1, 2. Ia duwen Koht eh ketin kupwurki sapwellime aramas akan, me pwulopwul oh me mah, en kaudokiong ih?

 KOWE emen me pwulopwul? Ma ei, ke kak kamehlele me ke wia emen me kesempwal nan sapwellimen Siohwa mwomwohdiso nan sampah pwon. Nan sahpw tohto, tohto en irail kan me kin papidaisla iei me pwulopwul kan. E uhdahn wia kangoang laud en kilang me pwulopwul tohto pilada en papah Siohwa.

² Nin duwen emen me pwulopwul, ke kin perenki iang meteikan me uwe iuk? Ele ke kin. Kitail kin perenki iang kompoakpatail kan. Ahpw Siohwa kin ketin kupwurki kitail en iangete riatail kan koaros kaudokiong ih. E kin ketin kupwurki sapwellime aramas akan en miniminpene, sohte lipilipil arail sounpar de mwomwen arail tikida. Wahnpoaron Pohl ntingihedi me kupwuren Koht iei me “aramas koaros en ale komourparail oh marainkihla me mehlel.” (1 Tim. 2:3, 4) Oh Kaudiahl 7:9 kawehwehda me irail kan me kaudokiong Koht kin kohsang nan “wehi koaros, ni kadaudok koaros, nan sahpw koaros, oh lokaia koaros.”

3, 4. (a) Soangen madamadau dah me me pwulopwul tohto rahnwet kin ahneki? (b) Nan Episos 4:25, dahme Pohl karasahkihong mwomwohdiso?

³ Mie wekpeseng laud nanpwungen me pwulopwul kan me kin papah Siohwa oh irail kan me sohte kin. Me tohto me sohte kin papah  Siohwa kin nsenohkihte pein irail oh dahme re mwahuki. Ni mehlel, ekei me kin wia roporop koasoia me me pwulopwul kan rahnwet kin medemedewehte pein irail laudsang mahs. Mwomwen arail koasoi oh arail likou kasalehda me re sohte kin wauneki meteikan, ahpw keieu me mah kan.

⁴ Soangen madamadau wet mie wasa koaros, kahrehda kitail anahne uhdahn nantihong pwe kitail en soikala met oh kaperenda Siohwa. Pil ni mwehin wahnpoaron ko, Pohl kalekehkin Kristian kan duwen soangen madamadauohte. E kin kahdaneki met “[“elen madamadau,” NW] me kin kamwakamwakid oh kakaun irail kan me kin uhwong Koht.” (Wadek Episos 2:1-3.) E kaperen en kilang nan mwomwohdiso me me pwulopwul kan sohte duwehte met. Re men iang riarail Kristian kan papah Siohwa. Re wehwehki me mwomwohdiso kin rasehng paliwar ehu me kakon tohto mie me kin doadoahkpene. Duwehte dahme Pohl ntingihdi, “kitail koaros wia kisehn paliwarteieu.” (Ep. 4:25) E pahn pil uhdahn kesempwal en miniminiong riatail Kristian kan ni atail kerekerenlahng imwin ahn Sehdan sampah. Mehn kahlemeng pwukat en nan Paipel me kitail pahn koasoiapene pahn sewese kitail en kilang dahme kahrehda kitail anahne ehupene de miniminpene.

5, 6. Dahme kitail sukuhlkihsang Lohd oh eh peneineio?

⁵ Mahso, sapwellimen Siohwa aramas akan kin mihla pahn irair kei me uhdahn keper. Siohwa ketin pere irail ni arail kin miniminpene oh sewese emenemen. Kitail koaros, me pwulopwul oh me mah, kak sukuhlkihsang mehn kahlemeng pwukat sang nan Paipel. Kitail kilang dahme wiawihong Lohd.

