ELAISA wie sapsapal kohla limwahn Wahun Sordan. E sapasapalkiher wihk kei, kohkohlahng paliepeng sang Nahna Orep. Met ni eh lelehr Israel, e kilang wekidekla kan me wiawi wasa me e kin kousoan ie. Sahpwo mwamwahula mwurin ahnsou me sohla keteu erein ahnsou reirei. Keteu tepidahr kin mweredi oh soumwet kan wie koadoakoadoahki arail mwaht akan. Mwein soukohpo perenki eh kilang me sahpwo mwamwahula, ahpw dahme e keieu nsenohki iei aramas ako. Arail nanpwungmwahu rehn Siohwa luwetalahr. Kaudok en Paal reklahr wasao oh Elaisa anahne doadoahk laud pwehn sewese irail. *

Ni eh kerenlang Apel-Mehola, Elaisa kilang aramas kei wie doadoahk nan mwetuwel lapala ehu. Mie kou 24 me re kihpene ni wad riemen oh pwihnen tohndoadoahk 12 me doadoahngki kou ko nan mwahto. Ohl me kahluwa pwihn en mwurio iei me Elaisa raparapahki. Ohl menet iei Elisa me Siohwa ketin pilada pwehn uhd alehdi ahn Elaisa pwukoa. Ehu pak Elaisa pehm me ih kelehpw me kin loalopwoatohng Koht, eri e uhdahn men tuhwong ohl menet.​—1 Nanmwarki 18:22; 19:14-19.

Ia duwe, Elaisa ekis pweiek en kihong emen tohrohr ekei eh pwukoa kan, iang ahneki eh pwais kaselel kan, de emen en wilian ih ehu rahn? Kitail sohte kak nda; kitail pil sohte kak nda ma e kin pwunodki mepwukat. Met pwehki ih “aramas emen duwehte kitail.” (Seims 5:17) Sohte lipilipil mehnia, Paipel mahsanih: “Elaisa eri kihsang eh likou puhpo oh kihdiong pohn Elisa.” (1 Nanmwarki 19:19) Ahn Elaisa likou puhpo, me ele wiawihkihda kilin sihpw de kuht, kin wia kilelepen pwukoa tohrohr me Siohwa ketikihong ih. Eri ni Elaisa eh kihdiong pohn Elisa likou puhpo, e kasalehda mwekid kesempwal ehu. Elaisa kin men uhpah sapwellimen Siohwa kehkehlik en idihada Elisa pwehn uhd wia eh pwukoa. Elaisa likih eh Koht oh peikiong.

Elisa kin uhdahn men sewese soukohp Elaisa me mah sang ih. Elisa sohte mwadangete wiliandi Elaisa. Ahpw erein sounpar weneu ape, e kin aktikitik ieiang oh sewese soukohp mah menet. Mwuhr, aramas akan esehkin ih me “ih me sawasepen Elaisa.” (2 Nanmwarki 3:11) Elaisa uhdahn nsenamwahukihla eh naineki sounsawas koahiek men. Ira kompoakepahnkihla emenemen. Ara kin kangoange emenemen uhdahn kin sewese ira en dadaur mendahki ara kilang wiewia sapahrek me rekla nan sahpwo. Wiewia suwed en nanmwarki Eihap me keieu susuwedla.

Mie pak ke lelohng kopwung sapahrek? Pali laud en kitail kin lelohng soahng wet nan sampah mwersuwed wet. Omw diarada kompoakepahmw men me kin poakohng Koht kak seweseiuk ken dadaurete. Ke pil kak sukuhlki laud duwen ahn Elaisa eh pwoson ni eh lelohng wiewia sapahrek.

Elaisa oh Elisa kin doadoahk laud pwehn kakehlaka ahn aramas ako arail nanpwungmwahu rehn Koht. E sansal me ira tiengla mwowe oh kasukuhlih soukohp teikan, oh koasoanehdi pwihn en sukuhl  kei. Ahpw mwuhr, Elaisa alehdi pil ehu pwukoa sang rehn Siohwa: “Kohla rehn Nanmwarki Eihap.” (1 Nanmwarki 21:18) Dahme Eihap wiadahr?

