OARALAP | KE KAK KARANIHALA KOHT
Ke Pehm me Ke Kin Karanih Koht?
“Ahneki nanpwungmwahu keren rehn Koht kin kahrehiong uhk en nsenamwahu, meleilei, oh sohte perki mehkot. Ke kin pehm me Koht kin ahnsou koaros ketin apwahpwalihkinuhk dahme keieu mwahu.”—CHRISTOPHER, MWAHNAKAPW EMEN NAN GHANA.
“Koht ketin mwahngih omw pepehm en sohla koapworopwor oh nsensuwed pwon, e kin ketin poakohng oh nsenohkin uhk laudsang me ke kak kasik.”—HANNAH, SOUNPAR 13, ALASKA, WEHIN AMERIKA.
“En ese me ke ahneki nanpwungmwahu keren rehn Koht wia pepehm ehu me keieu kesempwal oh kin kameleileidi loalomw!”—GINA, LIHEN JAMAICA MEN ME SOUNPAR 40 SAMWA.
Kaidehn Christopher, Hannah, oh Gina kelehpw me ahneki soangen pepehm wet. Aramas tohto nin sampah kin kamehlele me Koht kin ketin wiahkin irail kompoakepah. Ia duwen kowe? Ke kin pehm me ke ahneki nanpwungmwahu keren rehn Koht? De ke men karanih de uhdahn karanihala ih? Ele ke medewe: ‘Ia duwe, aramas emen kak ahneki nanpwungmwahu keren rehn Koht Wasa Lapalahpie? Ma ei, ia duwen?’
KITAIL KAK KARANIHALA KOHT
Nin duwen me Paipel kasalehda, kitail kak ahneki nanpwungmwahu keren rehn Koht. Paipel mahsanih me Koht ketin kahdaneki semen mehn Israel ko, Eipraam, “kompoakepahi.” (Aiseia 41:8) Pil tehk duwen luhk me kohwong kitail nan Seims 4:8: “Keido mpen Koht, oh e pahn ketin keiong mpamwail.” Eri, e sansal me kitail kak ahneki nanpwungmwahu keren de kompoakepahnki Koht. Ahpw pwehki kitail sohte kak kilang ih, ia duwen atail kak ‘keila mpen Koht’ oh ahneki nanpwungmwahu reh?
Pwehn sapengala peidek wet, medewehla dahme kin wiawi ni ahnsou me emen kin kompoakepahnkihla emen. Ira kin tepidahte esehla eden emenemen. Mwuhr, ni ara kin kaukaule koasoakoasoipene, ehukihpene ara madamadau oh pepehm, ara nanpwungmwahu kin kekeirda. Oh ni ara kin nantihong wia soahng mwahu kan ong emenemen, ara nanpwungmwahu kin kehlailla. Met kak duwehte atail en kakairada atail nanpwungmwahu keren rehn Koht. Kitail pahn kilang ia duwen met eh kak wiawi.
