1, 2. Ia mwomwen mour en Adam oh Ihp nin tapio? Peidek dah kei me pwarada?

 AHNSOU me Adam oh Ihp kepikipikda, sohte ara imwintihti. Ira unsek oh mihmi nan paradais. Ira ahneki nanpwungmwahu keren rehn Sounkapikadao, duwehte nanpwungen sahm men oh nah kan. (Sen. 2:7-9; Luk 3:38) Koht ketikihong ira pwukoa kesempwal ehu. (Wadek Senesis 1:28.) Ia uwen werei ira anahne momourki pwe ira en kapwaiada pwukoa wet? Ira sohte pahn anahne mour kohkohlahte pwe ‘kadaudokara kan pahn kousoanla wasa koaros nin sampah oh kaunda mehkoaros,’ ahpw ira pahn anahne mour kohkohlahte pwe ira en apwalih “mwahmw akan, menpihr kan oh mahn lawalo kan koaros.” Ira kakete ahneki pwukoa wet kohkohlahte.

² Dahme kahrehda irair en ahnsou wet weksang ahnsowo? Dahme kahrehda atail nsenamwahu kin ohkihla kahpwal tohto me rasehng imwintihti kei, duwehte imwintihti me keieu laud, mehla? Ia duwen Koht eh pahn ketin kasohrehla  imwintihti pwukat? Pasapengpen peidek pwukat kileldi nan Paipel, oh kitail pahn tehkpene nan iren onop wet.

3, 4. (a) Kehkehlik dahieu me Koht ketikihong Adam oh Ihp? (b) Ia uwen kesempwal en peikiong kehkehlik wet?

³ Mendahki Adam oh Ihp kepikipikda pwe ira en mour kohkohlahte, mie soahng kan me ira anahne wia pwehn wie momour. Ira anahne esingek, nim pihl, meir oh pil mwenge. Ahpw me kesempwalsang met iei ara nanpwungmwahu rehn Siohwa, me wia Utupen mour. (Deud. 8:3) Ira kak peren oh pousehlahte wie momour ihte ma ira mweidohng Siohwa en ketin kaweid ira. Pil mwohn Siohwa ketin kapikada Ihp, e ketin mahsanihong Adam: “Ke kak tungoale wahntuhke koaros me mi nan mwetuwelet, ahpw ihte wahntuhkehn kehsehki aramas dahme mwahu oh dahme suwed me ke sohte pahn tungoale, ma ke pahn tungoale, ke pahn mehkihla rahnohte.”​—Sen. 2:16, 17.

⁴ “Wahntuhkehn kehsehki aramas dahme mwahu oh dahme suwed” kin kasalehda me Koht sapwellimanki pwuhng en pilada dahme mwahu oh dahme suwed. Adam wehwehkihier dahme mwahu oh dahme pwung, pwehki e wiawihda rasehng Koht oh mie kadeikpen loale. Tuhkeo katamankihong Adam oh Ihp me ira pahn ahnsou koaros anahne sapwellimen Siohwa kaweid. Ma ira kang wahntuhkeo, e pahn mwomwen me ira patohwanohng Koht, “Se sohte anahne omw kosonned kan.” Ma ira wia met, ira oh neira seri kan pahn mehla, duwehte me Koht ketin padahkihong ira.

5. Dahme kahrehda Adam oh Ihp sapeikiong Siohwa?

⁵ Mwurin Ihp kapikipikda, Adam padahkihong ih duwen sapwellimen Siohwa kehkehlik. Ihp uhdahn ese kehkehlik wet pwehki mwuhr e pwurehng nda lokaia ko koaros. (Sen. 3:1-3) E kapwurehiong lokaia ko ong Sehdan, me doadoahngki serpent men en lokaiahiong ih. Sehdan mweidohng eh ineng en kaunda oh uhtohrda en laudla. (Pil kilang Seims 1:14, 15.) E ndaiong Ihp me Koht ketin likamw, oh ma Ihp sapeikiong Koht, e sohte pahn mehla ahpw e pahn duwehla Koht. (Sen. 3:4, 5) Ihp kamehlele Sehdan. E kasalehda eh men uhtohrda sang ni eh kang wahntuhkeo oh e pil ndaiong Adam en wia duwehte. (Sen. 3:6, 17) Sehdan pitihdi Ihp. (Wadek 1 Timoty 2:14.) Mendahki Adam ese me met sapwung, e rongala ngilen eh pwoudo. Serpent menet ele mwomwen kadek, ahpw ni mehlel, Sehdan me Tepilo iei imwintihti men me lemei oh e ese ia imwila suwed en likamw me e wiahda.

