Mehla rasehng emen eh memeir pwehki e sohte kak kehn wasa oh sohte kak wia mehkot. Ahpw Sounkapikpen mour kak ketin kapwurehdo me melahr kan sang ni eh pahn ketin kaiasada irail. Pwehn kadehde duwen met, Koht ketikihong Sises manaman en ketin kaiasada ekei aramas me melahr.​—Wadek Eklesiasdes 9:5; Sohn 11:11, 43, 44.

Koht ketin inoukihda me me melahr kan me e ketin tamataman pahn kaiasadahng mour nan sampah kapw pwung ehu. Ni ahnsou me Koht kupwurki, e pahn ketin kaiasada irail. Koht Wasa Lapalahpie ketin kupwurperenki doadoahngki sapwellime manaman en ketin kapwurehiong me melahr kan arail mour.​—Wadek Sohp 14:14, 15.

Ni ahnsou me Koht pahn ketin kaiasada aramas, re pahn kak ese me pein irail mwo. Re pahn kak pohnese kompoakparail kan oh arail peneinei. Mehnda ma paliwar en aramas men ohlahr de matala, Koht kak ketin kaiasada aramaso ong paliwar kapw ehu.​—Wadek 1 Korint 15:35, 38.

Ekeite me pahn iasadahng mour nanleng. (Kaudiahl 20:6) Pali laud en aramas akan me pahn iasada pahn mour nan paradais kapw ehu nin sampah. Irail pahn ahneki mour kapw oh pil koapworopwor en mour kohkohlahte.​—Wadek Melkahka 37:29; Wiewia 24:15.