⁶ Lohd oh eh peneinei mihla nan keper. Siohwa pahn ketin kasohrehla kahnimw en Sodom, wasa me re kin kousoan ie. E ketin poaronehdo tohnleng kei en padahkihong Lohd en mweselsang kahnimwo oh tang kohdahla nan nahna ko. Re ndaiong: “Tang, pwe ke en mourla!” (Sen. 19:12-22) Lohd oh nah serepein riemeno peikiong kaweid ko. Ahpw e kansensuwed me meteikan nan ahn Lohd peneineio sohte wia met. Ni Lohd eh padahkihong ohl ako me pahn pwoudiki nah serepein ko me re anahne mweselda, ira wiahki ih ohl mah men me wie “kamwakamwanohng ira.” Ira sohte kamehlele ih, eri ira iang mehla ni ahnsou me kahnimwo ohla. (Sen. 19:14) Lohd oh nah serepein riemeno kelehpw me pitla pwehki re peik oh kin ehupene.

7. Ia duwen Siohwa eh ketin sewese pwihn en aramas ako me kasalehda miniminpene nanpwungarail ni arail mweselsang Isip?

⁷ Kitail pil kak sukuhlkihsang mehn kahlemeng en mehn Israel ko ni ahnsou me re mweselsang Isip. Re sohte kohpeseng wiahla kisin pwihn kei, me ehuehu pwihn kin pein pilada arail ahl en kohla nan Sapwen Inowo. Ahpw, re kin seiloak nin duwen pwihn ehu me miniminpene. Oh ni ahnsou me Siohwa ketin pwalangpeseng Sehd Weitahtaho, kaidehn Moses kelehpw de ih oh ekeite mehn Israel ko me kotehla sehdo. Wehio pwon iang Moses, oh Siohwa ketin pere irail. (Eks. 14:21, 22, 29, 30) Pil me tohto me kaidehn mehn Israel pilada en papah Siohwa oh iang irail mweselsang Isip. Irail koaros kin ehupene. (Eks. 12:38) E pahn mwomwen pweipwei ma pwihn tikitik ehu, ele me pwulopwul kei, en pein wia arail, kohla ni ahl ehu me re leme me mwahu. Emen me wiewia pein ah sohte pahn ale perepe sang Siohwa.—1 Kor. 10:1.

8. Ni mwehin Seosopat, ia duwen sapwellimen Koht aramas akan ar miniminpene?

⁸ Ni mwehin Nanmwarki Seosopat, pwihn en karis laud kehlail ehu kohkohdohng pwehn peiong sapwellimen Koht aramas akan. (2 Kron. 20:1, 2) Dahme mehn Israel kan wia ni ahnsou me imwintihti kamasepwehko kapilirailpene? Re likih Siohwa oh kapakapki sapwellime kaweid. (Wadek 2 Kronikel 20:3, 4.) Sohte mehn Israel men me kelehpwla oh pein song en rapahki kamwahupen eh kahpwalo, ahpw irail koaros kin miniminpene. Paipel mahsanih: “Ohl en Suda koaros, iangahki ar pwoud kan, oh neirail  seri kan, iang uh wasao ni Tehnpas Sarawio.” (2 Kron. 20:13) Tohn wehio pwon, me pwulopwul oh me mah, likih Siohwa oh kapwaiada dahme re rong. Re miniminpene oh Siohwa ketin pere irail sang arail imwintihti kan. (2 Kron. 20:20-27) Met wia mehn kahlemeng mwahu ehu ong ia duwen sapwellimen Koht aramas akan ar kak pelianda uhwong kan nin duwen pwihn ehu.

9. Dahme kitail kak sukuhlkihsang tepin Kristian ko?

⁹ Ni mwehin wahnpoaron ko, Kristian kan kin miniminpene ni popohl oh kaudokiong Siohwa. Karasepe, ni mehn Suhs tohto oh pil mehn liki kan ar wiahla Kristian kei, irail koaros kin idawehn padahk ehute. Re kin ehupene, mwengepene, oh wiahki ehu kapakap. (Wiewia 2:42) Oh ni ahnsou me Kristian kan kin mihla pahn kalokolok, re kin kolokolte arail miniminpene. Ih ahnsowo me re kin keieu anahne emenemen. (Wiewia 4:23, 24) Ni atail kin lelohng kalokolok, kitail pil anahne miniminpene oh sewese emenemen.