6, 7. Ia duwen Siohwa eh ketin kadeikada Adam oh Ihp?

⁶ Adam oh Ihp uhwongada Siohwa, me ketikihong ira mour oh soahng mwahu koaros me ira ahneki. Siohwa uhdahn ketin mwahngih dahme wiawi. (1 Kron. 28:9; wadek Lepin Padahk 15:3.) Ahpw e ketin mweidohng Adam, Ihp, oh Sehdan en kasalehda ia uhdahn arail pepehm ong ih. Nin duwen Sahm men, e uhdahn kupwurtoutoukihla dahme re wiadahr. (Pil kilang Senesis 6:6.) Ahpw nin duwen Sounkopwung men, e ketin kasalehda pwung pahrek ong dahme pahn wiawihong me dipadahr ko.

⁷ Duwen tuhkehn kehsehki aramas  dahme mwahu oh dahme suwed, Koht ketin mahsanihong Adam: “Ma ke pahn tungoale, ke pahn mehkihla rahnohte.” Ele Adam medewe me met wehwehki e pahn mehla mwohn ketipino kihrla. Ahpw mwuhr, ni rahnohte, Siohwa ketin mahsaniong Adam oh Ihp. (Sen. 3:8) Nin duwen Sounkopwung mwahu men, e ketin rong mahs dahme ira pahn nda. (Sen. 3:9-13) Ih eri mahsanihong me dipan riemeno me ira pahn mehla. (Sen. 3:14-19) Ma e kemehlahte ira ahnsowo, kupwureo ong aramas akan sohte pahn pweida. (Ais. 55:11) Mendahki imwilahn wiewiahn dihp mwadangete tepida, Siohwa ketin mweidohng Adam oh Ihp en kak mour ekis werei pwe ira en nainekihda seri kan me kak ahneki mour mwahu ahnsou kohkohdo. Mwohn silangin Siohwa, Adam oh Ihp mehlahte rahno me ira wiahda dihp. Pil ehu, pwehki sounpar 1,000 kin rasehng rahnteieu rehn Siohwa, met wehwehki ira mehla nan “rahnteieu.”​—2 Pit. 3:8.

8, 9. Ia duwen dipen Adam eh lelohng kadaudoke kan koaros? (Menlau kilang tepin kilel.)

⁸ Ia duwe, dahme Adam oh Ihp wiadahro lelohng kadaudokara kan? Ei. Rom 5:12 mahsanih: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” Wahnpoaron Pohl pil nda: “Nin duwen sapeik en aramas tehmen eh kahrehiong aramas tohto dihp.” (Rom 5:19) Ohl lelepek Eipel me tepin mehla. (Sen. 4:8) Mwuhr nein Adam seri kan oh neirail seri kan pil mahla oh mehla. Aramas akan sohsohkihdi dihp oh mehla, imwintihti riemen me re sohte kak pitsang. Mendahki kitail sohte uhdahn ese ia duwen Adam eh kadaurohng kadaudoke kan dihp oh mehla, kitail kak kilang lipwen met.

⁹ Kitail kak wehwehki ni Paipel eh kapahrekihong dihp oh mehla “depwek en pahtou me mihmi pohn wehi koaros.” (Ais. 25:7) Sohte aramas kak pitsang dihp oh mehla. Ihme kahrehda Paipel mahsanih me “aramas koaros . . . kin mehkihla ar miniminiong Adam.” (1 Kor. 15:22) Eri Pohl idek peidek wet: “Ihs me pahn kapitiehla sang nan paliwar wet me kin kahluwalahng ie mehla?” Mie emen me kak kapitala Pohl? *​—Rom 7:24.