Nanmwarkio uhwongadar kaudok mehlel oh e suwed sang nanmwarki kan en Israel mwohn ih. E pwoudikihda Sesepel oh kahrehiong kaudok en Paal en uhdahn kehlail nan sahpwo, oh nanmwarkio pil iangete. (1 Nanmwarki 16:31-33) Kaudok en Paal kin iangahki tiahk en kaudok me pidada kaparapar, netiki paliwar oh pil meirongki kisin seri kan. Patehng met, me keren Eihap sapeikiong sapwellimen Siohwa kehkehlik me en kemehla Nanmwarki suwed en Siria, Penadad. E sansal me kahrepen Eihap eh sapeik iei pwehn kak alehdi mwohni. (1 Nanmwarki irelaud 20) Ahpw met, ahn Eihap oh Sesepel ara noahrok, men kepwehpwehla oh tiahk lemei uhdahn suwedla.

Mie tehnpas en Eihap nan Sameria me inenen laud oh kaselel. Pil mie tehnpese nan Sesreel, mwail 23 ape sang wasao. Limwahn keriaun tehnpeseo, mie lapalahn mwetuwel en wain ehu. Eihap noahrokehda kisin wasao me ohl emen me adaneki Napod sapweniki. Eihap eri ekerodo ohlo oh men pwainsang de kihong ih ehu mwetuwel en wain pwehn wiliankihdi. Ahpw Napod sapengki: “Ni mwaren KAUN-O I sohte kak patohwanohng komwi, pwe komwi en ninlimanikihla.” (1 Nanmwarki 21:3) Ia duwe, Napod wia ohl kahngohdi oh salamalam men? Me tohto medewe met. Ahpw ni mehlel, e kin peikiong sapwellimen Siohwa kosonned me mehn Israel kan en dehr netikihla sapwarail me re sohsohki sang arail peneinei. (Lipai 25:23-28) Ong Napod, e uhdahn sapwung en kauwehla kosonned en Koht. Ih ohl pwoson oh kommwad men pwe e uhdahn ese me e keper en uhwong Eihap.

Ahpw Eihap sohte kin medewe sapwellimen Siohwa Kosonnedo. E kohla ni imweo, “kupwure inenen toutoukihla” pwe e sohte alehdi dahme e anahne. Paipel mahsanih: “E ahpw kipedi pohn eh peht, sohpeiong dihdo, oh solahr men konot.” (1 Nanmwarki 21:4) Ni Sesepel eh kilang eh pwoudo mwakarada duwehte seri men, e mwadangete wiahda pilahn ehu pwehn wiahiong dahme eh pwoudo anahne. Ni ahnsowohte e pil kemehla peneinei mwahu ehu.

Ni atail wadek pilahn me e wiahdao, kitail kin pwuriamweikihla uwen eh suwed. Sesepel ese me nin duwen sapwellimen Koht Kosonned, ke anahne sounkadehde riemen pwehn kadehdehda sapwung me emen wiahda. (Deuderonomi 19:15) Ih eri ntingihada kisin likou kei oh kilelehdiong eden Eihap, kadaralahng me lapalap akan en Sesreel oh kaweidki ren rapahkihda ohl riemen me pahn men karaun likamwih Napod me e lahlahwe Koht oh nanmwarkio. Soangen dihp wet aramas kin kamakamkihla. Eh pilahno pweida mwahu. ‘Aramas likamw riemeno’ kadehdehda ni likamw duwen Napod oh irail eri kate oh kemehla. Kaidehn ihte met me wiawi. Nein Napod pwutangko pil kamakamla. * (1 Nanmwarki 21:5-14; Lipai 24:16; 2 Nanmwarki 9:26) Eihap  mweidohng eh pwoudo en wia dahme e men wia oh kemehla aramas mwahu ko.

Medewehla ahn Elaisa pepehm ni ahnsou me Siohwa ketin kasalehiong ih dahme nanmwarkio oh eh pwoudo wiadahr. E kin inenen kansensuwed ni aramas suwed men kin mwersuwedih aramas mwahu. (Melkahka 73:3-5, 12, 13) Rahnpwukat kitail kin kalapw kilang wiewia sapahrek, ekei pak pil kohsang irail me ahneki manaman oh kin nda me dene re wia wiliepen Koht. Ahpw ele kitail kak ale kamweit sang dahme wiawi. Wasaht Paipel kin katamankihong kitail me sohte mehkot kak rirsang silangin Siohwa. E ketin mwahngih mehkoaros. (Ipru 4:13) Eri dahme e pahn ketin wiawiong wiewia suwed kan me e kin ketin mahmahsanih?