10. Iahd me kitail pahn anahne keieu miniminpene?

¹⁰ Ahnsou uhdahn keren, kitail pahn lelohng ahnsou ehu me keieu apwal nan poadopoad en aramas. Soukohp Soel kawehwehda me “rahno pahn rotorot oh kansensuwed.” (Soel 2:1, 2; Sep. 1:14) Ni ahnsowo, sapwellimen Koht aramas akan pahn anahne miniminpene laudsang mahs. Tamanda sapwellimen Sises mahsen: “Wehi ehu me towe kan pahn uhpene oh peipene nanpwungahr, sohte pahn mour werei.”​—Mad. 12:25.

11. Dahme sapwellimen Koht aramas akan kak sukuhlki sang Melkahka 122:3, 4 me pid miniminpene? (Menlau kilang tepin kilel.)

¹¹ Ia uwen atail pahn anahne ehupene? Kitail kak sukuhlki mehn kasukuhl ehu sang mwomwen ihmw kan ar kin kokouda nan Serusalem en mahs. Ihmw pwukat kin kokouda uhdahn kerenpene kahrehda sounmelkahkao nda me kahnimwo “patpene wiahla ehu.” Aramas ako sohte kin perki mehkot pwehki re mihpene keren oh kak sewese oh pere emenemen. Kerenpene en ihmw pwukat ele pil katamankihong sounmelkahkao duwen kadaudok kan en Israel arail kin patpene nin duwen wehi ehu pwe ren kaudokiong Siohwa. (Wadek Melkahka 122:3, 4. *) Rahnpwukat oh pil rahn apwal akan me pahn kohdo, e uhdahn kesempwal me sapwellimen Siohwa aramas akan en “patpene wiahla ehu.”

12. Dahme pahn sewese kitail en pitla ni ahnsou me Kok pahn uhwongada sapwellimen Siohwa aramas akan?

¹² Dahme kahrehda atail miniminpene pahn uhdahn kesempwal ni ahnsou kohkohdo? Esekiel irelaud 38 kohpada me “Kok . . . nan sapwen Makok” pahn uhwongada sapwellimen Siohwa aramas akan. Met kaidehn ahnsou ehu me kitail en mweidohng mehkot en katohrekitailpeseng. E pil pahn uhdahn sapwung en medewe me ahn Sehdan sampah pahn pere kitail. Ahpw kitail pahn anahne ehuong riatail Kristian kan. Mehlel, kitail sohte pahn pitla ihte pwehki kitail iang kisehn pwihn ehu. Pein kitail anahne likih Siohwa oh peikiong ih. Eri Siohwa oh Sises pahn ketin kapitkitailla sang uhwong wet oh ketiki kitaillahng nan sampah kapwo. (Soel 2:32; Mad. 28:20) Ahpw kitail pil anahne miniminiongete sapwellimen Siohwa aramas akan. Ia duwe, ke medewe me Siohwa pahn ketin doarehla irail kan me pein wiewia arail?​—Maika 2:12.

13. Mehn kasukuhl dah kan me me pwulopwul kan kak sukuhlkihsang mehn kahlemeng kan me kitail koasoiapenehr?

¹³ Ma kowe emen me pwulopwul, ke kak kilang ia uwen e wia elen loalokong en mihmihte karanih riomw Kristian kan? Pelianda omw ineng en werekiongete irail kan me uwe iuk de ineng en kadohwanuhkasang aramas akan. Ahnsou keren, kitail koaros me pwulopwul oh  mah kan, pahn anahne emenemen laudsang mahs. Kakehlakahda omw nanpwungmwahu rehn riomw Kristian kan met oh perenki omw iang irail papah Siohwa. Ni ahnsou kohkohdo, omw miniminiong sapwellimen Siohwa aramas akan pahn doareiukala!

