OARALAP | IHS SOUNKADEHDEHN SIOHWA KAN?
Dahme Sounkadehdehn Siohwa kan Kin Kamehlele?
Sounkadehdehn Siohwa kan kin kamehlele me “audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo.” (2 Timoty 3:16) Se kin doadoahngki Paipel nin duwen mehn kaweid mwahu ehu pwehn sukuhlki duwen Sounkapikadao oh en ahneki mour me mie katepe.
Paipel mahsanih: “Re en esehla me komwihte me KAUN-O, kaun lapalap en mehkoaros nin sampah.” (Melkahka 83:18) * Eri, nin duwen sapwellimen Siohwa sounkadehde kan, se kin kaudokiong ih kelehpw oh nantihong en kadehdehda mwareo.—Aiseia 43:10-12.
Nin duwen Kristian kei, se kamehlele me Sises, me iei “Sapwellimen Koht,” * ketidihdo nin sampah oh wiahla Mesaiao. (Sohn 1:34, 41; 4:25, 26) Mwurin eh pwoula, Sises ketin iasadahng nanleng. (1 Korint 15:3, 4) Mwuhr, e ketin wiahla Nanmwarki en Wehin Koht. (Kaudiahl 11:15) Wehi wet uhdahn koperment ehu me pahn kapwurehdo Paradais nin sampah. (Daniel 2:44) Paipel mahsanih: “Me aktikitik kan pahn sapwenikihla sahpwo [“sampah,” NW] oh re pahn paiamwahu oh popohl.”—Melkahka 37:11, 29.
“Ni arail kin wadek Paipel, re kamehlele me Koht kin ketin mahmahseniong irail. Sohte lipilipil ahnsou kan me kahpwal kin pwarada nan arail mour, re kin doadoahngki Mahsen en Koht oh rapahki ire kan loale me kak sawas. . . . Ong irail, Mahsen en Koht wie momourte.”—Kaun en pelien lamalam en Kadolik Benjamin Cherayath, doaropwehn nuhs Münsterländische Volkszeitung, Sehmen
Sounkadehdehn Siohwa kan kin kamehlele me kaweid kan en Paipel kak wia kamwahu ong aramas pil rahnwet. (Aiseia 48:17, 18) Ihme kahrehda, se kin uhdahn peikiong kaweid pwukat. Karasepe, pwehki Paipel kin kehkehlikihong kitail en soikala wiewia kan me kin kasaminehla atail madamadau oh paliwar, se sohte kin simoak sika de doadoahngki wini en kasahliel kan. (2 Korint 7:1) Se pil kin soikala wiewia kan me uhwong padahk en Paipel, duwehte kamam sakau, tiahk samin me pid wia nsenen pwopwoud oh pirap.—1 Korint 6:9-11.
^ Nan Kawehwehpen Lepin Mahsen kan nan Pwuhk Sarawi ni Mahsen en Pohnpei: “KAUN-O—Nan kawehwe wet lepin mahsen lepet wiliandi Iahweh, mwaren [Koht] ni mahsen en Ipru.”
^ Paipel pil kamwarenki Sises “Sapwellimen Koht Iehros” pwehki iei ih me Koht ketin tepin kapikada oh ih kelehpw me Siohwa ketin pein kapikada.—Sohn 3:18; Kolose 1:13-15.
You May Also Like
ESSENTIAL BIBLE TEACHINGS
Mie Mwaren Koht?
Mie lengileng tohto ong Koht, me duwehte Wasa Lapalahpie, Sounkapikada, oh Kaun. Ahpw pein mwaren Koht kadoadoahk nan Paipel daulih pak 7,000.
