padahk kan nan Episos, oh ira “kawehwehiong ni oaritik duwen pwungen Ahl en Koht.” (Wiewia 18:24-26) Ia duwen Apolos eh paiekihda met?

¹¹ Ni Apolos eh kohla Akaia, e pousehlahte kalokalohk. E sewese irail kan me kamehlele rongamwahwo sang ni eh doadoahngki Paipel pwehn kadehdehda mwohn aramas akan me mehn Suhs ko sapwung oh me Sises iei me Krais. (Wiewia 18:27, 28) Ni Apolos eh wehwehkilahr wehwehn papidais en Kristian, e “wiahda sawas laud” ong me kapw kan me wie kekeirda nan padahk mehlel. Dahme kitail kak sukuhlki sang met? Kitail kak alasang ahn Apolos mehn kahlemeng sang ni atail kin doadoahk laud en wehwehkihla dahme kitail wadek nan Paipel. Ahpw kitail pil anahne karakarahk oh kalahnganki sawas koaros me kitail ale me kak kahrehiong kitail en wiahla sounpadahk mwahu kan.

12, 13. Ia duwen atail kak doadoahngki Paipel ni elen kadek pwehn sewese tohnsukuhl en Paipel men en kekeirda?

¹² Duwehte Persila, Akwila oh Apolos, kitail kak sewese meteikan. Ia omw pepehm ni omw kin sewese emen me perenki rong en wiahda wekidekla kan nan eh mour pwehn kak kekeirda nan padahk mehlel? De nin duwen elder men, ia omw pepehm ni emen riomw Kristian eh kalahnganki kaweid en Paipel me ke kihong ni ahnsou me e mi nan apwal ehu? E kin kahrehiong kitail en uhdahn perenki doadoahngki Paipel pwehn sewese meteikan ren wiahda wekidekla kan nan arail mour. * Ia duwen omw kak wia met?

¹³ Ni mwehin Elaisa, mehn Israel tohto saikinte pilada ma re pahn iang kaudok mehlel de kaudok likamw. Dahme Elaisa ndaiong mehn Israel ko kak sewese tohnsukuhl en Paipel men me saikinte pilada en papah Siohwa. (Wadek 1 Nanmwarki 18:21.) De mwein emen me perenki rong kin masak me kompoakepah kan de eh peneinei pahn kauwe ih pwehki eh kin onop Paipel. Ke kak sewese ih pilada en kaudokiong Siohwa ni omw doadoahngki dahme kileldi nan Aiseia 51:12, 13.​—Wadek.

14. Dahme pahn sewese iuk ken tamataman iren Paipel kan pwe ken kak sewese meteikan?

¹⁴ Mie ire tohto nan Paipel me kak kangoange, kapwungala de kakehlaka kitail. Ahpw mwein ke pahn medewe ia duwen omw kak ese mehnia iren Paipel me ken doadoahngki ahnsou me ke anahne. Wadek Paipel rahn koaros oh medemedewe dahme ke wadek. Ke pahn ekisekis esehla Paipel, oh Siohwa kak ketin doadoahngki sapwellime manaman pwehn sewese iuk ken tamataman dahme Paipel mahsanih.​—Mark 13:11; wadek Sohn 14:26. *

15. Dahme pahn sewese iuk wehwehkihla mwahu Mahsen en Koht?

¹⁵ Duwehte Nanmwarki Solomon, kapakapki loalokong sang rehn Siohwa. Ke anahne loalokong pwehn wia doadoahk en kalohk oh apwalih omw pwukoa kan nan mwomwohdiso. (2 Kron. 1:7-10) Alasang soukohp ko sang ni omw tehk kanahieng Mahsen en Koht. Met pahn sewese iuk en ese padahk mehlel duwen Siohwa oh kupwure. (1 Pit. 1:10-12) Wahnpoaron Pohl padahkihong Timoty en onopki “mahsen kan en pwoson oh padahk mehlel.” (1 Tim. 4:6) Ma ke kin onohnopki Paipel, ke pahn wehwehkihla mwahu oh ke pahn sukuhlki duwen omw kak doadoahngki pwehn sewese meteikan. Ni ahnsowohte, omw pwoson pahn kehlailla.