14, 15. (a) Dahme kahrehda Siohwa ketin kaiakaiahne kitail en miniminpene? (b) Iren kaweid dahieu me Siohwa ketikihong kitail pwe kitail en kak miniminpene?

¹⁴ Siohwa ketin sewese kitail en miniminpene oh papah ih. (Pil. 1:27; Sep. 3:8) E kin ketin kaiahne kitail ong ahnsou kohkohdo, ni ahnsou me e pahn “ketikipene soahng koaruhsie nanleng oh sampah pahn tahpwteieu, iei pahn Krais.” (Wadek Episos 1:9, 10.) Kupwuren Siohwa iei en ketin kaminiminpene koaros nanleng oh sampah pwe ren wiahla peneinei ehu me pahn kaudokiong ih. Siohwa pahn uhdahn ketin kapwaiada met. Me pwulopwul kan, kumwail kak iang wia kisehn peneinei wet kohkohlahte. Ia duwe, kumwail men iang miniminiong sapwellimen Siohwa pwihn?

¹⁵ Siohwa ketin kaiakaiahne kitail en miniminpene met pwe kitail en kak kousoanpene ni meleilei nan sampah kapwo. Ni kanengamah, e kin ketin padahkihong kitail en “nsenohteieu ong ni sawaspene,” “limpoakpene,” kamweitala emenemen, oh “kakehlakahda emenemen.” (1 Kor. 12:25; Rom 12:10; 1 Des. 4:18; 5:11) Siohwa ketin mwahngih me pwehki kitail soh unsek, ekei pak e sohte kin mengei en miniminpene. Ihme kahrehda e ketin mahsanihong kitail en pousehlahte “mahkpene” nanpwungatail.​—Ep. 4:32.

16, 17. (a) Ia ehu kahrepen atail mihting kan? (b) Dahme me pwulopwul kan kak sukuhlki sang sapwellimen Sises mehn kahlemeng?

¹⁶ Pil ehu ahl me Siohwa kin ketin sewese kitail en sukuhlki en ehupene iei sang ni eh ketikihong kitail mihting kan. Ipru 10:24, 25 kin katamankihong kitail me ehu kahrepen atail kin tuhpene iei en kangoange emenemen en wia me mwahu. Oh kitail pahn anahne atail mihting kan laudsang mahs ni atail kerenlahng rahnen Siohwa.

¹⁷ Sises ketin wia mehn kahlemeng mwahu ong kitail pwehki e ketin perenki iang sapwellimen Siohwa aramas akan tuhpene. Ni eh sounpar 12, e ketin iang eh pahpa nohno towehda mihting tohrohr laud ehu ni tehnpas sarawio. Ehu pak, eh pahpa nohno rapahki ih ahpw sohte kak diar. Ia duwe, e samwalahr pwehn iang me pwulopwul teiko? Soh. Ni eh pahpa nohno diarada ih, Sises wie ketiket rehn sounpadahk ko nan tehnpas sarawio koasokoasoia duwen Pwuhk Sarawi.​—Luk 2:45-47.

18. Ia duwen atail kapakap eh kak kakehlaka atail miniminpene?

 ¹⁸ Kitail pil kak kakehlakahda atail miniminpene sang ni atail kapakapki riatail kan oh peki rehn Siohwa en ketin sewese irail ni ahl me konehng arail irairo. Atail kapakapki riatail kan pahn katamankihong kitail ia uwen atail kin nsenohkin irail. E kesempwal en poakohng riatail Kristian kan, kangoange irail ni atail mihting kan, oh kapakapkin irail. Me pwulopwul kan, kumwail songehr wia soahng pwukat pwe kumwail en kak wia kompoakepah mwahu kei nan amwail mwomwohdiso? Pwehn pitila ni ahnsou me imwio pahn leledo, kitail pahn anahne karanih riatail Kristian kan, a kaidehn ahn Sehdan sampah.

