Nan Sesaria, mie kaunen sounpei en Rom men me adaneki Kornilius. Mehn Suhs kan kin wauneki, mendahki kaidehn ih mehn Suhs. Ni kadek e kin sewese me semwehmwe kan oh irail kan me anahne sawas. Kornilius kin kamehlele Siohwa oh e kin kaukaule kapakapohng. Ehu rahno, tohnleng men pwarehng Kornilius oh ndaiong: ‘Koht ketin karongeier omw kapakap kan. Eri kadarala ohl ekei nan kahnimw en Sopa, wasa me Piter kin mihmi ie, oh peki en kohdo rehmw.’ Ni ahnsowohte, Kornilius kadarala ohl silimen Sopa me dohki mpen mwail 30 kohlahng palieir.

Erein ahnsowo, nan Sopa, Piter kilangada kasansal ehu. E kilangada mahn akan me mehn Suhs kan sohte mweimwei en kang, oh e rongada ngihl ehu me ndaiong ih en kang. Piter sohte men kang, ih eri nda: ‘Ahpw saikinte pak ehu nan ei mour me I kang mahn samin.’ Ngihlo pil mahsanihong ih: ‘Ke dehr nda me mahn pwukat samin. Koht ketin kamwakeleiraildahr.’ Ngihlo ahpw pwurehng mahsanih: ‘Mie ohl silimen ni omw wenihmwen. Kohla iangirailda.’ Piter eri kohla ni wenihmwo oh idek rehn ohl ako dahme irail kohdohn wia. Irail eri sapeng, nda: ‘Kaunen sounpei en Rom Kornilius me kadarkitodo. E luke iuk en kohla ni imweo nan Sesaria.’ Piter eri kasamwo oh luke ohl ako ren pweidi mahs nan  imweo pwohngo. Mandahn rahno, Piter oh ekei rie Kristian ko iangada ohl ako kohla Sesaria.

Kornilius eri kilangada Piter oh kelepwikihdi. Ahpw Piter ndaiong: ‘Uhda! Ngehi aramas emen me duweiuk. Koht mahsanihong ie en kohdo ni imwomwet, mendahki mehn Suhs kan ar sohte kin kohla ni imwen mehn liki kan. Nna menlau ndaiong ie mahs dahme kahrehda ke ileklahng ie.’

Kornilius ahpw ndaiong Piter: ‘Rahn pahieu samwalahro I wie kapakapohng Koht, oh tohnleng men padahkihong ie en ileklahng uhk ken kohdo. Menlau padahkihong kiht mahsen en Siohwa kan.’ Piter eri nda: ‘Met I wehwehkidahr me Koht sohte kin ketin lipilipilki aramas. E kin kupwurki aramas koaros me kin men kaudokiong ih.’ Piter eri padahkihong irail soahng tohto duwen Sises. Sapwellimen Koht manaman ahpw kohieng Kornilius oh irail kan me iang ih mi mwo, oh irail koaros papidaisla.