16. (a) Ia duwen mehn Peria kan arail paiekihda wadewadek Paipel rahn koaros? (b) Dahme kahrehda e kesempwal ong kitail en wadek Paipel rahn koaros?

¹⁶ Mehn Suhs kan me kousoan nan Peria kin wadek Paipel ni keneinei rahn koaros. Ni Pohl eh kalohk ong irail, re kin kapahrekihpene dahme e nda ong dahme re ese sang nan Paipel. Me tohto rehrail pohnese me e padapadahngki padahk mehlel oh re “pwosonla.” (Wiewia 17:10-12) Kitail kak sukuhlki sang met me wadewadek Paipel rahn koaros kak sewese kitail en kakehlaka atail pwoson Siohwa. Kitail anahne ahneki pwoson kehlail ma kitail men mi nan sapwellimen Koht sampah kapw.​—Ipru 11:1.

17, 18. (a) Ia duwen pwoson oh limpoak kehlail ara kin pere mohngiongitail? (b) Ia duwen atail koapworopwor eh pere kitail?

¹⁷ Pohl kawehwehda me kitail anahne  pwoson, limpoak oh koapworopwor. E nda: “Kitail kisehn rahn, eri, kitail onohnop, kitail kapwatkihda pwoson oh limpoak pwe en wia perehpen mwaremwaratail; oh atail lisoarop en mahwen, iei koapworopwor en mour soutuk.” (1 Des. 5:8) Mehn perehpen mwaremware iei dipwisou ieu me sounpei kan kin kihong ni mwaremwararail pwehn pere arail mohngiong. Pil duwehte, kitail anahne perehla atail mohngiong. Ni Kristian men eh kin kakehlaka eh pwoson sapwellimen Koht inou kan oh ahneki limpoak laud ong Ih oh meteikan, e kin pere eh mohngiong. E pahn wia uwen eh kak koaros pwehn wie kenikente rehn Koht.

¹⁸ Pohl pil koasoia ni karasaras duwen lisoarop me kitail anahne lisoaropihada. Met iei “koapworopwor en mour soutuk,” de koapworopwor en komourla. Ni mwehin Paipel, sounpei kan kin doadoahngki lisoarop pwehn pere moangerail. Ni atail kin kakehlaka atail koapworopworki sapwellimen Siohwa kehl en ketin kapitkitailla, atail koapworopwor kak pere atail madamadau. Atail koapworopwor laud kin kihong kitail kahrepe koaros en pohnsehse irail me kesehla oh uhwongada kaudok mehlel oh arail padahk samin kan me kak mwadangete doupeseng nan mwomwohdiso duwehte soumwahu ehu. (2 Tim. 2:16-19) Atail koapworopwor pahn pil kahrehiong kitail en kehlail oh kihong kitail kahrepe ehu en soikala tiahk suwed.

19, 20. Dahme kahrehda kitail uhdahn kalahnganki Mahsen en Koht? Ia duwen atail kin kasalehda me kitail kalahnganki? (Menlau kilang kakon “ Siohwa Ketikihong Ie Dahme I Uhdahn Anahne.”)

¹⁹ Ni atail kerekerenlahng kaimwiseklahn imwin koasoandi wet, kitail anahne kalaudehla atail koapworopworki Mahsen en Siohwa. Mahsen en Siohwa kak sewese kitail en uhdihsang wiewia suwed kan oh pelianda ineng koaros en wiahda dihp. E pahn kansenamwahwih oh kangoange kitail en dadaurete pahn kasongosong koaros me Sehdan oh eh sampah kin kihong kitail. Kaweid kan nan Mahsen en Siohwa pahn sewese kitail kekeidte nan ahl me kolahng mour.

²⁰ Kupwuren Koht iei me “aramas koaros en ale komourparail.” Irail pwukat kin pidada sapwellime ladu kan oh pil irail kan me men rong ni atail kin kalohk oh padahkihong irail duwen rongamwahwo. Ahpw koaros me men pitsang kaimwiseklahn imwin koasoandi wet anahne “marainkihla me mehlel.” (1 Tim. 2:4) Kitail anahne wadek Paipel oh doadoahngki eh kaweid kan ma kitail men pitila. Atail kin wadek Paipel rahn koaros kin kasalehda uwen atail kalahnganki Mahsen en Siohwa.​—Sohn 17:17.