OARALAP
Ihs Sounkadehdehn Siohwa kan?
“I kin ese Mike erein sounpar tohto. Ih emen Sounkadehdehn Siohwa. Ahpw I sohte kin wehwehki eh pelien lamalamo. Ihs Siohwa? Dahme kahrehda Sounkadehde kan sohte kin kasarawi rahn en kasarawi kan? Ia duwe, Mike kin ieiang pwihnen lamalam ehu me me tohto kin medewe me ehusoahng?”—Becky, California, Wehin Amerika.
“Ni ahnsou me mehn mpei ko tepida onop Paipel rehn Sounkadehdehn Siohwa kan, I medewe: ‘Ia wehwehn ahd wet, Sounkadehdehn Siohwa kan? Soangen eden pelien lamalam dahieu me?’”—Zenon, Ontario, Canada.
“Ngehi oh ei pwoudo kin medewe me Sounkadehdehn Siohwa kan kin kohdo reht pwehn kasalehda me se sohte kin iang sarawi. Se pil medewe me ma pelien lamalam laud kan sohte kin kihda dahme se raparapahki, Sounkadehdehn Siohwa kan pil sohte kak.”—Kent, Washington, Wehin Amerika.
“Uhdahn I sehse ihs irail oh pil sehse dahme re kin kamehlele.”—Cecilie, Esbjerg, Denmark.
Ele ke kin kilang irail kalokalohkseli ihmw lel ihmw de wasa teikan, kihkihseli kisin pwuhk kan me poahsoankihda Paipel, oh kin idek rehn aramas akan ma re men onopki Paipel ni soh isepe. Mwein ke ale Kahn Iroir wet sang emen irail. Ahpw ele ke kin medemedewehte uhdahn ihs me Sounkadehdehn Siohwa kan. Mwein omw madamadau pil duwehte madamadau en irail kan me kileldi powe.
Ma ke ahneki iren kalelapek pwukat, ia wasa ke kak diarada pasapeng? Ia duwen omw kak sukuhlki dahme Sounkadehdehn Siohwa kan uhdahn kamehlele, ia wasa re kin kihsang ia mwohni pwehn apwalih arail doadoahk en kalohk oh wasahn kaudok kan, oh dahme kahrehda re kin mwemweitla ni imwen aramas akan de koasoiong aramas akan wasa teikan?
Cecilie, me kileldi mwoweo, nda: “I kin wadek soahng tohto duwen Sounkadehdehn Siohwa kan nan Internet. I kin rong dahme aramas akan ndindahseli oh pil soahng tohto teikan me ekei kin kauwehkin irail. Met kahrehda I ahneki madamadau me uhdahn sapwung duwen Sounkadehdehn Siohwa kan.” Ahpw mwuhr, Cecilie pein koasoiong Sounkadehdehn Siohwa kan oh diarada pasapengpen eh iren kalelapek ko.
Ia duwe, ke men esehda pasapeng pwung ong omw iren kalelapek kan duwen Sounkadehdehn Siohwa kan? Se men kangoange iuk ken kohla rehn Sounkadehdehn Siohwa kan me wiahda pwuhk wet. Irail me pahn keieu ese. (Lepin Padahk 14:15) Se koapworopworki me oaralap kan mwuhr pahn sewese iuk ken wehwehkihla ihs kiht oh dahme se kin kamehlele oh pil wehwehkihla doadoahk me se kin wia.