10. (a) Iren Paipel dah kan me kasalehda me Siohwa pahn ketin kalowehdi mehla? (b) Dahme iretikitik pwukat padahkihong kitail duwen Siohwa oh sapwellime Ohl?

¹⁰ Ei, Siohwa kak ketin kapitala Pohl. Paipel mahsanih: “KAUN-O, wasa Lapalahpie pahn ketin kamwomwala mehla kohkohlahte! E pahn ketikihsang pilenmesen aramas koaros.” (Ais. 25:8) Duwehte sahm men me kin kihsang lokolok en nah seri kan oh limwihasang pilen masarail, Siohwa kupwurperenki en ketin kalowehdi mehla. Sises kin patohwan utung Siohwa. 1 Korint 15:22 mahsanih: “Koaros pahn iasadahng mour pwehki ar miniminiong Krais.” Pohl pil sapengala pein eh peideko “Ihs me pahn kapitiehla?” ni eh nda: “Kalahngan ong Koht, me kin ketin kapwaiada met rehn atail Kaun Sises Krais!” (Rom 7:25) Eri e sansal me Siohwa sohte ketin uhdihsang eh poakohng aramas akan ni Adam oh Ihp ara dipada. Oh Sises,  me Siohwa ketin doadoahngki pwehn ketin kapikada Adam oh Ihp, pil kin poakohng aramas. (Lep. Pad. 8:30, 31) Ahpw ia duwen aramas akan ar pahn pitsang dihp oh mehla?

11. Dahme Siohwa ketin wia pwehn sewese aramas akan?

¹¹ Ni Adam eh dipada, Siohwa ketikihong ih kalokepen mehla. Eri imwilahn met, aramas koaros sohsohkihdi soh unsek oh mehla. (Rom 5:12, 16) Rom 5:18 pil mahsanih: “Dihpo . . . keriahla aramas koaros.” Dahme Siohwa kak ketin wia pwehn sewese aramas akan ahpw sohte meliehla sapwellime koasoandi kan? Sises ketin sapengala peidek wet ni eh mahsanih me e ketido “pwe en tounmeteikihla moure, pwe me ngeder en maiauda.” (Mad. 20:28) Nin duwen aramas unsek men, Sises kak ketikihda meirong ehu. Ia duwen pweipwei wet eh pahn kahrehiong pwung pahrek en kak pweida?​—1 Tim. 2:5, 6.

12. Meirong dahieu me kahrehiong sapwellimen Siohwa pwung pahrek en pweida?

¹² Nin duwen aramas unsek men, Sises kak ketin mour kohkohlahte. Ih met me Siohwa ketin kupwurki ong Adam. Pwehki Sises ketin poakohng Semeo oh kadaudoken Adam kan, e ketin tounmeteikihla moure nin duwen aramas men, me pahrekiong mour me Adam kasalongehlao. Mwuhr, Siohwa ketin kaiasada Sises ong nanleng nin duwen ngehn emen. (1 Pit. 3:18) Meirongo kahrehiong sapwellimen Siohwa pwung pahrek en pweida pwehki mour unsek en Sises wiliandi mour en Adam me pil unsek. Sises ketin kahrehda kadaudoken Adam kan en ahneki mour soutuk. Ihme kahrehda Pohl kahdaneki Sises “Adam en keieun dihen mwuhro,” me met wia ngehn emen me ketikihda komour.​—1 Kor. 15:45.

13. Dahme “Adam en keieun dihen mwuhro” pahn ketin wiahiong me melahr akan?

¹³ Ahnsou keren, “Adam en keieun dihen mwuhro” pahn ketikihong kadaudoken Adam kan mour soutuk. Met pahn iangahki pali laud en irail kan me mehla mahso. Irail pahn iasadahng mour nin sampah.​—Sohn 5:28, 29.

