Ni ahnsou me Sises ketiket rehn sapwellime wahnpoaron ko nan pereo, e mahsanihong irail: ‘Kumwail koaros pahn keseiehla oh tangasang ie pwohng wet.’ Piter eri nda: ‘Ngehi I sohte pahn! Mehnda ma meteikan koaruhsie pahn tangasang komwi, a ngehi I soh mwahn pahn keseikomwihla.’ Ahpw Sises mahsanihong Piter: ‘Mwohn malek eh pahn kakorot, ke pahn kahmahmki pahn pak silipak me ke sehse ie.’

Ni ahnsou me sounpei ko wahla Sises ni imwen Kaiapaso, pali laud en wahnpoaron ko tangasang Sises. Ahpw meh riemen me ideidawehnte pokono. Emen ira iei Piter. Piter kohlongala nan kelen imwen Kaiapaso oh iang mi limwahn kisinieio. Nan maraino, lidu serepein men kilangada mesen Pitero oh nda: ‘I ese iuk! Ke kin ieiangseli Sises!’

Piter eri sapeng, nda: ‘Soh, I sohte kin! I sohte wehwehki dahme ke ndindahn!’ Ih eri alulahng ni ewen kehlo. Ahpw sohte pwand, pil emen lidu serepein kilangada ih oh ndaiong pokono: ‘Lahp menet kin iangih Sises!’ Piter eri sapeng, nda: ‘I uhdahn sehse ohlo!’ Ohl emen eri nda: ‘Ke kin iang irail! I kak ese pwehki ngoromwen kasalehda me kowe mehn Kalili, duwehte Sises.’ Ahpw Piter kahula oh nda: ‘I sehse ohlo!’

Ni ahnsowohte, malek men pa kakorot. Piter eri kilengla kilangada Sises eh sohpeido oh kangkakil ih. E tamanda sapwellimen Sises mahsen ko, ih eri kohieila likio oh sengiseng laud.

Ni ahnsowohte, tohn Sanedrin, me wehwehki mwoalen kopwung lapalap en mehn Suhs kan ahpw pokonpene pwehn kapeidakih Sises nan imwen Kaiapaso. Irail koasoanehdier me re pahn kemehla Sises, oh met irail raparapahki kahrepe ieu pwe ren kemehla. Ahpw irail sohte kak diarada sapwung ehu me e wiahda. Kaiapas eri idek rehn Sises: ‘Kowe me sapwellimen Koht Ohlo?’ Sises eri sapeng mahsanih: ‘Iei ngehi ih.’ Kaiapas eri nda: ‘Kitail sohte anahne pil ehu mehn kadehde. E lahlahwe!’ Tohn mwoalen kopwungo ahpw pwungkihda oh nda: ‘Ohl menet  warohng kamakamala.’ Irail eri pohr Sises, kendipih, oh perehla mese ko, oh poakih, ndinda: ‘Ma kowe soukohp men, ndaiong kiht ihs me poakih iuk!’

Ni ahnsou me e rahnpeseng, irail wahlahng Sises nan mwoalen kopwung en Sanedrin ko oh pil pwurehng idek reh: ‘Kowe me sapwellimen Koht Ohlo?’ Sises eri sapeng mahsanih: ‘Kumwail me pein ndinda me iei ngehi ih.’ Irail eri nda me e dipada pwehki eh lahlahwe, oh wahlahng nan imwen Pontius Pailet, kepinahn Rom. Dahme wiawi mwurin mwo? Kitail pahn kilang.