Siohwa ketin kadarala Elaisa rehn Eihap. E ketin mahsanihong Elaisa: “Ke pahn diarada nan en Napod eh mwetuwel en waino.” (1 Nanmwarki 21:18) Ni Sesepel eh ndaiong Eihap me e sapwenikilahr mwetuwel en waino, e mwadangete pwourda oh kolahng kilang mwetuwelo. Eihap sohte ekis medewe me Siohwa ketin mahmahsanih dahme wiwiawi. Medewe mwomwen meseo ni eh mihmihseli nan mwetuwelo, ele medemedewe dahme e pahn kakete wiahiong wasao. Elaisa ahpw leledo mwo ahnsowo. Eihap sohla peren ahpw uhd lingeringerda oh nda: “Eri ke diarehr ie, kowe ei imwintihti?”​—1 Nanmwarki 21:20, NW.

Dahme Eihap nda kasalehda madamadau en pweipwei riau. Keieu, ni eh ndaiong Elaisa “Eri ke diarehr ie,” Eihap kasalehda me e sohte kin medemedewe duwen Siohwa. Siohwa ketin “diarehr” ih. E mwahngiher duwen Eihap eh pein pilada en wia dahme suwed oh paiekihda pilahn mwersuwed en Sesepel. Koht ketin mwahngih dahme mi nan mohngiong en Eihap, me eh men kepwehpwehla kesempwal sang en kasalehda mahk, wiewia pahrek de poakehla meteikan. Keriau, ni eh ndaiong Elaisa “kowe ei imwintihti,” Eihap kasalehda uwen eh kailongki ohl menet me wia kompoakepahn Siohwa Koht oh me kakete sewese ih sohpeisang eh wiewia suwed kan.

Ele kitail sukuhlki mehn kasukuhl kesempwal ehu sang ahn Eihap mwekid pweipwei. Kitail anahne tamataman me Siohwa Koht kin ketin mwahngih mehkoaros. Nin duwen Sahm limpoak men, e ketin mwahngih ni atail kin wetsang ni ahl pwung, oh e ketin kupwurki kitail en wekidala atail wiewia kan. Pwehn sewese kitail, e kin kalapw ketin doadoahngki kompoakepah kan, de irail me lelepek kan, duwehte Elaisa, me kin padahkihong meteikan duwen sapwellime mahsen. E uhdahn sapwung en kilangwohng  kompoakepahn Koht men nin duwen atail imwintihti.​—Melkahka 141:5.

Medewehla mwomwen Elaisao eh sapeng Eihap: “I diaruhkehr.” E diaradahr me Eihap wia sounpirap, soun kamaramas, oh kin uhwong Siohwa Koht. Elaisa uhdahn eimah ni eh pelianda ohl suwed menet. Elaisa eri padahkihong dahme Koht pahn ketin wiahiong Eihap. Siohwa ketin mwahngih dahme wiwiawi. En Eihap oh eh peneinei ar suwed pil kahrehiong aramas ako ren suwedla. Eri Elaisa ndaiong Eihap me Koht ketin koasoanehdier me eh peneinei pwon pahn “kamwomwasang.” Pil liho Sesepel pahn ale kalokepen eh wiewia suwed.​—1 Nanmwarki 21:20-26.

Elaisa sohte medewe me aramas akan kin pitsang arail wiewia suwed oh sapahrek. Nan sampah rahnwet, e mengei en ahneki soangen madamadau wet. Poadopoad en Paipel wet kin katamankihong kitail me Siohwa sohte kin ihte ketin mwahngih dahme wiwiawi ahpw e pil kin ketin kapwungala irairo ni ahl pahrek ni ahnsou me e ketin kupwurki. Sapwellime Mahsen kin kamehlelehiong kitail me ehu rahn e pahn ketikihsang kopwung sapahrek koaros kohkohlahte. (Melkahka 37:10, 11) Ahpw mwein ke kin medewe, ‘Sapwellimen Koht kadeik kin pidadahte kalokolok? De e pil kin pidada mahk kalahngan?’