14. Ia duwen aramas akan ar pahn kak pitsang irair en soh unsek?

¹⁴ Ia duwen aramas akan ar pahn kak pitsang irair en soh unsek? Siohwa ketin wiahda wehi ehu nanleng pwehn kapwaiada met. Sises oh irail meh 144,000 ko me pilipilda sang sampah iei me pahn kaunda wehi wet. (Wadek Kaudiahl 3:21.) Pwehki 144,000 ko wia aramas soh unsek kei mahs, re pahn kak wehwehki aramas akan me re pahn kaunda. Erein sounpar 1,000, Sises oh irail ko me pahn iang ih kaunda pahn sewese aramas akan ren unsekla.​—Kaud. 20:6.

15, 16. (a) Ia wehwehn “imwintihti . . . keieu mwuhr, iei mehla”? Iahd me e pahn lohdi? (b) Nin duwen me 1 Korint 15:28 kasalehda, dahme Sises pahn ketin wia ni ahnsou kohkohdo?

¹⁵ Ni imwilahn sounpar kido, aramas peik kan pahn saledeksang dihp oh mehla. Pohl kawehwehda: “Pwe duwen aramas koaros ar kin mehkihla ar miniminiong Adam, ih duwen koaros pahn iasadahng mour pwehki ar miniminiong Krais. Ahpw emenemen ni kaikairekdo wet: Krais mahs, a mwuhr, sapwellime kan, ni ahnsou me e pahn ketin pwarodo. Mwurin met, imwin sampah ahpw pahn wiawi [“imwio,” NW]; Krais pahn ketin powehdi kaun akan koaros, me lapalap oh manaman akan, oh ketikihong Koht Sahm sapwellime Wehi. Pwe Krais pahn ketin kakaun, Koht lao pahn ketin kalowehdi sapwellime imwintihti  kan oh ketikihdiong pahn aluweluwe kan. Oh imwintihti me pahn lohdi keieu mwuhr, iei mehla.” (1 Kor. 15:22-26) Mwuhr, mehla me aramas sohsohkihdi sang Adam pahn solahr mie. “Depwek en pahtou” me pwaindi aramas akan pahn sohrala kohkohlahte.​—Ais. 25:7, 8.

¹⁶ Pohl doula nda: “Mehkoaros lao pahn lohdiong pahn manaman en Krais, iei ahnsou me pein Krais pahn ketin uhpahiong Koht me ketikihdiong mehkoaros pah. Eri, Koht ahpw pahn ketin kakaun mehkoaruhsie.” (1 Kor. 15:28) Kahrepeo me Sises ketin wia kaun emen pahn imwisekla. Eri e pahn perenki kapwurehiong Siohwa manaman me e ahneki oh patohwanohng Siohwa aramas akan me unseklahr.

17. Dahme pahn wiawihong Sehdan?

¹⁷ Dahme pahn wiawihong Sehdan, me pwukoahki nsensuwed koaros me aramas akan ahneki? Kitail diar pasapengpe nan Kaudiahl 20:7-15. Ni imwin pahr kido, Sehdan pahn ale mweimwei en song pitih aramas unsek kan ni kaimwiseklahn kasongosong. Mwuhr, Sehdan oh koaros me pilada en idawehn ih pahn sohrala kohkohlahte. Met iei “keriaun mehla.” (Kaud. 21:8) Mehla wet sohte pahn “lohdi” pwehki irail kan me mehla ni “keriaun mehla” sohte pahn pwurehng mourda. Ma kitail lelepek ong Siohwa, kitail sohte anahne pwunodki me “keriaun mehla” wet kak lelohng kitail.

18. Ia duwen pwukoa me Koht ketikihong Adam eh pahn pweida?

¹⁸ Aramas koaros pahn unsekla oh Siohwa pahn ketin kupwurkin irail oh ketikihong irail mour soutuk. Imwintihti koaros me kin kauwehla nsenamwahu en aramas pahn sohrala. Pwukoa me Koht ketikihong Adam pahn pweida mehnda Adam eh solahr mie. Kadaudoke kan pahn perenki arail apwalih sampah oh pil mahn akan. Kitail kak uhdahn perenki me ahnsou keren, Siohwa pahn ketin kalowehdi imwintihti me keieu mwuhr, me iei mehla.