Janet nda: “Sohte pwand mwurin ei pahpao mehla, ei pwoudo ndaiong ie me e mwahukihda emen lih tohrohr. Mwurinte mwo, ni eh sohte pil katamankin kiht de kamwurkihtla, e rikida eh likou ko oh kohkohlahsang ie oh nait seri riemeno.” Janet diarada doadoahk ehu, ahpw pweineo sohte itar pwehn kolokolte imwarailo. Oh e pil lelohng soahng kan me laudsang ihte pwunod en mwohni. E nda: “Kapwunod laud en uhd kelehpwiki wia pwukoa kan koaros inenen laud. I suwedki me I sohte kak apwalih nei seri kan duwehte pahpa nohno teikan kin wia. Oh pil met, I pwunodki ia duwen meteikan ar kin medewehkin ie oh nei seri kan. Re kin medewe ma I kin wia uwen ei kak en kolokol ei mouren pwopwoud?”

Kapakap kin sewese Janet en powehdi eh pepehm kan oh kakairada eh nanpwungmwahu rehn Koht. E nda: “Ni pwong kan me keieu apwal, ahnsou me soahng koaros kin meleileidi oh I sohte kak uhdihsang ei medemedewe ei pwunod kan. Kapakap oh wadek Paipel kin sewese ie en meirla. Ehu iren Paipel me I kin perenki iei Pilipai 4:6, 7: ‘Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam.’ Nipwong tohto I kin kapakap oh pehm sapwellimen Siohwa popohl eh kin kansenamwahwihiehla.”

Sapwellimen Sises mahsen en kangoang nan sapwellime Kapahrek en Pohn Dohl me pid kapakap kin kadoadoahk ong soangen pwunod koaros: “Samamwail, . . . ketin mwahngih dahme konehng kumwail mwohn amwail saikinte kin peki mehkot.” (Madiu 6:8) Oh kitail anahne patohwan peki reh. Kapakap iei ahl me kitail keieu kak ‘keiong mpen Koht.’ Ia imwilahn atail wia met? ‘E pahn ketin keiong mpatail.’​—Seims 4:8.

Ei, kapakap wia laudsang ihte kansenamwahwihkitailla pwehki atail kasalehda atail pwunod. Siohwa, me kin “ketin sapeng pekipek kan,” kin pil ketin sewese koaros me kin rapahki ih ni pwoson. (Melkahka 65:2) Ihme kahrehda Sises ketin padahkihong sapwellime  tohnpadahk kan ren “poaden kapakap oh dehr tokedihsang.” (Luk 18:1) Kitail anahne doulahte peki sapwellimen Koht kaweid oh sawas oh uhdahn koapworopworki me e pahn ketin katingih atail pwoson. Kitail en dehr peikasalki ma e kin kupwurki de pil kak ketin kapwaiada. En ‘poadidiong kapakap ahnsou koaros’ ni ahl wet kin kasalehda me kitail ahneki pwoson mehlel.​—1 Deselonika 5:17.

Ahpw ia uhdahn wehwehn pwoson? Pwoson kin pidada ‘esehla’ Koht. (Sohn 17:3) Kitail kin wia met sang atail kin medemedewe laud sapwellimen Siohwa madamadau kan nan Paipel. Kitail sukuhlki me e kin ketin mwahngih emenemen kitail oh kupwurki sewese kitail. Ahpw, pwoson mehlel kin pidada laudsang en ihte esehla mehkot duwen Koht. E pil kin wehwehki en ahneki nanpwungmwahu ehu reh me kasalehda wahu. Duwehte atail kin kompoakepahnki emen, kitail sohte kak mwadangete wiahda soangen nanpwungmwahu wet. Atail pwoson “pahn keirda” ekisekis ni atail kalaudehla atail sukuhlki duwen ih, “wiewia mehkan me e kin ketin kupwurperenki,” oh ni atail paiekihda sapwellime sawas. (2 Korint 10:15; Sohn 8:29) Ih soangen pwoson wet me sewese Janet en powehdi eh kapwunod kan.

Janet nda: “Dahme uhdahn sewese kalaudehla ei pwoson iei sang ni ei kilang Siohwa eh kin ketin sewese ie sangete ahnsowo lel met. Pak tohto se kin lelohng wiewia sapahrek kan me mwomwen apwal en powehdi. Pwehki ei kin kalapw kapakap, Siohwa kin ketin ahnsou koaros wiahda ahl ehu ong kiht me I sohte kak pein medewehda. Ni ei kin kalahngan ong ih, met kin kataman ong ie uwen laud me e ketin wiadahr ong ie. E kin ahnsou koaros ketin sewese kiht ni ahnsou kan me konehng, kalapw mwohnte kahpwalo pahn wiawi. Oh e ketikihong ie kompoakepahi mehlel kan me wia Kristian mehlel kei. Re kin ahnsou koaros sewese ie oh wia mehn kahlemeng mwahu ong nei seri kan.” *

“I ese dahme kahrehda Siohwa ketin mahsanih nan Malakai 2:16: ‘I kin kalahdeki mweipeseng en pwopwoud!’ Ong emen me kin loalopwoat, mwekid en soaloalopwoat wet iei me keieu laud. Sounpar kei dower powe mwurin ei pwoudo kohkohla, ahpw mie ahnsou kan me I kin ahnekihte pepehm en kelekelehpw oh sohte katepei. Ahnsou me met kin wiawi, I kin song en wia mehkot pwehn sewese emen, oh met pil kin ahnsou koaros sewese ie.” Eri sang eh doadoahngki kaweid en Paipel pwehn dehr kin kelekelehpw, Janet kin katikala eh pwunod. *​—Lepin Padahk 18:1.

Janet nda: “Dahme kin keieu kansenamwahwihehla iei ei ese me Koht me ‘kin ketin apwalih me sepwoupwou kan oh ketin sinsile liohdi kan.’ E sohte pahn ketin keseikihtla duwehte me ei pwoudo wiahiong kiht.” (Melkahka 68:5) Janet ese me Koht sohte kin ketin kasongekin kitail “me suwed kot.” Ahpw, e kin ketikihong kitail erpit pwehki e kin “kupwursapan oh kalahngan ong aramas koaruhsie,” oh pil kin ketikihong kitail “manaman lapalap” pwehn sewese kitail en powehdi atail pwunod kan.​—Seims 1:5, 13; 2 Korint 4:7.

Ahpw ia duwen ma kitail pwunod pwehki atail mour mihla nan keper?