Mwein Elaisa pwuriamweikihla mwomwen Eihap eh mwekidki sapwellimen Koht kadeiko. Paipel kasalehda: “Eihap ahpw ketin tehrasang sapwellime likou kan, oh ketikihsang koaros , ahpw uhd pwuhriong nan likoun nsensuwed. E ahpw solahr konot, oh kin seiseimwok nan likoun nsensuwedo, oh pil ketiketseli ni mwomwen pahtou oh nsensuwed.” (1 Nanmwarki 21:27) Ia duwe, Eihap koluhkihla eh wiewia suwed ko?

Kitail ese me e wiahda wekidekla kei. Eihap aktikitikla, mehkot me uhdahn apwal ong ohl aklapalap men en wia. Ahpw ia duwe, e koluhla mehlel? Kitail kapahrekiong emen nanmwarki me kaunda mwurin ih me uhdahn suwedsang. Nanmwarkio iei Manase. Ni ahnsou me Siohwa ketin kaloke Manase, ohl menet aktikitikla oh likweriong Siohwa pwe en ketin sewese ih. E pil wia laudsang. E wekidala mwomwen eh mour ni eh kesehla dikedik en eni koaros me e wiahda. E pil nantihong wia soahng kan pwehn papah Siohwa oh pil kangoange nah aramas ako pwe ren wia soahngohte. (2 Kronikel 33:1-17) Ia duwe, Eihap wiahda soangen wekidekla pwukat? Soh.

Ia duwe, Siohwa ketin mwahngih Eihap eh kasalehda eh nsensuwed mwohn aramas akan? Siohwa mahsanihong Elaisa: “Ke kilangehr duwen Eihap eh aktikitiklahr mwohi? Kahrehda I sohte pahn ketikihong en ale kahpwal erein eh mour; ahpw met pahn pweida rehn nein Eihap seri kan.” (1 Nanmwarki 21:29) Siohwa ketin mahkohng Eihap? Soh. Koluhla mehlel me kak kahrehda emen en ale mahk sang rehn Koht. (Esekiel 33:14-16) Ahpw pwehki Eihap ekiste kasalehda mahk, Siohwa pil ketin kasalehiong mahk ni uwen me konehng. Eihap sohte pahn kilang soahng suwed kan me pahn wiawiong eh peneineio ahnsou me re pahn kamakamla.

Ahpw sapwellimen Siohwa kadeik ong ohl menet sohte wekila. Siohwa ketin keinemwe rehn sapwellime tohnleng ko ia ahl me keieu mwahu en pitihedi Eihap en iang mahweno me pahn kemehla ih. Mwurinte mwo, sapwellimen Siohwa kadeiko ong Eihap pweida. Nan mahweno, Eihap kesikdi oh eh ntao keredi ni mwuledek oh ih eri mehla nan were werennansapwo. Paipel pil mahsanih me ni tehnmwere werennansapw en mahweno kamwakelda, kidi kan tamwehsang ntahn nanmwarkio. Ni ahl wet, mahsen en Siohwa me Elaisa ndaiong Eihap pweida me mahsanih: “Wasaohte me kidi kan tamwehsang ntahn Napod, re pil pahn tamwehsang ntah.”​—1 Nanmwarki 21:19; 22:19-22, 34-38.

Ong Elaisa, Elisa oh sapwellimen Koht aramas lelepek kan koaros, imwilahn Eihap kihda mehn kataman mwahu me Siohwa sohte ketin manokehla ahn Napod eimah oh pwoson. Koht en kopwungpwung kin uhdahn ketikihda kalokepen wiewia suwed kan, mehnda ma ni ahnsou mwadang de ni ahnsou kan mwuhr. Ahnsou koaros e kin ketin kasalehda mahk nan sapwellime kadeik kan, ma mie kahrepe mwahu en wia met. (Nempe 14:18) Met wia mehn kasukuhl mwahu ong Elaisa me kin dadaur erein ahnsou werei pahn kaundahn nanmwarki suwedo. Mie pak me emen wiahiong uhk wiewia sapahrek ehu? Ke men kilang Koht eh pahn ketin kapwungala soahng pwukat? E pahn mwahu ma ke alasang ahn Elaisa pwoson. Ih oh ienge lelepeko, Elisa, kin doulahte kalohki mahsen en Koht oh dadaurete pahn wiewia sapahrek kan.