19-21. (a) Dahme kitail kin mwekidki en wia pwehki “kitail wia warteieu”? Menlau kihda karasaras kan. (b) Dahme ke sukuhlki sang mwomwen riatail kan ar sewese emenemen erein kahpwal kan wiawi?

¹⁹ Mehn kahlemeng tohto kasalehda me sapwellimen Siohwa aramas akan rahnwet “wia warteieu.” (Rom 12:5) Ni kahpwal kan, duwehte rerrer en sahpw de melimel ape, ar kahrehiong riatail kan nan lokolok, kitail kin poakehla oh men sewese irail. Nan December en pahr 2011, melimel ehu lel dekehn Mindanao nan Philippine. Erein pwohng ehute, daulih ihmw pahnen (40,000) ohkihla lapake, iangahki imwen riatail Kristian tohto. Ohpis en Sounkadehdehn Siohwa kan ripohtki me mwohn pwihn en sawas kan en sahpwo lella wasao, “riatail Kristian kan sang wasa teikan kadkadaralahr arail sawas.”

²⁰ Nan Sapan, riatail Kristian kan mihla nan kahpwal laud ni lapalahn rerrer en sahpw oh iloak laud ehu lel pali mese en sahpwo. Me tohto sohla arail mehkot. Karasepe, solahr imwen Yoshiko. E kin kousoan mpen mwail 25 dohsang Wasahn Kaudok. E nda: “Mwuhr, se pwuriamweikihla ni at diarada me rahnohte mwurin rerrer en sahpwo wiawi, sounapwalih me kin seiloako oh pil emen brother kohdo pwehn rapahki kiht.” Yoshiko sirei ni eh doula koasoia: “Se inenen kalahnganki en mwomwohdiso eh apwalihala laud at anahn akan ong kaudok. Pil patehng met, se alehdi sekid kan, suht kan, ehd kan, oh likoun meir kan.” Emen kisehn irail kan me kohdohng sawas koasoia: “Riatail kan sang wasa koaros nan Sapan kin ehupene nin duwen pwihn ehu oh sewese emenemen. Pil riatail kan sang wasa doh nan Amerika pil kohdohng sawas. Ni meteikan ar idek rehrail dahme kahrehda re kohdo sang wasa doh pwe ren sawas, re nda: ‘Se kin miniminiong riat kan nan Sapan oh re anahne at sawas.’” Ia duwe, ke kin pohlki omw iang kisehn pwihn ehu me towe kan kin uhdahn poakohng emenemen? Medewehla ia uwen soangen miniminpene wet eh kin kaperenda Siohwa!

²¹ Ma kitail sukuhlki ahnsou wet ia duwen atail pahn kin koapworopworki emenemen, kitail pahn ehupene ni atail onopadahng irair apwal akan me pahn kohdo. Mehnda ma kitail pil sohla kapehse rehn riatail Kristian kan nan sahpw teikan, kitail pahn kolokolte atail miniminiong riatail kan nan atail wasao. Emen sister sang Sapan me adaneki Fumiko, me pitsang melimel ehu, koasoia: “Imwio uhdahn kerendo. Kitail anahne pousehlahte sewese riatail Kristian kan ni atail kasikasik ahnsowo me kahpwal kan solahr pahn mie.”

22. Ia duwen atail miniminpene eh kak sewese kitail ni ahnsou kohkohdo?

²² Kaunopada met ong rahnen Siohwa sang ni omw kin wiewia uwen omw kak en miniminiong riomw Kristian kan. Ni ahn Sehdan sampah eh pahn sohrala, Siohwa pahn ketin kapitala sapwellime aramas akan duwehte me e ketin wia mahso. (Ais. 52:9, 10) Mehnda ma ke pwulopwul de mah, ke anahne kolokolte omw miniminiong sapwellimen Koht aramas akan pwe ken poadoandoarla. Nan iren onop en mwuhr, kitail pahn koasoiapene dahme kahrehda kitail pil anahne kalahnganki dahme kitail alehdier.